TLANELTOKIJLI melak techpaleuiya. Maski Satanás kineki kichiuas maka sa matitlaneltokakan itech Jehová, totlaneltokil techpaleuiya matotsakuilikan ijkuak Satanás techmojmotla “ikan flechas yejuan tlikuitiu” (Efes. 6:16). Noijki, totlaneltokil uelis techpaleuis matikixnamikikan nochi tlauejli tlen tikpiyaj tlen uejueyimej ken tepemej. Jesús okimijli inomachtijkauan: “Tla nenkipiyaj nemotlaneltok, maski pitentsin ken iteyo mostaza, uelis nenkijliskej on tepetl: ‘Xmejkuani nikan niman xuiya oksekan’, niman on tepetl nejkuaniskia” (Mat. 17:20). Kuajli nesi ika tlaneltokijli techyolchikaua, ika yejon, matotlajtoltikan: ¿Tlenon kijtosneki tlaneltokijli? ¿Kenon tikteititiskej ika tikpatiojkaitaj? ¿Kenon uelis tikchikauaskej totlaneltokil? Niman ¿itech akinon noneki titlaneltokaskej? (Rom. 4:3).

Tlaneltokijli xsan kijtosneki tikneltokas ika Biblia temachtia tlen melauak, pampa Biblia kijtoua ika hasta “on xkuajkualtin espíritus” kineltokaj ika nemi toTajtsin, “niman hasta kuekuetlakaj ikan nemojtijli” (Sant. 2:19). Kuakon, ¿tlenon kijtosneki tlaneltokijli?

Ijkuak Biblia kijtoua tlenon kijtosneki tlaneltokijli, kijtoua ika kijtosneki ome tlemach. Kachtopa, kijtoua ika “on tlaneltoktli kijtosneki melauak tikmatstokej ika tikseliskej on tlen tikchaj”, noso kuajli tikmatstokej ika itlaj melauak nochiuas (Heb. 11:1a). Tla titlaneltokaj, kuajli tikneltokaskej ika nochi tlen Jehová kijtoua melauak niman ika nochiuas. Se neskayotl, toTajtsin okimijli israelitas: “Nejua, nemoTEKO, nikijtoua ika xuelis ijki nokauas niman xnochiuas on pacto yejuan onikchiu iuan on tonaltsintli niman on yeuajli. Ika onkaj on tonaltsintli niman on yeuajli kichiuaskej ken onikinnauatij para kisaskej mojmostla ken noneki. No ijki ika onkaj nochiuas on pacto yejuan onikchiu iuan notekitkau David” (Jer. 33:20, 21). ¿Kemantika yotiknemilijkej ika kanaj xok tlanesis noso xok tlayouas pampa kanaj xok kisas noso xok kalakis tonaltsintli? Xkeman ijkon tiknemilianij. Tikmatstokej ika toTajtsin yejua akin kichiua ika tlaltikpaktli nochipa manopalakachojto niman makiyeualojto tonaltsintli, kuakon, tla yejua ueli kichiua yejon, ¿xmelak ika uelis kichiuas tlen yokijto? Kema (Is. 55:10, 11; Mat. 5:18).

Ika ome, tlaneltokijli kijtosneki “maski xtikitaj on tlen tikchaj, tikmatij ikan nochi toyojlo ika tikseliskej”, noso kuajli tikmatij ika itlaj melauak onka maski xtikitaj (Heb. 11:1b). Matiknemilikan ika se konetl techtlajtoltia tleka tikmatstokej ika melauak onka ajakatl. Maski xkeman tikitaj ajakatl, uelis tiktlanemililtiskej yejon konetl niman tikijliskej ika kema onka pampa yejon tlen tikijyotilanaj, yejon tlen kichiua itlaj manouiyoni noso kanaj tikijliskej okse itlaj. Ijkuak konetl kasikamati yejuin, kineltoka ika melauak onka maski xnesi. Noijki ijkon, uelis itlaj tikneltokaskej tla kuajli tikasikamatij ika melauak onka (Rom. 1:20).

Ken yotikitakej, san uelis itlaj tikneltokaskej tla kuajli tikasikamatij ika yejon melauak. Yejua ika, tla tiknekij tikpiyaskej tlaneltokijli, noneki tikmatiskej “on tlen melauak” (1 Tim. 2:4). San ika, xsan yejon noneki. Apóstol Pablo okijkuilo ika tlaneltokijli noteititia  ika toyojlo (Rom. 10:10). Xsan noneki tikneltokaskej tlen melauak, noneki tikpatiojkaitaskej. Niman tla tikpatiojkaitaj, tiknekiskej tikteititiskej totlaneltok, kijtosneki, tiknekiskej tikchiuaskej tlen toTajtsin kuelita (Sant. 2:20). Ijkuak yakaj xkipatiojkaita “on tlen melauak” itech Biblia, kanaj hasta xkiselia tlen kiteititia ika yejon melauak. Yejua ijkon kichiua pampa xkineki kipatlas itlanemilil noso kineki kichiuas tlen yejua kineki (2 Ped. 3:3, 4; Jud. 18). Yejua ika, xnochimej akin yeuejkaui okitakej milagros otlaneltokakej (Núm. 14:11; Juan 12:37). Espíritu santo san uelis kichiuas matlaneltokakan akin kitlasojtlaj tlen melauak niman akin kitlauelitaj tlen xmelauak (Gál. 5:22, TNM; 2 Tes. 2:10, 11).

David, yejua se itech itekipanojkauan toTajtsin akin yeuejkaui okiteititijkej ika melak otlaneltokakej (Heb. 11:32, 33). San ika, xnochimej ichanejkauan David ijkon otlaneltokakej. Matitlanemilikan itech ikniuj akin más iueyi katka, Eliab. Ijkuak Goliat okixnamik Israel, David okajman yejon niman okinek kimatis más itech tlen panotoya. San ika, Eliab okajuak David ipampa tlen okichiuj. Ijkon Eliab okiteititi ika xtlaneltokaya itech Jehová (1 Sam. 17:26-28). Xakaj uajnemi niman iuajtlaneltokatiuj, tatajtin xuelij kinpanoltiliaj ikoneuan tlaneltokijli. Kema, David tlaneltokaya itech toTajtsin pampa kuajli iuan nouikaya.

Ipan Salmo 27, David okijto tlenon okipaleui kuajli matlaneltoka (tlaxelojli pitentsin 1). Yejua tlanemiliaya itech tlen ipan yonochiujka yeuejkaui niman itech tlen Jehová yokinchiuilijka itlauelikniuan (tlaxeloltin pitentsitsintin 2 niman 3). Melak kipatiojkaitaya itabernáculo Jehová (tlaxelojli pitentsin 4) niman ompa kiueyichiuaya Jehová imiuan oksekimej israelitas (tlaxelojli pitentsin 6). Kichiuaya teoyotl niman ijkon Jehová makiyekana (tlaxeloltin pitentsitsintin 7 niman 8). Niman noijki kinekiya ika Jehová makimachti manejnemi ipan iojui (tlaxelojli pitentsin 11). David melak kipatiojkaitaya tlaneltokijli pampa onotlajtolti kanon nemiskia tla xtlaneltokaskia (tlaxelojli pitentsin 13).

Uelis titlaneltokaskej ken David tla noijki ijkon titlanemiliaj niman tikchiuaj ken nesi ipan Salmo 27. Pampa san uelis tikpiyaskej tlaneltokijli tla tikmatij “on tlen melauak”, noneki melak tomachtiskej iTlajtol toTajtsin niman toamatlajkuiloluan, yejon techpaleuis maka matikmachilikan ouijtika titlaneltokaskej (Sal. 1:2, 3). Ijkuak tomachtiskej, matitlanemilikan itech yejon, pampa tla ijkon tikchiuaj, tiknekiskej tiktlasojkamachiliskej Jehová. Niman tla melak tiktlasojkamachiliaj Jehová, melak tiknekiskej tikteititiskej totlaneltokil ijkuak tikueyichiuaskej ipan tlanechikoltin niman ijkuak tikimijliskej oksekimej tlen yejua kineki techmakas (Heb. 10:23-25). Noijki tikteititiaj ika titlaneltokaj ijkuak tikchiuaj teoyotl niman ijkuak titlaxikouaj (Luc. 18:1-8). Ijkon tej, nochipa matiknotsakan Jehová niman matikmatstokan ika yejua kineki techpaleuis (1 Tes. 5:17; 1 Ped. 5:7). Tla  titlaneltokaj, uelis tikchiuaskej tlen kichikauas totlaneltokil (Sant. 2:22).

Ijkuak sa achijtsin poliuiya ika mikis, Jesús okimijli inomachtijkauan: “Xneltokakan Dios niman nejua no xnechneltokakan” (Juan 14:1). Kuakon noneki titlaneltokaskej itech Jesús niman xsan itech Jehová. ¿Kenon uelis tikchiuaskej yejon? Matikitakan.

Kachtopa, matikitakan ken se tetlayokolijli tlen toTajtsin okichiuj topampa. Yejua okuajtitlan iKoneuj niman ijkon topampa mamiki. Apóstol Pablo okijto: “On nemilistli yejuan aman nikpiya ipan notlalnakayo, nikpiya ikan notlaneltok itech iKonetsin Dios, akin sanoyej onechtlajsojtlak niman nopampa onotemakak para omik” (Gál. 2:20). Ijkuak titlaneltokaj itech Jesús, tikasikamatij ika yejua yemelak onotemakak topampa. Imikilis Jesús kichiua ika Jehová matechintlapopoluili totlajtlakoluan, kichiua ika matikpiyakan se nemilistli tlen xkeman tlamis niman noijki techasikamachiltia ika toTajtsin melak techtlasojtla (Rom. 8:32, 38, 39; Efes. 1:7). Nochi yejuin techpaleuis maka matiknemilikan tlen xkuajli (2 Tes. 2:16, 17).

Ika ome, matikchiuakan teoyotl niman ijkon tiknisiuiskej Jehová. Pampa Jesús onotemakak topampa, uelis tikchiuiliskej teoyotl Jehová niman ijkon tikseliskej “iteiknelilis niman iueyi tetlajsojtlalis yejuan techpaleuis ijkuak itlaj techpolos” (Heb. 4:15, 16; 10:19-22). Tla tikchiuaj teoyotl, techpaleuis maka matiknekikan tikchiuaskej tlen xkuajli (Luc. 22:40).

Ika yeyi, matiktlakamatikan Jesús. Apóstol Juan okijkuilo: “Yejuan kineltoka iKonetsin Dios kipiya nemilistli para nochipa, pero on yejuan xkitlakamati xkipiyas in nemilistli, yej kiselis on temojtij icastigo Dios” (Juan 3:36). Apóstol Juan okijto akin tlaneltoka noijki tetlakamati. Ika yejon, tikteititiaj ika titlaneltokaj itech Jesús ijkuak tiktlakamatij. Niman tiktlakamatij ijkuak tikchiuaj ken kijtoua “itlanauatil Cristo”, kijtosneki, nochi tlen yejua otechmachti niman otechnauati (Gál. 6:2). Noijki tiktlakamatij ijkuak tikchiuaj tlen techijlia tekitketl yolmelauak niman tlamachilise (Mat. 24:45). Tla tikchiuaj tlen Jesús technauatia, uelis tikxikoskej tlen melak ouijtika (Mat. 7:24, 25).

Se tonajli, se tlakatl okijli Jesús: “Nejua nitlaneltoka, pero xnechpaleui más ma nitlaneltoka ken melauak noneki” (Mar. 9:24). Yejuin tlakatl tlaneltokaya, san ika, onoyolyemanili niman okasikamat ika nonekiya más tlaneltokas. Ijkon ken yejuin tlakatl, ajsis tonajli ijkuak nonekis más titlaneltokaskej. Niman tinochimej uelis aman tikchikauaskej totlaneltokil. Ken yotikitakej, tikchikauaj totlaneltokil ijkuak tomachtiaj iTlajtol toTajtsin niman ijkuak itech titlanemiliaj, niman yejon kichiuas matiktlasojkamachilikan Jehová. Totlaneltokil noijki chikaui ijkuak tikueyichiuaj Jehová imiuan tokniuan, ijkuak titenojnotsaj itech tlen tikseliskej niman ijkuak nochipa tikchiuaj teoyotl. Tla ijkon tikchikauaj totlaneltokil, tikseliskej se ueyi tlateochiualistli: tikseliskej itlasojtlalis toTajtsin (Jud. 20, 21).