IKA tlajtoltin tlen ika okijkuilojkej Biblia, uajlauj ipantsin setenta tlajtoltin ika hebreo scheʼóhl noso ika griego háides, yejuin nochipa onotlalijkej ijkuak tlajtoua itech mikilistli. Ipan seki Biblias notlajtolkuepa kentla “tlalkontli”, “tlatekoyonki” noso “miktlan”. San ika ¿kuajli ijkon ken onotlajtolkuep? ¿Tlenon kijtosneki yejuin ome tlajtoltin? Matikitakan kenon notekitiltiaj ipan Biblia.

Eclesiastés 9:10 kijtoua: “Xtlaj tekitl nion tlanemilijli nion tlaixmatilistli nion tlamachilistli ipan tlalkontli [scheʼóhl], kampa tiauj”. Kuakon, ¿kijtosneki Seol tlalkontli kampa tiktokaj se tochanejkauj? Ka. Ijkuak Biblia tlajtoua itech tlalkontli, xkitekitiltia scheʼóhl nion háides, kitlalia okseki tlajtoltin ika hebreo niman griego (Génesis 23:7-9; Mateo 28:1). Seol noijki xkijtosneki tlalkontli kampa kintokaj miyekej tlaltikpakchanejkej san sekan (Génesis 49:30, 31).

Ijkuak iTlajtol toTajtsin tlajtoua itech “Seol” noso “Hades”, ¿tlenon kijtosneki? Kijtosneki kampa melak miyek onakij mijkatsitsintin xijkon ken ijtik se tlalkontli. Ijkon tikasikamatij pampa ipan Isaías 5:14 kijtoua ika tlalkontli noso Seol melak “koyauak” niman ika “melak patlauak yokitlapo ikamak”. Uelis tikijtoskej ika Seol melak miyekej yokintolo mijkatsitsintin, niman nochipa kineki okseki (Proverbios 30:15, 16). Kampa tetokalo san kipiya kech onaki, san ika, “tlalkontli [scheʼóhl]” xkeman ixui (Proverbios 27:20). Kema, Seol, noso Hades, xkeman temi. Kuakon xkijtosneki tla Seol noso Hades uelis kanaj tikonnextiskej. Ijkuak Biblia tlajtoua ika yakaj yauj ipan Seol noso Hades, kijtosneki ika san kochtika ipan mikilistli.

Ijkuak Biblia techmachtia ika oksejpa yoliuiskej tlaltikpakchanejkej, kuajli tikasikamatij tlenon kijtosneki Seol noso Hades. ToTajtsin iTlajtol kijtoua ika akin ompa yauej, uelis oksejpa yoliuiskej (Job 14:13; Hechos 2:31, TNM; Apocalipsis [Revelación] 20:13, TNM). * Noijki kijtoua ika ompa nemij akin okitekichiuilijkej Jehová niman miyekej akin xokitekichiuilijkej  (Génesis 37:35; Salmo 55:15). Ika yejon, Biblia kijtoua: “Yoliuiskej nochimej, sanken on yejuan yolmelajkej niman on yejuan xyolmelajke” (Hechos 24:15).