1. ¿Tlenon uelis topan nochiuas tla melak toyolkokouaj?

TINOCHIMEJ tikixnamikij tlen ouijtika, niman mojmostla tokojtiliaj titlaxikoskej. San ika ¿xmelak ika más ouijtika tikitaj titlaxikoskej ijkuak toyolkokouaj? Ijkuak toyolkokouaj, tiknemiliaj ika xtlaj ika titepaleuijkej niman xueli tiyolpakij. Ijkon ken kijtoua Proverbios 24:10 itech Traducción del Nuevo Mundo: “Tla timoyolkokoua ijkuak tikixnamiki ajmantli, mitspolos mokojtilis”.

2. a) ¿Tlenon uelis kichiuas melak matoyolkokokan? b) ¿Tlenon tikitaskej ipan yejuin tlamachtijli?

² Onka miyek tlemach tlen uelis kichiuas melak matoyolkokokan. Kanaj toyolkokouaj pampa topopolouaj, pampa tikualoj, pampa xtikseliaj se tekitl ipan ikalpan toTajtsin noso pampa xtechkakij kampa titenojnotsaj. Ipan yejuin tlamachtijli, tikitaskej tlenon techpaleuis maka melak matoyolkokokan.

3. ¿Tlenon techpaleuis maka san nochipa matiknemilijtokan kenon topopolouaj?

³ Tla san nochipa tiknemilijtokej kenon topopolouaj, melak xkuajli tomachiliskej niman hasta uelis tiknemiliskej ika Jehová xtechkauilis matinemikan ipan xochitlalpan. Melak techijtlakos tla san nochipa yejon tiknemilijtokej. ¿Tlenon techpaleuis maka ijkon matitlanemilikan? Yemelak ika Biblia kijtoua ika tinochimej titlajtlakolejkej, san Jesús xkipiya tlajtlakojli (Rom. 3:23). San ika, Jehová xsan kitstika kenon topopolouaj niman xkichia nochi melak kuajli matikchiuakan. Yejua se toTaj  akin techtlasojtla niman techijyouiya. Yejua kimatstika ika kemantika ouijtika tikitaj tikchiuaskej tlen kuajli niman ika tokojtiliaj xsajnoye totlajtlakoltiskej ijkuak topopolouaj. Ika yejon, yejua kineki techpaleuis (Rom. 7:18, 19).

4, 5. Itech tlen kijtoua 1 Juan 3:19, 20, ¿tlenon okinpaleui omemej tokniuan siuamej maka melak manoyolkokokan?

⁴ Matikitakan tlenon inpan onochiuj Deborah niman María. * Ijkuak Deborah pitentsin katka, ichanejkauan xmás kitlasojtlayaj niman xmás kijliayaj tlen kuajli kichiuaya. Yejua ika, ijkuak oueyiyak, melak xkuajli nomachiliaya niman kinemiliaya ika xkeman itlaj kuajli kichiuaya. Maski san achijtsin nopopolouaya, melak noyolkokouaya niman kimachiliaya ika xtlaj ika tepaleui. María noijki ijkon onomachili. Ichanejkauan nochipa san kipijpinaujtiayaj niman kimachiliaya ika xtlaj ika tepaleui. Hasta ijkuak ikitekichiuilijtoya toTajtsin kimachiliaya ika xkinamikiya makixmatikan ken iteixpantijkauj Jehová.

⁵ Maski ijkon, yejuin tokniuan xkeman okitlalkauijkej Jehová. ¿Tlenon okinpaleui? Yejuamej okijlikej Jehová nochi tlen kinajmanaya (Sal. 55:22). Yejuamej okasikamatkej ika toTajtsin kimatstika ika tlen topan onochiuj yeuejkaui uelis kichiuas matiknemilikan ika xtitepaleuijkej. San ika, yejua noijki kita tlen kuajli tikchiuaj, maski kemantika tejuamej xueli tikitaj (xpoua 1 Juan 3:19, 20).

6. ¿Kenon ueliskia nomachilis akin oksejpa kichiua tlen xkuajli kichiuaya yeuejkaui?

⁶ Ijkuak yakaj nokojtilijtika kikajkauas tlen xkuajli kichiuaya yeuejkaui, san ika, oksejpa kichiua, kanaj uelis melak noyolkokos. Melauak, totlamachilis techtlajtlakoltia ijkuak tikchiuaj se ueyi tlajtlakojli (2 Cor. 7:10). San ika, noneki totlajpiyaskej maka melak totlajtlakoltiskej niman tiknemiliskej: “Xtlaj kuajli nikchiua, Jehová xkeman nechtlapopoluis”. Maka ijkon matiknemilikan pampa yejon xmelauak. Tla ijkin titlanemiliaj, uelis kichiuas matiktlalkauikan Jehová. Maka matikilkauakan tlen kijtoua Proverbios 24:10: tla toyolkokouaj, techpolos tokojtilis. Kuakon, más kuajli tla tiktlajtlaniliaj Jehová matechtlapopolui (Is. 1:18). Yejua kitas ika yemelak yotoyolkuepkej niman techtlapopoluis. Noijki, matitlajtokan imiuan tlayekankej, yejuamej techpaleuiskej oksejpa kuajli matouikakan iuan Jehová (Sant. 5:14, 15).

7. Tla tokojtilijtokej tijkajkauaskej itlaj tlen yeuejkaui tikchiuayaj, ¿tleka xnoneki tosiaujkauaskej?

⁷ Se tokniuj tlayekanketl akin chanti Francia, itoka Jean-Luc, yejuin tlen kimijlia tokniuan akin nokojtilijtokej xok kichiuaskej  tlen yeuejkaui kichiuayaj: “Jehová xkimita yolkuajkualtin akin xkeman nopopolouaj, yejua kimita yolkuajkualtin akin noyolkuepaj itech tlen xkuajli okichiujkej niman nokojtiliaj nopatlaskej” (Rom. 7:21-25). Kuakon, maka matiknemilikan ika xtlaj ika titepaleuijkej. Matikilnamikikan ika tinochimej topopolouaj, san ika, Jehová ueli techiknelia niman techijyouiya pampa iKonetsin onotemakak topampa (Efes. 1:7; 1 Juan 4:10).

8. ¿Akinomej uelis tikintlajtlaniliskej matechpaleuikan ijkuak melak toyolkokoskej?

⁸ Ijkuak melak toyolkokoskej, uelis tikintlajtlaniliskej tokniuan matechpaleuikan. Yejuamej nochipa kinektoskej techyolseuiskej niman techkakiskej (Prov. 12:25; 1 Tes. 5:14). Se tokniuj siuatl akin chanti Nigeria, itoka Joy, kijtoua: “¿Tlenon nikchiuaskia tla xnouan nemiskiaj tokniuan? Ijkuak yejuamej nechyolchikauaj, kuajli nikita ika Jehová kinnankilia noteoyouan. Yejuamej hasta yonechititijkej kenon nikinyolchikauas akin najmanaj”. Noneki matikilnamikikan ika tokniuan xnochipa uelis kitaskej tla tajmantokej. Kuakon, tla kemantika xkuajli tomachiliaj, nonekis tejuamej tikinnotsaskej tokniuan akin chikauak kipiyaj intlaneltokil niman tikintlajtlaniliskej matechpaleuikan.

9. ¿Tleka melak techyolchikaua Salmo 41:3 niman 94:19?

⁹ Matiktlajtlanilikan Jehová matechpaleui. Ijkuak tikpiyaj se ueyi kokolistli niman xueli tipajtij, kanaj melak ouijtika tikitaj tiyolpakiskej. Melauak, Jehová xkichiuas se milagro niman ijkon techpajtis, san ika, kema techyolseuis niman techpaleuis matitlaxikokan (xpoua Salmo 41:3; 94:19). Jehová uelis kichiuas ika sekimej tokniuan matechijlikan ika uelis techonkouiliskej tlen techpoloua noso ika uelis techonpaleuiskej tochan. Yejua noijki uelis kichiuas ika tokniuan touan makichiuakan teoyotl. Niman hasta uelis kichiuas matikilnamikikan tlen onka ipan iTlajtol, kanaj tikilnamikiskej ika ipan xochitlalpan xok tikualoskej nion xok titlajyouiskej (Rom. 15:4).

10. ¿Tlenon okipaleui Isang maka melak manoyolkoko?

¹⁰ Tokniuj Isang, akin chanti Nigeria, okipix se accidente niman tlapajtiketl okijli ika xok keman ueliskia nejnemis. Yejua kijtoua: “Melak onechyolkoko tlen onechijlikej niman melak oniajmankamik”. ¿Tlenon okipaleui maka ok ijkon manomachili? Yejua noijki kijtoua: “Nejua iuan nosiuauj nochipa tikchiuiliayaj teoyotl Jehová niman nochipa tomachtiayaj iTlajtol. Noijki, kuajli yotikijtokaj ika nochipa tiktlasojkamachiliskej toTajtsin pampa techteochiua niman pampa techijlia ika uelis tinemiskej ipan se xochitlalpan”.

11. ¿Tleka Cindy ouel oyolpak maski melak kualouaya?

¹¹ Tokniuj Cindy, akin chanti México, okijlikej ika kipiaya se kokolistli tlen ueliskia kimiktis. ¿Kenon ouel okixiko tlen kixnamiktoya? Ijkuak nemiya hospital, yejua mojmostla tenojnotsaya. Yejua kijtoua: “Pampa nitenojnotsaya, onechpaleui maniknemili kenon nikinpaleuis oksekimej. Xok niknemilijtoya kenon melak ninokokouaya niman ika nexchiuiliskiaj se operación. Ijkuak nechonitayaj tlapajtikej niman enfermeros, imiuan nitlajtouaya niman nikintlajtoltiaya kenon nemiyaj inchanejkauan. Sakin nikintlajtoltiaya tleka okitlapejpenijkej se tekitl tlen melak ouijtika. Yejon nechpaleuiaya manikita itech tlenon ueliskia nikinnojnotsas. Yejuamej onechijlikej ika xmás yakaj kintlajtoltiaya kenon nemiyaj, niman onechtlasojkamachilijkej pampa nikintlajtoltiaya. Sekimej hasta onechijlikej kanon chantij niman onechpanoltilijkej iminnúmero. Ijkuak ijkon nopan nochiujtoya, Jehová  okichiuj maueli maniyolpaki, hasta nejua nimojkatlachiaya ijkuak nikitaya kenon nechpaleuiaya” (Prov. 15:15).

12, 13. ¿Kenon tenojnotsaj sekimej tokniuan akin kualoj noso youeuentsintiakej, niman tlenon yopanok pampa ijkon kichiuaj?

¹² Sekimej tokniuan kimachiliaj ika xok ueli kitekichiuiliaj toTajtsin ijkon ken yejuamej kinekiskiaj pampa kualoj noso pampa youeuentsintiakej. Yejon kichiua melak manoyolkokokan. Maski ijkon, yejuamej nokojtiliaj tenojnotsaskej. Se tokniuj siuatl akin itoka katka Laurel Nisbet, * akin chantiya Estados Unidos, onen 37 xiuitl ipan se máquina tlen itoka pulmón de acero. Noijki kipiaya cáncer, miyekpa okichiuilijkej operación niman kipiaya kokolistli ipan ikuetlaxyo. Maski ijkon, yejua xkeman okikajkauj ika tenojnotsa. Okiminojnots enfermeros niman akin konpaleuiayaj ichan. Okinpaleui kanaj 17 tlaltikpakchanejkej manochiuakan iteixpantijkauan Jehová.

¹³ ¿Kenon uelis tenojnotsaskej akin youeuentsintiakej noso akin kipiyaj se kokolistli niman xok uelij kisaj kampa chantij? Se tlayekanketl akin chanti Francia, itoka Richard, kijtoua: “Nejua nikimijlia ika melak kuajli tla kintlaliaj seki toamatlajkuiloluan kampa oksekimej uelis kimitaskej. Akin ompa nisiuj panoskej kanaj kimitaskej niman kinekiskej más kimatiskej. Maski xok ueli tenojnotsaj techajchan, yejuamej uelis tenojnotsaskej niman melak kuajli nomachiliskej”. Akin xok uelij kisaj de inchan noijki uelis tenojnotsaskej ika carta niman ika teléfono.

14. ¿Tlenon tiuelij itech David?

¹⁴ ¿Melak tiknekij tikseliskej se tekitl ipan totlanechikol noso ipan tocircuito? ¿Xtechmakaj pampa yotiueuentsintiakej, tikualoj noso pampa kanaj tikixnamiktokej okse tlemach? Tla ijkon topan nochiujtok, melak techpaleuis tla tikitaj tlen okixnamik tekiuaj David. Yejua melak kinekiya kichijchiuas iteopan toTajtsin, san ika, Jehová okasikamachilti ika xyejua kichijchiuaskia. Maski ijkon, yejua okinek kipaleuis akin toTajtsin yokitlapejpenijka, okimakak miyek oro niman plata. ¡Melak kuajli tlen okichiuj David! (2 Sam. 7:12, 13; 1 Crón. 29:1, 3-5).

15. ¿Tlenon okipaleui se tokniuj akin chanti Francia maka melak manoyolkoko?

¹⁵ Se tokniuj akin chanti Francia, itoka Hugues, ononek kikauas itekiyo ken tlayekanketl pampa opeuj kualo. Melak opeuj najmana pampa nion ichan xok ueliya kichiuaya miyek tlemach. Yejua kijtoua: “Melak oninoyolkoko  niman nikmachiliaya ika xtlaj ika nitepaleui. San ika, ika yolik, onikasikamat ika maski xueli nikchiua miyek tlemach, kema ueliskia kuajli niktekichiuilis Jehová niman niyolpakis. Kuajli yonikijto ika nitlaxikos. Nejua kentla niGedeón niman on 300 tlakamej akin iuan otlaixnamikitoj. ¡Maski yonisiauj, ok nitlaxikojtos!” (Juec. 8:4).

16. ¿Tlenon tiuelij intech iluikaktekitkej?

¹⁶ Aman matikitakan tlenon tiuelij intech iluikaktekitkej. Sejpatipan, Jehová okintlajtolti iluikaktekitkej kenon yejuamej kichiuiliskiaj niman ijkon kikajkayauaskej tekiuaj Acab. Miyekej iluikaktekitkej okijlikej tlenon ueliskiaj kichiuaskej, san ika, Jehová okitlapejpeni san se iluikaktekitketl niman okijli ika tlen yejua kinemiliaya kichiuas melak kuajli onkisaskia (1 Rey. 22:19-22). ¿Onoyolkokojkej on oksekimej iluikaktekitkej? ¿Okinemilijkej ika xtlaj ika otepaleui tlen yejuamej okiteijlikej? Ka, xijkon otlanemilijkej. Iluikaktekitkej yolyemankej niman kinekij ika nochimej san Jehová makiueyichiuakan (Juec. 13:16-18; Apoc. 19:10).

17. ¿Tlenon uelis tikchiuaskej tla toyolkokouaj pampa xtikseliaj se tekitl ipan tlanechikojli?

¹⁷ Maka matikilkauakan ika Jehová techpatiojkaita pampa tiktekichiuiliaj niman pampa tikteijliaj iTlajtol. Jehová xtechpatiojkaita san pampa tikpiyaj miyek tekitl ipan tlanechikojli. ToTajtsin niman tokniuan techpatiojkaitaj pampa tiyolyemankej niman pampa tikasikamatij ika xnochi ueli tikchiuaj. Ika yejon, matiktlajtlanilikan Jehová matechpaleui nochipa matiyolyemankej. Matikchiuakan ken itekipanojkauan toTajtsin akin okiteititijkej ika yolyemankej katkaj niman, ika nochi toyojlo matikinpaleuikan tokniuan (Sal. 138:6; 1 Ped. 5:5).

18, 19. ¿Tlenon techpaleuis matiyolpakikan tla kampa titenojnotsaj xmás techkakisnekij?

¹⁸ ¿Tajmanaj pampa xmás tikinnextiaj tlaltikpakchanejkej kampa titenojnotsaj noso pampa xmás techkakisnekij? Tla ijkon topan nochiua, ¿tlenon uelis techpaleuis matiyolpakikan? Ipan recuadro “ ¿Kenon uelis más tiyolpakiskej ijkuak titenojnotsaskej?” yonoijkuilo seki tlemach tlen uelis techpaleuis. Noneki matikitakan totenojnotsalis ijkon ken kinamiki. ¿Tlenon kijtosneki yejuin?

¹⁹ Matikilnamikikan ika tejuamej titenojnotsaj pampa tiknekij ika nochimej makixmatikan itoka toTajtsin niman makimatikan tlenon kichiuas iTekiuajyo. Jesús kuajli okijto ika san  achijtsitsintin kinextiskiaj yejon ojtli tlen teuika ipan nemilistli (Mat. 7:13, 14, TNM). Ijkuak titenojnotsaj, titekitij iuan Jehová, iuan Jesús niman imiuan iluikaktekitkej (Mat. 28:19, 20, TNM; 1 Cor. 3:9; Apoc. 14:6, 7). Matikilnamikikan ika toTajtsin kintejtemojtika akin kinekij kitekichiuiliskej (Juan 6:44). Kuakon, tla tikitaj ika aman sekimej xtechkakisnekij, maka matajmanakan, kanaj sakin kema kinekiskej techkakiskej.

20. Itech tlen kijtoua Jeremías 20:8, 9, ¿tlenon techpaleuis maka melak matoyolkokokan?

²⁰ Matikitakan tlenon tiuelij itech Jeremías. Yejua ononek tenojnotsas kampa miyekej xkikakisnekiyaj. Miyekej hasta kiuijuikaltiayaj niman kipijpinaujtiayaj nochi tonajli (xpoua Jeremías 20:8, 9). Jeremías melak onoyolkoko, hasta xok kinekiya tenojnotsas. San ika, yejua xokikajkauj ika tenojnotsa. ¿Tleka? Yejua okijto ika iTlajtol toTajtsin katka kentla se tlitl tlen kitlatiaya. Tejuamej noijki ijkon uelis tomachiliskej tla tikpiyaj ipan toyojlo tlen kijtoua iTlajtol toTajtsin. Yejua ika, mojmostla matomachtikan niman itech matitlanemilikan. Tla ijkon tikchiuaj, más tiyolpakiskej ijkuak titenojnotsaskej niman kanaj más miyekej kinekiskej techkakiskej (Jer. 15:16).

21. ¿Tlenon techpaleuis maka melak matoyolkokokan?

²¹ Deborah, akin otikteneujkej ipan párrafo 4, kijtoua: “Satanás kineki matoyolkokokan pampa ijkon uelis techtlajkalis”. San ika, Jehová más kojtik xijkon ken Satanás niman nochi tlen kitekitiltia. Ika yejon, tla itlaj techyolkokoua, matikijlikan Jehová kenon tomachiliaj niman matiktlajtlanilikan matechpaleui. Yejua techpaleuis maka melak matotlajtlakoltikan ijkuak topopoloskej. Techpaleuis ijkuak tikualoskej, ijkuak xkuajli tomachiliskej pampa xtikpiyaj se tekitl tlen tikuelitaskiaj ipan ikalpan, niman noijki techpaleuis matiyolpakikan ijkuak titenojnotsaskej. Kema, Jehová techpaleuis maka melak matoyolkokokan.