Jesús onochiuj Ueyi Teopixki ijkuak onoapolakti, ipan xiuitl 29. ¿Kenon tikmatstokej? Ijkuak onoapolakti, Jesús okiteititi ika kinektoya kichiuas tlen Jehová kineki. Yejuin kijtosneki ika kinektoya kitemakas inemilis ken tlaxtlauijli (Gál. 1:4; Heb. 10:5-10). Tlen Jehová kineki kentla yeskia se tlaixpan. Ijkuak Jesús okitemakak inemilis topampa, kentla kitemakatoskia inemilis ken “itlaj uentli“ ipan yejon tlaixpan. Yejon tlaixpan onesiko ijkuak Jesús onoapolakti. Yejuin techasikamachiltia ika noijki onesiko se teopan. ¿Tlenon kixneskayotia yejuin teopan? Kixneskayotia nochi tlen yokichiuj Jehová niman ijkon uelis tikueyichiuaskej ken kinamiki. Niman Jehová san kiselia ken tikueyichiuaj tla tikneltokaj tlen okichiuj Jesús topampa (Mat. 3:16, 17, TNM; Heb. 5:4-6).

Pampa onesiko se teopan, noijki nonekiya nemis se ueyi teopixki. Ika yejon, Jehová okitlapejpeni Jesús ika “Espíritu Santo” niman okimakak kojtilistli (Hech. 10:37, 38; Mar. 1:9-11, TNM). Aman tej, ¿kenon tikmatstokej ika okitlapejpenijkej Jesús ken Ueyi Teopixki achto mikis niman achto yoliuis? Tikmatstokej yejuin pampa yotikitakej tlenon panouaya yeuejkaui ijkuak nemiya Aarón niman oksekimej teopixkej akin noyekanayaj ika Tlanauatijli tlen okimakakej Moisés.

Tlanauatijli kijtouaya ika san ueyi teopixki ueliskia kalakis ipan Santísimo. Se cortina kixelouaya Santo itech Santísimo, niman ueyi teopixki san panouaya ipan cortina ipan Tonajli ijkuak Notlapachouayaj Tlajtlakoltin (Heb. 9:1-3, 6, 7). Aarón niman akin noijki kichiuaskiaj intekiyo ken teopixkej okintlapejpenijkej achto panoskej ipan cortina tlen onkatka ipan tabernáculo. Kuakon, uelis tikijtoskej ika Jesús okitlapejpenijkej ken Ueyi Teopixki ipan iteopan Jehová achto mikis, niman sakin opanok ipan cortina, tlen kixneskayotia “itlalnakayo”, niman ijkon nemis ne iluikak (Heb. 10:20). Apóstol Pablo okijto ika Jesús okitlapejpenijkej ken Ueyi Teopixki niman okalak ipan “on yektiopan” tlen “más kuajli niman más melajki xken on yektiopan kampa on tiopixkej tekitij”, niman “okalak ne iluikak” (Heb. 9:11, 24).

Onopeualti yenkuik pacto ijkuak Jesús oyaj iluikak niman okitlajtlanili Jehová makiseli inemilis ken tlaxtlauijli inpampa tlaltikpakchanejkej. Ononek nochiuas yeyi tlemach niman ijkon nopeualtis yenkuik pacto.

Kachtopa, Jesús onokuep ne iluikak kampa nemi Jehová. Ika ome, okitlajtlanili Jehová makiseli inemilis ken tlaxtlauijli inpampa tlaltikpakchanejkej. Niman, ika yeyi, Jehová okiseli inemilis Jesús ken tlaxtlauijli. Yejuin yenkuik pacto kuajli onopeualti ijkuak onochiujkej on yeyi tlemach tlen yotikinteneujkej.

Biblia xkijtoua tlen tonajli okiseli Jehová inemilis Jesús ken tlaxtlauijli. Kuakon, xuelis tikijtoskej ipan katlejua tonajli onopeualti yenkuik pacto. San ika, kema tikmatstokej ika Jesús oyaj iluikak ijkuak ok poliuiya majtlaktli tonajli ika peuas Pentecostés (Hech. 1:3). Kanaj ipan yejon tonaltin, Jesús okitlajtlanili Jehová makiseli inemilis ken tlaxtlauijli, niman Jehová ijkon okichiuj (Heb. 9:12). Ipan Pentecostés, kuajli ones ika Jehová kema yokiselijka inemilis Jesús ken tlaxtlauijli (Hech. 2:1-4, 32, 33). Ijkuakon, kuajli onoteititi ika yonopeualtijka yenkuik pacto.