1. ¿Kenijki noitaya pan yeuejkaui?

 YEUEJKAUI, tlaltikpakchanejkej melak kikuayaj pan pampa yejon tlen más nokuaya (Gén. 14:18; Juan 21:9). Niman ipan Biblia kemantika kijtoua pan para kiteneuas tlakuajli (1 Rey. 17:​11, 12; Ezeq. 5:16). Jesús okitekitilti pan ipan ome imilagros (Mat. 16:​9, 10). Matikitakan se itech yejon milagro tlen nesi ipan Juan capítulo 6 niman matikitakan tlenon tiuelij itech yejon milagro.

2. Xteneua kemanon ononek tlakuajli para miyekej tlakuaskej.

² Ijkuak iapóstoles Jesús yotlankaj tenojnotsaj, Jesús okinuikak ipan se barco niman okipanauijkej mar de Galilea. Oyajkej nisiuj kalpan Betsaida kampa xakaj nemiya niman ijkon noseuiskej (Mar. 6:​7, 30-32; Luc. 9:10). San ika, ijkuak oajsikej, ompa yenemiyaj miyekej tlaltikpakchanejkej akin kinekiyaj kitaskej Jesús. Ijkuak Jesús okimitak, okimikneli, ika yejon, xsan ijkon ompa okinkauj, yejua opeuj kinnojnotsa itech iTekiuajyo toTajtsin niman opeuj kinpajtia akin kualouayaj. San ika, ijkuak yeteotlaktikatka, inomachtijkauan Jesús opeuj notlajtoltiaj kenijki tlakuaskiaj nochimej akin ompa nemiyaj. Sekimej kanaj kitkiyaj achijtsin tlakuajli, san ika, miyekej nonekiskia yaskej ipan kalpantsitsintin para konkouaskej tlen kikuaskej (Mat. 14:15; Juan 6:​4, 5). ¿Tlenon kichiuaskia Jesús inpampa yejuin tlaltikpakchanejkej?

 OTETLAKUALTI IKA SE MILAGRO

3. ¿Tlenon okimijli Jesús makichiuakan iapóstoles? (Noijki xkita tlaixkopinajli tlen nesi ixpan revista).

³ Jesús ijkin okimijli iapóstoles: “Ka, xkipiyaj tline yaskej. Yej nemejuamej xkinmakakan tlinon kikuaskej” (Mat. 14:16). Yejuin ouijtika yeskia pampa ompa nemiyaj 5,000 tlakamej, niman tla teuan tikinpouaj siuamej niman kokonej, ika nochi yeskiaj 15,000 tlaltikpakchanejkej (Mat. 14:21). Andrés okijto: “Nikan nemi sen tlakakonetl yejuan kipiya makuijli pan tlachijchitli ikan cebada niman ome michintsitsimej. Pero ¿tlinon kijtojtikaj in achijtsin tlakuajli para in miyek tlakatl?” (Juan 6:9). Pan tlachijchiujtli ika cebada xpatioj katka niman melak miyekej kichijchiuayaj, niman kanaj on tlakakonetl kitkiya michuajki tlen poyek katka. San ika, tlen kitkiya yejon tlakakonetl xnochimej kinmaxiliskia.

4. ¿Tlenon tiuelij itech Juan 6:​11-13? (Noijki xkimita tlaixkopinaltin).

⁴ Jesús kinekiya kintlakualtis yejon tlaltikpakchanejkej, ika yejon, okimijli nojnonkuaj manotlajtlalikan ipan on sakatl (Mar. 6:​39, 40; xpoua Juan 6:​11-13). Biblia kijtoua ika Jesús okitlaxtlauilmakak iTaj ipampa michintsitsintin niman pan. Niman melak kuajli ika ijkon okichiuj pampa itech toTajtsin ualeuaya yejon tlakuajli. Yejuin techilnamiktia ika noneki tikchiuaskej teoyotl ijkuak titlakuaskej, maski tla san toselti tinemiskej noso imiuan miyekej. Sakin, Jesús otlanauati makixexelokan tlakuajli, niman tlaltikpakchanejkej otlakuajkej hasta oixuikej. San ika, xotlan tlakuajli, ika yejon, Jesús otlanauati  makejyeuakan para sakin ueliskia oksejpa kikuaskej pampa xkinekiya san manenpoliui. Tlen okichiuj Jesús techititia ika xnoneki san tiknenpoloskej tlen tikpiyaj. Tatajtin uelis nomachtiskej imiuan inkoneuan itech tlen okichiuj Jesús niman ijkon kinmachtiskej makichiuakan teoyotl niman makinekikan kitemakaskej tlen kipiyaj.

5. ¿Tlenon okichiujkej tlaltikpakchanejkej ijkuak okimitakej imilagros Jesús, niman tlenon okichiuj Jesús?

⁵ Tlaltikpakchanejkej melak kinmojkatlachialtiaya kenijki temachtiaya Jesús niman milagros tlen kinchiuaya. Kimatstoyaj ika Moisés yokijtojka ika toTajtsin kitlaliskia se teotlajtojketl, kuakon, kanaj notlajtoltiayaj tla yejon teotlajtojketl katka Jesús (Deut. 18:​15-18). Kanaj yejuamej kinemiliayaj ika Jesús yeskia se melak kuajli tekiuaj pampa ueliskia kitlakualtis nochi kalpan. Ika yejon, yejuamej “kinekiyaj kasiskej para kalaktiskej inrey” (Juan 6:​14, 15). Tla Jesús kinokauiliskia makitlalikan ken tekiuaj, nokalaktijtoskia ipan inpolítica judíos, tlen kiyekanaya Roma. San ika, yejua xokinokauili maski melak kichiualtiayaj. Biblia kijtoua ika Jesús “onejkuanij niman iselti oyaj ipan on tepetl”. ¡Melak kuajli tlen techmachtia!

6. ¿Kenijki uelis tikchiuaskej ken Jesús? (Noijki xkita tlaixkopinajli).

⁶ Aman tej, tejuamej xakaj techtlajtlanilis matikmiyekilikan pan noso matikinpajtikan  akin kualoj ika se milagro. Noijki xakaj techchiualtisnekis matitekiuajkej. San ika, kanaj kema techchiualtisnekiskej matitlapaleuikan ipan política, kanaj techijliskej matikmakakan tovoto yakaj akin kinemiliaj ika kuajli tlayekanas noso matikchiuakan itlaj para tikititiskej ika tikpaleuiyaj. San ika, tlen okichiuj Jesús melak kuajli techmachtia. Yejua xokinek nokalaktis ipan política. Niman sakin yejua okijto: “Nejua xnitlamandaroua nikan ipan in tlaltikpaktli ken se rey” (Juan 17:14; 18:36). Melak kuajli tla tejuamej titlanemiliaj niman tikchiuaj ken Jesús. Akin tikchiuaj ken Cristo san tikpaleuiyaj iTekiuajyo toTajtsin, itech titlajtouaj niman tikchiuaj teoyotl para mayejkotiuetsi iTekiuajyo toTajtsin (Mat. 6:10). Matikitakan tlenon más tiuelij itech milagro tlen Jesús okichiuj ijkuak okimiyekili pan.

TLEN KIJTOSNEKI MILAGRO ITECH PANES

7. ¿Katlejua okse milagro okichiuj Jesús, niman tlenon okichiujkej iapóstoles? (Juan 6:​16-20).

⁷ Sakin ika Jesús yotetlakualtijka, okimijli iapóstoles manokuepakan Capernaúm ipan se barco niman yejua oyaj ipan tepetl para ijkon xkitlaliskiaj ken tekiuaj (xpoua Juan 6:​16-20). Ijkuak iapóstoles yayaj ipan barco, opeuj sajnoye ajakakiyaui niman opeuj melak koxoni atl. Kuakon, Jesús onejnentia ipan atl para ajsis kampa nemiyaj inomachtijkauan. Niman okijli apóstol Pedro noijki manejnemi ipan atl (Mat. 14:​22-31). Ijkuak Jesús otlejkok ipan barco, onotelti ajakakiyaujtli. Inomachtijkauan melak omojkatlachixkej niman okijtojkej: “Tlakaj melauak tejua tiiKoneu Dios” (Mat. 14:33). a Temojkatlachialti ika yejuamej ijkon okijtojkej ijkuak okitakej ika Jesús onejnen ipan atl, san ika, xijkon okijtojkej ijkuak yejua okimiyekili tlakuajli. Niman Marcos ijkin okijkuilo itech tlen opanok: “Maski yokitakaj tlinon yokichijka ika on pan niman on michimej, hasta aman xkajsikamatiyaj on milagro yejuan Jesús okichiu pampa sanoyej yoltechikajkej katkaj” (Mar. 6:​50-52). Kema, yejuamej xkajsikamatiyaj ika Jehová yokimakaka kojtilistli Jesús para makinchiua milagros. Sakin, Jesús oksejpa okiteneuj milagro itech panes niman ijkon itlaj okse techmachtis.

8, 9. ¿Tleka tlaltikpakchanejkej okitejtemotoj Jesús? (Juan 6:​26, 27).

⁸ Tlaltikpakchanejkej san kinekiyaj ika Jesús makintlakualti niman makinpaleui. Uajmostla, ijkuak okitakej ika Jesús niman iapóstoles yoyajkaj, yejuamej otlejkokej ipan seki barcos tlen ualeuayaj Tiberíades niman oyajkej Capernaúm para kontejtemoskej Jesús (Juan 6:​22-24). San ika ¿ijkon okichiujkej pampa yemelak kinekiyaj kikakiskej más itech iTekiuajyo toTajtsin? Ka, yejuamej san kinekiyaj oksejpa makintlakualti. ¿Kenijki tikmatij?

⁹ Ijkuak tlaltikpakchanejkej okinextitoj Jesús nisiuj Capernaúm, Jesús okinmijli ika yejuamej san kitokayaj pampa kinekiyaj makintlakualti. Okimijli ika otlakuajkej hasta kampa oixuikej ika on “tlakuajli yejuan saniman tlami”, niman okinyolchikauj makitejtemokan on “tlakuajli yejuan kisa itech Dios yejuan kitemaka nemilistli para nochipa” (xpoua Juan 6:​26, 27). Noijki okimijli ika san iTaj ueliskia kinmakas yejon tlakuajli. Kanaj melak okinmojkatlachialti ijkuak Jesús okimijli ika onka se tlakuajli tlen kitemaka nemilistli tlen xkeman tlamis. San ika ¿katlejua yejon tlakuajli niman kenijki ueliskia kinextiskej?

10. ¿Tlenon nonekiya kichiuaskej tlaltikpakchanejkej tla kinekiyaj kiseliskej nemilistli tlen xkeman tlamis?

 ¹⁰ Yejon judíos kinekiyaj kimatiskej tlenon nonekiya kichiuaskej para kiseliskej yejon tlakuajli. Kanaj okinemilijkej ika nonekiya kichiuaskej tlen kijtouaya Tlanauatijli tlen okimakakej Moisés. San ika, Jesús ijkin okimijli: “On tlen Dios kineki xchiuakan sano yejua in: Xnechneltokakan nejua yejuan onechajtitlan” (Juan 6:​28, 29). Kuakon, tla yejuamej kinekiyaj kipiyaskej “nemilistli para nochipa”, nonekiya tlaneltokaskej itech Jesús. Niman yejuin Jesús yokijtojka (Juan 3:​16-18, 36). Niman sakin oksejpa kijtoskia tlenon noneki tikchiuaskej para tikpiyaskej nemilistli tlen xkeman tlamis (Juan 17:3).

11. ¿Kenijki okiteititijkej judíos ika san tlanemiliayaj itech pan? (Salmo 105:40).

¹¹ Judíos xokineltokakej ika toTajtsin san kintlajtlaniliaya matlaneltokakan itech Jesús. Ika yejon, okitlajtoltijkej: “¿Tlen tlamauisojli titechititis para ijkuak yotikitakej timitsneltokaskej? ¿Tlinon tej, tikchiuas?” (Juan 6:30). Sakin, okijlijkej Jesús ika inuejkachanejkauan akin nemiyaj ipan itonaluan Moisés okiselijkej maná, tlen yeskia ken pan (Neh. 9:15; xpoua Salmo 105:40). Ijkuak Jesús otlajto itech “pan yejuan ualeua iluikak”, tlen yeskia ken maná tlen ualeua iluikak niman kitemaka nemilistli, judíos xokitlajtoltijkej tlenon kijtosnekiya (Juan 6:32). Kuajli nesi ika yejuamej san tlanemilijtoyaj itech pan, ika yejon, xokasikamatkej tlen Jesús kinekiya kinmachtis. ¿Tlenon tiuelij itech yejuin?

TLEN MÁS NONEKI TIKCHIUASKEJ

12. ¿Tlenon okichiuj Jesús para techititis tlenon más noneki tikchiuaskej?

¹² Juan capítulo 6 techititia ika más noneki tiktlakamatiskej toTajtsin niman kuajli iuan touikaskej. Jesús kuajli otechititi yejuin ijkuak Satanás okitlatlatak (Mat. 4:​3, 4). Ipan Tlamachtijli ipan Tepetl, Jesús noijki yokijtojka ika melak noneki kuajli matouikakan iuan Jehová (Mat. 5:​3, TNM). Ika yejon, matotlajtoltikan: “¿Tlen nikchiua ipan nonemilis kiteititia ika kachtopa nikneki ninouikas iuan toTajtsin niman xsan niknemilijtok nikpiyas tlen nikneki?”.

13. a) ¿Tleka tikijtouaj ika kuajli tla techyolpaktia titlakuaskej? b) ¿Itech tlenon noneki totlajpiyaskej? (1 Corintios 10:​6, 7, 11).

¹³ Xtlaj tlenon tla tiktlajtlaniliaj toTajtsin matechmaka tlen techpoloua niman matechyolpakti tlen techmaka (Luc. 11:3). Biblia kijtoua ika ijkuak se tlakatl chikauak tekiti, kichiua “ma tlakua niman ma tlaoni, niman ma paki”, niman ika nochi yejuin “ualeua itech Dios” (Ecl. 2:24; 8:15; Sant. 1:17). Maski ijkon, xnoneki sa ika tokauaskej tiktejtemojtoskej tlen tiknekij. Yejon tlen okijto apóstol Pablo. Yejua otlajto itech tlen xkuajli okichiujkej israelitas ipan tlaluaktli. Okiteneuj tlen xkuajli okichiujkej ipan tepetl Sinaí. Jehová kinchiuaya milagros para kintlakualtis israelitas, san ika, pampa yejuamej san kinemilijtoyaj tlen kinekiyaj kikuaskej, opeuj xkuajli kitaj tlen Jehová kinmakaya (Núm. 11:​4-6, 31-34). Niman ijkuak okiueyichiujkej uakaxkonetl tlachijchiujtli ika oro, yejuamej san okinemilijkej tlakuaskej, tlaoniskej niman noyolpaktiskej, niman okilkaujkej kitlakamatiskej Jehová (Éx. 32:​4-6). Pablo okimijli nochi yejuin tokniuan akin onenkej ijkuak sa achijtsin poliuiya para kipopoloskej Jerusalén niman iteopan, yejuin panoskia ipan xiuitl 70. Pablo okimijli maka makichiuakan ken israelitas: maka makileuikan on “xkuajli tlajtlamach” (xpoua 1 Corintios 10:​6, 7, 11). Aman tej, tejuamej noijki tinemij ipan itlamiyan tonaltin, ika yejon, melak kuajli tla  tijkakij tlen okijto Pablo niman xtikchiuaj tlen xkuajli okichiujkej israelitas.

14. ¿Tlenon kijtoua Biblia itech tlakuajli ipan yenkuik tlaltikpaktli?

¹⁴ Ijkuak Jesús okijto matiktlajtlanilikan toTajtsin tlen tikuaskej, noijki okijto matiktlajtlanilikan makichiua tlen yejua kineki nikan ipan tlaltikpaktli ijkon ken nochiujtika ne iluikak (Mat. 6:​9-11). Matikonnemilikan kenijki yes ijkuak ijkon panos. Biblia kijtoua ika toTajtsin kineki maonia tlakuajli tlen melak uelik ipan nochi tlaltikpaktli. Ipan Isaías 25:​6-8 kijtoua ika ijkuak tlanauatijtos iTekiuajyo toTajtsin onias tlakuajli tlen más kuajli. Niman ipan Salmo 72:16 ijkin kijtoua: “¡Ma onya miyek trigo ipan on país, niman ma onya miyek trigo ipan on tepemej!”. ¡Xkonnemili tikchijchiujtika se tlakuajli tlen melak tikuelilia noso se tlakuajli tlen xkeman tikchijchiuaya! ¡Noso xkonnemili tikonitok uvasayotl tlen otikixti ipan on uvakojtin tlen tejua otikintokak! (Is. 65:​21, 22). Nochimej akin nemiskej ipan yenkuik tlaltikpaktli kipiyaskej miyek tlakuajli.

15. ¿Tlenon nonekis kajsikamatiskej akin yoliuiskej? (Juan 6:35).

¹⁵ (Xpoua Juan 6:35). Kanaj tlaltikpakchanejkej akin okikuajkej pan niman michitsitsintin tlen Jesús okinmiyekili yoliuiskej maski yeuejkaui xotlaneltokakej. Kuakon, kanaj sekimej tikimixmatiskej ijkuak toTajtsin teyolitis (Juan 5:​28, 29). Yejuamej nonekis kajsikamatiskej tlen Jesús okijto: “Nejua nipan yejuan kitemaka nemilistli. Yejuan notech uajlau xkaman apismikis”. Nonekis kineltokaskej ika Jesús okitemakak inemilis inpampa. Sajnoye techyolpaktis tikinmachtiskej nochimej akin yoliuiskej niman nochimej kokonetsitsintin akin uajnemiskej ipan yenkuik tlaltikpaktli. Techyolpaktis tikuaskej nochi tlen onias, san ika, más techyolpaktis tikinpaleuiskej oksekimej manouikakan iuan Jehová.

16. ¿Tlenon tikitaskej ipan okse tlamachtijli?

¹⁶ Aman otikitakej seki tlen noteneua ipan Juan capítulo 6. San ika, sakin Jesús más otlajto itech “nemilistli para nochipa”. Melak nonekiya ika judíos kuajli makajsikamatikan tlen okijto Jesús itech yejuin, niman aman tejuamej noijki melak noneki kuajli matikajsikamatikan. Ipan okse tlamachtijli tikitaskej okseki tlen kijtoua Juan capítulo 6.