Yupu 5:1-27
5 “Khwoo, nkiichanani! Apwanne ookhalavo oni awaakhuleeni?
Aweela murima taani munayaanyu omveka nikhaviheryo?
2 Tiwi, okuha mathowa onnamwiipha mulolo,Nave nrima ninnamwiipha oohilapa muru.
3 Miyaano koomoona mulolo amelaka mitathaari,Nto moohilekela, nipuro nenle onakhaleiyevo ninnuulumeliwa.
4 Anamwane awe hanakhapeleleya,Nave annahooxiwa vamulako mutokweene wa epooma, ahikhanlevo oowaakiha.
5 Achu atala annalya seiho onahepheiye,Ekuxaka ophiyerya ni seihe iri veeri va miiwani;Nave sookhalano sawe sinnaheiwa va muraakhoni.
6 Tiwi, ohooxeya honakhuma vanchupini,Nave makacamiho hanamela vacheyani.
7 Muchu onayareliwa ohooxeya,Hiiha ntoko ophuwa wa mooro onacuphelaaya osulu.
8 Nto miyo kaahaala omveka Muluku,Nave kaahaala omuleela Muluku mulacu aka,
9 Yoole onapaka ichu itokotoko ni soohiweryeya ophwimmwa,Ichu sootikhiniha soohaalakhanyeya.
10 Owo onnarupiha epula veelaponi yavathiNave onnanaaniha emaca ni maahi.
11 Owo onnamwinnuwiha awiiyeviha,Nave onnamviiha ooceecheya wi avuluxiwe.
12 Owo onaakanyerya sawuupuwelela sa achu oovyaka,Wi miteko sa matata aya sihikhumelele phaama.*
13 Owo onnaaheya amiruku mu ovyaka waya,Mwawiihiiha, marehereryo* a achu oovyaka annaakanyeryiwa.
14 Othana awo annakumanano epiiphi,Nave othana mitiya, awo anneeca yaapareyaka ntoko ohiyu.
15 Muluku onnamwaakiha oohaawa wa nlema nnakhuma mwaano mwaya,Nave onnamvuluxa mmatani mwa achu akuru,
16 Wanthowa nenla, yookhalavo ewehereryo wa oohaawa,Nto eyano ya achu oohookololowa ennamaalihiwa.
17 Oohakalala muchu yoowo Muluku onamusameleiye,Wanthowa nenla ohikhooce olaka wa Aikuru Soothene!
18 Tiwi, Muluku onnaphoreiha, nto onnavooliha nikhwaca nene;Owo onnampwexa muchu, nto onnampenuxa ni matata awe.
19 Owo onamoovuluxa mu ipahu thanu nammoha,Naari mano yaneethanu napiili heewerela yoonanara.
20 Variyari va etala, owo onamoovuluxa wi ohikhwe,Nave variyari va ekhoco, owo onamoovuluxa wa owerya wa nlema.
21 Muluku onamookhapelelaani wa nlumi nniicela ntoko nwasuso,Nave vaavaa epahu eneeraaya ephiye, hamoovaru.
22 Mukaamutheya ipahu ni etala,Nave nyuwo hamurwa muwoova axinama a mutakhwani a veelaponi.
23 Tiwi, maluku a mmacani hekoophoreihakaani,*Nave axinama a mutakhwani enamukhalaka mmureceleni ni nyuwo.
24 Munarwa musuwela wi muxakala anyu ori wookhapeleleya,*Nave vaavaa muneeraanyu mwaalikhele muhuwo anyu, hokhalavo oni oyeleeleye.
25 Nyuwaano munahaala ohakalala nthowa na okhalano anamwane ancipale,Nave muyareriwo anyu wa muhoolo onahaala waaca ntoko munyepu wa veelaponi.
26 Munarwa mukhwa nlelo ikuru ihoomalenleeni,Ntoko mihupu sa yoolya inahemphwa mu elukuluku aya.
27 Chiri ti yeela noonnaahu, nave ti yeeyo.
Muwiriyane phaama nave mweemererye yeela.”
Inoota
^ Naari: “sihikhaleno mphurelo.”
^ Naari: “apalanu.”
^ Naari: “a mmacani anampaka waataana ni nyuwo.”
^ Mu Ehepiri, “ti murecele.”
