Yohani 9:1-41
9 Yesu aviraka, aamoona mulopwana yoowo aari eevaasi oyariwa wooyariwa.
2 Oohuserya awe yaamukoha eriki: “Rapi, ochenke taani, mulopwana yoola naari asitiithi awe, wi ayariwe ahoonaka?”
3 Yesu aahaakhula: “Naari mulopwana ola hachenke naari asitiithi awe, nto yeeren’ye hiiha wi miteko sa Muluku sooneye mwa yoowo.
4 Nnaphwanela opaka miteko sa Yoowo okirumme, vaavaa oryaaya othana; woona wi ohiyu waarwa haavo muchu onawerya olapa.
5 Vaava kiryaaka mweelaponi, ka omwaleela wa elapo.”
6 Aamanleiye oloca ichu seiha, aataphera mara vachayani, eetheyano echaya nave ahikeela mmiithoni mwa mulopwana
7 nave aahi wa yoowo: “Hawe wasusule va nchiya na o Silowe” (nenlo nnataphulela “Orummwa”). Mwawiihiiha, owo aayawo asusula, nave akooka oonaka.
8 Voocharela amwaacamani ni yaale khalai yaamoona avekavekaka yaaniikoha eriki: “Ola tahi mulopwana yoole aakiraathi avekavekaka?”
9 Akina yaanaloca eriki: “Ti yoola.” Nyenya akina yaani: “Hooye, nto onamulikanano.” Mulopwana aatitelela oloca ariki: “Ti yoomi.”
10 Mwawiihiiha, awo yaamukoha: “Vano, miitho aa ahulen’ye hai?”
11 Owo aahaakhula: “Mulopwana awiichaniwa Yesu aaheetheya echaya ahikeela mmiithoni mwaka, akileela ariki: ‘Hawe o Silowe wasusule.’ Hiihaa, kaayawo kisusula nave kipacerya woona.”
12 Mwa yeela, awo yaamukoha eriki: “Ori woowi mulopwana yoowo?” Owo aahaakhula ii: “Nkisuwenle.”
13 Yaamukuxa mulopwana yoowo aari eevaasi emukeriha wa Afarisi.
14 Nyenya, naari nihiku na Sapata vaavaa Yesu eethen’yeiye echaya ahula miitho a mulopwana.
15 Mwawiihiiha, Afarisi yaapacerya omukoha tho mulopwana mukhalelo aapacenryeiye woona. Owo aahi wa yaawo: “Yesu aahikeela mmiithoni mwaka echaya, kiya kasusula nave vano kinnawerya woona.”
16 Vano, Afarisi akina yaanaloca eriki: “Mulopwana yoowo tahi a Muluku, woona wi hanakhapelela nihiku na Sapata.” Akina yaani: “Onaweryeya hai wi mulipa oocheka anapaka miteko sootikhiniha ntoko seiha?” Hiihaa, waakhalavo okawanyeya mwa yaawo.
17 Awo yaahuuluula omukoha mulopwana eevaasi eriki: “Tiheeni waahaalaawe oloca sa yoowo, woona wi tohunle miitho aa?” Mulopwana aahi: “Owo mulipa a miririmu.”
18 Nyenya, Ayuta hiyeemererya wi mulopwana yoole oona aari eevaasi khalai, ophiyerya ewiichanne asitiithi a mulopwana yoole vano oona.
19 Nave awo yaahaakoha: “Apwanne ola mwaninyu yoowo munalocaanyu wi oyariwe eevaasi? Vano oweryen’ye hai wi anoona?”
20 Asitiithi awe yaahaakhula: “Noosuwela wi ola mwanihu nave wi oyariwe eevaasi.
21 Nto mukhalelo opacenryeiye woona, hiyaano hannasuwela; naari yoowo omuhunle miitho awe, hiyaano hinimusuwenle. Mmukohe yoowo, owo ohinnuwa, onanwerya oloca mukhateiye.”
22 Asitiithi awe yaaloca ichu seiha nthowa na owoova Ayuta, woona wi Ayuta yaapaka nlakano wi yoole ani amweemererye Yesu ntoko Kristu, muchu yoowo onaphwanela wiikariwa mmapuro aya a malapelo.*
23 Ti nthowa nene asitiithi awe yaaloncaaya eriki: “Owo ohinnuwa. Mmukohe yoowo.”
24 Mwawiihiiha, yaamwiichana wanaawiili mulopwana yoowo aari eevaasi elocano eriki: “Omucicimihe Muluku; noosuwela wi mulopwana owo mulipa oocheka.”
25 Owo aawaakhula ii: “Waakhanle wi owo mulipa oocheka, nkinasuwela. Echu kinasuwelaaka, tiwi kaari eevaasi, nto vano kinnawerya woona.”
26 Voocharela awo yaahi wa yoowo: “Tiheeni oweerenleiye? Ohunle hai miitho aa?”
27 Owo aawaakhula ariki: “Koomala wooleelaani, nave nlelo hamuniiwa. Ntakhara heeni munachunaanyu owiriyana wanaawiili? Apwanne munachuna okhala oohuserya awe tho?”
28 Mwa yeela awo yaamunyemula eriki: “Weyaano wa oohuserya a mulopwana yoowo, nto hiyo na oohuserya a Mose.
29 Noosuwela wi Muluku aaloca ni Mose, nto vooloca sa mulopwana owo, hannasuwela onarweiyewo.”
30 Mulopwana aawaakhula ii: “Chiryene ela ti yootikhiniha, wi nyuwo hamusuwenle weiwo onarweiyewo, nyenya naamwi hiihaa owo oohula miitho aka.
31 Noosuwela wi Muluku hanaawiriyana alipa oocheka, nyenya oothene yoole onamoova Muluku aneerano yookhwela awe, owo onnanwiriyana.
32 Ovinyerya khalai hanintonko wiiwa wi ookhala muchu ohunle miitho a muchu oyariwe eevaasi.
33 Waakhanle wi muchu ola hanarweela wa Muluku, owo haahaala owerya weera echu eri yoothene.”
34 Awo yaamwaakhula yii: “We oyariwe oocheka ene vano onachuna onihusiha hiyaano?” Nave awo yaamukakhela okhwipi!
35 Yesu aahiiwa wi awo yaamukakhela okhwipi, nave aamphwannyeiye, aamukoha ariki: “Apwanne weyaano onnamuroromela Mwaana a muchu?”
36 Mulopwana aamwaakhula ii: “Pwiya, taani yoowo wi kiwerye omuroromela?”
37 Yesu aaloca wa yoowo: “Weyo onnamoona yoowo, nave chiryene ti yoowo onaloca ni weyo.”
38 Mulopwana aahi: “Kinnamuroromela yoowo Pwiya.” Nave aamucicimiha.*
39 Yesu aaloca ariki: “Vanthowa na othoriha yoola koorwa mweelapo yeela, wi yaale ari eevaasi yooneke nave yaale anoona erweele evaasi.”
40 Afarisi akina yaawo yaari ni yoowo yiiwaka ichu seiha, yaaloca eriki: “Apwanne hiyo tho na alipa eevaasi?”
41 Yesu aaloca wa yaawo ariki: “Waakhanle wi nyuwaano mwa achu eevaasi, himwaahaala okhalano nthowa na yoocheka. Nyenya woona wi munnaloca muriki: ‘Ninnoona.’ Yoocheka anyu ennatitelela.”
