Akin kitlasojtlaj Jehová:

Jesús okijto: “[Nemejuamej] nenkixmatiskej tlen melauak, niman on tlen melauak yejua mechmanauis” (Juan 8:32). ¡Melak techyolchikaua yejuin tlajtoltin! Kema, uelis tikmatiskej tlen melauak ipan “sa itlajtlankan” yejuin tonaltin maski onka tlakajkayaualistli niman ouijtika tinemij (2 Timoteo 3:1). ¿Tikilnamiki kenon otiyolpak ijkuak otimomachti tlen melauak ipan iTlajtol toTajtsin? ¡Melak kualtsin tlen opanok!

San ika, xsan noneki matikmatikan tlen melauak niman matiktemachiltikan. Noneki manesi ika tikchiujtokej ipan tonemilis tlen yotomachtijkej. Kema, noneki nochipa tinemiskej itech itlasojtlalis toTajtsin. ¿Tlenon kijtosneki yejuin? Ipan yeuajli ijkuak sa achijtsin poliuiya ika mikiskia Jesús, okimijli itlatitlankauan: “Tla nenkitlakamatstiaskej notlanauatiluan, nenkiselijtiaskej notetlajsojtlalis ijkon ken nejua niktlakamatstiu itlanauatiluan noTajtsin niman nikselijtiu itetlajsojtlalis” (Juan 15:10).

¿Kenon onen Jesús itech itlasojtlalis toTajtsin? Okitlakamat itlanauatiluan iTaj. Noijki noneki ijkon matikchiuakan. Tla tiknekij nochipa tinemiskej itech itlasojtlalis toTajtsin, kipiya ika tikchiuaskej ipan tonemilis tlen yotomachtijkej. Jesús noijki okijto ipan yejon yeuajli: “Tla nenkajsikamatij in tlajtlamach niman peua ijki nenkichiuaj, Dios mechtiochiuas” (Juan 13:17).

Ika nochi toyojlo tiknekij ika yejuin amoxtli mamechpaleui xchiuakan ken yonemomachtijkej niman ijkon nochipa xnemikan itech “itetlajsojtlalis Dios”. Niman xchiatokan “yenkuik nemilistli para nochipa” (Judas 21).