Tlen notlajtoltiaj akin kitaj revistas
¿Kenon nokuiteua pampa yoyejkok itlauil Jerusalén ijkon ken kijtoua Isaías 60:1?
Isaías 60:1 kijtoua: “Xmokuiteua Jerusalén ika on mokualtsinueyilis, pampa yoyejkok motlauil, niman iueyilis moTEKO petlani mopan”. Kalpan Jerusalén, noso Sion, icapital Judá kineskayotiaya nochi kalpan Israel (Is. 60:14; 62:1, 2). San ika ¿kemanon niman kenon onokuiteuj Jerusalén niman oyejkok itlauil? ¿Oksejpa onochiuj tlen okijto Isaías? Matikinnankilikan yejuin.
¿Kemanon niman kenon onokuiteuj Jerusalén niman oyejkok itlauil? Judíos ouejkaujkej 70 xiuitl ne Babilonia. Niman ipan yejon xiujtin, Jerusalén niman iteopan xoxotontoyaj. San ika, ijkuak medos niman persas okinotlatkitijkej Babilonia, nochimej israelitas akin ompa chantiyaj okinkauilijkej manokuepakan Jerusalén niman ijkon oksejpa makiueyichiuakan toTajtsin (Esd. 1:1-4). Ipan 537 ijkuak xpeuaya xiuitl 1 sekimej judíos itech 12 tribus opeuj nokuepaj Jerusalén (Is. 60:4). Yejuamej oksejpa opeuj kitlauentlaliliaj Jehová, niman oksejpa opeuj kinpanoltiaj iluimej niman opeuj kiyektlaliaj teopan (Esd. 3:1-4, 7-11; 6:16-22 ). Kuakon, iueyilis toTajtsin opeuj petlani ipan Jerusalén, noso, opeuj petlani ipan ikalpan toTajtsin tlen yokiyektlalijkaj. Niman ikalpan toTajtsin katka ken se tlauijli para okseki kalpamej tlen nemiyaj ipan tlayoualyotl.
San ika, yejuin teotlajtojli tlen okijto Isaías xnochi onochiuj ipan Jerusalén. Pampa melak miyekej israelitas xok okitlakamatkej Jehová (Neh. 13:27; Mal. 1:6-8; 2:13, 14; Mat. 15:7-9). Niman sakin xok okiselijkej Mesías, Jesucristo (Mat. 27:1, 2). Ipan xiuitl 70, Jerusalén niman iteopan oksejpa okinxoxotonijkej.
Jehová yokijtojka ika ijkon panoskia (Dan. 9:24-27). Yejuin techititia ika yejua xkinekiya manochiua ne Jerusalén nochi tlen kijtoua teotlajtojli tlen uajnestiuj ipan Isaías capítulo 60.
¿Oksejpa onochiuj tlen okijto Isaías? Kema, san ika, aman onochiuj ipan “Jerusalén yejuan onkaj ne iluikak”. Yejuin Jerusalén kineskayotia nochimej itekipanojkauan Jehová tlen nemij ipan cielo, niman apóstol Pablo ijkin okijto itech yejuin Jerusalén: “Yejua nochiua tonanaj” (Gál. 4:26). Niman ¿akinomej yejuin ikoneuan Jerusalén? Jesús niman 144,000 akin yaskej ipan cielo ken Pablo. Nochimej tlapejpeniltin nemij ipan “se nación yektli [noso chipauak]”, Israel tlen iyaxka toTajtsin (1 Ped. 2:9; Gál. 6:16).
¿Kenon onokuiteuj Jerusalén tlen onka ne ipan cielo niman oyejkok itlauil? Onokuiteuj intechkopa inkoneuan tlapejpeniltin nikan ipan tlaltikpaktli. Matikitakan tlen okichiujkej niman tlen onoijto ipan teotlajtojli tlen uajnestiuj ipan Isaías capítulo 60.
Desde ipan ika ome siglo, ijkuak omijkej nochimej apóstoles opeuj notemachtia tlen xmelauak. Ika yejon, tokniuan tlapejpeniltin ononek nokuiteuaskej pampa kentla nemiyaj ipan tlayoualyotl (Mat. 13:37-43). Yejuamej nemiyaj ipan Ueyixtika Babilonia noso tlaneltokiltin tlen xmelajkej. Tlapejpeniltin tsauktoskiaj hasta “ijkuak tlamis tlajtlamach ken nochiua ipan tlaltikpaktli”, niman yejuin opeuj ipan 1914 (Mat. 13:39; Mat. 13:40, TNM). Sakin ipan 1919, tlapejpeniltin okiminmakaujkej, ijkuakon nimantsin oyejkok yejon tlauijli. ¿Tleka ijkon tikijtouaj? Pampa ijkuakon opeuj notenojnotsa. a Desde ijkuakon nochimej tlaltikpakchanejkej ipan nochi “naciones” inemij ipan yejuin tlauijli, niman noijki ompa nemij tlapejpeniltin akin iyaxka toTajtsin niman “reyes” tlen noteneua ipan Isaías 60:3 (Apoc. 5:9, 10).
Ika tlayekapan, tlapejpeniltin kiteititiskej itlauil Jehová niman ijkuakon más kuajli nesis. Ijkuak xok nikan nemiskej yejuamej teuamej yeskej ipan “yenkuik ueyikalpan Jerusalén”, kampa nemi Cristo iuan inovia, tlen kineskayotia 144,000 reyes niman teopixkej (Apoc. 14:1; 21:1, 2, 24; 22:3-5).
Yenkuik Jerusalén kichiuas tlen nesi ipan Isaías 60:1 (uelis tikitas Isaías 60:1, 3, 5, 11, 19, 20 iuan Apocalipsis 21:2, 9-11, 22-26). Ijkon ken kalpan Israel noyekanaya desde Jerusalén, aman ipan iTekiuajyo toTajtsin tlayekanas Cristo niman Yenkuik Jerusalén. ¿Niman tlenon kijtosneki Yenkuik Jerusalén tlen “uajtemotiaya de ne iluikak kampa Dios nemi” tlen noteneua ipan Apocalipsis? Kijtosneki ika toTajtsin kinpaleuis tlaltikpakchanejkej. Biblia kijtoua ika nochimej akin melajkanemij “kistinemiskej tlauilpan ikan itlauil on ueyikalpan”, niman xok kipiyaskej tlajtlakojli niman xok mikiskej (Apoc. 21:3, 4, 24). Niman ijkuakon “Dios nochi tlajtlamach kuajli kitlalis” ijkon ken okijto Isaías niman oksekimej teotlajtokej (Hech. 3:21). Ijkuak Cristo onochiuj Tekiuaj, opeuj noyektlalia ken Jehová kineki makiueyichiuakan niman ijkuak tlamis Mil Xiuitl xok nonekis noyektlalis.
a Ezequiel 37:1-14 niman Apocalipsis 11:7-12 noijki okijtokej ika oksejpa kuajli kiueyichiuaskej Jehová niman yejuin onochiuj ipan 1919. Teotlajtojli tlen nesi ipan Ezequiel, kinteneua nochimej tlapejpeniltin akin oksejpa kuajli okiueyichiujkej Jehová sakin ika yopanoka se tiempo ika tsauktoyaj. Niman teotlajtojli tlen nesi ipan Apocalipsis kiteneua se pitentsin grupo kampa nemij tlapejpeniltin akin kiyekanaj tekitl akin oksejpa kuajli kitekichiuiliskiaj Jehová sakin ika yokiminmakaujkaj tokniuan akin tsauktoyaj. Ipan 1919, yejuin grupo okitokayotijkej “tekitketl” yolmelauak niman tlamachilise (Mat. 24:45; xkita La adoración pura de Jehová: ¡por fin restaurada!, pág. 118).
