TLAMACHTIJLI 15
¿Akinon Jesús?
Miyekej kijtouaj ika kixmatij Jesús, san ika, xkuajli kixmatij, san kimatij kenijki itoka. Matikitakan tlenon melauak temachtia Biblia itech Jesús.
1. ¿Akinon Jesús?
Jesús se ángel akin melak kojtik niman nemi ne iluikak. Ijkuak Jehová opeuj tlachijchiua, kachtopa okichijchiuj Jesús. Ika yejon, Biblia kijtoua ika Jesús “nemi desde ijkuak nochi tlen onkaj, xe onkatka” (Colosenses 1:15). Biblia noijki kijtoua ika Jesús yejua “isenteKonetsin” toTajtsin, yejuin kijtosneki ika xakaj okipaleui toTajtsin ijkuak okichijchiuj Jesús (Juan 3:16). Jesús okipaleui Jehová ijkuak okichijchiuj nochi tlen onka (xkita Proverbios 8:30). Yejuamej melak kuajli nouikaj. Jesús noijki noixmati ken “Tlajtojli”, ijkon noixmati pampa yejua kiteijlia tlen toTajtsin kineki manomati (Juan 1:14).
2. ¿Tleka ouajlajka Jesús ipan tlaltikpaktli?
Ikipiya más de 2,000 xiuitl ijkuak toTajtsin okichiuj se kualtsin milagro. Ika iespíritu santo, toTajtsin okitlali inemilis Jesús ijtik se ichpochtli, akin itoka katka María. Ipampa yejuin, María okitlakatili Jesús (xkita Lucas 1:34, 35). Jesús ouajlajka ipan tlaltikpaktli para nochiuas Cristo noso Mesías niman ijkon techmakixtis. a Nochi teotlajtoltin tlen tlajtouayaj itech Mesías onochiujkej ijkuak ouajlajka Jesús. Ika yejon, miyekej ouel okimatkej ika yejua katka Cristo, iKoneuj toTajtsin (Mateo 16:16).
3. ¿Aman kanon nemi Jesús?
Ijkuak Jesús omik nikan ipan tlaltikpaktli, okiyolitijkej ken se espíritu niman, satepan, oksejpa onokuep ne iluikak. Niman ne iluikak “Dios okimakak más ueyilistli yejuan xakaj okse kipiya” (Filipenses 2:9). Yejuin kijtosneki ika Jesús melak ueyixtika. San ika, maka matikilkauakan ika maski melak ueyixtika, san Jehová yejua akin más ueyixtika.
OKSEKI XKASIKAMATI
Más kuajli matikitakan akinon Jesús. Noijki matikitakan tleka melak noneki matikixmatikan.
4. Jesús xyejua toTajtsin
Biblia kijtoua ika, maski Jesús se ángel akin melak kojtik ne iluikak, yejua kitlakamati iTajtsin, Jehová. ¿Tleka ijkon tikijtouaj? Xkitakan VIDEO niman ijkon nenkitaskej ika Jesús xyejua toTajtsin.
Jesús melak ueyixtika, san ika, Biblia noijki techijlia ika Jehová yejua akin más ueyixtika. Xkimitakan textos niman xtlajtokan itech yejuin:
Xkitakan Lucas 1:30-32.
-
Ijkon ken okijto yejon ángel, ¿kenijki noixmatiskia Jesús?
Xkitakan Marcos 1:10, 11.
-
¿Tlenon okakistik ijkuak Jesús onoapolakti?
-
¿Akinon okijto yejon tlajtoltin?
Xkitakan Juan 14:28.
-
¿Akinon más ueyixtika: se tajtli, noso ikoneuj?
-
Jesús okijto ika Jehová yejua iTajtsin, ¿tlenon techititia yejuin?
Xkitakan Juan 12:49.
-
¿Okijto Jesús ika yejua toTajtsin? ¿Tejua tlenon tikijtoskia?
5. Jesús yejua Mesías
Ipan Biblia uajnestiuej miyek teotlajtoltin tlen techpaleuiyaj matikmatikan akinon Mesías, akin toTajtsin okitlapejpeni niman ijkon nochimej mamakisakan. Xkitakan VIDEO. Ompa, nenkimitaskej seki teotlajtoltin tlen techititiaj ika Jesús yejua Mesías.
Xkimitakan yejuin teotlajtoltin ipan Biblia niman xtlajtokan itech yejuin:
Xkitakan Miqueas 5:2 (TNM), niman ijkon nenkimatiskej kanon onoijtojka tlakatiskia Mesías. b
-
¿Onochiuj yejuin teotlajtojli ijkuak otlakat Jesús? (Mateo 2:1).
Xkitakan Salmo 34:20 niman Zacarías 12:10 (TNM), niman ijkon nenkitaskej tlenon yonoijtojka itech kenijki mikiskia Jesús.
-
¿Onochiuj tlen kijtouaj yejuin teotlajtoltin? (Juan 19:33-37).
-
¿Tiknemilia ika Jesús itlaj okichiuj niman ijkon manochiuakan yejuin teotlajtoltin?
-
Aman ika yotikitakej nochi yejuin, ¿tlenon tiknemilia itech Jesús?
6. Melak techpaleuiya tla tikixmatij Jesús
Biblia techijlia tleka melak noneki matikmatikan akinon Jesús niman tlen tekitl yokiseli itech toTajtsin. Xkitakan Juan 14:6 niman 17:3, niman xtlajtokan itech yejuin:
-
¿Tleka melak noneki matikixmatikan Jesús?
Jesús yejua ojtli pampa techpaleuiya matouikakan iuan toTajtsin. Yejua otemachti tlen melauak itech Jehová. Niman, itechkopa Jesús, uelis tikpiyaskej nemilistli tlen xkeman tlamis.
SEKIMEJ KIJTOUAJ: “Iteixpantijkauan Jehová xtlaneltokaj itech Jesucristo”.
-
¿Tejua tlenon tiknemilia?
TLEN OTIUEL
Jesús se ángel akin melak kojtik. Yejua Mesías niman iKoneuj toTajtsin.
¿Kenon titlanankiliskia?
-
¿Kemanon okichijchiujkej Jesús?
-
¿Tlenon kichiuaya Jesús ijkuak xiuajlaya ipan tlaltikpaktli?
-
¿Kenijki tikmatij ika Jesús yejua Mesías?
OKSEKI XKITA
Xkita tlenon más techititia ika Jesús yejua Mesías.
Biblia kijtoua ika Jesús yejua iKoneuj toTajtsin. Xkita tlenon más kijtoua Biblia.
“¿Tleka Jesús noixmati ken iKoneuj toTajtsin?” (Tlamachtijli de jw.org)
Miyekej kijtouaj ika toTajtsin se trinidad, san ika ¿yejuin melauak? Xkita tlen kijtoua Biblia.
“¿Jesús yejua toTajtsin?” (Amatl Tekakistilijketl, 1 de abril de 2009)
Se siuatl okitak tlenon melauak temachtia Biblia itech Jesús. Xkita kenijki okipaleui yejon.
“Se judía kijtoua tleka xok kineltoka tlen yeuejkaui kineltokaya” (¡Xtlachiakan!, mayo de 2013)
a Ipan tlamachtiltin 26 niman 27 tikitaskej tleka nonekiya yakaj matechmakixti niman kenijki Jesús techmakixtia.
Puede que también le interese
TLEN MIYEKPA NOTLAJTOLTILO
¿Kenon nochiua ijkuak se kimachtiaj itech Biblia?
Ijkuak mitsmachtiskej iteixpantijkauan Jehová uelis tijkuis maski san katlejua Biblia. Uelis ompa nemiskej mochanejkauan noso moamigos.
