¿Tikilnamiki ijkuak otiuets ijkuak ok tipitentsin katka? Kanaj otimokoko ipan moma noso otimotechik ipan moikxitetepon. Niman kanaj otiknots monan mamitsyolseui. Kuakon yejua okichipauj kampa otimokoko niman okitlalili itlaj. Tejua otichokak, san ika, monan nimantsin omitsnapalo niman ika itlajtoluan okichiuj melak kuajli xmomachili. Ipan yejon tonaltin, nochipa ueliya tiyolseuiya.

Ijkuak toskaltiaj noijki melak ouijtika tipanouaj ipan tonemilis. Tlen tikixnamikij melak techajmana niman melak ouijtika tiknextiskej yolseuilistli. Teyolkoko tikijtoskej ika se akin iueyi xok ueli nimantsin kiyektlalia tlauejli ken ijkuak kipaleuiya se nantli ikonetsin. Matikitakan seki tlen topan nochiua.

• ¿Kanaj tejua yotikpolo motekiyo? Julián kijtoua ika ijkuak okipolo itekiyo, melak onajman niman notlajtoltiaya: “¿Kenon nikinmakas tlen kinpoloua nochanejkauan? Melak chikauak yonitekit ipan miyek xiuitl. ¿Niman tleka kampa nitekiti kinemiliaj ika xok itlaj ika nitepaleuiya?”.

• Kanaj tejua yotimokauj iuan akin yotimonamiktijka. Raquel kijtoua: “Ikipiya dieciocho metstli, noueuentsin onechkauj. Melak onechyolkoko yejon, yeskia kentla noyoltsin otlapan. Melak onechkoko notlalnakayo niman melak xkuajli ken oninomachili. Niman xok nikmatiya tlenon nikchiuas ika tlayekapan”.

• Kanaj tikpiya se kokolistli niman xnesi tla tipajtis. Kanaj timomachilia ken se tlakatl akin yeuejkaui onen, itoka katka Job akin okijto: “Niktlauelita nonemilis, xok nikneki ninemis” (Job 7:16). Noso kanaj noijki timomachilia ken Luis, se tlakatl akin ikipiya 80 xiuitl, yejua kijtoua: “Kemantika nikmachilia ken sa nikchia mikilistli”.

• Noso kanaj yomik se mochanejkauj niman tikneki tiknextis yolseuilistli. Robert kijtoua: “Ijkuak onikmat ika nokoneuj omik ipan se accidente ipan avión, xueli nikneltokaya. Yejon melak onechyolkoko, kentla ijkuak techteki se espada ijkon ken kijtoua Biblia” (Lucas 2:35).

Robert, Luis, Raquel niman Julián okinextijkej yolseuilistli maski melak ouijtika tlen kixnamiktoyaj. Yejuamej okinextijkej akin uelis kinyolseuis, kema, toTajtsin akin nochi ueli kichiua. ¿Kenon uelis mitsmakas yolseuilistli toTajtsin? ¿Noijki uelis mitsmakas yolseuilistli tlen tejua tikneki?