Mikilistli xijkon ken nemilistli. Mikilistli kentla ijkuak se melak kuajli kochtika (Juan 11:11-14). Akin yomijkej xuelij tlakakij, xuelij tlachiaj, nion tlajtoaj niman xuelij itlaj kinemiliaj (Eclesiastés 9:5, 10). Tlaneltokilis xmelauak, kijtoa ika akin yomijkej yauej kampa nemij espíritus onnemi iuan iminmijkatsitsiuan. San ika Biblia xijkon temachtia.

Tlaltikpakchanejkej akin yomijkej xuelis techpaleuiskej nion itlaj texchiuiliskej. Tlaltikpakchanejkej kimilnamikij akin yomijkej niman kintlamaniliaj pampa kinemiliaj ijkon kinyolpaktiaj akin yomijkej. San ika, yejon tlaneltokijli, xkuelita toTajtsin pampa ualeua itech itlakajkayaualis Satanás. Noijki xuelis kinyolpaktiskej akin yomijkej, pampa xok yoltokej. Xtikinmakasiskej akin yomijkej niman xtikinueyichiuaskej. San toTajtsin tikueyichiuaskej (Mateo 4:10).

Akin yomijkej oksepa tlachiaskej. Jehová kintlachialtis akin yomijkej uan ijkon manemikan ipan se xochitlalpan nikan ipan tlaltikpaktli (Juan 5:28, 29; Hechos 24:15). ToTajtsin uelis kiminkuiteuas akin yomijkej ijkon ken tejuamej tiuelij tikiminkuiteuaj akin kochtokej (Marcos 5:22, 23, 41, 42).

Ijkuak kijtoaj xtimikij, yejon se itlakajkayaualis Satanás niman yokichiuj miyekej makineltokakan. Satanás niman xkuakualtin espíritus kintlaneltokiltiaj tlaltikpakchanejkej ika iespíritus akin yomijkej yoltokej niman techuajkuiliaj kokolistli niman okseki tlaueltin. Kemantika Satanás kinkajkayauaj tlaltikpakchanejkej ijkuak temikij. Ika on, Jehová kintlauelita akin kiyejyekoaj tlajtoskej iuan akin yomijkej (Deuteronomio 18:10-12).