Yupu 2:1-13
2 Emanle weererya yeela, naaphiya nihiku nenlo anamwane a Muluku* eeparipari yiiperenkhaaya vamiithoni va Yehova, nave Satana tho aaya veeri vaya wi iiperekhe vamiithoni va Yehova.
2 Vanonto Yehova aamukoha Satana: “Onarwa woowi?” Satana aamwaakhula Yehova: “Kaamviravira ni weeceeca veelaponi yavathi.”
3 Yehova aahi wa Satana: “Woomvarerya* mulapeli aka Yupu? Haavo muchu onalikana ni yoowo veelaponi. Owo muchu awookololowa murima ni eekhaikhai,* onamoova Muluku nave onathanya yeeyo eri yoonanara. Owo nlelo onnaakeelela ororomeleya wawe, naamwi okeereryaka okilekecha wi kimutoloxe* yoowo ohirivovo nthowa.”
4 Nto Satana aamwaakhula Yehova: “Nrapala ni nrapala.* Muchu onamvaha soothene oreiyeno ntakhara okumi awe.
5 Nyenya vano, mviihe ntata nanyu nave mutannye makhuva ni mwiili awe, nave mweeparipari owo onamooruwanaani* vamiithoni vanyu.”
6 Voocharela, Yehova aahi wa Satana: “Phaameene, vano owo ori mmatatani mwaa!* Nto ohimwiiphe!”
7 Vanonto, Satana aapwahavo vamiithoni va Yehova. Nave aamuruuhela Yupu makhwaca matokweene ni awiicela,* ovinyerya vathi va inaani ophiyerya va muru.
8 Nave Yupu aakuxa nivali wi iisunekeno, nave akiraathi vacuurwani.
9 Wookuchulani, amwaariye yaaloca ni yoowo: “Nlelo munnaakeelela ororomeleya wanyu? Mmuruwane* Muluku nave mukhwe!”
10 Nto owo aawaakhula: “Weyaano onaloca ntoko muthiyana oololo. Apwanne nnaphwanela weemereryaka pahiru yeeyo eri yaphaama yoorweela wa Muluku eeparipari ni oheemererya tho yeeyo eri yoonanara?” Mwa soothene seiha Yupu haachenke ni eyano awe.
11 Asinthamwene araru a Yupu yaahiiwa sa makacamiho oothene yaamphacuwenle nave yaarwa, mmoha ti mmoha akhumaka nipuro nawe. Asinthamwene awe yaari: Elifasi o Temani, Piltati o Xuhi ni Sofari o Nama. Yaalakana wi yamuxekurye Yupu ni omuhakararya yoowo.
12 Vaavaa yaamoonnaaya erwaaka ocaiwene, hiyaamusuwenle. Yaapacerya winla vatokotoko ni waahula soowara saya, nave yaavonyerya echaya osulu ni wiihela mmuruni mwaya.
13 Voocharela, yaakirathi ni yoowo vachayani mahiku mathanu nameeli, othana ni ohiyu. Haavo aalonceru echu wa yoowo, ntakhara yaahoona wi wiicela ooneiye waari otokotoko.
Inoota
^ Masu oosiphela Eehepiri yaawo anataphulela ankeelo a Muluku.
^ Mu Ehepiri, “Wootikitherya murimaa wa.”
^ Naari: “oohikhalano nthowa ni awookololowa murima.”
^ Mu Ehepiri, “kimwiiphe.”
^ Naari: “Nnyapara ni nnyapara.”
^ Naari: “onanwuulumelaani.”
^ Naari: “koowinnyererya.”
^ Naari: “namukooxe.”
^ Naari: “mmuulumele.”
