1. ¿Tlenon kineki Jehová?

 IJKUAK Jehová okinchijchiuj tlaltikpaktlakamej, okichiuj para san no yejuamej makitlapejpenikan tlen kichiuaskej. Tinochimej mojmostla noneki tiktlapejpeniskej tlenon tikchiuaskej, san ika, melak noneki más kuajli matiknemilikan ijkuak tiktlapejpeniskej tla tosentemakaskej itech Jehová niman tinemiskej ipan ikalpan. Jehová melak kineki ika nochimej makitlapejpenikan itech manosentemakakan. ¿Tleka? Pampa nochimej melak kintlasojtla niman kineki kuajli manemikan. Yejua kineki imiuan nouikas niman nochipa manemikan (Deut. 30:​19, 20; Gál. 6:​7, 8).

2. ¿Tlenon kineki Jehová makichiuakan akin yokichiujkej se ueyi tlajtlakojli niman xnoyolkuepaj? (1 Juan 2:1).

² Jehová xtexchiualtia matiktekichiuilikan, yejua techkauilia tejuamej matiktlapejpenikan tla tiktekichiuiliskej. Aman  tej, ¿tlenon panoua tla se akin yonoapolakti kichiua se ueyi tlajtlakojli? Tla xnoyolkuepa, noneki kikixtiskej itech tlanechikojli (1 Cor. 5:13). San ika, maski se yotlajtlako, Jehová ok kineki itech mauajnokuepa. Matikilnamikikan ika Jehová okitemakak isenteKonetsin niman ijkon kintlapojpoluis akin noyolkuepaj (xpoua 1 Juan 2:1). ToTajtsin melak tetlasojtla, ika yejon, kinpaleuiya akin yotlajtlakojkej niman kinyolchikaua manoyolkuepakan (Zac. 1:3; Rom. 2:4; Sant. 4:8).

3. ¿Tlenon tikitaskej ipan yejuin tlamachtijli?

³ Jehová kineki matikimitakan tlajtlakoltin niman akin tlajtlakouaj ijkon ken yejua kimita. Yejuin tlamachtijli techpaleuis ijkon matikchiuakan. Kachtopa tikitaskej tlenon onochiuj ipan kachtopa siglo ijkuak ipan tlanechikojli Corinto yakaj kichiujtoya se ueyi tlajtlakojli. Sakin tikitaskej tlenon okinnauati Pablo makichiuakan tokniuan corintios ijkuak akin otlajtlako onoyolkuep. Sa ika tlami tikitaskej kenon Jehová kimita akin kichiuaj se ueyi tlajtlakojli.

TLENON OPANOK IPAN KACHTOPA SIGLO IJKUAK YAKAJ KICHIUJTOYA SE UEYI TLAJTLAKOJLI

4. ¿Tlenon panotoya ipan tlanechikojli Corinto? (1 Corintios 5:​1, 2).

⁴ (Xpoua 1 Corintios 5:​1, 2). Ijkuak Pablo ika yexpa tetlajpalojtinemiya, okimat ika ipan yenkuik tlanechikojli Corinto se tokniuj auilnentoya iuan itlakpanan. Pablo ijkin okijto itech tlen panotoya: “Ken on tlajtlakojli sanoyej xkuajli hasta on yejuan xhebreos xijkon kichiuaj”. San ika, kanaj tokniuan xkinemiliayaj tla xkuajli katka ika yejon tokniuj nemiya ipan tlanechikojli maski kichiujtoya se ueyi tlajtlakojli. Sekimej kanaj kinemiliayaj ika yejon kiteititiaya ika Jehová melak teiknelia niman ika kimajsikamatiya tlaltikpakchanejkej pampa tlajtlakolejkej. San ika, Jehová xkuelita manochiua tlajtlakojli ipan ikalpan. Ipampa tlen kichiujtoya yejon tlakatl, kanaj sekimej xkuajli kitayaj tlanechikojli. Niman kanaj noijki kichiujtoya ika oksekimej tokniuan makichiuakan tlajtlakojli. Kuakon, ¿tlenon okinnauati Pablo makichiuakan tokniuan corintios?

5. ¿Tlenon okimijli Pablo tokniuan, niman tlenon kinekiya kimajsikamachiltis? (1 Corintios 5:13; noijki xkita tlaixkopinajli).

⁵ (Xpoua 1 Corintios 5:13). Jehová okichiuj ika Pablo makimijli tokniuan ika nonekiya kikixtiskej itech tlanechikojli akin otlajtlako niman xnoyolkuepaya. ¿Kenon nonekiya kitaskej tokniuan akin  otlajtlako? Pablo okimijli ika xnonekiya iuan nosentlaliskej nion iuan tlakuaskej (1 Cor. 5:11). Ijkuak yakaj iuan titlakuaj, iuan tonojnotsaj niman iuan tinemij. Kuakon, Pablo kinekiya kimajsikamachiltis tokniuan ika xnonekiya melak iuan nemiskej akin yotlajtlakojka, pampa tla ijkon kichiuayaj, noijki ueliskiaj peuaskiaj kichiuaskej se tlajtlakojli (1 Cor. 5:​5-7). Noijki, tla xiuan nosentlaliayaj, kipaleuiskiaj makita ika yokiyolkokojka Jehová, mapinaui ipampa tlen okichiuj niman makineki noyolkuepas.

6. ¿Tlenon okichiujkej tokniuan niman akin otlajtlakojka sakin ika Pablo okomontlajkuilouili?

⁶ Sakin ika Pablo yokomontlajkuilouilijka akin chantiyaj Corinto, opeuj notlajtoltia tlenon kichiuaskiaj tokniuan. Sakin, Tito okijli tlenon opanok: tokniuan okichiujkaj nochi tlen okimijlika (2 Cor. 7:​6, 7). Noijki, sakin ika Pablo yokomontlajkuilouilijka, yejon  tlakatl onoyolkuep. Yejua xok kichiuaya tlen xkuajli niman oksejpa opeuj kintlakamati itlanauatiluan Jehová (2 Cor. 7:​8-11). ¿Aman Pablo tlenon kimijliskia makichiuakan tokniuan?

TLEN NONEKIYA KICHIUASKEJ TOKNIUAN IPAMPA AKIN ONOYOLKUEP

7. ¿Tlenon opanok pampa akin otlajtlako okikixtijkej itech tlanechikojli? (2 Corintios 2:​5-8).

⁷ (Xpoua 2 Corintios 2:​5-8). Pablo okijto: “On castigo yejuan yokiselij ijkuak nenmiyekej onencastigarojkej ye kuajlonkaj”. Yejua okijtosnek ika ken yokitlajtlakolmakakaj, yokipaleuijka. Kema, okipaleui manoyolkuepa (Heb. 12:11).

8. ¿Tlenon okimijli Pablo tokniuan?

⁸ Sakin, Pablo okimijli tokniuan tlenon nonekiya kichiuaskej ipampa akin otlajtlakojka: “Noneki nenkitlapojpoluiskej niman nenkiyoltlaliskej”. Noijki okimijli: “Sanoyej nemechtlajtlanilia, xkititikan ika sanken nenkitlajsojtlaj”. Ken tikitaj, Pablo xsan kinekiya ika tokniuan makikauilikan akin otlajtlako manokuepa ipan tlanechikojli, yejua noijki kinekiya makijlikan niman makititikan ika yokitlapojpoluijkaj niman ika kitlasojtlayaj. Tla ijkon kichiuayaj, akin otlajtlakojka kitaskia ika tokniuan yolpakiyaj pampa oksejpa yonokuepka ipan tlanechikojli.

9. ¿Kanaj tleka sekimej tokniuan ouijtika okitakej kuajli kiseliskej akin yotlajtlakojka?

⁹ ¿Ouijtika okitakej sekimej tokniuan kuajli kiseliskej akin otlajtlakojka? Biblia xtlaj kijtoua, san ika, uelis tikijtoskej ika kema. Yejua melak okijtlakojka tlanechikojli niman kanaj melak okinyolkokojka sekimej tokniuan. Niman kanaj sekimej kinemiliayaj ika xkinamikiya kuajli kiseliskej akin okichiujka tlen melak xkuajli pampa yejuamej nokojtiliayaj kitlakamatiskej itlanauatiluan Jehová (uelis tikitas Lucas 15:​28-30). San ika ¿tleka melak nonekiya makititikan ika kitlasojtlayaj akin yonokuepka ipan tlanechikojli?

10, 11. ¿Tlenon ueliskia panos tla tlayekankej xkitlapojpoluiskiaj akin yonoyolkuepka?

¹⁰ ¿Tlenon panoskia tla tlayekankej xkikauiliskiaj manokuepa ipan tlanechikojli akin yonoyolkuepka? ¿Noso tlenon panoskia tla tokniuan xkuajli kiseliskiaj? Akin otlajtlakojka kanaj melak noyolkokoskia. Niman kanaj hasta ueliskia kinemilis ika Jehová xok keman ueliskia kitlapojpoluis niman ika xtlaj ika kipaleuiskia tla nokojtiliaya oksejpa nouikas iuan Jehová.

¹¹ Niman xsan yejon panoskia. Tla tokniuan akin nemiyaj ipan tlanechikojli xkitlapojpoluiskiaj akin otlajtlakojka, hasta ueliskiaj xok nouikaskej iuan Jehová. ¿Tleka? Pampa kichiujtoskiaj ken Satanás, akin xteiknelia, niman xkichiujtoskiaj ken Jehová, akin kinektika kintlapojpoluis akin noyolkuepaj. Tla yejuamej xkitlapojpoluiskiaj yejon tlakatl, Diablo ueliskia kintekitiltis niman ijkon kichiuas ika yejon tlakatl maka oksejpa manouika iuan Jehová (2 Cor. 2:​10, 11; Efes. 4:27).

12. ¿Kenon tokniuan ueliskiaj kichiuaskej ken Jehová?

¹² Kuakon, ¿kenon tokniuan corintios ueliskiaj kichiuaskej ken Jehová niman xken Satanás? Tla kimitayaj akin noyolkuepayaj ijkon ken Jehová kimita. Xkita tlenon okijtojkej itech Jehová sekimej akin okijkuilojkej Biblia. David okijto: “Kuajli moyojlo niman titetlapojpoluiya” (Sal. 86:5) Daniel okijkuilo: “Pero tejua, toDios, titeikneliani niman titetlapojpoluiya” (Dan. 9:9). Niman Isaías okijto: “On xompayejyeua ma kaua on xkuajli ojtli; on yejuan xipan teita ma kaua on tlen xkuajli kinemilia. Xmokuepakan itech toTEKO, niman yejua mechiknelis. Xmokuepakan  itech toDios pampa yejua yolyemanki niman tetlapojpoluiya” (Is. 55:7).

13. ¿Tleka ueliskia oksejpa kiseliskej ipan tlanechikojli akin otlajtlakojka? (Xkita recuadro “ ¿Kech tiempo opanok para oksejpa kiseliskej ipan tlanechikojli Corinto akin otlajtlako?”).

¹³ Tla tokniuan akin nemiyaj ipan tlanechikojli Corinto kinekiyaj kichiuaskej ken Jehová, nonekiya kuajli kiseliskej akin yonoyolkuepka niman kititiskej ika melak kitlasojtlayaj. Pablo okijto ika tla kitlapojpoluiayaj yejon tlakatl, kiteititiskiaj ika nochipa tetlakamatiyaj (2 Cor. 2:9). Akin otlajtlakojka onoyolkuep ijkuak okikixtijkej itech tlanechikojli, ika yejon, maski xmiyek metstin yopanoka ika okikixtijkaj, tlayekankej ueliskia oksejpa kiseliskej ipan tlanechikojli.

TLENON TIUELIJ ITECH IMELAJKAYO NIMAN ITEIKNELILIS JEHOVÁ

14, 15. ¿Tlenon techmachtia tlen onochiuj ijkuak se tlakatl kichiujtoya se ueyi tlajtlakojli ipan tlanechikojli Corinto? (2 Pedro 3:9; noijki xkita tlaixkopinajli).

¹⁴ Jehová okichiuj manoijkuilo ipan iTlajtol tlen opanok ipan tlanechikojli Corinto niman ijkon techmachtis (Rom. 15:4). Tlen onoijkuilo, techmachtia ika Jehová xkineki manochiua tlajtlakojli ipan ikalpan. Sekimej kinemiliaj ika Jehová melak teiknelia niman kikauilia ika akin xnoyolkuepa manemi ipan tlanechikojli. Melauak, Jehová teiknelia, san ika, yejua xkitekauilia san tlenon manochiua ipan ikalpan niman xkinpatla itlanauatiluan (Jud. 4). Tla Jehová kikauiliskia manemi ipan tlanechikojli akin xnoyolkuepaya,  kiteititijtoskia ika xteiknelia pampa yejon ueliskia kichiuas makimijtlako tokniuan ipan tlanechikojli (Prov. 13:20; 1 Cor. 15:33).

¹⁵ Aman tej, tlen yotikonitakej noijki techmachtia ika Jehová xkineki yakaj mapopoliui. Yejua kichiua nochi tlen ueli niman ijkon kinmakixtis. Kimiknelia akin noyolkuepaj niman nokojtiliaj oksejpa kuajli iuan nouikaskej (Ezeq. 33:11; xpoua 2 Pedro 3:9). Ika yejon, ijkuak on tlakatl akin chantiya Corinto onoyolkuep niman xok tlajtlakojtoya, Jehová okijli tlanechikojli itechkopa Pablo ika nonekiya kitlapojpoluiskej niman kuajli kiseliskej.

16. ¿Tlenon tiknemilia itech Jehová ijkuak titlanemilia itech tlen onochiuj ijkuak nochiujtoya se ueyi tlajtlakojli ipan tlanechikojli Corinto?

¹⁶ Nochi tlen yotikonitakej, techpaleuiya matikitakan ika Jehová melak tetlasojtla, yolmelajki niman nochipa kichiua tlen kuajli (Sal. 33:5). ¿Xmelak ika ijkuak tikitaj yejuin ikualneskayouan toTajtsin kichiua más matiknekikan tikueyichiuaskej? Matikilnamikikan ika tinochimej titlajtlakolejkej niman noneki ika Jehová matechtlapojpolui. Melak tiktlasojkamachiliaj pampa okitemakak iKonetsin topampa, pampa ijkon yejua ueli techtlapojpoluiya. Melak techyolseuiya tikmatiskej ika Jehová melak kintlasojtla itekipanojkauan niman kineki kuajli manemikan.

17. ¿Tlenon tiknankiliskej ipan okseki tlamachtiltin?

¹⁷ ¿Niman aman tlenon panoua ijkuak yakaj kichiua se ueyi tlajtlakojli? ¿Kenon tlayekankej uelis kiteititiskej ika tetlasojtlaj ijkon ken Jehová niman kipaleuiskej manoyolkuepa akin yotlajtlako? ¿Tlenon noneki tikchiuaskej ijkuak tlayekankej kikixtiskej yakaj itech tlanechikojli noso yakaj kiseliskej? Nochi yejuin tiknankiliskej ipan okseki tlamachtiltin.