Tlen okijkuilo Mateo 19:1-30
19 Jesús nemiya Galilea ijkuak otlan kijtoua nochi yejuin. Satepan oajsik itenko Judea, tlen nokaua okse lado de río Jordán.
2 Melak miyekej iuan oyajkej niman yejua ompa okinpajti akin kualouayaj.
3 Kuakon, sekimej fariseos okinisiuijkej Jesús, niman pampa kinekiyaj kichiuaskej manopopolo okitlajtoltijkej: “¿Se tlakatl uelis kikauas isiuauj ipampa itlaj tlen xueyi kijtosneki?”.
4 Yejua okinnankili: “¿Xonenkileerojkej ika ijkuak toTajtsin otlachijchiuj, okichijchiuj se tlakatl niman se siuatl.
5 Niman okijto ‘Yejua ika, tlakatl kikauas itaj niman inan, nosetilis iuan isiuatsin niman on omemej nochiuaskej san se’?
6 Kuakon, xok omemej, aman yonochijkej san se. Yejua ika, tlen toTajtsin yokisetili, maka makixelo nion se tlakatl”.
7 Yejuamej okijlijkej: “Kuakon, ¿tleka Moisés okijto ika tlakatl noneki kimakas isiuauj se amatl kampa nestika ika iuan yonokauj niman kijlis mauiya?”.
8 Yejua okinnankili: “Moisés omechkauili xmokauakan imiuan nemosiuauan pampa melak nenyoltechikajkej. Pero ijkuak toTajtsin otlachijchiuj, xijkon kinekiya.
9 Nejua nimechijlia ika se san uelis kikauas isiuauj, tla isiuauj auilnentinemi,* pero tla se tlakatl kikaua isiuauj san ipampa itlaj tlen xueyi kijtosneki niman nonamiktia iuan okse, siuapapatla”.
10 Akin kinmachtiaya okijlijkej: “Tla yejon tlen kixnamiki se tlakatl iuan isiuauj, más kuajli tla xtimonamiktis”.
11 Yejua okimijli: “Xnochimej uelis ijkon kichiuaskej, san akin yokinmakakej yejon tetlayokolijli.
12 Sekimej xnonamiktiaj pampa xkuajli ken ouajnenkej niman oksekimej pampa itlaj okintekilijkej, pero sekimej xnonamiktiaj para kipaleuiskej iGobierno toTajtsin.* Tla yakaj ueli ijkon kichiua, makichiua”.
13 Kuakon, okinuajuikilijkej sekimej kokonej para makinteochiua niman makichiua oración inpampa. Pero akin kinmachtiaya okimajuakej.
14 Kuakon Jesús okijto: “Maka itlaj xkimijlikan kokonej, xkinkauilikan manechnisiuikan pampa san akin kichiuaj ijkon ken yejuamej kiseliskej iGobierno toTajtsin”.
15 Sakin, inpan okintlali imauan niman oksekan oyaj.
16 Kuakon, se tlakatl okinisiui niman okitlajtolti: “Maestro, ¿tlenon kuajli noneki nikchiuas para nikselis nemilistli tlen xkeman tlami?”.
17 Jesús okijli: “¿Tleka tinechtlajtoltia itech tlen kuajli? San nemi se akin kuajli. Maski ijkon, tla tikneki nemilistli tlen xkeman tlami, noneki nochipa tikintlakamatis tlanauatiltin”.
18 Yejua okitlajtolti: “¿Katlejua tlanauatiltin?”. Niman Jesús okinankili: “Maka xtemikti, maka xmoteka iuan akin xmoixnamik, maka xtlachteki, maka xtekajkayaua,
19 xtlakaita motaj niman monan niman xkintlasojtla oksekimej ijkon ken tejua timotlasojtla”.
20 Yejon telpochtli okijli: “Nochi yejuin nejua yonikuajchijtiaj, ¿tlenon más noneki nikchiuas?”.
21 Jesús okinankili: “Tla yemelak nochi kuajli tikneki tikchiuas, xnemakati tlen tikpiya niman xkinmaka yejon tomin akin xtlaj kipiyaj, ijkon tikpiyas se tesoro ne ipan cielo. Sakin, xuajla* niman nouan xuiya”.
22 Ijkuak telpochtli okikak yejon, melak onajman niman oyaj pampa miyek tlen kipiaya.
23 Kuakon, Jesús okimijli akin kinmachtiaya: “Nimechijlia ika se rico xnimantsin uelis kalakis kampa iGobierno toTajtsin.
24 Oksejpa nimechijlia ika nimantsin uelis kalakis se camello kampa koyonki aguja pero se rico xnimantsin uelis kalakis kampa iGobierno toTajtsin”.
25 Ijkuak akin kinmachtiaya okikakkej yejon melak omojkatlachixkej, niman okijtojkej: “Kuakon, ¿akinon uelis makisas?”.
26 Jesús imixko okintlajtlatak niman okimijli: “Gente kinemilia ika yejuin xueli nochiua, pero toTajtsin nochi ueli kichiua”.
27 Kuakon Pedro okinankili: “Tejuamej nochi yotikajkej san para mouan tiaskej, ¿tlenon tikseliskej?”.
28 Jesús okimijli: “Kuajli nimechijlia ika ijkuak nochi kiyenkuiliskej niman iKoneuj Tlakatl notlalis ipan itrono, nemejuamej akin nouan yonennenkej nemotlaliskej ipan 12 tronos niman nenkintlajtlakolmakaskej yejon 12 itribus Israel.
29 Niman nochi akin san nopampa kikajteuas ichan, ikniuan tlakamej, ikniuan siuamej, itaj, inan, ikoneuan noso itlaluan kiselis 100 veces más niman kiselis nemilistli tlen xkeman tlami.
30 ”Pero miyekej akin nemij tlayekapan nokauaskej tlakuitlapan, niman akin nemij tlakuitlapan nemiskej tlayekapan.
Notas
^ Ika griego noijtoua pornéia. Xkita auilnemilistli.
^ Ika griego kijtoua “Gobierno tlen onka cielo”.
^ Noso “xuiki”.
