• “Yeskia kentla noueuentsin miyekpa nechkajkayaujtoskia iuan yakaj”.

• “Nikmachiliaya ika melak yonechpinaujtijkaj, ika xnikualtsin niman ika xtlaj ika nitepaleui”.

• “Melak nitlajyouiaya niman xakaj nemiya akin ueliskia nikijlis tlen nikmachiliaya”.

• “Opeuj niknemilia ika Jehová xok najmanaya nopampa”.

Yejuin tlajtoltin kiteititiaj kenon melak tlajyouiya se siuatl ijkuak iueuentsin kita pornografía. Niman tla seki metstin noso seki xiujtin san ichtaka kita pornografía, isiuatsin kanaj kimachilis ika xok uelis itech tlaneltokas. Se siuatl okijto: “Ninotlajtoltiaya: ‘¿Akinon yejuin tlakatl akin nouan chanti? ¿Kanaj okseki itlaj nechiyanilijtika?’”.

¿Moueuentsin yopeuj kita pornografía? a Kuakon, yejuin tlamachtijli onochijchiuj para tejua. Nikan tikimitaskej seki textos tlen mitsyolchikauaskej, mitsititiskej ika Jehová mitspaleuis, niman noijki mitspaleuiskej kuajli xtlanemili niman xchikaua motlaneltok. b

Melauak ika tejua xuelis tikchiuas ika moueuentsin makipatla tlen kichiua, san ika, kema uelis itlaj tikchiuas para xyolseujto. Amantsin tikitaskej tlenon uelis mitspaleuis.

Maka xmotlajtlakolti. Kanaj se siuatl uelis kimachilis ika yejua kipiya tlajtlakojli pampa iueuentsin kita pornografía. Matontlanemilikan itech Alicia, c yejua kinemiliaya ika kichiujtoya itlaj tlen xkuajli niman notlajtoltiaya: “¿Tleka noueuentsin más kuelita kimitas oksekimej siuamej xken nejua?”. Niman sekimej tesiuauan kinemiliaj ika san no yejuamej kixoxotonijtokej innamiktilis. Daniela kijtoua: “Melak nitlauelmikiya pampa yejua ok kitaya pornografía. Nochipa san nikualantinemiya niman nejua ninotlajtlakoltiaya ika xok kuajli ninouikaya iuan noueuentsin”.

Tla tejua ijkon timomachilia, xkilnamiki ika Jehová xmitstlajtlakoltia ipampa tlen kichiua moueuentsin. Santiago 1:14 kijtoua: “On xkuajli  ieleuilis sen tlakatl kitlatlata para ma tlajtlako ijkuak ieleuilis kiyekana hasta kijtlakouilia itlamachilis” (Rom. 14:12; Filip. 2:12). Kuakon, Jehová xmitstlajtlakoltia, yej kipatiojkaita pampa tejua timelajkanemi (2 Crón. 16:9).

Maka xnemili ika moueuentsin kita pornografía pampa tejua xtikualtsin. Tla tikasikamati yejuin, melak mitspaleuis. Ixtlamatkej kijtouaj ika pornografía kichiua ika se tlakatl makineki makimakakan itlaj tlen nion se siuatl xueli kitemaka.

Maka san itech yejon xtlanemilijto. Catarina kijtoua ika mojmostla san kinemilijtoya ika iueuentsin kitaya pornografía. Xueliya itlaj okse kinemiliaya. Francisca kijtoua: “Ijkuak xnikmati kanon nemi noueuentsin, melak najmankamiki”. Oksekimej tesiuauan kijtouaj ika melak pinauij ijkuak nemij imiuan oksekimej tokniuan akin kimatij tlen kixnamiktokej. Niman oksekimej kijtouaj ika inselti nomachiliaj pampa kinemiliaj ika xakaj kimasikamati.

Xsan tejua ijkon timomachilia. San ika, tla nochipa titlanemilijtika itech yejon melak mitsijtlakos. Más kuajli tla titlanemilia itech kenon timouikas iuan Jehová, pampa yejon mitspaleuis xtlaxiko (Sal. 62:2; Efes. 6:10).

¿Kenon uelis mitspaleuis tla tikamapoua Biblia niman itech titlanemilia? Biblia kinteneua sekimej siuamej akin okixnamijkej tlen melak ouijtika. San ika, más kuajli onomachilijkej sakin ika okinotskej Jehová. Maski yejua xnochipa okichiuj mapopoliui tlen kixnamiktoyaj, kema okichiuj mayolseujtokan. Xontlanemili itech Ana, se siuatl akin melak najmanaya. Yejua ouejkauj “kichiua oración ixpan toTEKO” niman oyolseuj maski xkimatiya tlenon panoskia sakin (1 Sam. 1:10, 12, 18; 2 Cor. 1:3, 4).

Xkimijli tlayekankej akin nemij ipan motlanechikol mamitspaleuikan. Yejuamej “yeskej kenon kampa niyanalo ijkuak chikauak ajaka noso chikauak ajakakiaui” (Is. 32:2). Uelis mitsijliskej iuan akinon tokniuj siuatl uelis titlajtos niman ijkon mitsyolseuis (Prov. 17:17).

¿Uelis itlaj tikchiuas para moueuentsin makikajkaua pornografía? Kanaj kema. Biblia kijtoua ika para se tetlanis “más kuajli omemej xken se san iselti” (Ecl. 4:9-12). Ixtlamatkej yokitakej ika para yakaj más nimantsin kikajkauas kitas pornografía niman oksejpa itech tlaneltokaskej noneki yakaj makipaleui.

 Noneki kuajli tikitas tla moueuentsin yemelak kineki kikajkauas ika kita pornografía niman tla itlaj yokichiuj para ijkon kichiuas. ¿Tikmati tla moueuentsin yokitlajtlanili Jehová makipaleui niman tla yokintlajtlanili tlayekankej makipaleuikan? (2 Cor. 4:7; Sant. 5:14, 15). ¿Moueuentsin yokichiuj tlen kipaleuis kikajkauas kitas pornografía? ¿Tikmati tla xok más kimita dispositivos electrónicos niman tla nokojtilijtika kitlalkauis tlen ueliskia kichiuas oksejpa makita pornografía? (Prov. 27:12). ¿Kinektok xpaleui niman kinektok nochi mitsijlis? Tla kema, kanaj uelis tikpaleuis.

¿Kenon uelis tikchiuas? Xkita tlen kichiua Feliciana. Yejua ononamikti iuan Iván, akin opeuj kita pornografía desde ijkuak konetl katka. Feliciana kichiua nochi tlen ueli niman ijkon iueuentsin uelis iuan tlajtos ijkuak kimachilis ika oksejpa kineki kitas pornografía. Iván kijtoua: “Xnipinaui nikijlis nosiuatsin nochi tlen nikmachilia, yejua nechititia ika nechtlasojtla niman nechpaleuiya maka manikita pornografía. Niman nochipa nechtlajtoltia tlenon onikchiuj para xnikitas pornografía, noijki nechpaleuiya maka sajnoye maniktekitilti internet”. San ika, Feliciana melak kiyolkokoua ijkuak kita ika iueuentsin kuelita kitas pornografía. Yejua kijtoua: “Maski melak nikualani niman ninoyolkokoua, nikmatstika ika yejon xkipaleuis noueuentsin makikajkaua makita pornografía. Sakin ika Iván yonechijli tlen kimachilia, aman yejua iueli nechpaleuiya maniyolseui”.

Ijkuak ijkin nonojnotsaj, kipaleuiya teueuentsin para makikajkaua pornografía. San ika, noijki kipaleuiya tesiuatsin para oksejpa matlaneltoka itech iueuentsin. Ijkuak se teueuentsin kijlia isiuauj tlen ouijtika kita kichiuas, kanon yokistinen, noso kanon yoyajka, isiuauj más itech tlaneltoka.

¿Tiknemilia ika noijki uelis ijkon tikchiuas para tikpaleuis moueuentsin? Tla kema, ueliskia san sekan nenkipouaskej niman nemomachtiskej yejuin tlamachtijli. ¿Tlenon noneki kinektos kichiuas moueuentsin? Noneki kinektos kikajkauas pornografía niman kichiuas ika tejua oksejpa itech xtlaneltoka. Yejua xnoneki kualanis tla kita ika tejua tikneki titlajtos itech yejuin, yej noneki nokojtilis mitsasikamatis niman kitas kenon mitsyolkokoua tlen kichiujtika. Niman tejua, ¿tlenon noneki tiknektos tikchiuas? Noneki tikpaleuis niman tijkauilis mamitsititi ika kema oksejpa uelis itech titlaneltokas. Melak kuajli tla nenomemej nenkimatij tleka sekimej peuaj kitaj pornografía niman kenon ueliskej kikajkauaskej. d

 Tla nenkinemiliaj ika nenkualaniskej ijkuak nentlajtoskej itech yejuin, xkijlikan se tlayekanketl nemouan manemi ijkuak nemonojnotsaskej niman ijkon mechpaleuis. Uelis tiktlapejpenis se tlayekanketl akin nenomemej kuajli iuan nemouikaj. Xkilnamiki ika maski moueuentsin kanaj kikajkauas ika kita pornografía, tejua ok uejkauis para itech titlaneltokas. Maka xmosiaujkaua, xkita kenon ika yolik noyektlalijtiuj tlen mechajmana. Noneki tiempo niman xnoneki timosiaujkauas para oksejpa kuajli nemouikaskej (Ecl. 7:8; 1 Cor. 13:4).

Tla moueuentsin oksejpa kita pornografía, ¿kijtosneki ika xnoyolkuepa noso ika nochipa kichiujtos yejon? Ka, xyejon kijtosneki. Pampa yejuin itlaj tlen xnimantsin ueli nokajkaua, kanaj moueuentsin nonekis nochipa nokojtilijtos. Maski yejua youejkauj ika xok kita pornografía, sakin oksejpa ueliskia kitas. Tla kineki kikajkauas ika kita pornografía, noneki kichiuas tlen más kipaleuis, yejua nonekis ijkon kichiujtos maski nesis ika yokikajkauj (Prov. 28:14; Mat. 5:29; 1 Cor. 10:12). Noneki kipatlas ken tlanemilia niman kitlauelitas tlen xkuajli; noijki xkichiuas nochi tlen tsokuiltik, kijtosneki ika noneki kitlauelitas pornografía niman xnoneki nomajmatokas (Efes. 4:23; Sal. 97:10; Rom. 12:9). ¿Moixnamik kinektok kichiuas nochi yejuin? Tla kema, kuakon kanaj uelis nopatlas. e

¿Niman tla moueuentsin xkineki nopatlas? Kanaj yejon kichiua melak xmajmana, xmachili ika yomitskajkayaujkej niman melak xtlauelmiki. Xkijli Jehová nochi tlen mitsajmana niman yejua kichiuas xyolseui (1 Ped. 5:7). Nochipa xmomachti, xchiua teoyotl, niman xtlanemili itech tlen tikamapoua, niman ijkon más tiknisiuis Jehová niman tikitas ika yejua noijki más mitsnisiuis. “ToTEKO nemi nisiu para kinyoltlalia on yejuan sanoyej noyolkokouaj” niman kineki kinpaleuis para oksejpa mapakikan (Sal. 34:18). Xmokojtili tikchiuas tlen toTajtsin technauatia, xkintlajtlanili tlayekankej mamitspaleuikan niman xnemili ika kanaj se tonajli moueuentsin kinekis nopatlas (Rom. 2:4; 2 Ped. 3:9).