Ipan 2 Corintios 12:2, 3 Pablo, itlatitlankauj Cristo, okiteneuj se tlakatl akin “okuikakej ipan ika yeyi iluikak”. ¿Akinon katka? Ijkuak Pablo okitlajkuilouili tlanechikojli Corinto, yejua kuajli okijto ika toTajtsin kikuitoya ken se apóstol (2 Cor. 11:5, 23). Niman sakin opeuj tlajtoua itech “tlatlachalistin” niman itech yejon “tlajtlamach tlen sa no yejua toTeko” okimachilti. Ijkuak Pablo tlajtotoya itech yejuin, yejua xokinteneuj oksekimej tokniuan. Kuakon, uelis tikijtoskej ika akin okipix “tlatlachalistin” niman akin okimachiltijkej yejon “tlajtlamach” katka Pablo (2 Cor. 12:1, 5).

Kuakon, Pablo yejua katka akin “okuikakej ipan ika yeyi iluikak” niman ipan “xochitlalpan” (2 Cor. 12:2-4, TNM). Yejua okijto ika okimachiltijkej “tlajtlamach”, kuakon, uelis tiknemiliskej ika okijlikej itlaj tlen oniaskia ika tlayekapan.

¿Tlenon kijtosneki “ika yeyi iluikak” tlen okitak Pablo?

Ipan Biblia, tlajtojli iluikak uelis kijtosnekis miyek tlemach. Uelis kijtosnekis yejon iluikak tlen tikitaj (Gén. 11:4; 27:28; Mat. 6:26, TNM). Kemantika kijtosneki intekiuajyo tlaltikpakchanejkej (Dan. 4:20-22). Niman noijki uelis kijtosnekis tekiuajyotl tlen ualeua itech toTajtsin, ijkon ken iTekiuajyo toTajtsin (Apoc. 21:1).

Pablo okitak “ika yeyi iluikak”. ¿Tlenon kijtosnekiya ijkuak ijkon okijto? Kemantika Biblia yexpa kijtoua itlaj niman ijkon kuajli kipankixtis yejon tlajtojli (Is. 6:3; Ezeq. 21:27; Apoc. 4:8). Kuakon, nesi ika ijkuak Pablo otlajto itech “ika yeyi iluikak”, kinekiya kuajli kitemachiltis ika tlajtotoya itech se tekiuajyotl tlen melak ueyixtika: Tekiuajyotl kampa Cristo tlayekana niman kampa 144,000 tlapejpeniltin iuan tlayekanaskej (xkita Perspicacia para comprender las Escrituras, volumen 1, páginas 473, 476). Pedro kiteneujtoya Tekiuajyotl kampa Cristo tlayekana ijkuak okijto ika tikchiatokej “yenkuik cielo” tlen toTajtsin okijto (2 Ped. 3:13).

¿Niman tlenon kijtosneki yejon “xochitlalpan” tlen okiteneuj Pablo?

Tlajtojli xochitlalpan noijki uelis kijtosnekis miyek tlemach. Kachtopa, pampa Adán chantiya ipan tlaltikpaktli, uelis tikijtoskej ika yejuin tlajtojli kijtosneki se xochitlalpan tlen onias ika tlayekapan niman tlen onias ipan yejuin tlaltikpaktli. Ika ome, uelis kijtosnekis yejon kualtsin yolseuilistli tlen Jehová kinmakas itekipanojkauan ipan yenkuik tlaltikpaktli. Ika yeyi, noijki uelis kijtosnekis ken kualtsin onka iluikak, niman tlen noixmati ken “xochitlalpan tlen iyaxka toTajtsin” tlen nesi ipan Revelación 2:7 itech Traducción del Nuevo Mundo (xkita La Atalaya 15 julio 2015, página 8, párrafo 8).

Pablo kanaj kiteneujtoya yejuin yeyi tlemach ijkuak okijto tlen ipan onochiuj, ijkon ken nestika ipan 2 Corintios 12:4.

Kuakon:

Yejon “ika yeyi iluikak” tlen noteneua ipan 2 Corintios 12:2 kanaj kijtosneki Tekiuajyotl kampa Cristo tlayekana niman noijki 144,000 akin iuan tlayekanaskej, kijtosneki, “yenkuik cielo” (2 Ped. 3:13).

Kitokayotiaj “ika yeyi iluikak” pampa yejon Tekiuajyotl melak ueyixtika.

Yejon “xochitlalpan” kampa okuikakej Pablo ipan se tlatlachalistli kanaj kijtosneki: 1) Xochitlalpan tlen onias ika tlayekapan, 2) kualtsin yolseuilistli tlen onias ipan yejon tonaltin niman tlen nochiuiyan onias, niman 3) “xochitlalpan tlen iyaxka toTajtsin” tlen onka iluikak; nochi yejuin yeyi tlemach tlen yotikteneujkej onias ipan yenkuik tlaltikpaktli.

Kuakon, ipan yenkuik tlaltikpaktli tikitaskej ika onias “yenkuik cielo” niman “yenkuik tlaltikpaktli”. Nochi yenkuik yes. Niman tikteneujtokej Tekiuajyotl tlen onias iluikak niman tlaltikpakchanejkej akin kitekichiuiliskej Jehová ipan Xochitlalpan.