1. ¿Tlenon noneki notlajtoltis se tokniuj siuatl akin kinemilijtika tla nonamiktis iuan se tokniuj?

TINOCHIMEJ akin tiktekichiuiliaj toTajtsin tikpiyaj se totlayekankauj. Kema, Jesús yejua akin techyekana. Yejua melak kuajli kichiua itekiyo pampa xkeman nopopoloua. San ika, ijkuak se siuatl nonamiktia, noneki kinokauilis makiyekana iueuentsin akin miyekpa nopopoloua pampa tlajtlakole, niman, kemantika yejuin ouijtika. Ika yejon, ijkuak se tokniuj siuatl kinemilis tla nonamiktis iuan se tokniuj, noneki notlajtoltis: “¿Kuajli nechyekanas yejuin tokniuj? ¿Nokojtilia chikauak kitekichiuilis Jehová? Tla xijkon kichiua, ¿tleka niknemilia ika uelis nechpaleuis kuajli maninouika iuan Jehová sakin ika yotonamiktijkej?”. Noijki noneki notlajtoltis: “Niman nejua, ¿tlen kualneskayomej nikinpiya? ¿Nitetlasojtla niman xtotoka nikualani? ¿Kuajli ninouika iuan Jehová?” (Ecl. 4:9, 12). Tla se siuatl kuajli kitlapejpenia akinon iuan nonamiktis, yejon kipaleuis mayolpaki iuan iueuentsin.

2. ¿Tlenon tiknankiliskej ipan yejuin tlamachtijli?

² Melak miyekej tokniuan siuamej akin yononamiktijkej kichiuaj ijkon ken Jehová kinnauatia: yejuamej kitlakamatij inueuentsin. Tipakij pampa yejuin tokniuan ijkon kichiuaj niman pampa ueli imiuan tiktekichiuiliaj Jehová. Ipan yejuin tlamachtijli, tiknankiliskej yejuin: ¿tlenon kixnamikij sekimej tokniuan siuamej akin yononamiktijkej?, ¿tleka tokniuan siuamej kinokauiliaj makinyekana inueuentsin? niman ¿kenon teueuentsitsinuan niman tesiuauan uelis kichiuaskej ijkon ken Jesús, Abigaíl niman María, akin isiuauj katka José?

3. ¿Tleka nochimej akin yononamiktijkej kipiyaj tlauejli?

³ Namiktilistli se kualtsin tlateochiualistli tlen ualeua itech toTajtsin, san ika, nochimej akin nonamiktiaj tlajtlakolejkej (1 Juan 1:8). Ika yejon, iTlajtol toTajtsin kijtoua ika akin yononamiktijkej “tlajtlamach kimpajsoloua ipan in nemilistli” (1 Cor. 7:28). Matikitakan seki tlemach tlen kixnamikij sekimej tokniuan siuamej akin yononamiktijkej.

4. ¿Tleka sekimej siuamej ouijtika kitaj kitlakamatiskej inueuentsin?

⁴ Miyekej siuamej ouijtika kitaj kitlakamatiskej inueuentsin. ¿Tleka? Matikitakan tlen kijtoua Marisol, akin chanti Estados Unidos. Yejua kijtoua: “Kampa nejua oninoskalti, nochipa kimijlitoyaj siuamej ika yejuamej noijki uelis kichiuaskej nochi tlen tlakamej kichiuaj. San ika, nejua yonikasikamat ika Jehová yokintekitlali teueuentsitsinuan matlayekanakan ipan infamilias niman ika Jehová noijki yotechmakak akin titesiuauan se tekitl tlen melak ueyi kijtosneki. San ika, kemantika ouijtika nikita niknokauilis manechyekana noueuentsin pampa miyekej nechijliaj ika xnoneki ijkon nikchiuas”.

5. ¿Tlenon kinemiliaj sekimej teueuentsitsinuan?

⁵ Matikitakan tlenon más kixnamikij sekimej siuamej. Sekimej teueuentsitsinuan kinemiliaj ika xnoneki kitlakaitaskej insiuauj. Se tokniuj, akin itoka Ivón niman chanti Sudamérica, kijtoua: “Kampa nejua nichanti, kachtopa tlakuaj tlakamej, niman sakin, siuamej. Tajtin kimijliaj imichpokatsitsinuan ika noneki tlakualchiuaskej niman tlachipauaskej, san ika, intelpokatsitsinuan kimijliaj ika xnoneki itlaj kichiuaskej pampa yejuamej “reyes”, ika yejon, iminnan niman imikniuan siuamej yejuamej akin kintlakualtekiliaj”. Se tokniuj siuatl, akin itoka Yingling niman chanti Asia, kijtoua: “Kampa nejua niualeua miyekej kijtouaj ika se siuatl xnoneki melak matlamachilise nion xnoneki miyek tlemach maueli makichiua. Kijtouaj ika se tesiuauj san noneki tekichiuas kalijtik niman ika xnoneki itlaj kijlis iueuentsin”. Tla se teueuentsin ijkin kichiua, xkitlakamati Biblia, kitlajyouiltia isiuauj, xkichiua ken Jesús niman kiyolkokoua Jehová (Efes. 5:28, 29; 1 Ped. 3:7).

6. ¿Tlenon noneki kichiuaskej tesiuauan niman ijkon kuajli nouikaskej iuan Jehová?

⁶ Ken otikitakej ipan okse tlamachtijli, Jehová kineki ika teueuentsitsinuan makinpaleuikan infamilias machikaujto intlaneltokil, manemikan ika inyojlo niman makinmakakan tlen kinpoloua (1 Tim. 5:8). Maski ijkon, tokniuan siuamej akin yononamiktijkej kipiya ika mojmostla kixeloskej tiempo niman ijkon kiamapouaskej Biblia, tlanemiliskej itech tlen kipouaj niman kinotsaskej Jehová ika nochi inyojlo. Kemantika kanaj kintekiyomakas kichiuaskej yejuin. ¿Tleka? Pampa yejuamej kipiyaj miyek tekitl niman xmás kipiyaj tiempo, niman kemantika, melak siaujtokej. San ika, noneki kixeloskej tiempo niman ijkon kichiuaskej nochi yejuin. Jehová kineki ika toseselti matikchiuakan tlen noneki niman ijkon kuajli iuan touikaskej (Hech. 17:27).

7. ¿Tlenon kipaleuis se tesiuauj maka makitekiyomaka kitlakaitas niman kitlakamatis iueuentsin?

⁷ Yemelak, kemantika se tesiuauj uelis ouijtika kitas kitlakaitas niman kitlakamatis iueuentsin, akin tlajtlakole. San ika, tla yejua kuajli kasikamati tlen Jehová kinauatia ipan Biblia, xkitekiyomakas kitlakaitas niman kitlakamatis iueuentsin.

8. Itech tlen kijtoua Efesios 5:22-24, ¿tleka se tesiuauj akin kitekichiuilia toTajtsin kinokauilia makiyekana iueuentsin?

⁸ Se tesiuauj akin kitekichiuilia toTajtsin kinokauilia makiyekana iueuentsin pampa kimati ika yejon tlen kitlajtlanilia Jehová (xpoua  Efesios 5:22-24). Tlaneltoka itech toTajtsin iluikakchane. Kimatstika ika yejua kitlasojtla niman ika xkeman kitlajtlaniliskia makichiua itlaj tlen ueliskia kijtlakos (Deut. 6:24; 1 Juan 5:3).

9. ¿Tlenon panos tla se tesiuauj kinokauilia makiyekana iueuentsin?

⁹ Akin xkitekichiuiliaj Jehová kimijliaj tesiuauan maka makitlakamatikan Jehová niman ika tepinajti tla kinokauiliaj makinyekana inueuentsin. Akin ijkon kiteijliaj, kiteititiaj ika xkixmatij toTajtsin Jehová. Yejua xkeman kinnauatiskia siuamej makichiuakan itlaj tlen tepinajti. Tla se tesiuauj nokojtilia kichiuas tlen Jehová kinauatia, ifamilia nemis ika iyojlo (Sal. 119:165). Kema, yejua, iueuentsin niman ikoneuan melak yolpakiskej.

10. ¿Tlenon tiuelij itech tlen okijto Carol?

¹⁰ Ijkuak se tokniuj siuatl kinokauilia makiyekana iueuentsin akin tlajtlakole, kiteititia ika kitlasojtla niman kitlakaita Jehová, akin okijto ika se teueuentsin noneki kiyekanas ifamilia. Carol, akin chanti Sudamérica, kijtoua: “Nikmatstika ika noueuentsin uelis nopopolos. Niman, noijki nikmati ika tlen nikchiuas ijkuak ijkon panos, kiteititis tla yemelak nikpatiojkaita ken ninouika iuan Jehová. Ika yejon, nochipa ninokojtilia niktlakaitas noueuentsin pampa nikneki nikyolpaktis Jehová”.

11. a) ¿Tlenon kipaleuiya Aneese matetlapopolui ika nochi iyojlo? b) ¿Tlenon tiuelij itech tokniuj Aneese?

¹¹ Ijkuak se tesiuauj kita ika iueuentsin xnajmana ipampa, kanaj ouijtika kita kitlakaitas niman kitlakamatis. Matikitakan tlenon kichiua Aneese ijkuak ijkon ipan nochiua. Yejua kijtoua: “Ninokojtilia xnikualanis, niman nikilnamiki ika tinochimej topopolouaj. Ninokojtilia nitetlapopoluis ika nochi noyojlo, ijkon ken Jehová kichiua. Niman ijkuak nitetlapopoluiya, hasta niuajyolseui” (Sal. 86:5). Ijkuak se tesiuauj tetlapopoluiya, xkitekiyomaka kitlakaitas niman kitlakamatis iueuentsin.

12. ¿Intech akinon tlajtoua Biblia?

¹² Kanaj sekimej kinemiliaj ika akin kinokauiliaj makinnauatikan, nion achijtsin xyolchikaujkej niman xuejueyixtokej. San ika, yejuin xmelauak. Biblia tlajtoua intech miyekej itekipanojkauan toTajtsin akin okinokauilijkej makinyekanakan niman, maski ijkon, yejuamej  kema yolchikaujkej katkaj. Matikitakan tlenon tiuelij itech Jesús, Abigaíl niman María.

13. Xkijto tleka Jesús kinokauilia makiyekana Jehová.

¹³ Jesús kinokauilia makiyekana Jehová. Yejuin xkijtosneki tla Jesús xtlamachilise noso tla xmiyek tlemach ueli kichiua. Ka, Jesús melak tlamachilise. Ijkuak ouajla ipan tlaltikpaktli, melak kuajli ken otemachti niman xouijtika ken okintetomili nochi itlamachtiluan (Juan 7:45, 46). Jehová kimatstok ika Jesús melak miyek tlemach ueli kichiua, ika yejon, okikauili makipaleui ijkuak otlachijchiuj ne iluikak niman nikan ipan tlaltikpaktli (Prov. 8:30; Heb. 1:2-4). Niman, sakin ika Jesús oyoliuj, Jehová okichiuj maueyixto “ne iluikak niman nikan ipan in tlaltikpaktli” (Mat. 28:18). Maski Jesús melak miyek tlen ueli kichiua, yejua nochipa kitlajtlanilia Jehová makipaleui. ¿Tleka? Pampa yejua melak kitlasojtla iTajtsin (Juan 14:31).

14. a) ¿Kenon teueuentsitsinuan uelis kichiuaskej ijkon ken Jehová? b) ¿Tlenon kinmachtia Proverbios 31?

¹⁴ ¿Tlenon kinmachtia yejuin akin teueuentsitsinuan? Jehová yokijto akinomej noneki tlayekanaskej ipan se familia niman ipan tlanechikoltin, san ika, yejuin xkijtosneki tla Jehová kinemilia ika siuamej xuejueyixtokej. ¿Tleka ijkon tikijtouaj? Pampa ijkuak yejua kintlapejpenia akinomej tlayekanaskej iuan Jesús ne iluikak, xsan tlakamej kintlapejpenia, yejua noijki kintlapejpenia siuamej (Gál. 3:26-29, TNM). Jehová noijki yokiteititi ika tlaneltoka itech iKonetsin pampa yokikauili matlayekana. Se teueuentsin akin kitlakamati tlen kijtoua Biblia noijki uelis kichiuas ijkon ken Jehová. ¿Kenon uelis kichiuas? Tla kikauilia isiuatsin makiyekana seki tekitl. ITlajtol toTajtsin kijtoua ika se kuajli tesiuauj kuajli kitlajpiya ichan, ueli kinkoua niman kinnemaka tlaltin niman ueli tlasemana (xpoua Proverbios 31:15, 16, 18). Yejua xse tlakeuajli, ika yejon, uelis kijlis iueuentsin tlenon kinemilia. Niman, iueuentsin noneki itech tlaneltokas niman kikakis tlen kijlia (xpoua Proverbios 31:11, 26, 27). Ijkuak se teueuentsin ijkin kitlakaita isiuauj, isiuauj ika nochi iyojlo kinokauilis makiyekana.

15. ¿Kenon tesiuauan uelis kichiuaskej ijkon ken Jesús?

¹⁵ ¿Tlenon kinmachtia yejuin akin tesiuauan? Maski Jesús miyek tlemach yokichiuj, yejua xkinemilia tla tepinajti ika kinokauilia makiyekana Jehová (1 Cor. 15:28; Filip. 2:5, 6, TNM). Noijki ijkon, se kuajli tesiuauj xkinemilia tla tepinajti ika kinokauilia makiyekana iueuentsin. Yejua kipaleuiya iueuentsin pampa kitlasojtla niman noijki pampa kitlakaita niman kitlasojtla Jehová.

16. Itech tlen kijtoua 1 Samuel 25:3, 23-28, ¿tlenon okixnamik Abigaíl? (Xkita tlaixkopinajli tlen onka ixpan yejuin revista).

¹⁶ Abigaíl ononamikti iuan Nabal, se tlakatl akin san itech tlanemiliaya, noueyimatiya niman xtlaj kitlasojkamatiya. Maski ijkon, Abigaíl xkeman okinemili kikauas iueuentsin. Tla yejua kinekiskia kikauas, kikauiliskia ika David niman isoldados makimiktikan. San ika, yejua xijkon okichiuj, yej okitak kenon kipaleuis Nabal niman nochimej akin imiuan chantiyaj. Abigaíl melak yolchikauak katka pampa okinamikito David, akin uajlaya imiuan 400 soldados. Ika tetlakaitalistli, Abigaíl otlajto iuan David niman okijli ika yejua makitlajtlakolti ipampa tlen yokichiujka iueuentsin (xpoua 1 Samuel 25:3, 23-28). David nimantsin okasikamat ika Jehová kitekitiltijtoya yejuin siuatl niman ijkon kipaleuis maka makichiua itlaj tlen melak xkuajli.

17. ¿Kenon teueuentsitsinuan uelis kichiuaskej ijkon ken David?

¹⁷ ¿Tlenon kinmachtia yejuin akin teueuentsitsinuan? Abigaíl katka se siuatl akin melak kuajli tlanemiliaya. David okikak Abigaíl, niman ipampa yejon, xokinmikti akin nemiyaj ichan Nabal, akin xokitechiuilijkaj tlen xkuajli. Noijki ijkon, se teueuentsin akin tlamachilise  kikakis tlen kinemilia isiuauj ijkuak nonekis itlaj kitlapejpenis. Isiuauj uelis kipaleuis maka makitlapejpeni itlaj tlen xkuajli.

18. ¿Kenon tesiuauan uelis kichiuaskej ijkon ken Abigaíl?

¹⁸ ¿Tlenon kinmachtia yejuin akin tesiuauan? Se tesiuauj akin kitlasojtla niman kitlakaita Jehová uelis kipaleuis ifamilia, maski tla iueuentsin xkitekichiuilia Jehová noso tla xkichiua tlen toTajtsin technauatia. Yejua xkeman kinemilis kichiuas itlaj tlen Jehová xkuelita niman ijkon kikauas iueuentsin. Ka, yejua nokojtilis kitlakaitas niman kitlakamatis. Tla ijkon kichiua, iueuentsin kanaj kinekis kixmatis Jehová (1 Ped. 3:1, 2). Niman, maski tla iueuentsin xkinekiskia kitekichiuilis Jehová, yejua uelis kuajli kimatstos ika Jehová kipatiojkaita nochi tlen kichiua ipampa iueuentsin.

19. ¿Kemanon se tokniuj siuatl xnoneki kitlakamatis iueuentsin?

¹⁹ San ika, se tokniuj siuatl xnoneki kitlakamatis iueuentsin tla kitlajtlanilia makichiua itlaj tlen xkuelita Jehová. Matikonnemilikan ika se teueuentsin akin xkitekichiuilia Jehová kitlajtlanilia isiuauj matlakajkayaua, matlachteki noso makichiua itlaj tlen Jehová kitlauelita. Tokniuan siuamej akin yononamiktijkej niman nochimej akin kitekichiuiliaj Jehová noneki kachtopa kitlakamatiskej Jehová. Yejua ika, tla iueuentsin se tokniuj siuatl kitlajtlanilia makichiua itlaj tlen Jehová xkuelita, yejua xnoneki kitlakamatis. Ika tlakaitalistli noneki kimelajkaijlis tleka xkineki kichiuas tlen kitlajtlanilia (Hech. 5:29).

20. ¿Tleka tikijtouaj ika María melak kuajli nouikaya iuan Jehová?

²⁰ María melak kuajli nouikaya iuan Jehová. Niman kuajli nesi ika melak kixmatiya iTlajtol toTajtsin. ¿Tleka ijkon tikijtouaj? Pampa ijkuak otlajtlajto iuan Elisabet, inan Juan Teapolaktijketl, okiteneuj tlen kijtouaj Tlajkuiloltin ika hebreo ipantsin 20 veces (Luc. 1:46-55). Niman matitlanemilikan itech yejuin: maski María yokijlika José ika kema iuan nonamiktiskia, iiluikaktekitkauj Jehová xkachtopa okinots José. Yejuin iluikaktekitketl kachtopa okijli María ika yejua kitlakatiliskia niman kiskaltiskia iKoneuj toTajtsin (Luc. 1:26-33). Jehová kuajli kixmatiya María niman kimatstoya ika kitlasojtlaskia iKoneuj niman ika kuajli kitlajpiyaskia. Niman, maski Jesús omik niman  oyaj ne iluikak, María xkeman okikajkauj ika nouika iuan Jehová (Hech. 1:14).

21. ¿Tlenon kinmachtia teueuentsitsinuan tlen okichiuj María?

²¹ ¿Tlenon kinmachtia yejuin akin teueuentsitsinuan? Se kuajli teueuentsin yolpaki ijkuak kita ika isiuauj kuajli kasikamati tlen kijtoua iTlajtol toTajtsin. Yejua xkualani nion xkinemilia ika isiuauj kineki tlayekanas ipan ifamilia. Kimatstok ika tla isiuauj kuajli kasikamati tlen kijtoua Biblia niman tlen toTajtsin kitlajtlani, más kipaleuis ifamilia. Niman, maski se tesiuauj kanaj más onomachti ipan escuela, teueuentsin yejua akin noneki kiyekanas tlamachtijli ijkuak kiueyichiuaskej toTajtsin ken familia niman yejua akin noneki kipaleuis ifamilia machikaujto itlaneltokil (Efes. 6:4).

22. ¿Tlenon kinmachtia tesiuauan tlen okichiuj María?

²² ¿Tlenon kinmachtia yejuin akin tesiuauan? Se tesiuauj noneki kasikamatis ika iueuentsin yejua akin kiyekana, san ika, noneki kilnamiktos ika yejua noneki kitas kenon más kichikauas itlaneltokil (Gál. 6:5). Ika yejon, noneki kixelos tiempo niman ijkon san iselti nomachtis Biblia niman itech tlanemilis. Tla ijkon kichiua, xouijtika kitas kitlasojtlas niman kitlakaitas Jehová. Noijki, melak yolpakis iuan iueuentsin.

23. ¿Tlenon panoua ijkuak tokniuan siuamej kinokauiliaj makinyekana inueuentsin?

²³ Tesiuauan akin kitlasojtlaj Jehová kinokauiliaj makinyekana inueuentsin. Yejuamej más yolpakij xijkon ken on tesiuauan akin xijkon kichiuaj. Noijki, kimititiaj akin más telpokamej niman ichpokamej kenon noneki kitlakamatiskej Jehová. Niman xsan yejon, infamilias niman intlanechikol melak kuajli nemij (Tito 2:3-5). Ipan yejuin tonaltin, ipan ikalpan Jehová más miyekej nemij tokniuan siuamej (Sal. 68:11). Tinochimej, maski tla titlakamej noso tisiuamej, tikpiyaj se tekitl ipan tlanechikojli. Ipan okse tlamachtijli, tikitaskej kenon tikchiuaskej totekiyo tlen yotechmakak Jehová.