Tlen okijkuilo Juan 3:1-36
3 Nemiya se tlakatl akin itoka katka Nicodemo, yejua fariseo katka niman kinyekanaya judíos.
2 Yejua, ika tlayoua okitato Jesús niman okijli: “Rabí, tikmatstokej ika toTajtsin omitsajtitlan para xtemachti, pampa nion se tlakatl xueli kinchiua milagros tlen tejua tikinchiua tla toTajtsin xkipaleuiya”.
3 Jesús okinankili: “Melauak nimitsijlia ika se xuelis kitas iGobierno toTajtsin* tla xok oksejpa uajnemi”.
4 Nicodemo okijli: “¿Kenijki uelis yakaj uajnemis ijkuak yeueuentsin? Xuelis kalakis ipan ijti inan niman ika okpa uajnemis, ¿xmelak?”.
5 Jesús okinankili: “Melauak nimitsijlia ika tla yakaj xuajnemi itech atl niman espíritu, xuelis kalakis ipan iGobierno toTajtsin.
6 Akin uajnemi itech gente noijki gente, niman akin uajnemi itech espíritu noijki espíritu.
7 Maka xmojkatlachia pampa onimitsijli ‘Nemejuamej noneki oksejpa nenuajnemiskej’.
8 Ajakatl teilpitsa kampa kineki niman, maski ueli tikaki, xtikmati kanon oualeuj nion kanon yauj. Ijkon inpan nochiua nochimej akin ouajnenkej itech espíritu”.
9 Kuakon, Nicodemo okitlajtolti: “¿Kenijki ueli nochiua nochi yejuin?”.
10 Jesús okinankili: “¿Tejua titemachtia Israel niman xtikmati nochi yejuin?
11 Melauak nimitsijlia ika titlajtouaj itech tlen tikmatij niman tikteijliaj tlen yotikitakej, pero nemejuamej xnenkiseliaj tlen tejuamej timechijliaj.
12 Tla yonimechnots itech tlen onka ipan yejuin mundo niman maski ijkon xnenkineltokaj, ¿kenijki uelis nenkineltokaskej tla nimechijlia itech tlen onka ne cielo?
13 Noijki, nion se tlakatl xtlejkoua ne cielo san akin ouajtemok de ne cielo, iKoneuj Tlakatl.
14 Niman, ijkon ken Moisés ne ipan tlaluaktli okipilo kouatl, noijki ijkon kipiloskej iKoneuj Tlakatl
15 para nochi akin itech tlaneltokas kipiyas nemilistli tlen xkeman tlami.
16 ”Pampa toTajtsin melak okitlasojtlak yejuin mundo, hasta okitemakak isenteKonetsin* para ijkon nochimej akin kiteititiskej ika itech tlaneltokaj xpopoliuiskej, yej kipiyaskej nemilistli tlen xkeman tlami.
17 Pampa toTajtsin xokuajtitlan iKonetsin ipan yejuin mundo para makitlajtlakolmaka yejuin mundo, okuajtitlan para mamakisa yejuin mundo ipampa.
18 Akin kiteititia ika itech tlaneltoka xkitlajtlakolmakaskej. Akin kiteititia ika xtlaneltoka yokitlajtlakolmakakej, pampa xkiteititia ika tlaneltoka itech itoka isenteKonetsin toTajtsin.
19 Ipampa yejuin kintlajtlakolmakaskej: tlauijli ouajla ipan yejuin mundo niman yejuamej xokitlasojtlakej tlauijli, nochimej okitlasojtlakej tlayoualyotl pampa kichiuayaj tlen xkuajli.
20 Pampa akin kichiua tlen xkuajli kitlauelita tlauijli niman xyauj kampa tlauijli, para ijkon maka makimatikan tlen kichiua.
21 Pero akin kichiua tlen melauak yauj kampa tlauijli, para kuajli manesi ika kichiua tlen toTajtsin kineki”.
22 Satepan, Jesús niman akin kinmachtiaya okalakkej ipan se pueblito tlen onkatka Judea, niman ompa imiuan onen achijtsin tiempo niman teapolaktiaya.
23 Pero noijki Juan teapolaktiaya, ne Enón, tlen nisiuj onka Salim, pampa ompa onkatka miyek atl, niman miyekej uajlayaj niman noapolaktiayaj;
24 Juan ueliya ijkon kichiuaya pampa xekitsakuayaj.
25 Kuakon, akin Juan kinmachtiaya otlajtojkej iuan se judío itech kenijki nochipauaskiaj ixpan toTajtsin.
26 Sakin, oyajkej niman okijlijkej Juan: “Rabí, xkita, yejon tlakatl akin iuan tinemiya ne okse lado de río Jordán, itech akin tejua otitenojnots, teapolaktijtika, niman nochimej iuan yajtokej”.
27 Juan ijkin otenankili: “Xakaj ueli itlaj kiselia tla xkimakaj de ne cielo.
28 Nemejuamej onenkikakkej ijkuak onikijto ‘Nejua xniCristo, nejua onechajtitlankej para maniuajyekatstiuj’.*
29 Novio yejua akin kipiya novia. Pero iamigo novio, ijkuak nisiuj itech nemi niman kikaki, melak yolpaki pampa kikaki itlajtol novio. Yejua ika, aman melak niyolpaki.
30 Yejua más kinpiyas akin kinmachtia, pero nejua xok miyekej nouan nokauaskej”.
31 Akin ualeua ne tlakpak, más ueyixtika xijkon ken oksekimej. Akin ualeua ipan yejuin mundo, de yejuin mundo niman tlajtoua itech tlen nikan onka. Akin ualeua ne ipan cielo más ueyixtika xijkon ken oksekimej.
32 Niman kiteijlia tlen yokitak niman yokikak, pero xakaj kiselia tlen kijtoua.
33 Akin yokiseli tlen kiteijlia kuajli yokitak* ika toTajtsin nochipa kijtoua tlen melauak.
34 Akin toTajtsin okuajtitlan kijtoua tlen yejua okijli, pampa toTajtsin miyek kitemaka iespíritu.*
35 Tajtli kitlasojtla iKoneuj niman nochi yokimaktili.
36 Akin kiteititia ika tlaneltoka itech teKoneuj kipiya nemilistli tlen xkeman tlami, pero akin xkitlakamati teKoneuj xkitas nemilistli, pampa ipan onka itlauel toTajtsin.
Notas
^ Noso “iTekiuajyo toTajtsin”.
^ Xkita isentekonetsin.
^ Noso “tlayekapan yaya”.
^ Ika griego kijtoua “yokitlali isello”.
^ Ika griego kijtoua “xsan kitemachiua iespíritu”.
