TLAMACHTIJLI 17
Jehová kintlasojtla nochimej itekipanojkauan
“ToTEKO sanoyej paki iminuan ikoneuan” (SAL. 149:4).
TLAKUIKAJLI 108 ToTajtsin yemelak techtlasojtla
TLEN TIKITASKEJ *
ToTajtsin “sanoyej paki iminuan ikoneuan”. (Xkita párrafo 1).
1. ¿Tlenon kitilia Jehová ikalpan?
¡MELAK techyolpaktia ika “toTEKO sanoyej paki iminuan ikoneuan”! (Sal. 149:4). Jehová kita nochi tlen kuajli tikchiuaj, kita nochi tlen uelis tikchiuaskej niman techkauilia iuan matouikakan. Tla tejuamej itech tiyolmelajkanemij, yejua nochipa touan nemis (Juan 6:44).
2. ¿Tleka sekimej tokniuan xueli kineltokaj ika Jehová kintlasojtla?
2 Kanaj yakaj uelis kijtos: “Nikmatstok ika Jehová kintlasojtla nochimej itekipanojkauan, san ika ¿kenon uelis nikmatis ika nejua noijki nechtlasojtla?”. ¿Tleka sekimej tokniuan ijkon tlanemiliaj? Matikitakan tlen kijtoua Oksana, * akin melak otlajyoui ijkuak pitentsin katka: “Ijkuak oninoapolakti niman oninochiuj precursora, melak niyolpakiya. Sakin, ijkuak yopanoka 15 xiuitl, opeuj nikilnamiki nochi tlen xkuajli nopan yonochiujka. Opeuj nikmachilia ika xok nikyolpaktiaya Jehová niman ika xnechnamikiya manechtlasojtla”. Yua, se precursora akin noijki melak otlajyoui ijkuak pitentsin katka, techijlia: “Oninosentemakak itech Jehová pampa niknekiya nikyolpaktis, san ika, kuajli nikmatstoya ika yejua xkeman ueliskia nechtlasojtlas”.
3. ¿Tlenon tiknankiliskej ipan yejuin tlamachtijli?
3 Ijkon ken yejuin tokniuan kanaj tejuamej noijki melak tiktlasojtlaj Jehová, san ika, xueli tikneltokaj tla yejua noijki techtlasojtla. Ipan yejuin tlamachtijli tiknankiliskej yejuin: ¿tleka noneki kuajli tikmatstoskej ika Jehová yemelak techtlasojtla? niman ¿tlenon uelis tikchiuaskej ijkuak tiknemiliskej ika toTajtsin xtechtlasojtla?
UELIS TECHIJTLAKOS TLA TIKNEMILIAJ IKA JEHOVÁ XTECHTLASOJTLA
4. ¿Tlenon uelis topan nochiuas tla tiknemiliaj ika Jehová xtechtlasojtla?
4 Tla kuajli tikmatstokej ika Jehová techtlasojtla, tiknekiskej tiktekichiuiliskej, maski tikixnamikiskej tlen ouijtika. San ika, tla tejuamej tiknemiliaj ika Jehová xtechtlasojtla, xtiyolchikaujkej yeskej (Prov. 24:10). Noijki, tla tipeuaj ijkon titlanemiliaj niman toyolajmanaj, Satanás uelis kichiuas matitlajtlakokan (Efes. 6:16).
5. ¿Tlenon inpan yonochiuj sekimej tokniuan akin xkineltokayaj ika Jehová kintlasojtla?
5 Sekimej tokniuan xok chikauak kipiyaj intlaneltok pampa opeuj kinemiliaj ika Jehová xkintlasojtla. Se tlayekanketl akin itoka James, kijtoua: “Maski nitlapaleuijtoya Betel niman nitenojnotsaya ika okse tlajtojli, ninotlajtoltiaya tla Jehová yemelak kipatiojkaitaya tlen nikchiuaya. Kemantika niknemiliaya ika xnechkakiya ijkuak niknotsaya”. Eva, akin noijki chikauak kitekichiuilia Jehová, kijtoua: “Onikasikamat ika tla tikneltokaj ika Jehová xtechtlasojtla, uelis techijtlakos pampa uelis kichiuas maka sa matiktekichiuilikan niman maka matiyolpakikan. Niman ouijtika tijkajkauas ijkon titlanemilis”. Niman Michael, akin precursor regular niman tlayekanketl, kijtoua: “Tla xtikneltoka ika toTajtsin mitstlasojtla, ika yolik uelis tiktlalkauijtias”.
6. ¿Tlenon uelis tikchiuaskej ijkuak tiknemiliskej ika toTajtsin xtechtlasojtla?
6 Tlen okijtokej tokniuan techpaleuiya matikasikamatikan ika melak teijtlako tla tiknemiliaj ika Jehová xtechtlasojtla. ¿Tlenon uelis tikchiuaskej ijkuak tiknemiliskej ika toTajtsin xtechtlasojtla? Noneki nimantsin tijkajkauaskej ika ijkon titlanemiliaj. Matiktlajtlanilikan Jehová matechyolseui, makitlajpiya toyojlo niman totlamachilis niman ijkon xtiknemiliskej itlaj tlen xkuajli (Sal. 139:23; Filip. 4:6, 7). Niman maka matikilkauakan ika nemij oksekimej tokniuan akin noijki ijkon nomachiliaj. Hasta sekimej itekipanojkauan toTajtsin akin yeuejkaui onenkej noijki ijkon onomachilijkej. Matikitakan tlenon ipan onochiuj apóstol Pablo.
¿TLENON TECHMACHTIA TLEN IPAN ONOCHIUJ PABLO?
7. ¿Tleka melak najmanaya Pablo?
7 ¿Kemantika tikmachiliaj ika yotisiaujkej pampa tikpiyaj miyek tekitl? Pablo noijki ijkon okimachili. Yejua okijto ika xnajmanaya san ipampa se tlanechikojli, okijto ika najmanaya inpampa nochi tlanechikoltin (2 Cor. 11:23-28). ¿Xok tiyolpakij pampa melak tikualoj? Pablo melak najmanaya pampa kipiaya “sen tlajyouilistli yejuan ken itlaj uitstli”, yejuin kanaj katka se kokolistli (2 Cor. 12:7-10). ¿Kemantika toyolkokouaj pampa xueli nochi kuajli tikchiuaj? Pablo kemantika noijki ijkon onomachili. Yejua okijto ika melak najmanaya pampa nonekiya nochipa nokojtilis kichiuas tlen kuajli (Rom. 7:21-24).
8. ¿Tlenon okipaleui Pablo nochipa makitekichiuili Jehová maski okixnamik tlen ouijtika?
8 Maski Pablo okixnamik miyek tlen ouijtika, nochipa okitekichiuili Jehová. ¿Tlenon okipaleui matlaxiko? Maski yejua kimatstoya ika tlajtlakole katka, nochipa otlaneltokak itech tlen Jesús okichiuj topampa. Noijki, kimatstoya tlen Jesús okijto, ika akin itech tlaneltokas kipiyas “nemilistli para nochipa” (Juan 3:16; Rom. 6:23). Kuajli nesi ika Pablo melak tlaneltokaya itech tlen Jesús okichiuj topampa. Noijki, kuajli kimatstoya ika Jehová kinektok kintlapopoluis hasta akin kichiuaj itlaj tlen melak xkuajli tla yejuamej noyolkuepaj (Sal. 86:5).
9. ¿Tlenon techmachtia tlen Pablo okijto ipan Gálatas 2:20?
9 Pablo kineltokaya ika toTajtsin melak kitlasojtlaya pampa kimatstoya ika yokuajtitlanka Jesús mamikiki ipampa (xpoua Gálatas 2:20, TNM). * Matikitakan tlen okijto Pablo itlamiyan yejuin tlaxelojli, yejua okijto: “IKonetsin toTajtsin [...] onechtlasojtlak niman onotemakak nopampa”. Pablo kuajli kimatstoya ika toTajtsin nochimej kintlasojtla niman xkeman okinemili: “Nikasikamati tleka Jehová kintlasojtla nokniuan, san ika, xnikneltoka tla nejua noijki nechtlasojtla”. Yejua hasta okimilnamikti romanos: “Ijkuak tixpolijtikatkaj ipan tlajtlakojli, Cristo topampa omik” (Rom. 5:8). ToTajtsin nochimej kintlasojtla.
10. ¿Tlenon techmachtia Romanos 8:38, 39?
10 (Xpoua Romanos 8:38, 39). Pablo kuajli kimatstoya ika toTajtsin techtlasojtla. Pampa yejua okijto: “Xonkaj itlaj nion xakaj uelis techxelos itech itetlajsojtlalis Dios”. Yejua kuajli kimatstoya ika Jehová yokimijyouijka israelitas. Niman noijki kimatstoya ika yejua noijki yokiknelijkaj. Pablo kentla kijtotoskia: “Tla Jehová okuajtitlan iKoneuj mamikiki nopampa, xnoneki niknemilis ika yejua xnechtlasojtla” (Rom. 8:32).
ToTajtsin xsan kitstika kenon otopopolojkej yeuejkaui, yejua kita tlen aman tikchiujtokej niman tlen ika tlayekapan uelis tikchiuaskej. (Xkita párrafo 11). *
11. Maski Pablo melak otlajtlako ijkon ken kijtoua ipan 1 Timoteo 1:12-15, ¿tleka kuajli kimatstoya ika toTajtsin kitlasojtlaya?
11 (Xpoua 1 Timoteo 1:12-15). Kemantika, Pablo notlajtlakoltiaya ipampa tlen yeuejkaui okichiujka. Yejua okijto: “Nejua tej, más niueyi tlajtlakolej xken nochimej tlajtlakolejkej”. Ijkuak xikitekichiuiliaya toTajtsin okintlaueltokak sekimej tokniuan ipan miyekej kalpamej, sekimej okintsauk niman hasta otlapaleui ijkuak okinmiktijkej sekimej tokniuan (Hech. 26:10, 11). Matikonnemilikan ika otepaleuijka makimiktikan se tokniuj iuan isiuauj niman aman kixmati inkoneuj yejuin tokniuan. ¿Kanaj kenon nomachiliskia? Pablo kiyolkokouaya tlen okichiuj, san ika, kimatstoya ika xok ueliskia kiyektlalis. Yejua kuajli kimatstoya ika Cristo omik ipampa, ika yejon, okijkuilo: “Nejua niapóstol ipampa iueyitetlajsojtlalis Dios” (1 Cor. 15:3, 10). ¿Tlenon techmachtia yejuin? Ika noneki kuajli tikmatstoskej ika Cristo noijki omik topampa, niman yejon okichiuj kuajli matouikakan iuan Jehová (Hech. 3:19). ToTajtsin xsan kitstika kenon otopopolojkej ijkuak xitiktekichiuiliayaj noso maski itiktekichiuiliayaj, yejua kita tlen aman tikchiujtokej niman tlen ika tlayekapan uelis tikchiuaskej (Is. 1:18).
12. Ken kijtoua 1 Juan 3:19, 20, ¿tlenon noneki tikchiuaskej tla tikmachiliaj ika xtlaj ika titepaleuiyaj noso ika xtechnamiki matechtlasojtlakan?
12 Kemantika, toyojlo uelis techkajkayauas niman uelis kichiuas matiknemilikan ika xtlaj ika titepaleuijkej noso ika xtechnamiki matechtlasojtlakan (xpoua 1 Juan 3:19, 20). Yejua ika, kanaj tiknemiliskej ika toTajtsin xuelis techtlapopoluis san ika tlen Jesús okichiuj topampa. Ijkuak ijkon tomachiliskej matikilnamikikan ika “Dios más nochi kimati xken toyojlo”. Maski tikmachiliskej ika toTajtsin xtechtlasojtla nion xtechtlapopoluis, yejon xmelauak, yejua kema techtlasojtla niman techtlapopoluiya. Tla xtiknekij tikilkauaskej ika toTajtsin techtlasojtla, noneki mojmostla tomachtiskej Biblia, tikchiuaskej teoyotl niman nochipa tosentlaliskej imiuan tokniuan. Matikitakan tleka melak noneki ijkon matikchiuakan.
¿KENON TECHPALEUIYA IJKUAK TOMACHTIAJ, TIKCHIUAJ TEOYOTL NIMAN IJKUAK TINEMIJ IMIUAN TOKNIUAN?
13. ¿Kenon techpaleuiya ijkuak tomachtiaj iTlajtol toTajtsin? (Xkita recuadro “ ¿Kenon kinpaleuiya iTlajtol toTajtsin?”).
13 Mojmostla matomachtikan iTlajtol toTajtsin. Tla ijkon tikchiuaj, más tikixmatiskej Jehová niman tikasikamatiskej ika yejua yemelak techtlasojtla. Ijkuak tejuamej mojmostla titlanemiliaj itech tlen kijtoua Biblia, “kiyektlalia on tlen xkuajli” onka ipan totlamachilis niman ipan toyojlo (2 Tim. 3:16). Se tokniuj tlayekanketl akin itoka Kevin niman akin nochipa noyolajmanaya, kijtoua: “Ijkuak nikpoua Salmo 103 niman itech nitlanemilia, nechpaleuiya manikasikamati ika Jehová kema nechtlasojtla”. Niman Eva, akin otikteneujkej ipan párrafo 5, kijtoua: “Nejua nochipa ika teotlak nijkaua achijtsin tiempo niman ijkon niknemilia kenon nechita Jehová. Yejon nechyolseuiya niman kichikaua notlaneltokil”.
14. ¿Kenon techpaleuiya teoyotl?
14 Nochipa matikchiuakan teoyotl (1 Tes. 5:17). Ijkuak yakaj nochipa iuan tonojnotsaj niman tikijliaj tlen yemelak tikmachiliaj, peua más kuajli iuan touikaj. Noijki noneki ijkon tikchiuaskej iuan Jehová. Ijkuak tikijliaj Jehová tlen tikmachiliaj, tlen tiknemiliaj niman tlen techajmana tikititiaj ika itech titlaneltokaj niman tikititiaj ika tikmatstokej ika techtlasojtla (Sal. 94:17-19; 1 Juan 5:14, 15). Yua, akin otikteneujkej ipan párrafo 2, kijtoua: “Ijkuak niknotsa Jehová xsan nikijlia tlen onikchiuj ipan yejon tonajli. Nikijlia nochi tlen nikmachilia. Nejua xnikita Jehová ken yakaj akin itech nitekiti, nejua nikyejyekoua nikitas ken se tajtli akin melak kintlasojtla ikoneuan”. (Xkita recuadro “ ¿Yotikpoujka?”).
15. ¿Kenon kiteititia Jehová ika melak techtlasojtla?
15 Nochipa matosentlalikan imiuan tokniuan. Yejuamej yeskiaj kentla se tetlayokolijli tlen toTajtsin yotechmakak (Sant. 1:17). ToTajtsin techititia ika techtlasojtla pampa techinmaka tokniuan akin kentla tochanejkauan yeskiaj niman akin nochipa techtlasojtlaj (Prov. 17:17). Ipan amatlajkuilojli tlen Pablo okimijkuilouili colosenses, ompa okinteneuj sekimej tokniuan akin okipaleuijkej niman okijto ika yejuamej okiyolchikaujkej (Col. 4:10, 11). Hasta Jesús ononek makipaleuikan iluikaktekitkej niman sekimej tlaltikpakchanejkej, niman yejua melak okitlasojkamat tlen okichiujkej ipampa (Luc. 22:28, 43).
16. ¿Kenon techpaleuiyaj tokniuan matiknisiuikan Jehová?
16 ¿Tikimijliaj noso tikinkauiliaj tokniuan matechpaleuikan? Tla tikijliaj se tokniuj akin chikauak itlaneltok tlen techajmana, melak techpaleuis niman ijkuak ijkon tikchiuaj xkijtosneki tla xtiyolchikaujkej. James, akin otikteneujkej ipan párrafo 5, kijtoua: “Melak yonechpaleui pampa ninouika imiuan tokniuan akin kipiyaj chikauak intlaneltok. Ijkuak ninajmana, yejon tokniuan kuajli nechkakij niman nechilnamiktiaj ika nechtlasojtlaj. Yejuin nechititia ika Jehová nechtlasojtla niman najmana nopampa”. ¡Melak noneki matikinpiyakan amigos ipan tlanechikojli!
NOCHIPA MATIKTLASOJTLAKAN JEHOVÁ
17, 18. ¿Akinon noneki tiktenkakiskej, niman tleka?
17 Satanás kineki techtlanis niman kineki matikchiuakan tlen xkuajli. Noijki, kineki matiknemilikan ika Jehová xtechtlasojtla niman ika xtechnamiki matechmakixti. San ika, ken otikitakej ipan yejuin tlamachtijli, yejon xmelauak.
18 Jehová melak techtlasojtla niman techpatiojkaita. Tla tiktlakamatij, nochipa techtlasojtlas ijkon ken okitlasojtlak Jesús (Juan 15:10). Kuakon, ijkuak Satanás noso toyojlo techijliskej ika Jehová xtechtlasojtla, maka matikinkakikan. Matijkakikan Jehová, akin kita nochi tlen kuajli tikchiuaj. Maka keman matikilkauakan ika yejua “sanoyej paki iminuan ikoneuan”, niman noijki mouan.
TLAKUIKAJLI 141 Nemilistli se kualtsin tetlayokolijli
^ párr. 5 Sekimej tokniuan xueli kineltokaj tla Jehová kintlasojtla. Ipan yejuin tlamachtijli, tikitaskej tleka uelis kuajli tikmatstoskej ika Jehová tinochimej techtlasojtla. Noijki, tikitaskej tlenon tikchiuaskej tla xmás tikneltokaj ika toTajtsin techtlasojtla.
^ párr. 2 Intokauan yonopatlakej.
^ párr. 9 Gálatas 2:20: “Nipilkatika ipan se kojtli melaktik iuan Cristo. Xok nejua akin niyoltika, aman Cristo yejua akin nemi ipan noyojlo. Kema, aman ninemi pampa nitlaneltoka itech iKonetsin toTajtsin, akin onechtlasojtlak niman onotemakak nopampa”.
^ párr. 68 TLEN NESI IPAN TLAIXKOPINAJLI: Ijkuak Pablo xikitekichiuiliaya toTajtsin, okichiuj makintsakuakan miyekej tokniuan. Ijkuak otlaneltokak itech tlen Jesús okichiuj ipampa, onopatlak niman okinyolchikauj ikniuan. Kanaj sekimej akin okinyolchikauj katkaj inchanejkauan akin okintlaueltokaka.
