“¿Kech uejkauis, Jehová, ika kipiya ika nitsajtsis menechpaleuikan, niman, tejua xtijkaki? ¿Kech uejkauis ika kipiya ika niktlajtlanis tlapaleuilistli ipampa tlen xkuajli nochiua, san ika, xtlaj tikchiua?” (Habacuc 1:2, 3). Ijkon okijto Habacuc, se tlakatl yolkuajli akin kiyolpaktiaya toTajtsin. ¿Okijto yejuin pampa xtlaneltokaya itech? Ka, xijkon. Niman toTajtsin hasta okijli ika yokitlali se tonajli ijkuak kipopolos tlen tetlajyouiltia (Habacuc 2:2, 3).

Ijkuak tejua noso yakaj akin tiktlasojtla tlajyouiya, xouijtika tiknemilis ika toTajtsin melak uejkaui ika kichiuas tlen yokijto niman ika nonekiskia nimantsin makichiujtiuetsi. San ika Biblia kuajli techijlia ika “toTeko xkokotona itekiu ken sekimej kinemiliaj, yej nochi kichijtiu ijkuak contocarojtiu. Ipan in tonaltin techpialia ijyouilistli, pampa nion se tlakatl xkineki ma poliui, yej kineki para nochimej ma noyolpatlakan” (2 Pedro 3:9).

Sa achijtsin poliui. Jesús okiteneuj tlen nochiuaskia “ijkuak tlamis tlajtlamach ken nochiua ipan tlaltikpaktli” niman ika yejuin kitaskiaj tlaltikpakchanejkej itech se generación (Mateo 24:3-42). Ipan yejuin tonaltin, inochiujtok yejuin teotlajtojli, tlen kiteititia ika tlen kichiuas toTajtsin inpampa tlaltikpakchanejkej, sa achijtsin poliui. *

San ika, ¿uelis toTajtsin kipopolos tlajyouilistli? Ijkuak Jesús onen ipan tlaltikpaktli, okiteititi ika toTajtsin uelis kipopolos tlen kintlajyouiltia tlaltikpakchanejkej. Matikimitakan seki neskayomej.

Tlen tlaixpoloua. Se tonajli, ijkuak Jesús niman itlatitlankauan yayaj ipan mar tlen onka Galilea, opeuj chikauak ajakakiyaui niman yejuin ikichiujtoya ika barco tlen ipan yayaj maapolaki. Ijkuakon Jesús okiteititi ika, yejua niman iTaj, uelij kiyekanaj tlen onka ipan tlaltikpaktli (Colosenses 1:15, 16). Yejua san okijto: “‘Xmotelti, niman ma ka sa tlamach xchiua’. Niman kemaj ouajnoteltij on ajakatl. Nimantsin nochi okaktiaj, niman nochi kuajli onokau” (Marcos 4:35-39).

Kokolistin. Miyekej tlaltikpakchanejkej kimatiyaj ika Jesús ueliya kinpajtiaya akin xtlachiayaj, koxomej, akin kipiayaj epilepsia, akin kipiayaj lepra niman okseki kokolistin. Biblia kiteneua ika Jesús “okimpajtij nochimej on kokoxkej” (Mateo 4:23, 24; 8:16; 11:2-5).

Apistli. Ipan itenojnotsalis, Jesús okpa okitekitilti kojtilistli tlen okimakak iTaj niman ijkon okimiyekili achijtsin tlakuajli tlen kipiaya, ijkon okintlakualti miyekej tlaltikpakchanejkej (Mateo 14:14-21; 15:32-38).

Mikilistli. Ijkuak Jesús nemiya ipan tlaltikpaktli okinyoliti yeyi tlaltikpakchanejkej, se itech yejuamej ikipiaya naui tonajli ika yomijka. Yejon kuajli kiteititia ika Jehová ueli kinyolitia akin yomijkej (Marcos 5:35-42; Lucas 7:11-16; Juan 11:3-44).