Tla tiknekij iuan touikaskej toTajtsin, noneki tikixmatiskej. Akin touan nouikaj kimatij totokayo niman kikuij, ¿xmelak? Ijkon, toTajtsin kineki matikixmatikan niman matijkuikan itoka. ToTajtsin itoka Jehová (Salmo 83:18, Mateo 6:9). Noijki, noneki tikixmatiskej tlen kuelita niman tlen xkuelita, akinon iuan nouika niman itlauelikniuan. Ijkon ken tiuejkauis ijkuak yakaj tikixmatis, Biblia kijtoa ika noneki tikxelos tonaltin uan ijkon tikixmatis Jehová (Efesios 5:15, 16).

Akin iuan nouikaj toTajtsin kichiuaj tlen yejua kuelita. Xnemili intech akin imiuan timouika. Tla tikiminchiuilia tlemach tlen xkuajli niman tikchiua tlen xkuelitaj, ¿ok imiuan timouikas? Tikmatstokej ika ka. Noijki ijkon, tla tiknekij touikaskej iuan toTajtsin, noneki tikchiuaskej tlen kuelita (Juan 4:24).

Xnochi tlaneltokiltin techpaleuiyaj matouikakan iuan toTajtsin. Jesús, akin kuajli iuan nouika toTajtsin, otlajto itech ome ojtli. Se, patlauak niman tentika ika tlaltikpakchanejkej. Yejuin ojtli teuika itech tlapopolouilistli. Okse pitsauak kampa yauej achijtsin tlaltikpakchanejkej. Yejuin ojtli teuika itech nemilistli tlen xkeman tlamis. Yejuin kijtosneki tla tiknekij touikaskej iuan toTajtsin, noneki tikmatiskej kenon kuajli tikueyichiuaskej (Mateo 7:13, 14).