1. ¿Tlenon tiknekij tinochimej?

MATIKNEMILIKAN ika tiknamikij yakaj akin tikixmatstokej niman tiktlakaitaj, san ika, yejua xkilnamiki totokayo niman nion xtechilnamiki. ¿Kenon tomachiliskiaj? Kanaj melak tajmanaskiaj, pampa tinochimej tiknekij matechixmatikan niman matechtlasojkaitakan. San ika, xsan tiknekij makimatstokan akinon tejuamej, tiknekij matechtlasojkaitakan niman makipatiojkaitakan tlen yotikchiujkej ipan tonemilis (Núm. 11:16; Job 31:6).

2, 3. ¿Tlenon uelis panos tla melak tiknekij matechixmatikan niman matechtlasojkaitakan? (Xkita tlaixkopinajli kampa peua tlen tomachtijtokej).

² San ika, ijkon ken panoua ika okseki tlen tiknekij, uelis tiknekiskej matechixmatikan niman matechtlasojkaitakan ken xok kinamiki. Noijki, tlaltikpaktli tlen kiyekana Satanás uelis kichiuas melak matiknekikan tiuejueyixtoskej niman melak miyekej matechixmatikan. Ijkuak panoua yejon, xtikueyichiuaj niman xtiktlakaitaj toTajtsin iluikakchane, Jehová, ken yejua kinamiki (Apoc. 4:11).

 ³ Ipan itonaluan Jesús, xkuajli ken tlanemiliayaj sekimej tlayekankej ipan tlaneltokiltin, pampa melak kinekiyaj makimixmatikan. Jesús okinmelajkaijli inomachtijkauan: “Xmotakan sa no nemejuamej intech on temachtijkej ikan tlanauatijli yejuan kuelitaj tlakenuejueyakkistinemij, niman kinekij ikan miyek tetlakaitalistli ma kintlajpalokan neka ipan plaza, niman kinekij on más kuajli sietas ne ipan on tiopantin, niman ipan on iluimej kinekij noseuiskej ipan on más uejueyixtokej sietas”. Niman noijki okijto: “Yejuamej, tej, más ueyi castigo kiseliskej” (Luc. 20:46, 47). San ika, Jesús kuajli otlajto itech se siuakaualtsintli akin okitemakaka achijtsin tomintsin, yejua xokitejtemo ika oksekimej makimatikan tlen okichiuj (Luc. 21:1-4). Ijkon, Jesús okiteititi kenon Jehová kita yejuin. Niman yejuin tlamachtijli techpaleuis noijki ijkon matikitakan.

4. ¿Akinon melak noneki matechixmati niman matechtlasojkaita, niman tleka?

⁴ Xnoneki tiktejtemoskej tlen miyekej kitejtemouaj ipan yejuin tlaltikpaktli. Miyekej kinekij makimixmatikan pampa melak onomachtijkej, pampa melak kuajli ken tekitij, pampa uelij nauiltiaj noso itlaj uelij kichijchiuaj. Kuakon, ¿akinon melak noneki matechixmati niman matechtlasojkaita? Pablo technankilia ijkuak okijto: “Aman ika nemejuamej yonenkixmatkej toTajtsin, noso, nikijtosneki, toTajtsin yomechixmat, ¿kenon aman oksejpa nemokueptokej itech yejon kachtopa tlajtlamach tlen xkojtikej niman xtepaleuijkej niman nenkinekij nemochiuaskej oksejpa intlakeualuan?” (Gál. 4:9, TNM). ¡Se ueyi tlateochiualistli ika ToTajtsin akin Ueyixtika, uelis techixmatis! Jehová techixmati, techtlasojtla, niman kineki iuan matouikakan. Ijkuak Jehová otexchijchiuj, yejua kinekiya iuan matouikakan (Ecl. 12:13, 14).

5. ¿Tlenon noneki tikchiuaskej niman ijkon touikaskej iuan Jehová?

⁵ Ijkon ipan onochiuj Moisés. Yejua okitlajtlanili Jehová makikauili kixmatis iojuiuan, niman Jehová okinankili: “Noijki nikchiuas yejuin tlen otiktlajtlan, pampa yotinechixpakti niman nejua nimitsixmatstika ika motoka” (Éx. 33:12-17). Tejuamej noijki tikseliaj kualtsitsintin tlateochiualistin ijkuak Jehová techixmati toseselti. San ika ¿tlenon noneki tikchiuaskej niman ijkon touikaskej iuan toTajtsin? Tiktlasojtlaskej niman itech tosentemakaskej (xpoua 1 Corintios 8:3).

6, 7. ¿Tlenon ueliskia kichiuas maka sa matouikakan iuan Jehová?

⁶ Aman tej, noneki matiktlajpiyakan ken touikaj iuan toTajtsin iluikakchane. Ijkon ken tokniuan akin chantiyaj Galacia niman akin Pablo okintlajkuilouili, noneki kuajli tikitaskej maka tochiuaskej tlakeualtin itech “yejon kachtopa tlajtlamach tlen xkojtikej niman xtepaleuijkej” tlen onka ipan yejuin tlaltikpaktli, noijki maka tiktejtemoskej yejon ueyilistli tlen kitemaka (Gál. 4:9, TNM). ToTajtsin yokimixmatka yejuin tokniuan akin onenkej ipan kachtopa siglo. San ika, Pablo okimijli ika oksejpa kitejtemojtoyaj tlen xitlaj kijtosneki. Kentla kimijlitoskia: “Nemejuamej yonenkiskaltijkej nemotlaneltokil, ¿tleka oksejpa nenkinekij nemokuepaskej itech nochi tlen yonenkikaujkaj tlakuitlapan?”.

⁷ ¿Uelis ijkon topan nochiuas? Tikmatstokej ika kema. Ijkuak otikixmatkej Jehová, kanaj xotiknejkej tiuejueyixtoskej ipan yejuin tlaltikpaktli tlen kiyekana Satanás, ijkon ken okichiuj Pablo (xpoua Filipenses 3:7, 8). Kanaj xotiknejkej otomachtijkej ipan universidad, xotikselijkej  se ueyi tekitl noso xotiknejkej tiktlaniskej miyek tomin. Tla tiueliyaj itlaj tiktsotsonayaj, tokuikatiayaj noso tiueliyaj tauiltiayaj, kanaj yejon ueliskia kichiuas matikpiyakan tomin niman noijki miyekej techixmatiskiaj. San ika, xotiktejtemojkej yejon niman otijkaujkej nochi (Heb. 11:24-27). ¿Tiknemiliskej ika xkuajli tlen otikchiujkej pampa otijkaujkej yejon? Melak xkuajli tla ijkon titlanemiliskiaj. Pampa uelis kichiuas ika oksejpa matiktejtemokan tlajtlamach tlen otiknemilijkaj ika “xkojtikej niman xtepaleuijkej”.

8. ¿Tlenon techpaleuis melak matiknekikan ika Jehová matechixmati niman matechtlasojkaita?

⁸ ¿Kenon uelis tiktejtemoskej ika Jehová matechixmati niman matechtlasojkaita niman maka yejuin tlaltikpaktli? Noneki matikilnamikikan yejuin ome tlemach tlen ueyi kijtosneki. Kachtopa, ika Jehová nochipa kimixmati niman kintlasojkaita itekipanojkauan akin yolmelaujkej (xpoua Hebreos 6:10; 11:6). Yejua yemelak kinpatiojkaita nochimej itekipanojkauan, niman kimachilia ika xkinamikiskia san ijkon kominilkauas. Yejua nochipa “kimixmatstikaj yejuan melauak iyaxkauan” (2 Tim. 2:19). Jehová kitstika tlen kichiuaj akin yolmelaujkanemij niman kimatstika kenon kinmakixtis ijkuak itlaj kitlatlatas intlaneltokil (Sal. 1:6; 2 Ped. 2:9, TNM).

9. Xkijto kenon Jehová miyekpa okititi ikalpan ika kiseliaya.

⁹ Kemantika, Jehová yokititi ikalpan ika kiselia ken nion xkichiaya (2 Crón. 20:20, 29). Matiknemilikan kenon Jehová okinmakixti israelitas ipan mar Rojo, ijkuak faraón niman isoldados kinekiyaj kominajsiskej (Éx. 14:21-30; Sal. 106:9-11). Yejon tlen opanok sajnoye otemojkatlachialti, ika yejon, maski yopanoka 40 xiujtin, miyekan ok tlajtouayaj itech yejon (Jos. 2:9-11). Ipan yejuin tonaltin, melak techyolchikaua tikilnamikiskej kenon yeuejkaui Jehová okitlasojtlak ikalpan niman okititi ikojtilis, pampa melak nisiuj tinemij itech tonajli ijkuak techixnamikis Gog de Magog (Ezeq. 38:8-12). Ijkuak yejkos yejon tonajli, melak tipakiskej pampa otiktlapejpenijkej matechixmati niman matechtlasojkaita Jehová niman xyejuin tlaltikpaktli.

10. ¿Tlenon noijki noneki matikilnamikikan?

¹⁰ Ika ome, noijki noneki matikilnamikikan ika Jehová techtlasojkaitas niman techteochiuas ken nion xtikchiaj. ToTajtsin xkinteochiuas akin kichiuaj tlen kuajli san pampa kinekij ika oksekimej makimitakan. ¿Tleka? Pampa Jesús okijto ika akin ijkon kichiuaj “ye kipiaj intetlayokolil” (xpoua Mateo 6:1-5). San ika, noijki okijto ika iTaj kimita akin xkintlasojkamachiliaj ijkuak kinpaleuiyaj oksekimej. ToTajtsin kita kenon tepaleuiyaj niman kinteochiua, kemantika ken nion xkichiaj. Matikimitakan seki neskayomej.

11. ¿Kenon Jehová okiteochiuj María?

¹¹ Ijkuak oyejkok tonajli ika ikoneuj tlakatiskia ipan tlaltikpaktli, Jehová okitlapejpeni se ichpochtli akin itoka katka María niman ijkon yejua makitlakatili. Yejua chantiya Nazaret, se kalpan tlen xmiyekej kixmatiyaj niman uejka nokauaya itech Jerusalén niman itech kualtsin teopan tlen ompa onkatka (xpoua Lucas 1:26-33). ¿Tleka okitlapejpeni María? Iluikaktekitketl Gabriel okijli yejuin ichpochtli: “Pampa Dios yomitstiochiu”. María okiteititi ika kuajli nouikaya  iuan toTajtsin ijkuak iuan otlajto Elisabet, se akin ichanejkauj katka (Luc. 1:46-55). Kema, Jehová kuajli yokitaka María, niman pampa yejua yolmelaujkanemiya, okimakak yejuin tlateochiualistli tlen xkichiaya.

12, 13. ¿Kenon okichiuj Jehová makixmatikan Jesús ijkuak otlakat niman ijkuak okuikakej teopan?

¹² Ijkuak Jesús otlakatiko, Jehová xokimijli tekiuajkej akin uejueyixtoyaj ipan Jerusalén niman Belén. Yejua okintitlan sekimej iluikaktekitkej makimijlitij sekimej tlakamej akin kintlajpiayaj inborreguitos nisiuj Belén (Luc. 2:8-14). Yejon tlajpixkej okitatoj konetsintli akin kemach yotlakatka (Luc. 2:15-17). Kanaj María niman José melak okinyolpakti ijkuak okitakej kenon Jesús okimakakej ueyilistli. Tlen kichiua Jehová niman tlen kichiua Diablo melak sejneka. Pampa Diablo okichiuj ika miyekej ipan Jerusalén makimatikan ika Jesús yotlakatka ijkuak okintitlan sekimej astrólogos makitatij Jesús niman itajuan. Yejon okichiuj maonia se ueyi tlauejli (Mat. 2:3). Ipampa yejon, melak miyekej konetsitsintin okinmiktijkej (Mat. 2:16, TNM).

¹³ Cuarenta tonaltin sakin ika Jesús otlakat, María nonekiya konmakas Jehová se uentli ipan teopan tlen onkatka Jerusalén, tlen nokauaya kanaj nueve kilómetros itech Belén (Luc. 2:22-24). Ijkuak María yaya Jerusalén iuan ichanejkauan kanaj notlajtoltijtiaya tla teopixki kimakaskia Jesús ueyilistli. Jesús kema okitlakaitakej, san ika, kanaj xijkon ken kichiaya María. Jehová okintlapejpeni omemej tlaltikpakchanejkej makiteijlikan ika Jesús yeskia Mesías noso Cristo, akin yonoijtoka uajlaskia. Jehová okitekitilti se akin itoka katka Simeón, se “kuajli tlakatl” akin “kitlakaitaya Dios”, niman noijki Ana, se siuakauajli akin kipiaya 84 xiuitl niman siuateotlajtoketl katka (Luc. 2:25-38).

14. ¿Tlen tlateochiualistin okiseli María?

¹⁴ ¿Jehová okiteochiuj María pampa okitlajpix niman okiskalti ikoneuj? Kema. Pampa Jehová okichiuj ika manotlali ipan Biblia tlen okijto niman tlen okichiuj María. Nesi ika, yejua xouel oyaj iuan Jesús ijkuak otenojnotstinen yeyi xiuitl. ¿Ononek nokauas Jerusalén pampa siuakauajli katka? Kanaj kema. Kuakon, yejua xokiseli miyek tlateochiualistin tlen oksekimej tlaltikpakchanejkej kema okiselijkej. San ika, kema onen iuan Jesús ijkuak yejua omik (Juan 19:26). Noijki, yejua nemiya inuan inomachtijkauan Jesús ipan Jerusalén seki tonaltin achto yejkoskia iluitl Pentecostés tlen onochiuj ipan xiuitl 33, ijkuak okiselijkej espíritu santo (Hech. 1:13, 14). Kanaj yejua noijki okiseli espíritu santo iuan akin ompa nemiyaj. Tla ijkon opanok, kijtosneki ika ueliskia nochipa nemis ne iluikak iuan Jesús. ¡Melak ueyi tlateochiualistli okiseli pampa nochipa oyolmelaujkanen!

15. Ijkuak Jesús onen ipan tlaltikpaktli, ¿kenon Jehová okititi ika kitlasojkaitaya?

¹⁵ Jesús xkitejtemouaya makitlakaitakan tlayekankej ipan tlaneltokiltin nion tekiuajkej. Yejua kinekiya ika Jehová makitlasojkaita. Niman kanaj melak okiyolchikauj ika Jehová yexpa okijli ika kitlasojkaitaya. Ijkuak yejua san kemach yonoapolaktijka ipan atentli Jordán, Jehová okijli: “Yejua in yejua notlajsojkaKonetsin yejuan itech nipaktikaj” (Mat. 3:17). Nesi ika san Jesús niman Juan Teapolaktijketl okikakej yejuin tlajtoltin. Ijkuak poliuiya kanaj se xiuitl ika kimiktiskej Jesús, yeyimej itlatitlankauan okikakej ika toTajtsin okijto: “In yejua notlajsojkaKoneu  yejuan itech nipaktikaj. Yejua xtenkakikan” (Mat. 17:5). Sa ika nochi, Jehová oksejpa okinots ikoneuj seki tonaltin achto ika mikiskia (Juan 12:28).

16, 17. ¿Kenon Jehová okimakak ueyilistli Jesús ken nion xkichiaya?

¹⁶ Jesús kimatiya ika ken kimiktiskiaj melak tepinajti yeskia, tlaltikpakchanejkej kitlajtlakoltiskiaj ika okiuijuikaltijka toTajtsin. Maski ijkon, ipan se teoyotl okitlajtlan manochiua tlen kineki toTajtsin niman xtlen yejua kinekiya (Mat. 26:39, 42). “Yejua otlaxiko ipan se kojtli melaktik, okimapeuj pinauilistli”, niman xokitejtemo ika tlaltikpakchanejkej makitlasojkaitakan, san kinekiya kiyolpaktis iTajtsin (Heb. 12:2, TNM). ¿Kenon Jehová okititi ikoneuj ika kitstoya nochi tlen kichiujtoya?

¹⁷ Ijkuak onen ipan tlaltikpaktli, Jesús okijto ika kinekiya oksejpa kipiyas ueyilistli tlen kipiaya ijkuak nemiya iuan itaj ipan iluikak (Juan 17:5). Xitlaj techititia tla kinekiya melak ueyixtos. Maski ijkon, ¿tlenon okichiuj Jehová ipampa? Okimakak ueyilistli ken Jesús nion xkichiaya. Okiyoliti niman “okimakak más ueyilistli yejuan xakaj okse kipia”. Noijki, okimakak itlaj tlen xakaj okse kiseliaya ipan yejon tonaltin: nemis ken se espíritu akin xok uelis mikis (Filip. 2:9; 1 Tim. 6:16). * ¡Melak ueyi tlateochiualistli okiseli pampa oyolmelaujkanen!

18. ¿Tlenon techpaleuis maka matiktejtemokan matechixmatikan niman matechtlasojkaitakan tlaltikpakchanejkej?

¹⁸ ¿Tlenon techpaleuis maka matiktejtemokan matechtlasojkaitakan tlaltikpakchanejkej? Tla xkeman tikilkauaj ika Jehová nochipa kintlasojkaita niman ika miyekpa kinteochiua akin yolmelaujkanemij ken nion xkichiayaj. Yemelak ika xtikmatij kenon techteochiuas Jehová ika tlayekapan, san ika, tikmatstokej ika kema kichiuas. Kuakon, ijkuak tikixnamikiskej tlaueltin ipan yejuin tlaltikpaktli, matikilnamikikan ika yejuin tlaltikpaktli xok uejkauis. Niman ken oksekimej kintlasojkaitaj noijki san panos (1 Juan 2:17). ToTajtsin Jehová, akin melak techtlasojtla, yejua yolmelaujki, niman xkilkauas totekiyo nion tlasojtlalistli tlen tikititiaj (Heb. 6:10). Kema, yejua techtlasojkaitas niman techteochiuas ken kinamiki, niman kichiuas kanaj ken nion xtikchiaj.