Yupu 34:1-37
34 Nave Elihu aatitelela oloca ariki:
2 “Mwiiwe masu aka, nyuwo muri a miruku;Mukiwiriyane, nyuwo oosuwelaxa.
3 Tiwi naaru ninnalawiha masu,Hiiha ntoko nlumi nnalawihaaya yoolya.
4 Hankooni naalikhele mukhatiihu yeeyo eri yawookololowa;Nlakelele mukhatiihu yeeyo eri yaphaama.
5 Tiwi Yupu ooloca: ‘Miyaano kookhalano rasawu,Nto Muluku ookhooca okeerela yawookololowa.
6 Apwanne kaaphwanela wootha ni oloca wi kookhalano nthowa?
Nikhwaca naka hannavola naamwi kihichenke.’
7 Muchu taani onalikana ni Yupu,Onawurya onyemula ntoko maahi?
8 Owo onakhala ni achu oonanara murimaNave oneeca ni achu ootakhala.
9 Woona wi onnaloca: ‘Muchu hanaphura echuMu weererya omuhakalaliha Muluku.’
10 Vano, mukiwiriyane, nyuwo muri oosuwelaxa:*
Honaweryeya wa Muluku eeparipari weerano ichu soonanara,Wa Aikuru Soothene weerano sootakhala!
11 Woona wi owo onammuchuwela muchu mwawiiwanana ni saweera saweNave onammuruuhela yoowo sookhumelela sa meecelo awe.
12 Eparipari tiyawi Muluku haneera yeeyo eri yoonanara;Aikuru Soothene hanakhoromanyiha ekhaikhai.
13 Taani omvanhe Muluku murici wa olamulela ni okhapelela elapo?Nave taani omuthanlile wi alamuleleke elapo yoothene?
14 Waakhanle wi owo onnaavareryaxa yaawo,Ni okuxa munepa ni nwiya aya,
15 Achu oothene yaamukhwa vamoha,*Nave oothene awo yaamukookela onchupini.
16 Mwawiihiiha, mwaari oosuwelaxa, nwiriyane phaama yeela;Mwiiwe phaama yeeyo kinalocaaka.
17 Apwanne muchu oniica ekhaikhai onanwerya olamulela?Naari, apwanne mwanwerya omvaha nthowa ooweryaxa yoowo ori awookololowa?
18 Apwanne mwanwerya oloca wa mwene: ‘Hamunaphuriha echu,’
Naari wa achu oovuwa: ‘Nyuwo mwa achu oonanara murima’?
19 Ookhalavo mmoha ohinooniherya nthalu wa alipa oolamula,Naari omukhaliha phaama muchu a muhakhu omuhiya oohaawa,*Woona wi oothene yaawo ari muteko wa matata awe.
20 Awo ananwerya okhwa mootutuxa, ohiyu eriyari;Annacikinyiwa moowali nave annarimeela;Ophiyerya tho achu oowerya annaviihiwavo, nto ohiya ni mata aachu.
21 Woona wi miitho a Muluku annavarerya iphiro sa achu,Nave owo onnoona meecelo aya oothene.
22 Hiyaavo epiiphi naari nipuro nooripa phiWeiwo achu oonanara murima anaweryaaya wiipithawo.
23 Tiwi, Muluku halakelenle elukuluku wa muchuWi iiperekhe wa yoowo wi amuthorihe.
24 Owo onnaamwarya achu oowerya ohirivo woochuneya opacerya waalikhelaNave onnaakuha akina mu nipuro naya.
25 Woona wi owo onnasuwela yeeyo awo aneeraaya;Onnaamwarya variyari va ohiyu, nave annaphonciwa.*
26 Owo onnaamana nthowa na soonanara saya,Achu oothene ewoonaka,
27 Ntakhara aahiya omuchara yoowoNave hanapwacha iphiro sawe;
28 Anneeriha wi oohaawa ekhuweleke wa yoowo,Ophiyerya wi owo onniiwa wiikhupanyerya wa oohasuwa.
29 Vaavaa Muluku onamaaleiye, taani onawerya omuthoriha?
Vaavaa owo oniipithiheiye ethoi awe, taani onawerya omoona?
Moohipwacha waari wa maloko, naari wa muchu, yookhumelela ene emohamoha,
30 Hiiha muchu ootakhala* hanawerya olamulela,Naari oreya muraakho ntakhara muloko wa achu.
31 Apwanne muchu onanwerya oloca wa Muluku:‘Koolakiwa, naamwi kihenre echu yoonanara;
32 Mukoonihe yeeyo kihin’yaaka woona;Waakhanle wi koopaka yoonanara, nkuuluula tho’?
33 Apwanne owo onnaphwanela woochuwelaani mwawiiwanana ni yeeyo munachunaanyu, muniiha mukhoocaka othoriha wawe?
Nyuwo munaphwanela olakelela, ohiya yoomi.
Vano, mukileele tiheeni musuwenlaanyu phaama.
34 Achu oosuwelaxa* anamukileela,Muchu vyakala a miruku onakiiwa:
35 ‘Yupu onaloca ahisuwelaka,Nave masu awe henooniherya wiiwexexa.’
36 Mano Yupu eereryiwe* mwawaakhwanela,Woona wi maakhulo awe ari ntoko aachu oonanara murima!
37 Yoocheka awe ennaceererya omwaryeya;Onnoopa makuphi mwamunyemu vamiithoni vahuNave onnaaceererya masu awe wi amphwanyerye mathowa Muluku eeparipari!”
Inoota
^ Mu Ehepiri, “a murima.”
^ Mu Ehepiri, “Miili soothene saamukhwa vamoha.”
^ Naari: “muchu oovuwa omuhiya awiiyeviha.”
^ Naari: “annahirimitiwa.”
^ Naari: “oomwaryeya.”
^ Mu Ehepiri, “achu a murima.”
^ Naari akhweya: “Tiithi, Yupu eereryiwe.”
