1. ¿Tlenon yokichiujkej miyekej itekipanojkauan Jehová?

 ¿TEJUA tiktlasojtla Jehová? ¡Tikmatstokej ika kema! Niman xsan tejua tiktlasojtla, miyekej itekipanojkauan noijki melak okitlasojtlakej Jehová (Sal. 104:​33, 34). Miyekej akin yeuejkaui onenkej okinejkej kikauaskej seki tlemach niman ijkon más kitekichiuiliskej Jehová, ken nazareos akin nemiyaj ipan kalpan Israel. San ika ¿akinomej katkaj nazareos, niman kenijki uelis tikchiuaskej ijkon ken yejuamej?

2. a) ¿Akinomej katkaj nazareos? (Números 6:​1, 2). b) ¿Tleka sekimej israelitas nochiuayaj nazareos?

² Tlajtojli nazareo ualeua itech se tlajtojli hebreo tlen kijtosneki “akin yokitlapejpenijkej”, “akin xeliujtika” noso “akin yonosentemakak”. Yejuin tlajtojli melak kinnamikiya akin nazareos katkaj pampa yejuamej yokikaujka seki tlemach niman ijkon más chikauak kitekichiuiliskej Jehová. Tlanauatijli tlen okimakakej Moisés kinkauiliaya tlakamej niman siuamej makijlikan Jehová ika ipan se tiempo nemiskiaj ken nazareos (xpoua Números 6:​1, 2). a Ijkuak yakaj ijkin kijliaya Jehová, nonekiya kitlakamatis seki tlanauatiltin tlen oksekimej israelitas xnonekiya kitlakamatiskej. Niman, ¿tleka sekimej israelitas nochiuayaj nazareos? Pampa melak kitlasojtlayaj Jehová  niman pampa melak kitlasojkamatiyaj nochi tlen yejua yokichiujka inpampa (Deut. 6:5; 16:17).

3. ¿Tleka tikijtouaj ika aman noijki tikchiuaj ken nazareos?

³ “Itlanauatil Cristo” okitekipatlak Tlanauatijli tlen okimakakej Moisés, ika yejon, itekipanojkauan toTajtsin xok ueliskiaj nochiuaskiaj nazareos (Gál. 6:2; Rom. 10:4). San ika, aman tejuamej noijki tiknekij tiktekichiuiliskej Jehová ika nochi toyojlo, toalma, totlamachilis niman tokojtilis ijkon ken kichiuayaj nazareos (Mar. 12:30). Niman yejon tlen tikijliaj Jehová ijkuak itech tosentemakaj, niman para tikchiuaskej yejon noneki tiktlakamatiskej niman tijkauaskej seki tlemach. Matikitakan kenijki nazareos kichiuayaj tlen yokijlijkaj Jehová niman kenijki tlen yejuamej kichiuayaj techpaleuis matikchiuakan tlen otikijlikej Jehová ijkuak otosentemakakej (Mat. 16:24). b

MATIKNEKTOKAN TIJKAUASKEJ SEKI TLEMACH

4. Ken kijtoua Números 6:​3, 4, ¿tlenon xnonekiya kichiuaskej nazareos?

⁴ (Xpoua Números 6:​3, 4). Nazareos xueliskiaj koniskiaj vino noso “itlaj okse yejuan tlaxokolijli”, nion xueliyaj kikuayaj uvas “nion uvas yejuan tetsoltik”. Nochi yejuin israelitas kikuayaj niman koniyaj pampa xse tlajtlakojli katka. Niman Biblia hasta kijtoua ika vino se itetlayokolil toTajtsin niman “kiminmaka paktli” akin konij (Sal. 104:​14, 15). Maski ijkon, nazareos kinektoyaj kikauaskej nochi yejuin. c

5. ¿Tlenon okichiujkej Madián niman Marcela, niman tleka ijkon okichiujkej?

⁵ Tejuamej noijki tijkauaj seki tlemach pampa tiknekij más chikauak tiktekichiuiliskej Jehová ijkon ken nazareos. Matitlajtokan itech tokniuj Madián niman isiuauj Marcela. d Yejuamej chantiyaj Colombia niman melak kuajli nemiyaj. Tokniuj Madián melak ueyi kitlaniya tomin niman melak kualtsin katka inkal. San ika, kinekiyaj más chikauak kitekichiuiliskej Jehová, ika yejon, okikaujkej seki tlemach. Yejuamej kijtouaj: “Otikitakej kenijki xmás tikpopoloskej tomin, otichantitoj ipan se kajli más pitentsin niman noijki otiknamakakej tocarro”. Xakaj okinchiualti makichiuakan nochi yejuin. San ika, yejuamej  ijkin okichiujkej pampa kinekiyaj más chikauak tenojnotsaskej, niman aman melak yolpakij.

6. ¿Tlenon tiknektokej tikchiuaskej, niman tleka? (Noijki xkita tlaixkopinajli).

⁶ Akin tikchiuaj ken Cristo tiknektokej tijkauaskej seki tlemach tlen tikuelitaj niman ijkon más titlapaleuiskej ipan ikalpan Jehová (1 Cor. 9:​3-6). Sekimej tokniuan yokikaujkej inkal noso intekiyo. Niman sekimej tokniuan akin telpokamej yokijtojkej ika xnimantsin nonamiktiskej niman oksekimej tokniuan akin yononamiktijkej yokijtojkej ika xnimantsin kinpiyaskej inkoneuan. Oksekimej yononek kinkauaskej inchanejkauan niman iminamigos pampa oksekan onchantij para más tenojnotsaskej. Jehová xtechtlajtlanilia matikchiuakan nochi yejuin, niman xkijtosneki tla xkuajli tlen tijkauaj. San ika, timiyekej yotikchiujkej yejuin pampa tiknekij más chikauak tiktekichiuiliskej Jehová, ika yejon, kuajli matikmatstokan ika yejua melak kipatiojkaita nochi tlen tikchiuaj ipampa (Heb. 6:10).

MATOKOJTILIKAN PARA XTIKCHIUASKEJ KEN OKSEKIMEJ

7. ¿Tleka nonekiya yolchikaujkej yeskej nazareos niman ijkon kichiuaskej tlen yokijlijkaj Jehová? (Números 6:5; noijki xkita tlaixkopinajli).

⁷ (Xpoua Números 6:5). Nazareos xueliskiaj notekiliskej intson pampa ijkon kiteititiayaj ika san Jehová ueliskia kinnauatis niman ika kichiuaskiaj nochi tlen yejua kineki. Tla se israelita uejkauiya ken nazareo, melak tsonueueyakiaya niman israelitas nimantsin kitayaj ika nazareo katka. Tla se nazareo kitlakaitayaj niman kiyolchikauayaj, xouijtika kitaya kichiuas tlen yokijlijka Jehová. San ika, melak teajman ika kemantika israelitas xkitlakaitayaj niman xkipaleuiayaj akin nazareo katka. Biblia kijtoua ika ijkuak nemiya teotlajtoketl Amós, sekimej israelitas kiminonitiayaj vino akin nazareos katkaj niman ijkon maka makichiuakan tlen yokijlijkaj Jehová (Amós 2:12). Akin nazareos katkaj nonekiya melak yolchikaujkej yeskej para xkichiuaskej ken oksekimej niman kichiuaskej tlen yokijlijkaj Jehová.

8. ¿Tlenon tikuelita itech tlen okichiuj Benjamin?

⁸ Tejuamej noijki uelis toyolchikauaskej para xtikchiuaskej ken oksekimej. Kemantika uelis tomojtiskej, san ika, Jehová techpaleuis. Matikteneuakan tlen ipan opanok se telpokatsin akin iteixpantijkauj Jehová niman chanti Noruega. Yejua itoka Benjamin niman kipiya 10 xiuitl. Kampa nomachtia kinekiyaj kiteititiskej ika kinekiyaj matetlani Ucrania ipan guerra. Kuakon, okimijlijkej kokonej manotlakentijtiakan ken tlachia ibandera Ucrania niman manokuikatikan. Benjamin san uejka kominitstoya pampa xkichiuaskia yejon.  San ika, ijkuak maestra okonitak, okontsajtsili niman okijli: “Xmokuikatiki, san timitschiatokej”. Benjamin okitako imaestra niman onoyolchikauj para kijlis: “Nejua xninokuikatis pampa xnikpaleuiya Ucrania niman xkeman nikpaleuiskia pampa miyekej iteixpantijkauan Jehová yokintsajkej pampa xyauej guerra”. Maestra okasikamat niman xok itlaj okijli. San ika, icompañeros opeuj kitlajtoltiaj tleka xnokuikatiaya. Benjamin opeuj melak nomojtia niman hasta chokasnekiya, san ika, onoyolchikauj niman ijkon kimijlis ken yokijlijka imaestra. Sakin, Benjamin okimijli itajuan kenijki Jehová okipaleuijka niman ijkon kijlis imaestra tlen yejua xkichiuaskia.

9. ¿Kenijki uelis tikyolpaktiskej Jehová?

⁹ Ijkuak tiktlakamatij Jehová, oksekimej kitaj ika tejuamej xtijkomej ken yejuamej. Kemantika noneki toyolchikauaskej niman ijkon tikteijliskej ika tiiteixpantijkauan Jehová kampa titekitij noso kampa tomachtiaj. Niman aman tikitaj ika más yotlaijtlakauj niman miyekej kichiuaj tlen melak xkuajli, ika yejon, kemantika ouijtika tikitaj tikchiuaskej tlen kijtoua Biblia niman titenojnotsaskej itech iTekiuajyo toTajtsin (2 Tim. 1:8; 3:13). San ika, matikilnamikikan ika melak tikyolpaktiaj Jehová ijkuak tokojtiliaj xtijkomej yeskej ken akin xkitekichiuiliaj (Prov. 27:11; Mal. 3:18).

KACHTOPA MATIKTLAKAMATIKAN JEHOVÁ

10. ¿Tleka ouijtika kitayaj nazareos kichiuaskej tlen kijtoua Números 6:​6, 7?

¹⁰ (Xpoua Números 6:​6, 7). Nazareos xueliskiaj kinisiuiskiaj se mijkatsintli. Kanaj ueliskia tiknemiliskiaj ika yejuin xouijtika katka. San ika, tla se ichanejkauj nazareo mikiya, kanaj ouijtika kitaskia kitlakamatis yejuin tlanauatijli. ¿Tleka? Pampa yeuejkaui nonekiya nisiuj tinemis itech mijkatsintli (Juan 19:​39, 40; Hech. 9:​36-40). Akin nazareos katkaj xueliskiaj kinisiuiskej se mijkatsintli. San ika, yejuamej kiteititiayaj ika chikauak kipiayaj intlaneltok pampa maski mikiya se inchanejkauj niman melak noyolkokouayaj, yejuamej xkonitayaj. Niman tikmatstokej ika yejuamej xsan inselti nemiyaj, pampa Jehová kinmakaya kojtilistli niman ijkon matlaxikokan

11. ¿Tlenon noneki tikchiuaskej ijkuak itlaj panos ipan tofamilia? (Noijki xkita tlaixkopinajli).

¹¹ Akin tikchiuaj ken Cristo tikmatstokej ika noneki tikchiuaskej tlen yotikijlijkej Jehová. San ika, ijkuak itlaj panoua ipan tofamilia,  ouijtika tikitaj tikchiuaskej yejuin. Yemelak, noneki tikinpaleuiskej tochanejkauan, san ika, tikmatstokej ika kachtopa noneki tiktlakamatiskej Jehová (Mat. 10:​35-37; 1 Tim. 5:8). Niman kemantika, pampa tiknekij tikyolpaktiskej Jehová, kanaj xuelis tiyolseujtoskej imiuan tochanejkauan.

12. ¿Tlenon okichiuj Alexandru ijkuak isiuauj xkinekiya manomachti?

¹² Matikitakan tlen ipan opanok Alexandru. Yejua niman isiuauj, Dorina, opeujkej nomachtiaj Biblia, san ika, ijkuak ikuikayaj se xiuitl, Dorina xok okinek nomachtis niman kinekiya ika Alexandru noijki maka sa manomachti. San ika, yejua okijli ika xkikajkauaskia. Yejon xokuelitak Dorina niman melak kichiualtiaya makikajkaua ika nomachtia. Tokniuj kiyejyekouaya kasikamatis isiuauj, san ika, kemantika kitekiyomakaya pampa san tlemach kijliaya niman san tlemach kichiuiliaya. Kemantika tokniuj Alexandru nosiaujkauaya niman kinemiliaya xok nomachtis, maski ijkon, okijto ika nochipa kitlakamatis Jehová. Noijki nochipa okitlakaitak Dorina niman kualtsin kinotsaya. Sakin, Dorina oksejpa okinek nomachtis Biblia pampa okitak ika iueuentsin xkikajkauaya. (Xkita video Alexandru niman Dorina Văcar: “Tlasojtlalistli teijyouiya niman yolkuajli”, tlen onka ipan sección “Tlen melauak kipatla innemilis tlaltikpakchanejkej”, ipan jw.org).

13. ¿Kenijki uelis tikteititiskej ika tiktlasojtlaj Jehová niman tofamilia?

¹³ Jehová okichijchiuj kachtopa familia, niman kineki ika nochi familias nochipa mayolpakikan (Efes. 3:​14, 15). Tla tiknekij tikyolpaktiskej Jehová, noneki tikchiuaskej tlen yejua techijlia. Yejua kipatiojkaita ijkuak kita ika tokojtiliaj tiktekichiuiliskej niman noijki tokojtiliaj tikintlajpiyaskej tochanejkauan, tikintlakaitaskej niman tikintlasojtlaskej (Rom. 12:10).

MATOYOLCHIKAUAKAN MATIKCHIUAKAN KEN NAZAREOS

14. ¿Akinomej noneki tikinyolchikauaskej?

¹⁴ Tinochimej akin tiktekichiuiliaj Jehová melak tiktlasojtlaj, ika yejon, tiknektokej tijkauaskej seki tlemach. San ika, kemantika ouijtika tikitaj tikchiuaskej yejuin. Kuakon, ¿kenijki uelis tikinyolchikauaskej oksekimej niman ijkon makikauakan seki tlemach para más kitekichiuiliskej Jehová? Uelis tikimijliskej tlen makinyolchikaua (Job 16:5). ¿Nemi yakaj ipan motlanechikol akin nokojtilijtika kikauas seki tlemach niman ijkon más chikauak kitekichiuilis Jehová? ¿Tikixmati se telpochtli akin nokojtilijtika xkichiuas ken akin imiuan nomachtia? ¿Tikixmati se tokniuj  noso yakaj akin kemach yopeuj nomachtia Biblia niman ichanejkauan kitlauelitaj pampa melajkanemi itech Jehová? Tla tikita ika yakaj itlaj kixnamiktika, uelis tikyolchikauas niman tikijlis ika melak tikpatiojkaita tlen kichiua niman ijkon kitekichiuilis Jehová (Filem. 4, 5, 7).

15. ¿Kenijki yokinpaleuijkej sekimej tokniuan akin chikauak kitekichiuiliaj Jehová?

¹⁵ Kemantika uelis tikinpaleuiskej tokniuan akin chikauak kitekichiuiliaj Jehová (Prov. 19:17; Heb. 13:16). Se tokniuj akin ilamajtsin niman chanti Sri Lanka ijkon okichiuj. Yejua nochi metstin kixelouaya itomintsin tlen gobierno kimakaya niman ijkon kinmakas omemej ichpokamej akin precursoras katkaj para makitlaxtlauakan inteléfono. ¡Melak kualtsin tlen okichiuj yejuin tokniuj!

16. ¿Tlenon tiuelij itech nazareos?

¹⁶ ¡Melak miyek tiuelij itech nazareos! San ika, noijki itlaj tiuelij itech toTaj Jehová. Yejua kimatstika ika melak tiknekij tikyolpaktiskej niman ika tiknektokej tijkauaskej seki tlemach niman ijkon tikchiuaskej tlen otikijlijkej ijkuak otosentemakakej. Noijki melak techyolpaktia ika techkauilia matikititikan ika tiktlasojtlaj (Prov. 23:​15, 16; Mar. 10:​28-30; 1 Juan 4:19). Tlen yeuejkaui okichiujkej nazareos techititia ika yejua kita niman kipatiojkaita nochi tlen tejuamej yotikchiujkej para tiktekichiuiliskej. Kuakon, nochipa matiktekichiuilijtokan Jehová niman nochipa matokojtilijtokan más kuajli tiktekichiuiliskej.