• ToTajtsin kitlapejpeniskia. “Kuajli yoniktlalij norey [...]. Xnechtlajtlanili ma nimitsmaka ken herencia on naciones, niman ma nimitsyaxkati nochi in tlaltikpaktli, niman nejua nimitsmakas” (Salmo 2:6, 8).

• Ualeuaskia itech tekiuaj David. “Totech yotlakat sen konetsintli. Dios yotechmakak se konetsintli [...]. Yejua tlamandaros ipan itrono David; tlayekanas ken rey nochiuiyan, niman [...] xkaman tlamis ika tlamandaros” (Isaías 9:6, 7).

• Uajnemiskia Belén. “Okintlajtoltij kanon tlakatis on Cristo [...]. Yejuamej okijlijkej: ‘Tlakatis ipan on kalpan itoka Belén nikan Judea, pampa on tiotlajtojketl ijkin okijkuiloj’” (Mateo 2:4, 5).

• Xkiseliskiaj niman kimiktiskiaj. “Xokiselijkej. Yejua sanoyej otlajyouij, ueyi tlajyouilistli okixmat. Nion achijtsin xotiknekej otikitakej [...]. Pero yej okojkokojkej ipampa tejuamej totlajtlakoluan” (Isaías 53:3, 5).

• Yoliuiskia niman kiueyichiuaskiaj. “Xtinechkauas ipan tlalkontli, nion xompa tikauas ma palani notlalnakayo [...]. On pakilistli xkaman tlamis ne mouan” (Salmo 16:10, 11).

San Jesucristo ipan yonochiuj tlen kemach yonoteneuj. Hasta se ángel okijli inan, María: “Dios toTEKO kitlalis para Rey yes, niman kipiyas on tekiuajyotl yejuan iuejkatataj David okipix [...] niman itekiuajyo xkaman tlamis” (Lucas 1:31-33).

Ijkuak Jesús nemiya nikan ipan tlaltikpaktli xkeman otekiuajtik. San ika, ijkuak tekiuajtis ipan iTekiuajyo toTajtsin kinyekanas tlaltikpakchanejkej. ¿Tleka kinamiki matechyekana? Matikitakan tlen okichiuj ijkuak nemiya ipan tlaltikpaktli.

•   Jesús okinek kinpaleuis oksekimej. Nochimej okinpaleui, tlakamej, siuamej, telpokamej niman akin youeuentsintiakej. Yejua xkitaya kanon ualeuayaj nion tla kipiayaj noso xkipiayaj tomintsin (Mateo 9:36; Marcos 10:16). Ijkuak se akin kipiaya lepra okijli: “Tla tikneki, uelis tinechpajtis”, Jesús okikneli niman okipajti (Marcos 1:40-42).

• Jesús otechititi kenon tikyolpaktiskej toTajtsin. Yejua okijto: “Xakaj uelis kitekichiuilis Dios niman no kinotekimakas on tomin”. Noijki otechijli matikinchiuilikan oksekimej tlen tikuelitaskiaj matexchiuilikan. Noijki, otechmachti ika toTajtsin xsan kita tlen tikchiuaj, noijki kita tlen tiknemiliaj niman tlen tikmachiliaj. Kuakon, tla tiknekij tikyolpaktiskej toTajtsin noneki kuajli tikitaskej tlenon onka ipan toyojlo (Mateo 5:28; 6:24; 7:12). Jesús kuajli okijto ika tla tiknekij yemelak tiyolpakiskej, noneki kuajli tikmatiskej tlen toTajtsin kineki matikchiuakan niman matiktlakamatikan (Lucas 11:28).

• Jesús otechititi tlen kijtosneki titetlasojtlas. Tlen kijtouaya niman tlen kichiuaya ajsiya ipan inyojlo tlaltikpakchanejkej. Biblia kijtoua: “On tojlamej sanoyej pakatlachayaj ika on tlen yejua kinmijliaya, pampa yejua temachtiaya ikan ipoder Dios” (Mateo 7:28, 29). Yejua okimijli: “Xkintlajsojtlakan on nemotlauelikniuan”. Niman yejua okichiuj teoyotl inpampa sekimej akin okimiktijkej, okijto: “NoTajtsin, xkintlapojpolui, pampa xkimatij tlinon kichiuaj” (Mateo 5:44; Lucas 23:34).

Jesús kinamiki matechyekana pampa techtlasojtla niman kineki techpaleuis. San ika ¿kemanon tekiuajtis?