1, 2. Sakin ijkuak Jesús oyaj ipan iluikak, ¿kanaj tlenon onotlajtoltijkej itlatitlankauan?

ITLATITLANKAUAN Jesús ijkatoyaj ipan tepetl itoka olivos niman konitstoyaj inTlamachtijkauj niman akin iuan nouikaj, Jesús. Yejua opeuj tlejkoua niman moxtli opeuj kitlapachoua (Hechos 1:9, 10). Kanaj ipan ome xiuitl yejua yokinmachtijka, yokinyolchikaujka niman yokinyekanka. San ika, aman xok nemiya inuan. ¿Tlenon kichiuaskiaj?

² Ijkuak xiyaya ipan iluikak, Jesús okimijli inomachtijkauan: “Nennechteixpantiliskej ne Jerusalén, niman imanyan Judea, niman Samaria, niman nochiuiyan ipan in tlaltikpaktli” (Hechos 1:8). ¿Kenon ueliskia kichiuaskej yejon tekitl? Jesús yokimijlika ika iespíritu santo toTajtsin kinpaleuiskia (Hechos 1:5). San ika ¿akinon kinyekanaskia? ¿Akinon kiyekanaskia tenojnotsalistli ipan nochi tlaltikpaktli? Itlatitlankauan Cristo kimatiyaj ika Jehová yokintekitiltijka tlakamej makinyekanakan israelitas yeuejkaui. Kuakon yejuamej notlajtoltiayaj tla Jehová aman kitlapejpeniskia se yenkuik tlayekanketl.

3. a) Sakin ijkuak Jesús oyaj ipan iluikak, ¿tlenon melak ueyi kijtosneki nonekiya kitlapejpeniskej itlatitlankauan? b) ¿Tlenon tlajtoltilistin tikinnankiliskej ipan yejuin tlamachtijli?

 ³ Sakin ijkuak oyaj ipan iluikak, inomachtijkauan onomachtijkej iTlajtol toTajtsin, okichiujkej teoyotl niman okitlapejpenijkej Matías akin okipatlak Judas Iscariote akin katka ika majtlaktli uan ome itlatitlankauj Cristo (Hechos 1:15-26). ¿Tleka kitayaj yejuamej niman Jehová ika melak nonekiya makitlapejpenikan okse? Inomachtijkauan okasikamatkej ika nonekiya yeskiaj majtlaktli uan ome itlatitlankauan Cristo * (xkita nota). Jesús yokintlapejpenijka itlatitlankauan niman okinmachti makichiuakan se ueyi tekitl ipan ikalpan toTajtsin. ¿Tlenon yejon tekitl? ¿Kenon Jehová niman Jesús okinmachtijkej makichiuakan tekitl? ¿Kenon noijki nochiua ipan yejuin tonajli? ¿Kenon uelis “[ti]kinmelnamiki[skej] [to]tlayekankauan”? Kema, ¿kenon tikilnamikiskej “tekitketl yejuan nochipa kichiua ken iteko kinauatia niman kipia kuajli itlamachilis [‘tekitketl yolmelauak niman tlamachilise’, TNM]? (Hebreos 13:7; Mateo 24:45).

4. ¿Tlenon tekitl okipixkej itlatitlankauan Cristo niman tlayekankej ipan Jerusalén?

⁴ Itlatitlankauan Cristo opeuj tlayekanaj ipan kachtopa tlanechikojli ipan pentecostés itech xiuitl 33. Biblia kijtoua ika “Pedro ouajnotelkets inuan on majtlaktli uan se apóstoles” niman okinmachti melak miyekej tlen melauak itech makixtilistli (Hechos 2:14, 15). Miyekej opeuj kichiuaj ken Cristo. Sakin itech yejuin, yejuamej nochipa “kuajli nouikayaj ken on apóstoles kitemachtiayaj” (Hechos 2:42). Itlatitlankauan Cristo noijki kitayaj kenon notekitiltis tomin ipan tlanechikojli (Hechos 4:34, 35). Yejuamej okimachtijkej ikalpan toTajtsin niman okichiujkej teoyotl ipampa, ijkuak okijtokej: “Tejuamej xtikajkauaskej ika tikchiuaskej oración niman ika tiktemachtiskej itlajtol Dios” (Hechos 6:4). Niman okintitlankej akin youejkauj tenojnotsaj matenojnotsatij ipan kalpamej kampa xkeman notenojnotsaya (Hechos 8:14, 15). Sakin oksekimej tlayekankej tlapejpeniltin iuan itlatitlankauan Cristo opeuj tlayekanaj ipan tlanechikojli. Ken grupo akin tlayekana, okinyekan nochi tlanechikoltin (Hechos 15:2).

5, 6. a) ¿Kenon espíritu santo okimakak chikaualistli grupo akin tlayekana? (Xkita tlaixkopinajli kampa peua tlen tomachtijtokej). b) ¿Kenon iluikaktekitkej okipaleuijkej grupo akin tlayekana? c) ¿Kenon iTlajtol toTajtsin okiyekan grupo akin tlayekana?

⁵ Akin kichiuayaj ken Cristo ipan kachtopa siglo kimatiyaj ika Jehová kiyekantoya grupo akin tlayekana ipampa Jesús. ¿Tleka kuajli kimatstoyaj yejon? Kachtopa, espíritu santo okimakak chikaualistli grupo akin tlayekana (Juan 16:13). Nochimej tlapejpeniltin kiseliaj espíritu santo, san ika, espíritu santo okinmakak chikaualistli itlatitlankauan Cristo makimatikan kenon kichiuaskej intekiyo ken tlayekankej. Se neskayotl, ipan  xiuitl 49 espíritu santo okiyekan grupo akin tlayekana makinemili tlenon nochiuas itech circuncisión. Tlanechikoltin okichiujkej tlen okimijlikej. Ika yejon, “noyolchikauayaj ipan intlaneltok niman on tlaneltokakej mojmostla más miyekixtiayaj” (Hechos 16:4, 5). Ipan amatlajkuilojli itech circuncisión tlen okintitlanilijkej tlanechikoltin, tikitaj ika grupo akin tlayekana kipiaya iespíritu santo toTajtsin niman okiteititi kualneskayomej ken tlasojtlalistli niman tlaneltokijli (Hechos 15:11, 25-29; Gálatas 5:22, 23, TNM).

⁶ Ika ome, iluikaktekitkej okipaleuijkej grupo akin tlayekana. Se neskayotl, se iluikaktekitketl okijli Cornelio makinexti Pedro itlatitlankauj Cristo. Sakin ijkuak Pedro okinojnots Cornelio niman ichanejkauan, okiselijkej espíritu santo maski yejuamej xonochiuilijkej circuncisión. Kuakon, Cornelio akin xkatka judío yejua kachtopa onochiuj ken akin kichiua ken Cristo maski xonochiuili circuncisión. Ijkuak itlatitlankauan Cristo niman oksekimej tokniuan okimatkej yejuin, kuajli okiselijkej tlen kinekiya toTajtsin. Ika yejon, kuajli okinselijkej ipan tlanechikojli akin xkatkaj judíos niman xonochiuilijkej circuncisión (Hechos 11:13-18). Itech yejuin, kuajli tikitaj ika iluikaktekitkej otlapaleuijkej itech tenojnotsalistli tlen kiyekantoya grupo akin tlayekana (Hechos 5:19, 20). Ika yeyi, iTlajtol toTajtsin okiyekan grupo akin tlayekana. Yejuin tlakamej okitekitiltijkej iTlajtol toTajtsin ika kitlapejpeniskej tlenon kichiuaskej itech tlaneltokiltin niman ika kinyekanaskej tlanechikoltin (Hechos 1:20-22; 15:15-20).

7. ¿Tleka uelis tikijtoskej ika Jesús okinyekan akin kachtopa okichiujkej ken Cristo?

⁷ Maski grupo akin tlayekana kipiaya tlanauatijkayotl ipan tlanechikojli, kimatiya ika Jesucristo yejua katka iTlayekankauj. ¿Kenon tikmatij yejuin? Pablo, itlatitlankauj Cristo, okijto ika Cristo sekimej okintlali ken tlatitlankej. Yejua noijki okijto ika Cristo “yejuan tlayekanketl” ipan tlanechikojli (Efesios 4:11, 15). Yejuamej xokimixmatkej ika itokayo se itlatitlankauj Cristo akin ueyixtoya, yejuamej “okintokayotijkej cristianos” (Hechos 11:26). Pablo kimatiya ika melak ueyi kijtosnekiya kichiuaskej tlen temachtia Biblia tlen temachtiayaj itlatitlankauan Cristo niman oksekimej akin tlayekanayaj. Hasta Pablo okijto: “Pero nikneki xkajsikamatikan ika [...] Cristo yejua tlayekanki ipan cada tlakatl”. Ika yejuin tlajtoltin noijki tlajtouaya itech nochimej akin nemiyaj ipan grupo akin tlayekana. Sakin Pablo noijki okijto: “Dios tlayekanki itech Cristo” (1 Corintios 11:2, 3). Kuajli nesi ika Jehová yokitlapejpenijka iKoneuj, Jesucristo, matlayekana ipan tlanechikojli.

8, 9. ¿Tlenon ueyi tekitl okipix tokniuj Russell?

⁸ Kanaj ipan xiuitl 1870, Charles Taze Russell niman sekimej akin iuan nouikayaj opeuj kiyejyekouaj kiueyichiuaskej toTajtsin ken temachtia Biblia niman kinpaleuiskej oksekimej noijki makichiuakan. Yejuin noijki kijtosnekiya kinpaleuiskej tlaltikpakchanejkej akin tlajtouaj okseki tlajtoltin. Ika yejon, ipan xiuitl 1884 ononek notlalis Zion’s Watch Tower Tract Society niman tokniuj Russell yejua onochiuj presidente * (xkita nota). Yejua melak kuajli onomachti Biblia niman xonomojti kimijlis oksekimej ika tlen temachtiayaj ipan teopan ken Trinidad niman ika tikpiyaj itlaj tlen xueli miki xuajnestiuj ipan Biblia. Yejua  okasikamat ika ijkuak Cristo nokuepaskia, xueliskia yakaj kitas ika ixtololojuan niman ika intonaluan akin “xhebreos [...] tlamis[kiaj]” ipan xiuitl 1914 (Lucas 21:24). Tokniuj Russell okikuik itiempo, ichikaualis niman itomin ika kinmachtis tlen melauak oksekimej. Kuajli nesi ika Jehová niman Jesús okitekitiltijkej tokniuj Russell matlayekana ipan tonaltin ijkuak melak nonekiya.

⁹ Tokniuj Russell xkinekiya ika tlaltikpakchanejkej makiueyikaitakan. Ipan xiuitl 1896, okijkuilo ika yejua niman oksekimej tlayekankej xkinekiyaj makinueyiteneuakan. Yejuamej xokinejkej makimixmatikan ika tlajtoltin tlen ika noueyiteneua se tlaltikpakchane. Noijki xokinejkej ika nion se grupo makixmatikan ika intoka. Sakin yejua okijto: “Yejuin xitekiyo se tlakatl”.

10. a) ¿Kemanon okitlali Jesús “tekitketl” yolmelauak niman tlamachilise? b) ¿Xkijto kenon kuajli onasikamat ika Grupo akin Tlayekana tlamantik noso sejneka itech Sociedad Watch Tower?

¹⁰ Ipan 1919, yeyi xiuitl sakin ika tokniuj Russell yomijka, Jesús okitlali “tekitketl” yolmelauak niman tlamachilise. ¿Tleka onotlali? Yejua kinmakaskia inomachtijkauan Jesús tlamachtijli tlen ualeua itech toTajtsin kentla “tlen kikuaskej ijkuak noneki” (Mateo 24:45). Hasta ipan yejon kachtopa xiujtin, se pitentsin grupo ika tokniuan tlapejpeniltin ipan oficina kampa noyekanaj nochi sucursales, tlen onka ipan Brooklyn (Nueva York), okinmakak inomachtijkauan Jesús tlamachtijli tlen ualeua itech toTajtsin. Tlajtojli “grupo akin tlayekana” opeuj uajnestiuj ipan toamatlajkuiloluan ipan xiuitl 1940 ika tlayekapan. Ipan yejon xiujtin, “grupo akin tlayekana” ika noteneuayaj tlayekankej itech Watch Tower and Tract Society. San ika, ipan xiuitl 1971, kuajli onasikamat ika Grupo akin Tlayekana tlamantik noso sejneka itech Sociedad Watch Tower, tlen notekitiltia ika tekiuajkej matekauilikan manotenojnotsa. Ipan yejon tonaltin ika tlayekapan, tokniuan tlapejpeniltin ueliskiaj teuan yeskej itech Grupo akin Tlayekana maski xteuan yeskej itech Sociedad Watch Tower. Sakin tokniuan akin nopouaj itech “oksekimej borregos” yotlapaleuijkej ken tlayekankej itech Sociedad Watch Tower niman itech okseki tlen yonotlalijkej tlen notekitiltiaj ipan ikalpan toTajtsin. Ika yejon, Grupo akin Tlayekana san kitemaka tlamachtijli niman tlayekanalistli tlen kisa itech Biblia (Juan 10:16; Hechos 6:4). La Atalaya 15 julio 2013 otechtomili ika “tekitketl” yolmelauak niman tlamachilise yejua se pitentsin grupo ika tokniuan tlapejpeniltin akin noixmati ken Grupo akin Tlayekana.

11. ¿Kenon kitlapejpenia tlen kichiuas Grupo akin Tlayekana?

¹¹ Grupo akin Tlayekana kitlapejpenia tlen kichiuas ken san se grupo ijkuak nosentlaliaj san sekan nochi semanas. Yejuin tlanechikojli kinpaleuiya nochimej makipiyakan san se tlanemilijli niman san sekan manemikan (Proverbios 20:18). Nion se tokniuj akin teuan  itech Grupo akin Tlayekana ueyixtika intech oksekimej itech yejon grupo. Ika yejon, nochi xiujtin nopatlatiuej tokniuan akin tlayekanaj ipan intlanechikol (1 Pedro 5:1). Yejuin noijki ijkon kichiuaj itech chikuasen comités tlen kipiya Grupo akin Tlayekana. Nion se tokniuj itech Grupo akin Tlayekana kinemilia ika ueyixtika itech ikniuan. Nochimej yejuamej noijki ken se akin kiselia tlamachtijli tlen ualeua itech toTajtsin niman kichiua itlayekanalis tekitketl yolmelauak.

12. ¿Tlenon tlajtoltilistin tikinnankiliskej sakin?

¹² Grupo akin Tlayekana toTajtsin xiuan nonotsa niman kemantika nopopoloua. Ika yejon, uelis nopopolos ijkuak techtomilis seki itech Biblia noso ken kiyekana ikalpan toTajtsin. Se neskayotl, ipan Índice de las publicaciones Watch Tower kipiya “Aclaración de creencias”, kampa uajnestiuj se lista ken yonoyektlali ken tikasikamatij tlamachtiltin  itech Biblia tlen opeuj notetomilia itech xiuitl 1870 ika tlayekapan. Jesús okijto ika tekitketl yolmelauak techmakaskia kuajli tlamachtijli tlen ualeua itech toTajtsin. Kuakon aman uelis tiknankiliskej tlajtoltilistli tlen okichiuj Jesús: “¿Akinon on tekitketl yejuan nochipa kichiua ken iteko kinauatia niman kipia kuajli itlamachilis?” (Mateo 24:45). ¿Tlenon teititia ika Grupo akin Tlayekana yejua tekitketl yolmelauak? Matikitakan yeyi tlemach tlen okipaleui grupo akin tlayekana ipan itonaluan itlatitlankauan Cristo.

13. ¿Kenon espíritu santo yokipaleui Grupo akin Tlayekana?

¹³ Espíritu santo kipaleuiya Grupo akin Tlayekana. Espíritu santo yokipaleui Grupo akin Tlayekana makasikamati tlen melauak itech Biblia tlen yeuejkaui xnasikamatiya. Se neskayotl, xtlanemili itech kenon kuajli yonasikamat tlen tikneltokaj tlen kemach yotikteneujkej. Nion se tlaltikpakchane xueliskia kasikamatis niman tetomilis “tlajtlamach yejuan más ueyi kijtosnekij itech Dios” san iselti (xpoua 1 Corintios 2:10). Grupo akin Tlayekana nomachilia ken Pablo ijkuak okijto: “Ijkuak tejuamej titemachtiaj  ika on tlajtlamach, tikchiuaj ken iEspíritu Dios techijlia, niman xken kisa ipan totlamatkilis” (1 Corintios 2:13). Ipan miyek xiujtin, onkatka tlamachtiltin tlen xmelauak niman xkuajli tlayekanalistli. San ika ¿tleka yomiyekiyak tlen yonasikamat itech Biblia itech xiuitl 1919 ika tlayekapan? San pampa toTajtsin yotlapaleui ika iespíritu santo.

14. Ijkon ken kijtoua Apocalipsis 14:6, 7, ¿kenon iluikaktekitkej kipaleuiyaj Grupo akin Tlayekana niman ikalpan toTajtsin ipan yejuin tonajli?

¹⁴ Iluikaktekitkej kipaleuiyaj Grupo akin Tlayekana. Grupo akin Tlayekana kipiya ueyi tekitl ika kinyekanas 8 millones akin tenojnotsaj ipan nochi tlaltikpaktli. ¿Tleka melak kuajli nochiua yejuin tekitl? Pampa iluikaktekitkej tlapaleuiyaj (xpoua Apocalipsis 14:6, 7). Miyekpa, iluikaktekitkej kinyekanaj tenojnotskej kampa nemi se akin kitlajtlanilijtika tlapaleuilistli toTajtsin * (xkita nota). Maski kampa xkinekij noso kualanij tlaltikpakchanejkej itech totekiyo, noijki melak yonotenojnots niman yotitemachtijkej itech Biblia. Yejuin noijki san uelis nochiuas ika intlapaleuilis iluikaktekitkej.

15. ¿Kenon Grupo akin Tlayekana tlamantik noso sejneka itech tlayekankej itech akin san kijtouaj kichiuaj ken Cristo? Xkijto se neskayotl.

¹⁵ ITlajtol toTajtsin kiyekana Grupo akin Tlayekana (xpoua Juan 17:17). Xnemili tlen opanok ipan xiuitl 1973. La Atalaya 15 octubre itech yejon xiuitl otetlajtolti tla “uelis noapolaktiskej tlaltikpakchanejkej akin xkikajkauaj ika tlachichinaj noso pokij”. Otlanankili ika tlatolyekanalistin itech Biblia niman okijto ika ka. Yejon revista okiteneuj miyek tlaxeloltin itech Biblia niman okijto ika se akin xkikajkaua ika tlachichina noso poki kipiya ika kisas itech tlanechikojli (1 Corintios 5:7; 2 Corintios 7:1). Noijki okijto ika tlanauatijli xualeuaya itech tlakamej ualeuaya itech toTajtsin “akin kijtoua ipan iTlajtol tlen onoijkuilo”. Nion se tlaneltokijli xkineki kineltokas nochi iTlajtol toTajtsin, niman yejuin ijkon ijkuak sekimej kitaj ika ouijtika. Se amoxtli itech tlaneltokijli tlen san kemach okis ipan Estados Unidos kijtoua: “Tlayekankej ipan tlaneltokiltin miyekpa kiyektlaliaj miyek tlen temachtiaj ijkon ken miyekej kipiyaj intlaneltokil niman ken tlanemiliaj niman ijkon melak miyekej makiselikan”. San ika, Grupo akin Tlayekana xnoyekana ika tlen miyekej tlaltikpakchanejkej kuelitaj.  Yejuin Grupo noyekana ika iTlajtol toTajtsin, tlen teititia ika Jehová yejua akin yemelak kiyekana ikalpan ipan yejuin tonajli.

16. ¿Kenon uelis tikilnamikiskej Grupo akin Tlayekana?

¹⁶ (Xpoua Hebreos 13:7). Biblia kijtoua ika “xkinmelnamikikan nemotlayekankauan”. Se ken uelis tikchiuas yejuin ijkuak tikchiua teoyotl ipampa Grupo akin Tlayekana (Efesios 6:18). Yejuamej kipiyaj miyek tekitl, ken kitemakaskej tlamachtijli tlen ualeua itech toTajtsin, kiyekanaskej tenojnotsalistli ipan nochi tlaltikpaktli niman kitaskej kenon notekitiltis tomin tlen notemaka ika nochi toyojlo ipan ikalpan toTajtsin. Ika yejon, yejuamej kinekij matikchiuakan teoyotl inpampa.

17, 18. a) ¿Kenon uelis tikchiuaskej itlayekanalis Grupo akin Tlayekana? b) ¿Kenon tenojnotsalistli kipaleuiya Grupo akin Tlayekana niman Jesús?

¹⁷ Uelis noijki tikilnamikiskej Grupo akin Tlayekana ijkuak tikchiuaj itlanauatil niman itlayekanalis. Grupo akin Tlayekana techmaka tlayekanalistli ika toamatlajkuiloluan, tlanechikoltin niman uejueyimej tlanechikoltin. Noijki kintlalia tlayekankej ipan circuito, niman yejuamej kintlaliaj tlayekankej ipan tlanechikojli. Ijkuak tlayekankej ipan circuito niman tlayekankej ipan tlanechikojli kichiuaj tlayekanalistli tlen kiseliaj, kiteititiaj ika kilnamikij Grupo akin Tlayekana. Niman tinochimej tikteititiskej ika tiktlakaitaj toTlayekankauj, Jesús, ijkuak tikintlakamatij akin kintekitiltia matlayekanakan ipan yejuin tonajli (Hebreos 13:17).

¹⁸ Okse ken uelis tikilnamikiskej Grupo akin Tlayekana ijkuak tikchiuaskej nochi tlen tiueliskej ika titenojnotsaskej. Hebreos 13:7 technauatia matikixkopinakan intlaneltokil akin tlayekanaj. Grupo akin Tlayekana yokiteititi ika melak nochikaua niman kineki manotenojnotsa kuajli tlajtoltin. ¿Tikinpaleuijtokej yejuin tokniuan ipan yejuin tekitl? Tla kema, melak kuajli tomachiliskej ijkuak tijkakiskej Jesús techijlis: “Ika nochi on tlen ika onenkipaleuijkej intech in nokniuan yejuan xuejueyixtokej, sa no nejua onennechpaleuijkej” (Mateo 25:34-40).

19. ¿Tleka kuajli yotiknemili tikchiuas itlayekanalis toTlayekankauj, Jesús?

¹⁹ Ijkuak Jesús oksejpa onokuep ipan iluikak, xsan inselti okinkaujteuj inomachtijkauan (Mateo 28:20). Yejua kimatiya ika espíritu santo, iluikaktekitkej niman iTlajtol toTajtsin okipaleui matlayekana ijkuak nemiya ipan tlaltikpaktli. Yejua kimaka noijki yejuin tlapaleuilistli tekitketl yolmelauak ipan yejuin tonajli. Kuakon “san kanon yau on Borreguito”, Jesús, Grupo akin Tlayekana “ompa iuan yauij” (Apocalipsis 14:4). Ika yejon, ijkuak tikchiuaj itlayekanalis Grupo akin Tlayekana, tikchiuaj itlayekanalis toTlayekankauj Jesús. Sa achijtsin poliui, yejua techuikas kampa onias nemilistli tlen xkeman tlamis (Apocalipsis 7:14-17). ¡Yejuin nion se tlayekanketl tlaltikpakchane xuelis kichiuas!