Yupu 16:1-22
16 Yupu aahaakhula:
2 “Kohiiwa ichu sincipale ntoko seiha.
Ohiya okihakararya, oothene nyuwo munaaceererya wuukhuwa waka.
3 Apwanne masu yaala a siiyo herwa emala?
Tiheeni enaweerihaani okaakhula hiiha?
4 Miyaano tho kaanwerya oloca ntoko nyuwaano.
Mwaari miyo,Kaamurehererya masu ooreera wi kooloceleeniNi ocikinya muru aka koovaanyakaani.
5 Nto ohiya yeeyo, kaahaala woolipihaani ni masu a mwaano mwaka,Nave ohakararya wa mwaano mwaka waahaala owiichuuwihaani.
6 Kaalocaka, wiicela waka honamala;Vano kamaala oloca, ophiyerya mweeryo taani wiicela waka onavukuwaaya?
7 Nto vano, Muluku ookeeriha okhala oovelavela;Ohaatoloxa achu oothene a vaate vaka.
8 Ohiya yeeyoru, nyuwo mookiphara nave eyo ennakeerela onamoona,Nave wooca waka onnakivinyerya ni okeerela onamoona.
9 Onanariwa wawe wookimwasanya, nave owo onnakiica.
Owo onnakhuuriha miino awe wa nthowa na miyo.
Mwiicani aka ookimwasanya ni miitho awe.
10 Awo annaathama wi ekikhuure,Nave annakimana mphatamaaru mwa munyemu;Annakithukumanela yaance.
11 Muluku ookiveleela wa maponkwe,Nave ookirihela mmatani mwa amutakhali.
12 Miyaano kaahiichaala, nto owo ookinyaanya;Akiphara waakocho nave akihirimita,Nave akeera miyo ntoko yooluluwanya awe.
13 Achu awe oovonya munra aakirica;Owo ookihoma marupo nave haano ikharari;Onnamuyeeherya wamwe aka vacheyani.
14 Kiri ntoko exiri yeeyo owo onakhuculeiye wiiliwiili.Ntoko mukhoco, owo onnakichimakela.
15 Koosona isakhwi wi kikhuneeleno nrapala* naka,Nave koovitha ocicimiheya waka* vanchupini.
16 Ethoi aka yoophilivila wa nthowa na winlaxa,Nave miitho aka aahuruweliwa ni epiiphi yooriipa phii.*
17 Naamwi hiihaa, nkipanke echu ya nlalaNave nivekelo naka ti naweela.
18 Echaya we, ohikhuneele nikhami naka!
Nave nihiphwanyeye nipuro wi okhuwela waka wiichuuwevo!
19 Hiihava, namoona aka ori wirimu;Yoole onawerya okeerela onamoona ori wiirimurimu.
20 Asinthamwene aka annakitheya,Vaavaa miitho aka anamorihaaya miithori wa Muluku.*
21 Akhalevo muchu oni athorihe mulacu wa muchu ni Muluku,Hiihaa ntoko eneereyaaya muchu ni mukhweiye.
22 Tiwi, iyaakha ihanlewo ti savakhaani,Nave kinarwa kiya mphiro yoowo ohinakookiwawo.
Inoota
^ Naari: “nnyapara.”
^ Naari: “ikuru saka.” Mu Ehepiri, “nnyaka naka.”
^ Naari: “muuruuxi wa okhwa.”
^ Naari akhweya: “miitho aka ananwehaaya Muluku ehirino ekhove.”
