Apwanne Muluku Ookhala?

ORUMIHA

Naakhulo na Piipiliya

Aa. Nnanwerya ophwanya sawooniherya seeparipari Mpiipiliyani wi Muluku ookhala. Piipiliya onnanceenyerya winnuwiha nroromelo wa Muluku ohiya weemererya pahiru wa yeeyo malapelo anahusihaaya, nto moorweela wa opharihela “wuupuwela” ni ‘osuwela.’ (Aroma 12:1; 1 Yohani 5:20) Moone sawooniherya inathipeleya Mpiipiliyani:

Oreheryeya wa elapo ni okhalamo ikumi yawooniherya wi ookhalavo Mpatuxa. Piipiliya oni: “Tiwi, empa ni empa enatekiwa ni muchu, nto otenke soothene ti Muluku.” (Ahebri 3:4) Naamwi yaawooniherya yeela eri yookhweya, achu ancipale ahusihiwe annoona wi ti yeeparipari. *
Ntoko achu, nookhalano nchuno na wiiwexexa yootaphulela ya yookhwela ya okumi. Eyo ennapaka makupa wa yeeyo Piipiliya oniichaneiye “soothowa saya soomunepani.” (Mateu 5:3; Wupulula 4:11) Okhalano soothowa soomunepani henooniherya pahiru wi Muluku ookhala, nyenya tho wi owo ti Mpatuxa oosivela nave onachuna wi naakhwaniheryeke soothowa seiho.—Mateu 4:4.
Masu a miririmu alociwe Mpiipiliyani, arempwe mu iyaakha masaneene ihaakumve waakhwanela mmikhalelo soothene. Ela enathoonyerya wi yaahaala orweela mmathipelo a achu.—2 Pedro 1:21.
Alipa oomurepa Piipiliya yaahikhalano masuwelelo a siyensiya waapwaha achu a elukuluku aya. Ntoko yootakiherya, khalai achu yeemererya wi elapo enaphareleliwa ni mwaaxinama, ntoko echepo, Enari naari emope. Nyenya Piipiliya onaloca wi Muluku ‘eemenshe echaya vasiyoni vene.’ (Yobi 26:7) Mmukhalelo woolikana, Piipiliya onnaloca mookwakwaleya opakiwa wa elapo wi ti yoovilikana. (Isaiya 40:22) Ancipale aneemererya wi otharihiwa wookwakwaleya a masuwelelo yaala avasulu ti yawi alipa oomurepa Piipiliya, yaakhela sooleeliherya soorweela wa Muluku.
Piipiliya onnaakhula makoho mancipale oovila. Ohikhalavo maakhulo oohakalaliha vooloca sa makoho yaala anammweeriha muchu okhalano makuchuwelo wi Muluku hakhanle. Ntoko yootakiherya: Waakhanle wi Muluku toosivela ni aikuru soothene, ntakhara heeni aakhalavo makacamiho ni ichu soonanara veelaponi? Ntakhara heeni wiiliwiili ikerexa sinaavolowela achu moonanara ohiya mwaphaama? —Tito 1:16.

^ par. 2 Ntoko yootakiherya, astronomu Allan Sandage ooloca sa mukhalelo wa elapo: “Kinoona wooheemereryeya wi oreheryeya wa elapo orimoona okhumelela. Ookhala oreherenrye. Wa miyo Muluku tootikhiniha, nto ori wanthowa na yootikhiniha ya okhala, ohiya wi ehikhalevo echu.”