Maski tokniuan uelis kitaskej kenon notlajpiyaskej, noneki kichiuaskej yejuin ijkon ken kijtouaj tlajtolyekanalistin itech Biblia. Yejuin tlajtolyekanalistin teasikamachiltiaj ika xkuajli notekitiltiskej armas, ken se pistola, se rifle noso okse arma tlen ika tlatoponiaj, ika manotlajpiyakan itech oksekimej tlaltikpakchanejkej. Matitlanemilikan itech yejuin:

Ixpan Jehová, inemilis se tlaltikpakchane melak tlasojti. Salmista kimatiya ika itech Jehová “ualeujtika nemilistli” (Sal. 36:9). Ika yejon, tla se tokniuj kineki notlajpiyas noso kitlajpiyas tlen kipiya, yejua kichiuaskia nochi tlen noneki niman ijkon maka yakaj mikis niman xkipiyas tlajtlakojli (Deut. 22:8; Sal. 51:14).

Melauak ika, maski san ika tlenon uelis nomiktis yakaj, san ika, ika se arma totoka nochiua yejuin, uelis pampa kineki kichiuas noso maski nion xkinemiliaya kichiuas *. Noijki, tla se akin tlachteki nomojtia pampa kita ika nopiya se arma, uelis ueyiyas tlen panos niman yakaj mikis.

Ijkuak sa achijtsin poliuiya ika mikis Jesús, okimijli inomachtijkauan makitejtemokan se espada, san ika, xika notlajpiyaskiaj (Luc. 22:36, 38). Jesús okimijli yejuin pampa kinekiya kinmachtis itlaj: maka matlauisokikan nion maski ijkuak miyekej kimixnamikiskiaj ika armas (Luc. 22:52). Ijkuak Pedro okikoko ika  espada itlakeual ueyi teopixki, Jesús okijli: “Xkejeua moespada kampa otikxikopin”. Sakin Jesús okijto se tlajtolyekanalistli, tlen hasta ipan yejuin tonajli ika noyekanaj akin kichiuaj ken Cristo: “Nochimej yejuan temiktiaj ikan espada, no yejua ika mikiskej” (Mat. 26:51, 52).

Ijkon ken kijtoua Miqueas 4:3, itekipanojkauan toTajtsin kinkuepaskej inespadas ika “rejas tlen kipiya arado niman inlanzas kinkuepaskej tepostin tlen ika kitekiskej xiujtli”. Akin kichiuaj ken Cristo kimixmatij ika kipiyaj yolseuilistli, ijkon ken okijto Pablo itlatitlankauj Cristo: “Tla yakaj mechchiuilia itlaj xkuajli, ma ka no ijki xkuepilikan. [...] Xchiuakan kanika hasta kampa nenueliskej ken ijki nemoyolika nennemiskej iuan nochi tlakatl” (Rom. 12:17, 18). Maski Pablo okixnamik miyek tlen ouijtika, ken itlaj xkuajli kichiuiliskiaj “ichtekej”, okichiuj tlen yokijtoka niman xkeman okipanaui tlajtolyekanalistin san pampa kimakixtis inemilis (2 Cor. 11:26). Yejua otlaneltokak itech toTajtsin niman itech tlamachilistli tlen temaka iTlajtol, itlaj tlen melak kuajli xijkon ken tlen ika titlaixnamikis (Ecl. 9:18).

Akin tikchiuaj ken Cristo melak tiktlasojkaitaj tonemilis xijkon ken tlemach tlen tikpiyaj. “Inemilis se tlakatl xne ualejtikaj itech on tlen miyek kipia” (Luc. 12:15). Tla yakaj akin techtlachtekilia kuajkui se arma, matiknotsakan ika yemanki tlajtojli. Tla maski ijkon xnoteltia, matikilnamikikan yejuin tlajtolyekanalistli tlen okijto Jesús: “Ma ka xkuepiltikan on xkuajli tlakatl tlen yejua mechchiuilia”. Yejuin uelis kijtosnekis tijkauiliskej makitki tlen kinekis (Mat. 5:39, 40; Luc. 6:29). * Tla totlajpiyaj melak techpaleuis. Tla xtikteitijtinemij nochi tlemach tlen tikpiyaj niman techixmatij ika kuajli touikaj iuan oksekimej pampa tiiteixpantijkauan Jehová, uelis kichiuas maka matechixnamikikan akin xkuakualtin (1 Juan 2:16; Prov. 18:10).

Akin tikchiuaj ken Cristo tiktlakaitaj intlamachilis oksekimej (Rom. 14:21). Tla ipan tlanechikojli nomati ika yakaj kipiya se arma tlen ika totlajpiyaj itech tlaltikpakchanejkej, sekimej uelis xkuajli tlajtoskej noso kintlajkalis. Tlasojtlalistli kichiuas matikchiuakan tlen kinajmana osekimej niman xsan tlen tejuamej tiknekij, maski kemantika kijtosnekis xtikchiuaskej tlen tiknemiliaj technamiki niman se tlanauatijli techkauilia (1 Cor. 10:32, 33; 13:4, 5).

Akin tikchiuaj ken Cristo tokojtiliaj tiktemakaskej se kuajli neskayotl (2 Cor. 4:2; 1 Ped. 5:2, 3). Ijkuak se tokniuj yokimakakej tlajtolpaleuilistin itech Biblia niman ok kipiya se arma tlen ika notlajpiya itech oksekimej tlaltikpakchanejkej, xkitemaka se kuajli neskayotl. Ika yejon, xuelis kiselis se tekitl ipan tlanechikojli. Noijki uelis ijkon tikijtoskej itech se tokniuj akin ok kitkitinemi se arma ipampa itekiyo. Tla ijkon, melak kuajli yes tla kitejtemoua okse tekitl. *

Kuakon uelis tikijtoskej ika se tokniuj iselti kinemilis kenon kitlajpiyas inemilis niman ichanejkauan, kenon kitlajpiyas tlen kipiya niman tlenon tekitl kiselis. San ika, ijkuak kitlapejpenis tlenon kichiuas, noneki kilnamikis tlajtolyekanalistin itech Biblia, tlen techititiaj itlamachilis toTajtsin niman itlasojtlalis. Tokniuan akin kipiyaj chikauak intlaneltokil noyekanaj ika yejuin tlajtolyekanalistin niman kitlapejpeniaj xkipiyaskej se arma tlen ika notlajpiyaskej itech oksekimej tlaltikpakchanejkej. Kuajli kimatstokej ika nemiskej ika inyojlo tla tlaneltokaj itech toTajtsin niman noyekanaj ika tlen temachtia Biblia (Sal. 97:10; Prov. 1:33; 2:6, 7).