Yohani 10:1-42
10 “Mweeparipari kinnooleelaani wi yoole ohinavolowa va mulako wa nikhola na ipucepuche, anavira makupa makina, mpava ni mulipa awaakha.
2 Nto yoole onavolowa va mulako ti mukukhula a ipucepuche.
3 Mulipa ooweherya mulako, onnamuhulela yoowo nave ipucepuche sinnawiriyana nsu nawe. Owo onniichana ipucepuche sawe moorweela wa nsina nave onnakumiherya vaate.
4 Amanle okumiha ipucepuche sawe soothene, owo onnaya ohoolo waya, nave iho sinnamuchara woona wi sinnasuwela nsu nawe.
5 Akhala mukina ihimusuwenlaaya, hirwaru imuchara, sinnamuchawa vawi hisuwenle nsu nawe.”
6 Yesu aalonce niphwanaphwaniho nenla wa yaawo, nto awo hiyiiwexenxe yeeyo owo aaleeleiye.
7 Mwawiihiiha, Yesu aaloca wanaawiili: “Mweeparipari kinnooleelaani, miyo ka mulako wa ipucepuche.
8 Oothene yaawo aruule elocaka wi ti miyo, ampava ni alipa awaakha; nyenya ipucepuche hisinaawiriyana yaawo.
9 Miyo ka mulako; oothene onavolowa moorweela wa miyo onamvuluxiwa, onamvolowa ni okhuma nave onamphwanya munyepu.
10 Mpava onarweela pahi wiiya, wiipha ni otoloxa. Miyo kirweenle wi iho ikhaleno okumi, okumi mwawaacaxa.
11 Miyo ka mukukhula aphaama; mukukhula aphaama onnavaha ekumi awe wi avuluxe ipucepuche.
12 Namuteko, yoowo ohiri mukukhula naari ihiri ipucepuche sawe, vaavaa onooneiye mwiici orwaaka, owo onnahiya ipucepuche achawa, nave mwiici onnaphara nave ikina simwalamwala;
13 owo onnachawa nthowa nawi namuteko nave hanapwacha ipucepuche.
14 Miyo ka mukukhula aphaama. Koosuwela ipucepuche saka, nave ipucepuche saka sookisuwela,
15 hiihaa ntoko Atiithi akisuwenlaaya, miyo tho kohaasuwela Atiithi; nave kinnavaha okumi aka wi kivuluxe ipucepuche.
16 “Kookhalano ipucepuche ikina, seiho ihiri sa nikhola nenla; iho tho kinaphwanela oruuha, inarwa iwiriyana nsu naka nave sinamukhala muhuwo mmoha ni mukukhula mmoharu.
17 Ti nthowa nene Atiithi anakisivelaaya, woona wi kinnavaha ekumi aka wi kaakhele wanaawiili.
18 Haavo muchu onakaakha, nyenya kinaveleela mwaneene aka. Kookhalano owerya wa oveleela ni owerya wa waakhela wanaawiili. Kaakhenle malamulo yaala wa Atiithi aka.”
19 Wanaawiili, waakhalavo okawanyeya variyari va Ayuta vanthowa na masu yaala.
20 Ancipale a yaawo yaanaloca eriki: “Owo ookhalano nsololo nave oorweela anepa. Ntakhara heeni munanwiriyanaanyu?”
21 Akina yaani: “Ala tahi masu a muchu orino nsololo. Apwanne nsololo ninnawerya ohula miitho aachu eevaasi?”
22 Mweelukuluku yeele, yaakhalavo Efesta ya Oveleeliwa Empa ya Muluku yeeyo yeeren’ye o Yerusalemu. Yaari mahiku ooriirya,
23 nave Yesu aaneeceeca mu empa ya Muluku, makupa a nipithela na Solomoni.
24 Voocharela, Ayuta yaamurukurerya epacerya oloca ni yoowo eriki: “Ophiyerya liini oneeraawe onihiyeke ni minikwa? Waari Kristu, onleele mookwakwaleya.”
25 Yesu aawaakhula ariki: “Miyaano kohooleelani, nave nlelo hamuneemererya. Miteko seiho kinapharaaka mu nsina na Atiithi aka, sinnakeerela onamoona.
26 Nto nyuwo hamuneemererya, ntakhara hamuri ipucepuche saka.
27 Ipucepuche saka sinniiwa nsu naka, miyaano koosuwela nave iho sinnakichara.
28 Kinnavaha seiho okumi woohimala, iho hirwa itoloxiwa nave haavo oni akaakhe mmatani mwaka.
29 Yeeyo Atiithi akivanhaaya ti yookhweleya opwaha ichu ikina, nave haavo onawerya owaakha Atiithi mmatani mwaya.
30 Miyaano ni Atiithi nri mmoharu.”*
31 Ekwaha yeela tho, Ayuta yaacoca maluku wi emvonyeno.
32 Yesu aahi wa yaawo: “Miyo koowoonihaani miteko sincipale saphaama soorweela wa Atiithi. Miteko taani mwa seiha munakivonyeryaanyu maluku?”
33 Ayuta yaamwaakhula yii: “Hiyaano nnoovonya maluku ohiya wanthowa na miteko saphaama, nyenya nthowa na munyemu; woona wi weyo naamwi ori muchu, oniiseera okhala muluku.”
34 Yesu aawaakhula: “Herempwale Mmalamulo anyu: ‘Muluku oriye: “Nyuwaano mwa amuluku”’?*
35 Nave hiyo noosuwela wi soorepa hasinatorokiwa. Waakhanle wi Muluku onnawiichana yaale anathoriha ni masu awe okhala ntoko ‘amuluku,’
36 apwanne ennaakhwanela ni yeeyo munalocaanyu wa miyo muriki: ‘Weyo onnamunyemula Muluku’ vaavaa kinalocaaka wi miyo ka Mwaana a Muluku, naamwi keelihiwe ni kirummwe mweelaponi ni Atiithi aka?
37 Kaahipharaka miteko sa Atiithi aka, muhikiroromeleke.
38 Nyenya wakhala wi kinneerano, naamwi muhikeemereryaka miyo, mweemererye miteko wi musuwele nave muroromele wi Atiithi ari mwawiiwanana ni miyo nave miyo mwawiiwanana ni Atiithi.”
39 Hiihaa, yaachuna tho omphara, nto owo aakophola.
40 Owo aapwahavo alapuwela o Yortano nipuro nenlo Yohani aapatiseiyewo woopaceryani, akhala weiwo.
41 Ancipale yaaya wa yoowo enaloca eriki: “Naamwi Yohani ahenreno eneneeryo emoharu mano, soothene olonceiye sa mulopwana ola ti seeparipari.”
42 Nave weiwe achu ancipale yaamuroromela.
