Ipan tlamachtijli tlen youajpanok, otikitakej tlen Jesús okijto ika nochiuaskia. Nochi tlen nochiujtika kuajli kiteititia ika iTekiuajyo toTajtsin itekiuajtitika ne iluikak niman Jesucristo yejua Tekiuaj.

Biblia kijtoua ika ijkuak Jesús opeuj tekiuajti kachtopa okuajtlajkal Satanás niman idemonios. Aman yejuamej san uelij kichiuaj tlen xkuajli ipan tlaltikpaktli, ika yejon, desde 1914 melak opeuj tlaijtlakaui (Apocalipsis 12:7, 9).

Maski melak yotlaijtlakauj ipan tlaltikpaktli, Jesús akin Tekiuaj itech iTekiuajyo toTajtsin, miyek yokichiuj tlen techpaleuiya. Jesús kiyekantika tekitl tlen okijtokaj ika nochiuas, ika ipan nochi tlaltikpaktli temachtiskej itech Biblia, niman yokinpaleui miyekej mauelikan tlen kinpaleuis ipan innemilis niman makichiuakan ijkon ken youelkej (Isaías 2:2-4). Noijki youelkej kenon pakiskej imiuan inchanejkauan niman yokitakej ika intekiyo noso tlen kipiyaj xyejon tlen melak ueyi kijtosneki. Biblia kinpaleuiya kuajli machantikan niman makichiuakan ijkon ken toTajtsin kineki manemikan ijkuak iTekiuajyo tlayekanas.

Maski Jesús tlayekantika iluikak, tlakamej ok tlayekantokej ipan tlaltikpaktli. San ika, toTajtsin okijli Jesús: “Xkintlankapiya [noso xkintlantiuj, TNM] ikan poder, on motlauelikniuan” (Salmo 110:2). Sa achijtsin poliui ika Jesús kinpopolos itlauelikniuan niman kipopolos nochi tlen kiminajmankamiktia akin kinekij kitlakamatiskej toTajtsin.

Ijkuakon, iTekiuajyo toTajtsin kichiuas yejuin:

• Kinpopolos tlaneltokiltin xmelajkej. Biblia kijtoua ika tlaneltokiltin xmelajkej kentla se tlakapajpatlaketl akin sa achijtsin poliui ika kipopoloskej. Kuakon, tlaneltokiltin tlen xmelajkej popoliuiskej pampa yokiteititijkej tlen xmelauak itech toTajtsin niman yokichiujkej ouijtika matinemikan. Melak temojkatlachialtis ijkuak kipopoloskej (Apocalipsis 17:15, 16).

• Kinpopolos akin aman tlayekanaj. ITekiuajyo toTajtsin kinpopolos nochimej akin aman tlayekantokej (Apocalipsis 19:15, 17, 18).

• Kinpopolos akin xkuajkualtin. ¿Tlenon inpan nochiuas akin xkikajkauaj tlen xkuajli niman xkinekij kitlakamatiskej toTajtsin? Akin xkuajkualtin toTajtsin “kinkixtis ipan in tlajli” (Proverbios 2:22).

• Kipopolos Satanás niman idemonios. Satanás niman idemonios xok kinkajkayauaskej on países (Apocalipsis 20:3, 10).

¿Tlenon inpan nochiuas akin kinekiskej makinyekana iTekiuajyo toTajtsin?

Ijkuak Jesús uajtlayekantos miyek kichiuas xijkon ken akin aman tlayekanaj. Noijki iuan nemiskej 144,000 akin yokintlapejpeni iuan matekiuajtikan (Apocalipsis 5:9, 10; 14:1, 3). Kuajli kitas ika manochiua tlen toTajtsin kineki ipan tlaltikpaktli. ¿Tlenon kichiuas iTekiuajyo toTajtsin topampa?

• Kichiuas maka sa matikualokan nion matimikikan. “Xok yakaj kijtos: ‘Nikualo’” niman “xok onyas mikilistli” (Isaías 33:24; Apocalipsis 21:4).

• Kichiuas ika toyojlo matinemikan. “Nochimej yejuamej sanoyej kuajli nemiskej [...] niman on motlauelikniuan xok tikinmakajsis, [...] yej moyolika tinemis” (Isaías 54:13, 14).

• Techmakas tekitl tlen tikuelitaskej. “Notlajsojkakoneuan kipakaseliskej on tlen kitlaniskej ipan intekiu. Intekiu xsanenkaj kichiuaskej” (Isaías 65:22, 23).

• Kiyektlalis tlen kijtlakoua tlaltikpaktli. “Ma paki on xalpatlajkan, on tlaluaktli; ma pakilistlamati, ma noxochiyoti” (Isaías 35:1).

• Techmachtis tlenon noneki tikchiuaskej niman ijkon uelis tinemiskej nochipa. “In nemilistli yejuan para nochipa se kiselia ijkuak mitsixmati tejua yejuan san moselti melauak tiDios, niman nejua niJesuCristo yejuan otinechajtitlan” (Juan 17:3).

ToTajtsin kineki ijkon xyolpaki (Isaías 48:18). Ipan okse tlamachtijli tikitas tlenon uelis tikchiuas tla tikneki tinemis ipan yejuin tlaltikpaktli tlen toTajtsin kiyektlalis.