Yupu 41:1-34
-
Muluku onnamuloca mwaaxinama ootikhiniha, Leviyata (1-34)
41 “Apwanne onanwerya omphara Leviyata* nnancooloNaari omaka nlumi nawe ni mukoi?
2 Apwanne onawerya oviriha mukoi mphulani mwaweNaari othorola ilakutha sawe nnancoolo?*
3 Apwanne owo aahaala wooveka wi ommorele ikharari,Naari aahaala oloca ni weyaano mooreera murima?
4 Apwanne owo onampaka waataana ni weyo,Wi akhale kapuro aa mu okumi woothene?
5 Apwanne onamuthataka ni yoowo ntoko palameNaari ommakelela yoowo mukoi muxikoni wi athateke ni anamwane aa akhaani aasithiyana?
6 Apwanne alipa a maroca anammuthuma?
Apwanne anammukawana variyari va alipa ootumiha?
7 Apwanne onanwerya othorola nrapala nawe ni ikaruma sincipale soothorolano*Naari othorola muru awe ni mavaka a omesano?
8 Omukuherye ntata naa;Weyo horwa ocuwala sa mukhico yoowo, nave horwa wuuluula weerano!
9 Ewehereryo vyakala ya onwerya ti watheru.
Omoonaru pahi onamuuwela vathi.
10 Haavo oneererya omuroxa.
Mwawiihiiha, taani onawerya owana ni mi?
11 Taani aapacenrye okivaha echu wi kimvahe tho echu?
Soothene iri vathi veerimu ti saaka.
12 Nkihiya oloca sa meco sawe,Ikuru sawe ni mwiili awe opakiwe phaama.
13 Taani ontoko omurula yoowara awe?
Taani oni avire waalakutha wawe?
14 Taani onawerya ohula milako sa mwaano mwawe?*
Maino awe oothene tawoopiha.
15 Oculi wawe sookhalawo misera sa maakakharu,*Yaawo ari oopatelelana phaama nikina nnikhwaaya .
16 Nimoha ti nimoha nri waacamanaxa nnikinaOphiyerya wi echeku henavira veeri vaya.
17 Awo ari oopatelelana nikina nnikhwaaya;Ari oopharelelana nikina nnikhwaaya nave honaweryeya omwalanyiha.
18 Vaavaa onaaxamuryeiye onnakhuma waarya,Miitho awe ari ntoko waarya wa oxa.
19 Itari sinnakhuma mwaano mwawe;Nave annakhumamo makalume a mooro.
20 Mphulani mwawe onnakhumamo mwiixi,Ntoko cukucha otetheeriwe ni marekele.
21 Nwiya awe onnapaha makhala,Nave nikalume ninnakhuma mwaano mwawe.
22 Esiko awe ti yakuruxa,Nave oothene yaale anakumanano annakhwa ni woova.
23 Nrapala na ethai awe noopharana,Ti noolipa ntoko muthipo nave hinnaxekexeya.
24 Murima awe ti wooturuwa ntoko nluku,Aa, wooturuwa ntoko namahaani mukhaani.
25 Vaavaa owo onavinyeiye, ophiyerya achu akuru annoova;Wiitannya wawe onnoopopiha.
26 Hinaavo nlema nnamukakacha ophiyerya omphoreiha;Naari nivaka, naari nivaka nookhuveya, naari tho munra.
27 Wa yoowo, muthipo ori ntoko nlaxi,Enyacu ntoko mwiri wa wuuca.
28 Nivaka hinnamweeriha ochawa;Wa yoowo, maluku anavonyiwa ni mpilima ari ntoko malaxi anavavihiwa.
29 Ekopo eri ntoko nlaxi wa yoowo,Nave owo onnatheya onyaakula wa nivaka nookhuveya.
30 Erukulu awe eri ntoko mavali oothokolowa;Aaviraka vancokwini onnacekavo ntoko ekaaro yawiipichano.
31 Owo onneeriha wi mapuro awiixa enathanuwa ntoko mwaapu ori vaikho;Owo onnatannya ephareya ntoko makhurwa ari mmwaapuni vaikho.
32 Oculi wawe onnahiya muchico wawaarya vaavale onavireiyevo,
Eerihaka okhala ntoko wi maahi awiixa aakhalano ipwi.
33 Haavo onalikaneiyeno veelaponi yavathi,Yoopatuxiwa epakiwe wi ehooveke.
34 Owo onnaawerya awiirumiha oothene.
Owo ti mwene a axinama oothene akuru amutakhwani.”
Inoota
^ Akhweya enaahiwa ekonya.
^ Mu Ehepiri, “ni mwiiwa.”
^ Yaari ekaruma yoohomano, woonaru yaarino miino meeli yaaweha oculi ntoko nancoolo.
^ Mu Ehepiri, “owanoni wawe.”
^ Naari: “maakanuwe.”
