Historia 75

Nauimej telpokamej nemij Babilonia

TEKIUAJ Nabucodonosor kinuika ipan ueyikalpan Babilonia, israelitas akin melak kuajli okiselijkej tlamachtijli. Sakin, kintlapejpenia telpokamej kualtsitsintin niman tlamachilisejkej. Nikan tikita naui. Se itoka Daniel, niman oksekimej yeyimej telpokamej, babilonios kintokayotiaj Sadrac, Mesac niman Abednego.

Nabucodonosor kineki kinmachtis niman ijkon matekitikan ichan. Tla yopanok yeyi xiuitl ika kinmachtia, kintlapejpenis san akin melak tlamachilisejkej niman ijkon kipaleuiskej makiyektlalikan itlaueluan. Kineki machikaujkej yejuin telpokamej, kuakon tlanauatia makinmakakan tlakuajli iuan vino tlen yejua iuan ichanejkauan kikuaj.

Tikitaj nikan Daniel. ¿Tikmatstika tlenon kijlitika Aspenaz, itlakeual Nabucodonosor akin ueyixtika? Kijlia ika xkineki kikuas tlakuajli uelik tlen kikua tekiuaj. Aspenaz najmana. ‘Tekiuaj yokijto tlenon nenkikuaskej niman nenkoniskej’, kijtoua. ‘Niman tla xnenchikaujkej nentlachiaj ken oksekimej telpokamej, uelis nechmiktis.’

Ika yejon, Daniel konnotsa akin Aspenaz okitlali makintlajpiya yejua niman yeyimej telpokamej akin iuan nouika. Daniel kijtoua: ‘Ipan majtlaktli tonajli, xtechmaka kijli niman atl. Kuakon xtechixtlalo iuan oksekimej telpokamej akin kinmakaj tlen tekiuaj kikua, niman xkita akinomej kuajli nesij’.

Tlajpixketl kema okinek kichiuas. Niman ijkuak kaxiltiaj majtlaktli tonajli, Daniel niman yeyimej telpokamej akin iuan nouika, nesij melak chikaujkej maka ken oksekimej telpokamej, kuakon ok kinkauiliaj makikuakan kijli, niman xkikuaj tlen tekiuaj kinmaka.

Ijkuak kaxiltiaj yeyi xiuitl, nochimej telpokamej kinuikaj itech Nabucodonosor. Ijkuak imiuan yotlajto, tekiuaj kita ika Daniel, Sadrac, Mesac iuan Abednego, melak tlamachilisejkej. Ika yejon, kichiua matlapaleuikan ichan. Ijkuak tekiuaj kintlajtoltia niman kimijlia itlaueluan Daniel niman yeyimej telpokamej akin iuan nouika, yejuamej majtlaktlitipan tlamachilisejkej xijkon ken yejuin teopixkej iuan tlamachilisejkej akin tekiuaj kinpiya.

Daniel 1:1-21.