ToTajtsin okinyekan ikoneuan Abrahán niman onochiujkej kentla ikalpan, niman okinmakak tlanauatiltin. Yejuin kalpan okitokayoti “Israel” akin kiueyichiuaskiaj niman kitlakamatiskiaj iTlajtol (Salmo 147:19, 20). Ijkon, oksekimej países ueliskiaj nopaleuiskej itech Israel. Xkita Génesis 22:18.

ToTajtsin okintlapejpeni israelitas niman ijkon okiteixpantijkej. Ika tlen yopanok yeuejkaui, nesi kenon okinpaleui toTajtsin ijkuak okitlakamatkej itlanauatiluan (Deuteronomio 4:6). Kuakon, ipampa israelitas, oksekimej ueliskiaj kixmatiskiaj toTajtsin. Xkita Isaías 43:10, 12.

Israelitas xok kuajli onenkej ixpan toTajtsin, niman Jehová okinpatlak. Okintlapejpeni akin melauak kichiuaj ken Cristo (Mateo 21:43; 23:37, 38). Israelitas xok kiteixpantiliaj Jehová, aman, akin yemelak kichiuaj ken Cristo yejuamej akin kimixmatij ken iteixpantijkauan Jehová. Xkita Hechos 15:14, 17.

Jesús okimijli inomachtijkauan kenon tenojnotsaskej niman kenon kichiuaskej oksekimej manosentemakakan itech toTajtsin (Mateo 10:7, 11; 24:14; 28:19, 20). Yejuin tekitl iyejkotika ijkuak xok nochiuas, pampa tinemij sa itlamiyan tonaltin ijkuak kipopoloskej nochi ken nochiua ipan tlaltikpaktli. Itech miyek países Jehová yokinsentlali itekipanojkauan akin kiueyichiuaj ken kineki (Apocalipsis [Revelación] 7:9, 10). Itekipanojkauan toTajtsin kimatij kenon noyolchikauaskej niman kenon nopaleuiskej. Ipan nochiuiyan tlaltikpaktli san se tlamachtijli kiseliaj ijkuak nosentlaliaj. Xkita Hebreos 10:24, 25.

Kanaj ipan xiuitl 1870-1880, achijtsitsintin nomachtijkej ipan Biblia opeujkej nomachtiaj tlen melauak kijtoua Biblia. Yejuamej kimatstoyaj ika Jesús yokimijlika inomachtijkauan kenon tenojnotsaskiaj. Kuakon opeujkej tenojnotsaj itech iTekiuajyo toTajtsin nochiuiyan. Ipan xiuitl 1931 onotokayotijkej ken iteixpantijkauan Jehová. Xkita Hechos 1:8; 2:1, 4, niman 5:42.

Ijkuak onenkej inomachtijkauan Cristo, nemiya se grupo itech tlayekankej tlamachilisejkej akin kintlajpiayaj nochimej tlanechikoltin. Yejon tlakamej kimatstoyaj ika Jesús yejua tlayekanketl ipan nochi tlanechikoltin (Hechos 16:4, 5). Noijki ijkon ipan yejuin tonajli, nemi se Grupo akin Tlayekana niman kinpaleuiyaj tlen kichiuaj iteixpantijkauan Jehová ipan nochiuiyan tlaltikpaktli. Yejuin tlayekankej tlamachilisejkej kiyekanaj kampa nochijchiua amoxtin, notlajtolkuepaj niman kixelouaj tlen nomachtilos itech ipantsin seiscientos tlajtoltin. Kuakon, yejuin Grupo akin Tlayekana ueli kinyolchikaua niman kinyekana cien mil tlanechikoltin ipan nochiuiyan tlaltikpaktli. Ipan nochi tlanechikoltin, nemij tlakamej akin kuajli tekititokej niman yejuamej kintlaliaj matlayekanakan. Yejuin tlakamej kintlasojtlaj niman kintlajpiyaj itekipanojkauan toTajtsin. Xkita 1 Pedro 5:2, 3.

Iteixpantijkauan Jehová kimatstokej kenon teijliskej tlen kualtsin techijlia toTajtsin niman kenon kinpaleuiskej oksekimej manosentemakakan itech toTajtsin. Ijkon ken okichiujkej itlatitlankauan Jesús, yejuamej noijki tenojnotsaj techajchan (Hechos 20:20). Yejuamej noijki kinmachtiaj itech Biblia akin kuelitaj kichiuaskej tlen melauak. Iteixpantijkauan Jehová melak kualtsin nouikaj niman kipiyaj se tajtli akin melak kintlasojtla. Kentla ikniujtin san sekan nopaleuiyaj (2 Tesalonicenses 1:3). Niman ken tekitij, kiyolpaktiaj Jehová niman kinpaleuiyaj oksekimej. Xakaj ijkon paki ipan tlaltikpaktli ken ikalpan Jehová. Xkita Salmo 33:12 niman Hechos 20:35.