1. ¿Katlejua sekimej tlanauatiltin tlen kipiya Biblia niman kenon techpaleuiya tla tikintlakamatij?

IPAN Biblia, Jehová yotechmakak itlanauatiluan kampa techijlia tlenon kineki matikchiuakan. Yejua techijlia ika xkineki matikinueyichiuakan tajtsitsintin, matitlachtekikan, matitlauanikan noso matiauilnemikan (1 Corintios 6:9, 10). Jesús noijki okitemakak yejuin tlanauatijli: “Xkinmachtikan tlaltikpakchanejkej ipan nochi kalpamej, xkinapolaktikan ipampa itoka toTajtsin niman ipampa Tekoneuj niman ipampa espíritu santo, xkimachtikan makitlakamatikan nochi tlajtlamach tlen yonimechnauati. Niman, ¡xkitakan!, mojmostla nemouan ninemi hasta ijkuak sa achijtsin poliuis ijkuak tlamis tlajtlamach ken nochiua ipan tlaltikpaktli” (Mateo 28:19, 20, TNM). Nochi tlen Jehová niman Jesús techijliaj kichiuaj pampa kinekij kuajli matinemikan. Itlanauatiluan Jehová kijtoua kenon tikintlajpiyaskej tochanejkauan niman kenon melak kuajli matinemikan niman matipakikan. San ika, melak ueyi kijtosneki ijkuak tiktlakamatij itlanauatiluan Jehová, ken ijkuak technauatia matitenojnotsakan, tikyolpaktiaj niman techteochiua.

2, 3. a) ¿Tleka Biblia xnochipa techmaka tlanauatiltin itech nochi tlen tiktlapejpeniaj tikchiuaskej ipan tonemilis? b) ¿Katlejua tlajtoltilistin nonankiliskej ipan yejuin tlamachtijli? (Xkita tlaixkopinajli kampa peua tlen tomachtijtokej).

² San ika, ipan Biblia xnochipa tiknextiskej tlenon tikchiuaskej. Se  neskayotl, xtiknextiskej kampa matechijli ken totlakentiskej. Yejuin teititia ika Jehová melak tlamachilise. Maski tlaltikpakchanejkej ipan nochi tlaltikpaktli tlatlamantik noso sesejneka ken notlakentiaj niman nimantsin nopatla tlakentli tlen yenkuik kisa, Biblia xkeman nopatla. Noijki, xkipiya se lista ika tlanauatiltin itech tekitl, itech ken toyolpaktiaj nion tlen tikchiuaskej niman ijkon xtikualoskej. Jehová kinkauilia ika insejselti niman akin tlayekanaj itech inchanejkauan makitlapejpenikan tlenon kichiuaskej itech tlen yotikonteneujkej.

³ Kuakon, ijkuak tiktlapejpeniskej itlaj tlen melak noneki tikchiuaskej ipan tonemilis niman xonka se tlanauatijli ipan Biblia, uelis totlajtoltiskej: “¿Kineki Jehová kuajli maniktlapejpeni tlen nikchiuas? ¿Yolpakis Jehová ika tlen niktlapejpenis nikchiuas ijkuak xnikpanauiya se tlanauatijli? ¿Kenon kuajli nikmatis tla Jehová yolpakis ika tlen niktlapejpenis nikchiuas?”.

4, 5. ¿Tlenon uelis panos totechkopa niman itech oksekimej ika tlen tiktlapejpeniaj tikchiuaskej?

⁴ Sekimej kinemiliaj ika uelis kitlapejpeniskej san tlen kinekiskej kichiuaskej. San ika, tejuamej tiknekij tikchiuas tlen kiyolpaktia Jehová. Ika yejon, kachtopa itlaj tiktlapejpeniskej tlen tikchiuaskej, noneki tiknemiliskej tlen kijtoua Biblia niman tiktlakamatiskej. Se neskayotl, Biblia techijlia tlen kinemilia toTajtsin itech ken notekitiltia yestli, niman tikchiuaj tlen techijlia (Génesis 9:4; Hechos 15:28, 29). Uelis tiktlajtlaniliskej Jehová matechpaleui matiktlapejpenikan tlen kiyolpaktia.

⁵ Tlen tiktlapejpeniaj tikchiuaskej kichiuas matechpaleui noso matechijtlako. Tla kuajli tiktlapejpeniaj tlen tikchiuaskej, techpaleuis matonisiuikan itech Jehová. Tla xkuajli tiktlapejpeniaj tlen tikchiuaskej, uelis kijtlakos ken touikaj iuan yejua. Noijki tlen tiktlapejpeniaj uelis kinpaleuis noso kimijtlakos oksekimej. Xtiknekij tikchiuaskej itlaj tlen makichiua maka kuajli manomachilikan tokniuan, tlen makiyemanili intlaneltokil noso tikchiuaskej makipiyakan tlauejli tokniuan ipan tlanechikojli. Ika yejon, melak noneki kuajli matiktlapejpenikan tlen tikchiuaskej (xpoua Romanos 14:19; Gálatas 6:7).

6. ¿Tlenon techyekanas ijkuak tiktlapejpeniskej tlen tikchiuaskej?

⁶ Ijkuak Biblia xtechmelajkaijlia tlenon noneki matikchiuakan, ¿kenon uelis kuajli tiktlapejpeniskej tlen tikchiuaskej? Xnoneki tikchiuaskej san tlen tejuamej tiknekij, noneki matiknemilikan tlenon kinamiki tikchiuaskej niman tiktlapejpeniskej tikchiuaskej tlen makiyolpakti Jehová. Kuakon kuajli matikmatstokan ika yejua techpaleuis kuajli matikisatij itech tlen tikchiuaj (xpoua Salmo 37:5). *

7. Ijkuak xonka se tlanauatijli ipan Biblia, ¿kenon uelis tikmatiskej tlen Jehová kineki matikchiuakan?

⁷ ¿Kenon uelis tikmatiskej tlen kiyolpaktia Jehová? Efesios 5:17 techijlia: “Kuajli xkajsikamatikan on tlen kineki [Jehová]”. Ijkuak xonka se tlanauatijli ipan Biblia tlen makijto tlenon noneki tikchiuaskej, noneki matikasikamatikan tlen Jehová kineki matikchiuakan nochipa. ¿Kenon uelis tikchiuaskej yejon? Noneki tikchiuaskej teoyotl niman tijkauiliskej espíritu santo matechyekana.

8. ¿Kenon okasikamat Jesús tlen Jehová kinekiya makichiua? Xkijto ika se neskayotl.

⁸ Jesús nochipa okasikamat tlen Jehová kinekiya makichiua. Se neskayotl, okpa ijkuak tlaltikpakchanejkej xkipiayaj tlen kikuaskej, Jesús okichiuj teoyotl niman okintlakualti ika se milagro (Mateo 14:17-20; 15:34-37). San ika, ijkuak Jesús melak apismikiya ipan tlaluaktli, Diablo okitlatlatak makinkuepa temej ika tlen uelis kikuas niman yejua xokinek (xpoua Mateo 4:2-4). Yejua kuajli kixmatiya iTaj. Ika yejon, kimatiya ika Jehová xkinekiskia makikui espíritu santo san itech tlen yejua kipoloua. Yejua kuajli kimatstoya  ika iTaj kiyekanaskia niman kimakaskia tlakuajli ijkuak yejua kipoloskia.

9, 10. ¿Tlenon uelis techpaleuis kuajli matiktlapejpenikan tlen tikchiuaskej? Xkijto ika se neskayotl.

⁹ Ijkon ken Jesús, uelis kuajli tiktlapejpeniskej tlen tikchiuaskej tla tijkauiliaj Jehová matechyekana. Biblia kijtoua: “Xmokauili ika nochi moyojlo mamitsyekana Jehová, niman maka xmopaleui san ipan motlamachilis. Itech nochi moojuiuan xkauili mamitsyekana, niman yejua mitspaleuis xyolmelaujkanemi. Maka xmochiua titlamachilise ixpan moixtololojuan. Xmojkaita Jehová niman xmejkuani itech tlen xkuajli” (Proverbios 3:5-7). Ijkuak tomachtiaj Biblia niman tomachtiaj ken tlanemilia Jehová, tikasikamatij tlenon kinekij matikchiuakan nochipa. Ijkuak melak kuajli tikixmatij ken tlanemilia Jehová, xouijtika yes tiktlapejpeniskej tikchiuaskej tlen kiyolpaktis. Ijkon, nimantsin tikasikamatiskej tlenon kineki toTajtsin (Ezequiel 11:19).

¹⁰ Xtlanemili itech se siuatl akin yononamikti yauj ontlakoua niman kimitaj zapatos melak kualtsitsintin, san ika, melak patiojkej. Maski xiuan nemi iueuentsin, yejua kimati tlenon kinemilia tla kipopolos miyek tomin tlen ika tlakouas. ¿Kenon kuajli kimati? Yejua youejkauj ika iuan yononamikti, ika yejon yejua kimati kenon kineki iueuentsin makikuikan intomin. Noijki ijkon, ijkuak tomachtiaj ken tlanemilia Jehová niman tlenon yokichiuj yeuejkaui, tikmatij tlenon kineki matikchiuakan nochipa.

11. ¿Tlenon uelis totlajtoltiskej ijkuak tikpouaj noso tomachtiaj Biblia? (Xkita recuadro “ Ijkuak timomachtia Biblia, xmotlajtolti”).

¹¹ ¿Kenon uelis tikmatiskej tlenon kinemilia Jehová? Tla mojmostla tikpouaj niman tomachtiaj Biblia, melak techpaleuis. Ijkuak tikchiuaskej yejuin, uelis totlajtoltiskej: “¿Tlenon nechmachtia yejuin itech Jehová? ¿Tleka yejua okichiuj ijkin?”. Niman ijkon ken okichiuj David, noneki tiktlajtlaniliskej Jehová matechpaleui  kuajli matikixmatikan. Yejua okijto: “Xchiua manikixmati moojuiuan, Jehová; xnechititi moojuiuan. Xchiua maninejnemi ipan tlen melauak niman xnechmachti, pampa tejua noTajtsin akin nechmakixtia. Motech yonitlamachiak nochi tonajli” (Salmo 25:4, 5). Ijkuak tomachtiskej itlaj itech Jehová, matiknemilikan kemanon niman kanon uelis tijkuiskej tlen yotomachtijkej. ¿Uelis tikchiuaskej tlen yotomachtijkej kampa titekitij, ipan kaltlamachtijli, kampa titenojnotsaj noso itech tochanejkauan? Ijkuak tiknemiliaj kemanon niman kanon uelis tikchiuaskej tlen tomachtiaj, xouijtika tikmatiskej kenon kineki Jehová matikchiuakan.

12. ¿Kenon uelis amatlajkuiloltin niman tlanechikoltin techpaleuiskej kuajli matikixmatikan ken tlanemilia Jehová itech seki tlemach?

¹² Noijki, uelis tikmatiskej kenon tlanemilia Jehová tla kuajli tijkaki tlen techmachtia ikalpan itech Biblia. Se neskayotl, ijkuak noneki tiktlapejpeniskej tlenon tikchiuaskej, matiktejtemokan ipan Índice de las publicaciones Watch Tower niman Guía de estudio para los testigos de Jehová tlen techpaleuis matikmatikan ken tlanemilia Jehová. Noijki uelis techpaleuis ijkuak kuajli titlakakij ipan tlanechikoltin, titlanankiliaj niman ijkuak titlanemiliaj itech tlen tomachtiaj. Yejuin techpaleuis matitlanemilikan ken Jehová tlanemilia. Tla ijkon tikchiuaj, tiueliskej tiktlapejpeniskej tlen kiyolpaktia niman yejua techteochiuas.

13. Xkijto ika se neskayotl kenon tejuamej uelis kuajli tiktlapejpeniskej tlen tikchiuaskej ijkuak kachtopa tikitaj tlen kinemilia Jehová.

¹³ Matikitakan se neskayotl kenon uelis kuajli tiktlapejpeniskej tlen tikchiuaskej ijkuak tikitaj ken tlanemilia Jehová. Kanaj tikuelitaskia timochiuas precursor. Tejua yotikpatlak itlaj ipan monemilis niman ijkon uejkaujtipan titenojnotsas. San ika, ok xkuajli tikmati tla yemelak tipakis san ika achijtsin tomin niman xmiyek tlemach. Kema, Biblia xkijtoua tla noneki tochiuaskej precursores ika tiktekichiuiliskej Jehová. Uelis kuajli tiktekichiuilitiaskej toTajtsin san ken akin tenojnotsa akin yonoapolakti. San ika, Jesús okijto ika Jehová kinteochiuaj akin nosentemakaj itech iTekiuajyo (xpoua Lucas 18:29, 30). Biblia noijki kijtoua ika Jehová kiyolpaktia ijkuak tikchiuaj nochi tlen tiuelij ika tikueyichiuaskej niman yejua kineki ika matiktekichiuilikan ika pakilistli (Salmo 119:108; 2 Corintios 9:7). Ijkuak tikchiuaj teoyotl itech yejuin niman titlanemiliaj, uelis tiktlapejpeniskej tlen kuajli tikchiuaskej ken noneki niman tlen Jehová uelis kiteochiuas.

14. ¿Kenon uelis tikmatis tla ken timotlakentis kiyolpaktis Jehová?

¹⁴ Onka okse neskayotl: Tejua melak tikuelita kenon nesi se tlakentli. San ika, tikmati ika sekimej tokniuan ipan tlanechikojli kanaj xkuajli kitaskej tla ijkon timotlakentis. Biblia xtechijlia katlejua tlakentli kema niman ka. Kuakon, ¿kenon uelis tikmatiskej Jehová tlenon kinemilia? Biblia techijlia: “On siuamej ma notlakentikan kuajli ken noneki. [...] Ma ka sanoyej ma kualnextikan intson. Ma ka notlajmachyotikan ikan oro nion ikan perlas, nion ma ka ma kitlalikan tlakentli yejuan sanoyej patioj. Yej ma kichiuakan kuajli tekitl ken on siuamej yejuan kiteneuaj kitlakaitaj Dios” (1 Timoteo 2:9, 10). Kema, tinochimej akin tiktekichiuiliaj Jehová uelis tikchiuaskej yejuin tlajtoltin. Ijkuak toyektlaliaj ken noneki, tiknemiliaj ken uelis nomachiliskej sekimej itech ken totlakentiaj niman ken tinesij. Pampa tikintlasojtlaj tokniuan, maka matikchiuakan itlaj tlen uelis kichiuas xkuajli manomachilikan (1 Corintios 10:23, 24; Filipenses 3:17). Tla titlanemiliaj itech tlen kijtoua Biblia niman ken tlanemilia Jehová, uelis tikyolpaktiskej ika tlen tiktlapejpeniskej tikchiuaskej.

15, 16. a) ¿Kenon nomachilis Jehová tla tejuamej titlanemilijtokej itech auilnemilistli? b) Ijkuak tiktlapejpeniaj tlen ika toyolpaktiskej, ¿kenon uelis tikmatiskej tlen kiyolpaktia Jehová? c) ¿Tlenon noneki tikchiuaskej ijkuak tiktlapejpeniskej tlen melak ueyi kijtosneki?

¹⁵ Ipan Biblia tomachtiaj kenon nomachilia  Jehová niman noyolkokoua ijkuak tlaltikpakchanejkej kichiuaj tlen xkuajli niman ijkuak tlanemiliaj itech tlen xkuajli (xpoua Génesis 6:5, 6). * Kuajli nesi ika Jehová xkineki ika tejuamej matitlanemilikan itech auilnemilistli. Tla titlanemiliaj itech yejon tlemach, sakin uelis tikchiuaskej. Ika yejon, Jehová kineki ika tejuamej matiknemilikan tlen chipauak niman tlen kuajli. Santiago, inomachtijkauj Jesús, okijto ika akin kipiyaj itlamachialis Jehová “chipajkej” niman “kinekij yolseuilistli inuan oksekimej, niman nemij yolyemankej, [...] sanoyej teiknelianij, niman kitechiuiliaj miyek tlajtlamach tlen kuajli, niman xkeman techikoitaj” (Santiago 3:17). Kuakon, Biblia techmachtia ika maka matoyolpaktikan ika tlen uelis kichiuas matiknemilikan noso matikileuikan tlen tsokuiltik niman tlemach tlen xkuajli. Tla kuajli tikasikamatij tlen Jehová kitlasojtla niman kitlauelita, xouijtika tikmatiskej katlejua amoxtin, películas noso videojuegos tiktlapejpeniskej, niman xnonekis tikintlajtoltiskej oksekimej.

¹⁶ Ijkuak nonekis tiktlapejpeniskej itlaj, miyekpa onka miyek tlen uelis kiyolpaktis Jehová. San ika, ijkuak nonekis tiktlapejpeniskej itlaj tlen melak ueyi kijtosneki, kuajli yes tla tiktlajtlaniliaj tlajtolpaleuilistli se tlayekanketl, okse tokniuj akin uelis techpaleuis noso se tokniuj siuatl (Tito 2:3-5; Santiago 5:13-15). Kema, xnoneki matikijlikan yakaj makitlapejpeni topampa tlen tejuamej tikchiuaskiaj. Noneki matitlanemilikan itech tlen yotomachtijkej ipan Biblia niman ijkon kuajli tiktlapejpeniskej tlen tikchiuaskej (Hebreos 5:14). Pablo, itlatitlankauj Cristo, okijto: “Cada se tlaltikpaktlakatl kinomamaltis on yejuan kichiua nikan ipan in tlaltikpaktli” (Gálatas 6:5).

17. ¿Kenon techpaleuiya ijkuak tlen tiktlapejpeniaj tikchiuaj kiyolpaktia toTajtsin?

¹⁷ Ijkuak tiktlapejpeniskej tikchiuaskej tlen kiyolpaktia Jehová, uelis tonisiuiskej itech, kuelitas tlen tikchiuaskej niman techteochiuas (Santiago 4:8). Kuakon, totlaneltokil itech Jehová melak ueyiyas. Ika yejon, matitlanemilikan tlen tikpouaj ipan Biblia niman ijkon uelis tikasikamatiskej kenon tlanemilia Jehová. Kema, nochipa onias itlaj yenkuik tlen tomachtiskej itech Jehová (Job 26:14). San ika, tla tochikauaj tomachtiaj itech yejua aman, titlamachilisejkej yeskej niman uelis kuajli tiktlapejpeniskej tlen tikchiuaskej (Proverbios 2:1-5). Intlanemilil tlaltikpakchanejkej niman tlen kinemiliaj kichiuaskej nopatla, san ika, Jehová xkeman nopatla. David okijto: “Itlajtolpaleuilis Jehová nochipa onias; itlanemililuan iyojlo uejkauiskej niman xkeman popoliuiskej” (Salmo 33:11). Kuajli nesi, uelis melak kuajli tiktlapejpeniskej tlen tikchiuaskej ijkuak tomachtiaj titlanemiliskej ken Jehová tlanemilia niman tikchiuaskej tlen kiyolpaktia.