TLAMACHTIJLI 19

¿Iteixpantijkauan Jehová melauak kichiuaj ken Cristo?

REPRODUCIR EN

Akin tiiteixpantijkauan Jehová tikijtouaj ika tejuamej melauak tikchiuaj ken Cristo. ¿Tleka? Matikitakan kanon kisa tlen tikneltokaj niman tleka totokayotiaj iteixpantijkauan Jehová. Noijki matikitakan kenijki melak totlasojtlaj.

1. ¿Kanon kisa tlen kineltokaj iteixpantijkauan Jehová?

Jesús okijli toTajtsin: “Motlajtoltsin yejua tlen melauak” (Juan 17:17). Nochi tlen kijtouaya Jesús kikixtiaya itech iTlajtol toTajtsin. Akin tiiteixpantijkauan Jehová noijki ijkon tikchiuaj. Kanaj ipan 1870, iteixpantijkauan Jehová, akin ijkuakon kimixmatiyaj ken Nomachtijkej itech Biblia, opeujkej kuajli nomachtiaj iTlajtol toTajtsin. Nochi tlen kineltokayaj kisaya ipan Biblia, maski miyek religiones xyejon tlen temachtiayaj. Sakin, opeujkej tenojnotsaj itech tlen kijtoua Biblia. a

2. ¿Tleka totokayotiaj iteixpantijkauan Jehová?

Jehová kijtoua ika, akin melauak itekipanojkauan, yejuamej itestigos noso iteixpantijkauan pampa kiteijliaj tlen yejua kineki manomati (Hebreos 11:4-12:1, TNM). Yeuejkaui, toTajtsin okijli ikalpan: “Nemejuamej nennotestigos” (xkita Isaías 43:10). Niman Jesús noijki noixmati ken “testigo” (Apocalipsis 1:5). Ika yejon, ipan 1931 ototokayotijkej iteixpantijkauan Jehová. Melak tiyolpakij pampa ijkon totokayotiaj.

3. ¿Kenijki kiteititiaj iteixpantijkauan Jehová ika tetlasojtlaj ijkon ken Jesús?

Jesús melak kintlasojtlaya inomachtijkauan, hasta kimitaya ken ifamilia (xkita Marcos 3:35). Akin tiiteixpantijkauan Jehová noijki melak totlasojtlaj niman toitaj ken se familia. Ika yejon, ijkuak tonotsaj, toijliaj “nokniuj” (Filemón 1, 2). Noijki tiktlakamatij tlanauatijli kampa kijtoua: “Xkintlajsojtlakan nochimej on tokniuan” (1 Pedro 2:17). Akin tiiteixpantijkauan Jehová tikintlasojtlaj tokniuan, ika yejon, tikchiuaj tlen kuajli inpampa niman tikinpaleuiyaj ijkuak inpan nochiua tlen xkuajli.

OKSEKI XKASIKAMATI

Más matikimixmatikan iteixpantijkauan Jehová niman matikitakan tlenon techititia ika yejuamej melauak kichiuaj ken Cristo.

Tlen kineltokaj akin melauak kichiuaj ken Cristo kisa ipan Biblia niman kimijliaj oksekimej tlen ompa kijtoua.

4. Tlen tikneltokaj kisa ipan Biblia

Jehová yokijtojka ika ajsiskia se tiempo ijkuak más kuajli nasikamatiskia tlen kijtoua Biblia. Xkitakan Daniel 12:4 niman xtlajtokan itech yejuin:

Ijkon ken kijtoua yejuin texto, ¿tlenon miyekiyaskia?

Xkita kenijki Charles Russell niman oksekimej akin noijki nomachtiayaj Biblia opeujkej kuajli nomachtiaj iTlajtol toTajtsin. Xkitakan VIDEO niman xtlajtokan itech yejuin:

VIDEO: Notejtemoua tlen melauak itech Biblia (7:45)

Ken otikitakej ipan video, ¿kenijki nomachtiayaj Biblia Charles Russell niman oksekimej akin noijki nomachtiayaj iTlajtol toTajtsin?

¿Tikmatiya yejuin?

Kemantika tikpatlaj seki tlen tikneltokaj. ¿Tleka? Pampa ijkon ken ika yolik uajtlanestiuj niman ijkon tikitaj nochi tlen onka, toTajtsin noijki ika yolik techpaleuijtiuj matikasikamatikan iTlajtol (xkitakan Proverbios 4:18). Melauak ika Biblia xnopatla, san ika, ijkuak más kuajli tikasikamatij se texto, noijki tikpatlaj tlen tikneltokaj.

5. Tikteititiaj ika melauak tiiteixpantijkauan Jehová

¿Tleka ototokayotijkej iteixpantijkauan Jehová? Xkitakan VIDEO niman xtlajtokan itech yejuin:

VIDEO: Ken totokayotiaj kiteititia tlen tikchiuaj (2:40)

¿Tleka melak kuajli ika ototokayotijkej iteixpantijkauan Jehová?

¿Tleka Jehová yotechtlapejpeni niman ijkon matochiuakan iteixpantijkauan? Pampa, miyekej yokijtokej tlen xmelauak itech Jehová, ika yejon, yejua kineki ika iteixpantijkauan makiteijlikan tlen melauak. Matikitakan tlenon miyekej yokiteneuilijkej Jehová.

Seki religiones kijtouaj ika toTajtsin kineki matikueyichiuakan ika imágenes, san ika ¿yejon melauak? Xkitakan Levítico 26:1 niman xtlajtokan itech yejuin:

Ijkon ken kijtoua yejuin texto, ¿kuelita toTajtsin matikueyichiuakan ika imágenes?

Sekimej tlayekankej ipan religiones temachtiaj ika Jesús yejua toTajtsin, san ika ¿yejon melauak? Xkitakan Juan 20:17 niman xtlajtokan itech yejuin:

¿Kijtoua yejuin texto ika Jesús yejua toTajtsin?
Jehová yokimijli iteixpantijkauan makiteijlikan tlen melauak itech yejua niman itech iKoneuj. ¿Tlenon tiknemilia itech yejuin?

6. Tinochimej totlasojtlaj

Biblia kijtoua ika akin melauak kichiuaj ken Cristo yeskiaj kentla ipartes se tlalnakayotl. Xkitakan 1 Corintios 12:25, 26 niman xtlajtokan itech yejuin:

¿Tlenon noneki kichiuaskej akin melauak kichiuaj ken Cristo ijkuak imikniuan tlajyouiyaj?
¿Tejua yotikitak kenijki iteixpantijkauan Jehová kinoititiaj ika notlasojtlaj?

Ijkuak sekimej iteixpantijkauan Jehová tlajyouiyaj, imikniuan nimantsin kitaj kenijki kinpaleuiskej. Xkitakan VIDEO niman xtlajtokan itech yejuin:

VIDEO: Huracán Matthew tlaixpoloua Haití (5:29)

Iteixpantijkauan Jehová kinpaleuiyaj imikniuan akin tlajyouiyaj. ¿Xmelak ika ijkon kiteititiaj ika notlasojtlaj? ¿Tleka ijkon tikijtoua?

Akin melauak kichiuaj ken Cristo tetlasojtlaj niman kinpaleuiyaj akin inpan nochiua tlen xkuajli.

SEKIMEJ KIJTOUAJ: “Iteixpantijkauan Jehová san kemach onesikoj”.

¿Kemanon opeuj kimixmati Jehová nochimej itekipanojkauan ken iteixpantijkauan?

TLEN OTIUEL

Akin tiiteixpantijkauan Jehová melauak tikchiuaj ken Cristo. Tejuamej melak totlasojtlaj niman san sekan tikueyichiuaj toTajtsin. Tlen tikneltokaj kisa ipan Biblia niman tikteijliaj tlen melauak itech Jehová.