Wupulula 6:1-17
-
Mwaasaana Eepucepuche onnahula iseelu soopacerya thanu nammoha (1-17)
-
Mulipa oovootha anwenle kavalo aweela (1, 2)
-
Mulipa oomweeciha kavalo a ekoore ya mooro wi aviihemo murecele veelaponi yavathi (3, 4)
-
Mulipa oomweeciha kavalo ooripa wi aruuhe etala (5, 6)
-
Mulipa oomweeciha kavalo a ecuurwa oniichaniwa Okhwa (7, 8)
-
Yaale yiiphiwe vathi va altare (9-11)
-
Mwaacikinye mutokotoko (12-17)
-
6 Kaamoona Mwaasaana Eepucepuche vaavaa aahunleiye emoha wa iseelu thanu napiili, nave kaahiiwa emoha wa ikumi seihe xexe elocaka ni nsu naalikana ni etari nriki: “Orwe!”
2 Kaamoona kavalo aweela nave yoowo aanwenle aakhalano munra; avahiwa korowa nave akhuma avoothaka wi aakhwaniherye ovootha wawe.
3 Vaavaa owo aahunleiye eseelu yanaawiili, kaahiiwa ekumi yanaawiili elocaka eriki: “Orwe!”
4 Aakhuma kavalo mukina a ekoore ya mooro, nave yoowo aanwenle aavahiwa owerya wa oviihavo murecele veelaponi yavathi wi achu yiiphaneke mukina ni mukhwaawe nave owo aavahiwa nlema ntokweene.
5 Vaavaa owo aahunleiye eseelu yaneeraru kaahiiwa ekumi yaneeraru elocaka eriki: “Orwe!” Kaamoona kavalo ooripa nave yoowo aanwenle aakhalano epalansa mmatani mwawe.
6 Kaahiiwa oruma waalikana ni nsu veeri va ikumi seihe xexe nriki: “Mphimo mmoha wa* tiriku etenaariyu* emoha nave miphimo miraru sa sevata etenaariyu emoha. Muhinanarihe makhurwa ni eviinyu.”
7 Vaavaa owo aahunleiye eseelu yaneexexe, kaahiiwa nsu na ekumi yaneexexe nriki: “Orwe!”
8 Kaamoona kavalo a ecuurwa, nave yoowo aanwenle iichaniwa okhwa. Nave Mahiye* yaanamuchara vakhiviru. Aavahiwa owerya wa makupa aneexexe a elapo yavathi wi iipheno ni nlema noorekama, ni etala, ni epahu yawiipha, vamoha ni axinama awoopiha a veelaponi yavathi.
9 Vaavaa owo aahunleiye eseelu yaneethanu, kaahoona vathi va altare ikumi* sa yaale yiiphiwe nthowa na masu a Muluku ni wa nthowa na onamoona awo yaavanhaaya.
10 Awo yaakhuwela moovuwa eriki: “Ophiyerya liini, Pwiya Oowerya, aweela ni eeparipari, munahaalaanyu woovelela waathoriha yaale amanke veelaponi yavathi ni wunla ikuhu wa nikhami nahu, awo ayenhaaya?”
11 Nave mmoha ti mmoha aavahiwa yoowara yoorekama yaweela, nave yaaleeliwa wi yiichuuwe vakhaani, ophiyerya naakhwanenle nuumuru na akapuro akhwaaya ni asinnaya yaawo yaahaala wiiphiwa hiiha ntoko awo yiiphiwaaya.
12 Kaamoona vaavaa owo aahuleiye eseelu yaneethanu nammoha, nave aaheereya mwaacikinye mutokotoko; nsuwa naaripa ntoko esaakhu ya mapururu,* nave mweeri woothene waathatuwa okhala ntoko nikhami,
13 nave itheneeri sa wirimu saamorela veelaponi yavathi, hiiha ntoko mwiri wa mukuukhu onacikinyiwa ni echeku yawuupa, onamoriha sawiima saya ikithi.
14 Erimu yaaxova ntoko eroolu enuupaanyiwa, nave miyaako soothene ni ivilivili soothene saaviihiwamo mmapuroni mwaya.
15 Voocharela, mamwene a veelaponi yavathi, atokweene, ahooleli a akhoco, achu a muhakhu, achu akuru, akapuro oothene ni achu oothene ootaphuwa, yaahiipitha mmakhukuni ni mmikotini ya mmiyaakoni.
16 Nave yaanatitelela oloca wa miyaako ni miyala, eriki: “Munuuwele nave muniipithihe vamiithoni va Yoole okiraanthe vamunyukhuni ni wa esara ya Mwaasaana Eepucepuche,
17 woona wi noophiya nihiku ntokweene na esara aya, nave taani ani awerye weemela?”
Inoota
^ Naari: “Eliitru emoha ya.”
^ Ekhorowa yo Roma, yeeyo yaaliviwano namuteko olampe nihiku nimoha.
^ Naari: “Hati,” ela tiwi, nipuro achu oothene anavithiwaayawo. Moone Masu Atharihiwe.
^ Mwawooneya nnaahiwa nikhami nnakhaviherya okumi n’yeehiwe vakhiviru va altare. Moone Masu Atharihiwe.
^ Akhweya anaahiwa mapururu naari manri a epuri.
