Yohani 6:1-71
6 Emanle yeela, Yesu aacimula aya makupa makina a Ephareya yo Kalileya, naari Tiperiyate.
2 Nave muloko* muncipale wa achu waanamuchara, woona wi yaanoona ineneeryo sootikhiniha owo aapakeiye aapenuxaka awiiceliwa.
3 Mwawiihiiha, Yesu aawela omwaako nave akiraathi weiwo ni oohuserya awe.
4 Aanaacamela Paska, efesta ya Ayuta.
5 Vaavaa Yesu aaviihaleiye miitho awe, oona muloko wa achu orwaaka wa yoowo, aamukoha Filipi ariki: “Nnaya okula woowi ipaau wi achu ala elye?”
6 Nto, aalonce yeela wi amweehe, woona wi aanasuwela yeeyo aahaleiye weera.
7 Filipi aamwaakhula ariki: “Ipaau sa itenaariyu masana meeli hasinaakhwana echu naari mano wi muchu ti muchu alye vakhaani.”
8 Mmoha a oohuserya awe, awiichaniwa Antreya yoowo aari munna a Simoni Petru, aaloca ni Yesu ariki:
9 “Vaava ookhalavo mwaammiravo orino ipaau thanu ni asihopa eeli. Nto tiheeni yeela wa achu ancipale?”
10 Yesu aahi: “Mwaaleele achu wi ekiraathe.” Waakhalavo vaavale munyepu; mwawiihiiha, yaakilaathi alopwana echu ya macikhwi mathanu.*
11 Yesu aakuxa ipaau, amanle ovekelela, aahaakawela oothene yaale yaakiranthe vaavale; aaheerano emohamoha ni asihopa nave oothene yaalya ophiyerya yaachunelaayavo.
12 Nto, vaavaa yaavonnaaya, Yesu aaloca wa oohuserya: “Muthukumanye soohalela sene, wi ehikhale eni eyeehiwe.”
13 Mwawiihiiha, moorweela wa ipaau seihe thanu, saathukumanyiwa soohalela seiho achu yooceenlaaya, isareya micanka khumi napiili.
14 Vaavaa achu yoonnaaya yootikhiniha yeela eenreiyeno, yaapacerya oloca: “Ola chiryene mulipa a miririmu yoowo aahaala orwa mweelaponi.”
15 Vaavaa Yesu aasuwenleiye wi yaanarwa wi emphare ni yoolakelela ya omweera mwene, aapwahavo aakookela omwaako meekheiye.
16 Wiilalaayavo, oohuserya awe yaakhuruwela ophareya,
17 nave yaanwela mwaaceya ecimula, enalapuwa ephareya eyaaka o Kafarnawu. Waaripavo nave Yesu nlelo haari ni yaawo.
18 Nave tho, ephareya yaanarweela owali, nthowa nawi yaanoopa echeku yawuupa.
19 Nto, emanle omweeciha mwaaceya echu ya ikilomeeturu thanu naari thanu nammoha,* awo yaamoona Yesu eecaka vasulu va ephareya amwaacamelaka mwaaceya, nave awo yaasareya woova.
20 Nyenya Yesu aahi wa yaawo: “Ti miyaano muhoove!”
21 Mwawiihiiha, awo yaanachuna omwaakhela mmwaaceyani, nave moohilekela mwaaceya aaphiya okhopela weiwo yaayaayawo.
22 Mmeeloni mwaya, muloko wa achu yoowo waari makupa makina a ephareya, waahoona wi vaavale aahanlevo mwaaceya mukhaani nave wi Yesu haawenle mmwaaceyani vamoha ni oohuserya awe, nyenya oohuserya awe ti yaapwanhe mukhataaya.
23 Mwawiihiiha, amwaaceya oorweela o Tiperiyate, yaaphiya waacamela vaavale achu yaalyilaayavo ipaau emanle Apwiya ovekelela.
24 Mwawiihiiha, vaavaa muloko woonnaaya wi naari Yesu, naari oohuserya awe hiyaari vaavale, awo yaakookela mmwaaceyani, eya o Kafarnawu wi yamwaavye Yesu.
25 Vaavaa awo yaamphwannyaaya okhopela wa ephareya, yaamukoha eriki: “Rapi, mphin’ye liini wenno?”
26 Yesu aawaakhula ariki: “Mweeparipari kinnooleelaani, nyuwo munakaavya ohiya nthowa na woona ineneeryo, nyenya nthowa nawi moolya ipaau mvona.
27 Mulapeke, ohiya wa nthowa na yoolya yeeyo enuuca, nyenya wa nthowa na yoolya yeeyo enatitelela okhala ophiyerya wookumini woohimala, yeeyo Mwaana a muchu oneereiye oovaheeni; woona wi Atiithi, Muluku mwaneene, aahela mwa yoowo eseelu aya ya omweemererya.”
28 Mwawiihiiha awo yaamukoha eriki: “Tiheeni nnaphwanelaahu weera wi niphare miteko sa Muluku?”
29 Yesu aawaakhula ariki: “Muteko wa Muluku tuula: Omuroromela yoole omurummeiye.”
30 Voocharela awo yaamukoha: “Eneneeryo taani muneeraanyu mpake, wi noone nave niweemereryeeni? Muteko taani muneeraanyu mpake?
31 Makholo ahu yaalya mana mutakhwani, hiihaa ntoko erempwaaya: ‘Owo aahaavaha epaau yoorweela wirimu wi elye.’”
32 Voocharela Yesu aalocano ariki: “Mweeparipari kinnooleelaani, Mose hoovanheni epaau enarweela wirimu, nyenya Atiithi aka annoovahaani epaau yeeparipari enarweela wirimu.
33 Ntakhara epaau ya Muluku ti yeeyo enakhuruwa wirimu nave enavaha okumi elapo.”
34 Mwawiihiiha awo yaahi wa yoowo: “Pwiya, munivaheke epaau yeeyo mahiku oothene.”
35 Yesu aahi wa yaawo: “Miyaano ka epaau ya ekumi. Yoole onarwa wa miyo harwa avoliwa etala, nave yoole onakiroromela miyo harwa tho akhalano nthanana.
36 Nyenya ntoko kooleenlaakani, nyuwo mookoona nave naamwi hiihaa hamuneemererya.
37 Oothene yoole Atiithi anakivahaaya onnarwa wa miyo, nave miyo nkirwa kimukhooca yoole onarwa wa miyo;
38 woona wi kikhurunwe wirimu, ohiya wi keereno yookhwela aka, nyenya yookhwela ya yoowo okirumme.
39 Yookhwela ya yoowo okirumme ti ela: Wi kihimuyeleele mmoharu mano a oothene yaale owo okivanheiye, nyenya wi kaaviihe mookhwani mu nihiku nookuchula.
40 Woona wi yookhwela ya Atiithi aka ti ela: Wi oothene yoole onamweemererya Mwaana ni omuroromela akhaleno ekumi yoohimala, nave miyo kinarwa kimviiha mookhwani mu nihiku nookuchula.”
41 Voocharela Ayuta yaapacerya omwaapa yoowo nthowa na oloca ariki: “Miyaano ka epaau ekhurunwe wirimu.”
42 Nave awo yaanaloca eriki: “Ola tahi Yesu, mwaana a Yosefe? Hinaasuwenle apapa awe ni amama awe? Vano onaweryeya hai oloca: ‘Miyo kikhurunwe wirimu’?”
43 Yesu aawaakhula ariki: “Mmaale waapa.
44 Haavo muchu onarwa wa miyo Atiithi yaawo akirumme ehikiruuhenle, nave miyo kinarwa kimviiha mookhwani mu nihiku nookuchula.
45 Alipa a miririmu aarepa wi: ‘Oothene awo enarwa ehusihiwa ni Yehova.’ Oothene yoole onaawiriyana Atiithi nave ahuserya onnarwa wa miyo.
46 Tahi wi ookhala owoonne Atiithi, voohikhala yoowo orwiile wa Muluku: Ola oowoona Atiithi.
47 Mweeparipari kinnooleelaani, yoole onaroromela ookhalano ekumi yoohimala.
48 “Miyaano ka epaau ya okumi.
49 Makholo anyu yaalya mana mutakhwani naamwi hiihaa awo aakhwa.
50 Ela epaau enakhuruwa wirimu, wi yoole oni alye ahikhwe.
51 Miyaano ka epaau ekumi, yeeyo ekhurunwe wirimu. Wakhala wi muchu oolya epaau yeela, onamukhala okhala wookhala; chiryene, epaau kinahaalaaka ovaha ti mwiili aka wanthowa na ikumi sa achu.”*
52 Voocharela Ayuta yaapacerya ovaanyihana yaawoyaawo eriki: “Oni oweryeye hai wi mulopwana ola anivahe mwiili awe wi nikhuure?”
53 Mwawiihiiha, Yesu aahi wa yaawo: “Mweeparipari kinnooleelaani, mwaahikhuura mwiili wa Mwaana a muchu ni owurya nikhami nawe, nyuwo himwaano okumi mwa nyuwo meekhiinyu.
54 Yoowo onapaka mwiili aka okhala yoolya awe ni owurya nikhami naka ookhalano ekumi yoohimala, nave miyo kinarwa kimviiha mookhwani mu nihiku nookuchula;
55 vawi mwiili aka yoolya yeeparipari, nave nikhami naka yoowurya yeeparipari.
56 Oothene yoole onapaka mwiili aka okhala yoolya awe ni owurya nikhami naka onnatitelela okhala mwawiiwanana ni mi, nave miyo mwawiiwanana ni yoowo.
57 Hiihaa ntoko Atiithi anakhala, akirummaaya miyo, miyo tho kinnakhala vanthowa na Atiithi, hiihaa tho yoole onakipaka miyo okhala yoolya awe onamukhala wanthowa na mi.
58 Ela epaau yeeyo ekhurunwe wirimu. Ti yoohiyana ni yeeyo makholo anyu yaalyilaaya nave ekhwa. Yoole onapaka epaau yeela okhala yoolya awe onamukhala okhala wookhala.”
59 Owo aalonce ichu seiha vaavaa aahusiheiye mu nipuro na malapelo* o Kafarnawu.
60 Vaavaa yiiwalaaya yeela, ancipale a oohuserya awe yaaloca eriki: “Masu ala toovila weemererya; taani onawerya owiriyana?”
61 Nto Yesu aasuwenleiye wi awo yaanavaanyihana nthowa na yeeyo aalonceiye, aahi wa yaawo: “Apwanne ela ennookwaculihaani?
62 Hanka waakhanle wi moomoona Mwaana a muchu awelaka, akookelaka weiwo aareiyewo khalai?
63 Ti munepa onavaha ekumi; mwiili honaphuriha echu. Masu kooleenlaakaani ari mwawiiwanana ni munepa waweela nave annavaha okumi.
64 Nyenya aakhalavo mwa nyuwo ahineemererya.” Woona wi ovinyerya wuupaceryani, Yesu aanaasuwela yaale yahaahaala omuroromela ni yoole aahaala omveleela.
65 Owo aahaaceererya: “Ti nthowa na yeeyo koolenlaakani kiriki: Haavo onarwa wa miyo yaaheemukhala wi Atiithi aalakelela wi owo arwe.”
66 Vanthowa na yeela oohuserya awe ancipale yaakookela ichu yaahin’yaaya muculi, ehiya weeca ni yoowo.
67 Mwawiihiiha, Yesu aaloca wa oohuserya awe Khumi Napiili ariki: “Apwanne nyuwaano tho munakhwela opwaha?”
68 Simoni Petru aamwaakhula ariki: “Pwiya, nni n’ye wawani? Nyuwaano mookhalano masu a ekumi yoohimala.
69 Hiyaano ninnaroromela nave noosuwela wi nyuwo mwa Aweela a Muluku.”
70 Yesu aawaakhula ii: “Miyo nkoothanlileeni nyuwo khumi napiili? Mmoha a nyuwo mulipa a wootha.”*
71 Mweeparipari, owo aamuloca Yutasi mwaana a Simoni Iskariyoti, woona wi ti yoowo aahaala omveleela naamwi aari mmoha a oohuserya Khumi Napiili.
Inoota
^ Naari: “mucici.”
^ 5.000.
^ Mu Ekiriki: “echu ya mastatiya 25 naari 30.” Estatiya emoha ti ya ameetru 185.
^ Mu Ekriki, “elapo.”
^ Naari akhweya: “nipuro noothukumanamo.” Mu Ekriki, “sinakooka.”
^ Naari “mutakhali.”
