ToTajtsin Jehová a okinnamikti kachtopa tlakatl iuan siuatl. Biblia kijtoua ika yejua okichijchiuj kachtopa siuatl “niman okuikak ixpan tlakatl”. Adán melak oyolpak niman okijto: “Aman kema yejuin noijki omitl tlen ouajkis ipan noomiuan niman noijki nakatl tlen ouajkis itech nonakayo” (Génesis 2:​22, 23). Jehová ok kineki ika akin yononamiktijkej mapakikan.

Ijkuak se nonamiktia, kanaj kinemilia xkeman kipiyas tlauejli. San ika, hasta akin melak notlasojtlaj kipiyaskej tlauejli (1 Corintios 7:​28). Ipan yejuin amatlajkuilojli tiknextis tlajtolyekanalistin tlen uajlauej ipan Biblia. Tla tikintlakamati, mitspaleuis tiyolpakis iuan moixnamik niman iuan mochanejkauan (Salmo 19:​8-​11).

TLEN BIBLIA KIJTOUA: Teueuentsin yejua kinyekana ichanejkauan (Efesios 5:​23).

Tla tejua titeueuentsin, Jehová kineki xtlajpiya mosiuauj ika tlasojtlalistli (1 Pedro 3:7). Yejua okichijchiuj siuatl niman ijkon mamitspaleui. Kineki xkita ika tlakaitalistli niman tlasojtlalistli (Génesis 2:​18). Noneki melak tiktlasojtlas, hasta timajmanas kachtopa itech tlen yejua kineki niman maka san itech tlen tejua tikneki (Efesios 5:​25-29).

Tla tejua titesiuauj, Jehová kineki xtlakaita moueuentsin niman xpaleui makichiua itekiyo (1 Corintios 11:3; Efesios 5:​33). Xpaleui ika nochi moyojlo itech tlen yokitlapejpeni kichiuas (Colosenses 3:​18). Tla ijkon tikchiua, melak kuajli mitsitas moueuentsin niman noijki Jehová (1 Pedro 3:​1-6).

TLEN UELIS TIKCHIUAS:

• Xtlajtolti moixnamik tlenon uelis tikchiuas niman ijkon timochiuas melak kuajli titeueuentsin noso titesiuauj. Kuajli xkaki tlen mitsijlis niman xyejyeko tikchiuas

• Xteijyoui. Uelis uejkauis nemomachtiskej kenon nemoyolpaktiskej

TLEN BIBLIA KIJTOUA: Melak noneki xmajmana ipampa tlen kineki moixnamik (Filipenses 2:​3, 4). Xtlasojkaita moixnamik, xkilnamiki ika Jehová kineki ika akin kitekichiuiliaj nochipa matetlasojtlakan (2 Timoteo 2:​24). Xnemili kenon titlajtos, pampa Biblia kijtoua: “Akin xkinemilia tlen kijtoua tlateki ken se espada, san ika, intlajtoluan akin tlamachilisejkej tepajtiaj” (Proverbios 12:​18). Iespíritu santo Jehová mitspaleuis titlajtos yemanki niman ika tlasojtlalistli (Gálatas 5:​22, 23; Colosenses 4:6).

TLEN UELIS TIKCHIUAS:

• Ijkuak ok xtitlajtoua iuan moixnamik itech itlaj tlen melak noneki, xtlajtlanili toTajtsin mamitspaleui maka nimantsin tikualanis niman kuajli xkasikamati

• Kuajli xnemili tlenon tikijtos niman kenon tikijtos

TLEN BIBLIA KIJTOUA: Ijkuak nonamiktiaj, nochiuaj “san se cuerpo” (Efesios 5:​31). San ika, xkijtosneki tla xok omemej, ika yejon tlamantik noso sejneka tlanemiliaj. Kuakon, melak noneki nemomachtiskej nentlanemiliskej niman nenkimachiliskej ijkon ken nemoixnamik (Filipenses 2:⁠2). Yejuin melak noneki ijkuak nenkitlapejpeniskej tlen nenkichiuaskej. Biblia kijtoua: “Tla titetlajtoltia, tlen tiknemilia tikchiuas kuajli onkisa” (Proverbios 20:​18). Mamechyekanakan tlajtolyekanalistin ijkuak san sekan nenkitlapejpeniskej itlaj itech tlen melak ueyi kijtosneki (Proverbios 8:​32, 33).

TLEN UELIS TIKCHIUAS:

• Maka san xtlajto itech tlen tikmati noso tlen tiknemilia. Xkijli moixnamik tlenon tikmachilia

• Ijkuak itlaj tiknemilia tikchiuas, kachtopa iuan xtlajto