Yupu 20:1-29
20 Sofari o Nama, aahaakhula ariki:
2 “Murima aka woosarasareya nave opisa murima wookimalela,Ti nthowa nene kinachunaaka owaakhulaani.
3 Osamela wanyu mmanle wiimukiruwana;Nave wiiwexexa waka* onnakeeriha waakhula.
4 Mweeparipari nyuwaano mwaanasuwela yeela ovinyerya khalai,Woona wi eneereya hiiha ovinyerya vaavaa muchu aakuhiweiye* veelaponi yavathi,
5 Wi okhuwela woohakalala wa muchu oonanara murima ti wa elukuluku tontoNave ohakalala wa muchu ootakhala* onamwi koti.
6 Naamwi wiisunnuwiha wawe ophin’ye wirimu,Nave muru awe onakomela mmeekuni,
7 Owo onamucakanela okhala wookhala, hiiha ntoko mari* awe;Yaale yaamoona wiiliwiili anamukohaka: ‘Okele woowi?’
8 Owo onahaala ovava ntoko yooloha, nave awo herwa emphwanya;Owo onahaala ocakanela ntoko yawoona ohiyu.
9 Miitho yaawo yaamoonne herwa emoona tho wanaawiili,Nave nipuro nenlo aakhaleiyevo hinrwa tho nimoona yoowo wanaawiili.
10 Anamwane awe anamwaavya mahala wa oohaawa,Nave mata awe anamukookiha muhakhu awe.
11 Makhuva awe yaahaacano ikuru soomiravo,Nto iho,* inamukona ni yoowo onchupini.
12 Wakhala wi yeeyo eri yoonanara ti yoosiva mwaano mwawe,Wakhala wi owo oovitha vathi va nlumi nawe,
13 Wakhala wi oolawiha nave ahinahiya,Nto aakeeleliha mwaano mwawe,
14 Yoolya awe enamukhala yoonyuunya mmirimani mwawe;Eyo enahaala okhala ntoko esenya* ya evili mmirimani mwawe.
15 Owo oomirya muhakhu, nto onahaala orapheyamo,Muluku onahaala oviihamo mmirimani mwawe.
16 Owo onamunuula esenya ya inowa;Esenya ya* evili enammwiipha.
17 Owo harwa apuha eleiti* ni enuwiYoosareya ntoko maahi.
18 Owo onamukookiha sookhalano sawe ahilyilevo;*Owo harwa apuha muhakhu woorweela mmaroca awe.
19 Tiwi, aanaanyaanya ni waanyanyala oohaawa;Iikuxerya empa yeeyo aahitenkeiye.
20 Nyenya owo hakhalano murecele wampuwa;Muhakhu awe homukhaviherya wi omvuluxe.
21 Hiyaavo emuhalenle wi akhuure;Ti nthowa nene muhakhu awe oneeraaya ohilekele.
22 Vaavaa muhakhu awe oneeraaya waaceereryeye, wuukhuwa onarwa omphwanya;Ohaawa woothene onammuphwanya yoowo.
23 Owo amanle ovona,Muluku* anarwa amuruuhela esara awe yoovarela,Amurupihelaka yoowo ophiyerya mpuwa mwenexa mwa mwiili awe.
24 Vaavaa oneereiye achawe ikaruma soowanano sa muthipo,Mavaka a munra wa enyacu enammuhoma.
25 Owo onnaphola nivaka oculi wawe,Onnaviihavo nivaka nawaarya vahapani vawe;Nave woopopiha onnamphwanya yoowo.
26 Epiiphi yooriipa phii ennawehererya muhakhu awe;Mooro yoowo ohiparihiwe ni muchu onammweeyela yoowo;Soohooxa sinnaawehererya yaale eni ekophole mmuxakalani mwawe.
27 Erimu enamuupulula yoohesa awe;Elapo enammurukunuwela yoowo.
28 Maahi oorweela anammwarya empa awe;Oni okhale orupa otokweene mu nihiku na esara ya Muluku.*
29 Ela eri yamahala yoorweela wa Muluku wa yoole ori oonanara murima,Yoohiyeryiwa yeeyo Muluku olakelenleiye wa yoowo.”
Inoota
^ Mu Ehepiri, “munepa wa wiiwexexa waka.”
^ Naari: “achu yaakuhiwaaya; Atamu aakuhiweiye.”
^ Naari: “oomwaryeya.”
^ Naari: “mavi.”
^ Ela tiwi, ikuru sawe.
^ Naari: “wamwe.”
^ Mu Ehepiri, “Nlumi na.”
^ Naari: “mukaka.”
^ Mu Ehepiri, “ahiminrye seiho.”
^ Mu Ehepiri, “Owo.”
^ Mu Ehepiri, “esara Awe.”
