TLAMACHTIJLI 23
“Mamitsyekteneua nochi tlakatl”
“NoTEKO [Jehová], motokatsin para yeyika onkaj” (SAL. 135:13).
TLAKUIKAJLI 10 Matikueyichiuakan toTajtsin Jehová
TLEN TIKITASKEJ *
1, 2. ¿Itech tlenon tikuelitaj titlajtoskej akin tiiteixpantijkauan Jehová?
AKIN tiiteixpantijkauan Jehová melak tikuelitaj tikteijliskej ika san Jehová kinamiki matlayekana niman ika noneki manoyekteneua noso manochipaua itoka. ¿Tikijtoskiaj ika yejuin ome tlemach melak tlamantikej? Ka.
2 Tinochimej yotiuelkej ika noneki tikyekteneuaskej itoka toTajtsin niman tikteititiskej ika san yejua melak kuajli tlayekana. Niman yejuin ome tlemach xsan noneki tikauilmatiskej.
3. ¿Tlenon kiteititia itoka Jehová?
3 Itoka Jehová kiteititia kenon yejua niman noijki kiteititia kenon tlayekana. Kuakon, tla tikijtouaj ika melak noneki matikyekteneuakan noso matikchipauakan itoka toTajtsin, noijki tikijtotokej ika melak noneki tikteititiskej ika san yejua kinamiki matlayekana. Uelis tikasikamatiskej tlenon más kiteititia itoka Jehová tla tikitaj kenon melak kuajli tlayekana ipan tlaltikpaktli niman ne iluikak (xkita recuadro “ Tlen noneki kuajli manoteititi”).
4. a) ¿Tlenon kijtoua Salmo 135:13 itech itoka toTajtsin? b) ¿Tlenon tiknankiliskej ipan yejuin tlamachtijli?
4 Itoka Jehová melak ueyi kijtosneki (xpoua Salmo 135:13). ¿Tleka melak ueyi kijtosneki itoka Jehová? ¿Akinon kachtopa okixnamik itoka Jehová? ¿Tlenon kichiua toTajtsin niman ijkon kiyekteneua itoka? ¿Tlenon uelis tikchiuaskej niman ijkon tikyekteneuaskej itoka Jehová? Nochi yejuin tiknankiliskej ipan yejuin tlamachtijli.
TLEN KICHIUA MANOYEKTENEUA SE TOKAYOTL
5. ¿Kanaj tlenon uelis notlajtoltiskej akin kikakij ika itoka toTajtsin noneki manoyekteneua?
5 Ipan Mateo 6:9, Jesús okijto itlaj tlen noneki tikijtoskej ijkuak tikchiuiliskej teoyotl toTajtsin. Yejua okijto: “Ma mitsyekteneua nochi tlakatl”. ¿Tlenon kijtosnekij yejuin tlajtoltin? Kanaj sekimej uelis notlajtoltiskej: “¿Kijtosneki ika xnoyekteneujtika itoka toTajtsin? ¿Tleka noneki manoyekteneua itoka?”. Tla tiknekij tikmatiskej yejuin, noneki tikasikamatiskej tlenon kijtosneki ijkuak noyekteneua se tokayotl.
6. ¿Tlenon kichiua manoyekteneua se tokayotl?
6 Totokayo xsan se tlajtojli tlen ueli noijkuiloua noso miyekpa noteneua. Biblia kijtoua: “Más kuajli nouiyan mitsixmatiskej ika kuajli timouika, xken tla miyek tikpiyas oro niman plata” (Prov. 22:1; Ecl. 7:1). Yejuin kijtosneki ika totokayo noyekteneua ika tlen oksekimej kinemiliaj totech. Ika yejon, uelis tikijtoskej ika ken noijkuiloua noso noijtoua totokayo xyejon tlen más ueyi kijtosneki, yej más ueyi kijtosneki tlen oksekimej kinemiliaj ijkuak kikakij noso kitaj totokayo.
7. ¿Tlenon kichiuaj oksekimej niman ijkon maka manoyekteneua itoka toTajtsin?
7 Ijkuak yakaj kijtoua tlen xmelauak itech Jehová, kichiua maka manoyekteneua itoka. Kema, kiyejyekotika kitsokuilos itoka. Ipan xochitlalpan Edén, ompa kampa kachtopa okixnamijkej itoka toTajtsin. Matikitakan tlenon tiuelij itech yejuin.
KIXNAMIKIJ ITOKA JEHOVÁ
8. a) ¿Tlenon kimatstoyaj Adán niman Eva? b) ¿Tlenon ueliskia totlajtoltiskej?
8 Adán niman Eva kimatstoyaj ika toTajtsin itoka Jehová. Niman noijki kimatstoyaj ika toTajtsin yejua akin nochi okichijchiujka niman ika okinmakaka innemilis, se kualtsin xochitlalpan kampa chantiskej niman ika kiteochiuaya innamiktilis (Gén. 1:26-28; 2:18). San ika ¿nochipa nokojtiliskiaj tlanemiliskej itech nochi tlen Jehová okichiujka inpampa? ¿Nokojtiliskiaj más kitlasojtlaskej Jehová niman más kitlasojkamachiliskej? Yejuin onoitak ijkuak Satanás okimijli tlen xmelauak itech toTajtsin.
9. Ken kijtoua Génesis 2:16, 17 niman 3:1-5, ¿tlenon yokinnauatijkaj Adán niman Eva, san ika, kenon okinkajkayauj Satanás?
9 (Xpoua Génesis 2:16, 17; 3:1-5). Satanás okitekitilti se kouatl niman ijkon kijlis Eva: “¿Tlen melauak omechijlij Dios para nion se xnenkuaskej itlakyo on kojtin yejuan onokej ipan in xochitlan?”. Satanás okijto tlen xmelauak itech Jehová, niman Eva opeuj ometlamati. ToTajtsin kema kinkauiliaya makikuakan itlakilyo nochi kojtin, san se xkinekiya makikuakan. Adán niman Eva ueliskiaj kikuaskej miyek tlakilyomej (Gén. 2:9). Kuajli nesi ika Jehová kintlasojtlaya pampa okinmakak miyek tlemach. San ika, okimijli maka makikuakan itlakilyo se kojtli. Ika tlen okijto Satanás, okiteasikamachilti ika toTajtsin tsotsokatl katka. Satanás okijto tlen xmelauak itech toTajtsin. Kanaj yejuin okichiuj ika Eva makinemili ika toTajtsin kiyanilijtikatka itlaj tlen kuajli.
10. ¿Kenon Satanás okixnamik itoka toTajtsin, niman tlenon opanok pampa ijkon okichiuj?
10 Ijkuakon, Eva ok kitaya Jehová ken iUeyitlayekankauj. Eva hasta okijli Satanás nochi tlen toTajtsin okimijlika maka kichiuaskej. Okijli ika toTajtsin okimijlika maka kikuaskej nion kikitskiskej itlakilyo se kojtli. Eva kimatstoya ika toTajtsin okimijlika ika tla xkitlakamatiyaj, mikiskiaj. San ika, Satanás okijli Eva ika xmikiskiaj (Gén. 3:2-4). Satanás okijto se tlakajkayaualistli. Yejuin okichiuj maka manoyekteneua itoka toTajtsin. Yejua okiteasikamachilti ika Jehová kinkajkayaujtoya. Ijkon, Satanás onochiuj Diablo, tlen kijtosneki tetlajtolchijchiuilijketl. Satanás melak kuajli okikajkayauj Eva (1 Tim. 2:14). Eva más otlaneltokak itech Satanás xijkon ken itech Jehová. Yejon okichiuj makitlapejpeni tlen melak xkuajli: xokitlakamat toTajtsin niman okikua tlen xkipiaya ika kikuas. Sakin, Eva okimakak Adán yejon kojtlakilyotl (Gén. 3:6).
11. ¿Tlenon kinamikiya kichiuaskej Adán niman Eva?
11 Matiknemilikan kenon Eva kinamikiya kinankilis Satanás. Eva ueliskia ijkin kinankilis: “Tejua nion xnimitsixmati, san ika, noTaj Jehová kema nikixmatstok. Nejua niktlasojtla niman itech nitlaneltoka. Nochi tlen tikpiyaj, nejua niman Adán, yejua yotechmakak. Maka xkijto tlen xmelauak itech noTaj Jehová. ¡Xuiya!”. Jehová melak pakiskia tla Eva ijkon tlanankiliskia pampa kitaskia ika yemelak kitlasojtlaya niman ika xkeman kikauaskia (Prov. 27:11). San ika, nion yejua nion Adán xkitlasojtlayaj Jehová ika nochi inyojlo. Ika yejon, xitlaj okichiujkej ijkuak Satanás okijto tlen xmelauak itech Jehová.
12. ¿Kenon Satanás okichiuj ika Eva maometlamati, niman tlenon xokichiujkej Adán niman Eva?
12 Ken yotikitakej, Satanás okichiuj ika Eva makinemili ika Jehová xse kuajli Tajtli. Sakin, Adán niman Eva xitlaj okichiujkej niman ijkon Satanás maka ijkon matlajto itech Jehová. Yejua ika, okineltokilijkej Satanás niman okixnamijkej inTajtsin. Aman, Satanás noijki ijkon kichiua: kijtoua tlen xmelauak itech toTajtsin niman kichiua ika miyekej maka manokauilikan makinyekana Jehová.
JEHOVÁ KIYEKTENEUA ITOKA
13. ¿Tleka tikijtouaj ika Ezequiel 36:23 techititia tlen Jehová melak kineki matikmatikan?
13 ¿Okinokauili Jehová makijtouilikan tlen xmelauak? Ka, yejua xokinokauili. Ipan nochi Biblia, yejua kijtoua tlenon yokichiuj niman ijkon kiteititis ika xmelauak tlen Satanás okijto ipan xochitlalpan Edén (Gén. 3:15). Uelis tikijtoskej ika nochi Biblia techmachtia ika itechkopa iTekiuajyo tlen kiyekana Jesús, Jehová oksejpa kichiuas maonia yolseuilistli ipan tlaltikpaktli niman manochiua tlen kuajli. Biblia techpaleuiya matikasikamatikan kenon Jehová kiyekteneua itoka (xpoua Ezequiel 36:23, TNM). *
14. ¿Kenon Jehová yokiyekteneuj itoka?
14 Satanás melak yokiyejyeko maka manochiua tlen Jehová kineki. San ika, xkeman ueli. Biblia kiteititia tlenon yokichiuj Jehová, niman noijki kiteititia ika xakaj nemi ijkon ken yejua. Yemelak, Jehová kiyolkokoua nochi tlen Satanás niman oksekimej kichiuaj niman ijkon kixnamikiskej (Sal. 78:40). Ipampa tlen Jehová kichiua, kuajli nesi ika yejua tlamachilise, teijyouiya niman ika melajki. Yejua noijki miyekpa yokiteititi kenon melak kojtik. San ika, itech nochi tlen kichiua, kuajli nesi ika melak tetlasojtla (1 Juan 4:8). Jehová nochipa kichipaujtika itoka.
Satanás okijli Eva tlen xmelauak itech Jehová, niman ok ijkon kuajchiujtiuj. (Xkimita párrafos 9, 10 niman 15). *
15. ¿Kenon Satanás ok kixnamiktika itoka toTajtsin niman tlenon yopanok ipampa yejon?
15 Ipan yejuin tonaltin, Satanás ok kixnamiktika itoka Jehová. Kiyejyekoua kichiuas ika tlaltikpakchanejkej makineltokakan ika toTajtsin xkojtik, xmelajki, xtlamachilise niman ika xtetlasojtla. San matikonnemilikan yejuin: Satanás kiyejyekoua techtlaneltokiltis ika xnemi Jehová. Niman ijkuak kita ika yakaj kema tlaneltoka itech toTajtsin, kiyejyekoua kitlaneltokiltis ika xkeman uelis kiyolpaktis pampa miyek tlen kitlajtlani. Noijki kiteijlia ika Jehová xteiknelia niman ika techtlatis ipan infierno. Akin kineltokaj yejuin tlakajkayaualistin xkinekij makinyekana Jehová. Satanás kiyejyekojtos kinkajkayauas tlaltikpakchanejkej niman noijki kinekis ika tejua xtlalkaui Jehová. ¿Timokauilis?
TLEN TEJUAMEJ UELIS TIKCHIUASKEJ
16. ¿Tlenon tejuamej uelis tikchiuaskej?
16 Maski titlajtlakolejkej, Jehová techkauilia matikpaleuikan manochipaua itoka. Yejuin kijtosneki ika uelis tikchiuaskej tlen Adán niman Eva xokichiujkej. Maski miyekej kiuijuikaltiaj niman kijtouaj tlen xmelauak itech itoka Jehová, tejuamej uelis tikteititiskej ika xmelauak tlen kijtouiliaj. Kema, uelis tikteititiskej ika Jehová chipauak, yolmelajki, yolkuajli niman tetlasojtlani (Is. 29:23). Uelis tikteititiskej ika tiknekij san yejua matechyekana niman uelis tikteijliskej ika san yejua melajki tlayekanas, ika kichiuas matinemikan ika toyojlo niman matipakikan (Sal. 37:9, 37; 146:5, 6, 10).
17. ¿Tlenon okichiuj Jesús niman ijkon makixmatikan itoka iTajtsin?
17 Ijkuak tikchiuaj tlen noneki niman ijkon manoyekteneua itoka Jehová, tikchiujtokej ijkon ken Jesucristo (Juan 17:26). Jesús xsan okitekitilti itoka iTajtsin, noijki okiteititi kenon yemelak yejua. Matontlanemilikan itech tlen okichiuj ijkuak fariseos okijtokej ika toTajtsin miyek kitlajtlani, xteasikamati, xteiknelia niman ika xkuajli iyojlo. Ijkuak ijkon opanok, Jesús okinpaleui tlaltikpakchanejkej makitakan ika iTajtsin teasikamati, teijyouiya, tetlasojtla niman teiknelia. Pampa Jesús nochipa okichiuj ken iTajtsin, miyekej ouel okixmatkej Jehová (Juan 14:9).
18. ¿Kenon uelis tikteititiskej ika xmelauak tlen kijtouaj itlauelikniuan Jehová?
18 Tejuamej noijki uelis tikchiuaskej ken Jesús. Uelis tikteijliskej tlen tikmatstokej itech Jehová niman kenon yejua melak tetlasojtla niman teiknelia. Tla ijkon tikchiuaj, tikteititiskej ika xmelauak tlen kijtouaj itlauelikniuan, tikyekteneuaskej itoka Jehová niman tikinpaleuiskej tlaltikpakchanejkej makichipaujkaitakan. Tejuamej uelis tikchiuaskej ken Jehová maski titlajtlakolejkej (Efes. 5:1, 2). Ipampa tlen tikijtouaj niman tlen tikchiuaj, tlaltikpakchanejkej uelis kixmatiskej Jehová. Kema, tejuamej uelis titlapaleuiskej manoyekteneua itoka. Uelis tikyekteneuaskej itoka tla tikinpaleuiyaj oksekimej maka ok makineltokakan tlen xmelauak itech toTajtsin. * Niman, tla tejuamej nochipa timelajkanemij, tikyekteneujtoskej itoka toTajtsin (Job 27:5).
Tiknekij tikinpaleuiskej akin tikinmachtiaj Biblia makasikamatikan ika Jehová yolkuajli niman tetlasojtla. (Xkimita párrafos 18 niman 19). *
19. Ken kijtoua Isaías 63:7, ¿tleka tejuamej titemachtiaj Biblia?
19 Onka okse tlemach tlen uelis tikchiuaskej niman ijkon manoyekteneua itoka Jehová. Ijkuak yakaj tikmachtiaj Biblia, melak kuajli tikititiaj ika san Jehová kinamiki matlayekana. Niman yejuin melauak, san yejua kinamiki matlayekana ipan tlaltikpaktli niman ne iluikak. Maski melak noneki matikteititikan tlen kitlajtlani Jehová, maka matikilkauakan ika tejuamej tiknekij ika tlaltikpakchanejkej makitlasojtlakan Jehová niman maka keman makitlalkauikan. Ika yejon, nochipa noneki tikteititiskej tlen kualtsin kichiua Jehová (xpoua Isaías 63:7). Tla ijkin tikchiuaj, tlaltikpakchanejkej kitlasojtlaskej Jehová niman kitlakamatiskej pampa xkeman kinekiskej kitlalkauiskej.
20. ¿Tlenon tiknankiliskej ipan okse tlamachtijli?
20 Ipan okse tlamachtijli, tiknankiliskej yejuin: ¿Kenon uelis tikmatiskej tla tlen tikchiuaj niman ken titemachtiaj kiyekteneua itoka Jehová niman tla kinpaleuiya oksekimej makinisiuikan toTajtsin?
TLAKUIKAJLI 2 Motoka Jehová
^ párr. 5 ¿Tlenon noneki kichiuaskej tlaltikpakchanejkej niman iluikaktekitkej? ¿Niman tleka noneki ijkon makichiuakan? Tla tikasikamatij yejuin, techpaleuis más kuajli matouikakan iuan Jehová.
^ párr. 13 Ezequiel 36:23: “‘Nejua nikchiuas machipaui noueyitoka, tlen kalpamej yokitsokuilotijkej, tlen nemejuamej onenkitsokuilotijkej ipan yejon kalpamej; niman kalpamej kimatiskej ika nejua niJehováʼ, ijkon kijtoua nemoTeko Jehová akin Ueyixtika, ‘ijkuak nejua ninoyekteneuas nemotsajlan imixpan yejon kalpamej’”.
^ párr. 18 Kemantika, ipan toamatlajkuiloluan yonoteijli ika xnoneki titepaleuiskej manoyekteneua itoka Jehová pampa xakaj kijtoua tla xkinamiki makipiya yejuin tokayotl. San ika, ipan 2017, ipan tlanechikojli tlen nochiua sejse xiuitl, tokniuj akin okiyekan yejon tlanechikojli okijto ika xtlaj tlenon tla ipan toteoyouan tiktlajtlanij manoyekteneua noso manochipaua itoka Jehová, pampa miyekej yokichiujkej maka manoyekteneua itokayo. Xkita programa de enero de 2018 ipan jw.org® (xpachouili kampa kijtoua BIBLIOTECA > JW BROADCASTING®).
^ párr. 63 TLEN NESI IPAN TLAIXKOPINAJLI: Diablo okixnamik Jehová ijkuak okijli Eva ika toTajtsin tlakajkayaua. Desde yeuejkaui, Satanás youajtlakajkayaujtia: yokijto ika toTajtsin xteiknelia niman ika xokinchijchiuj tlaltikpakchanejkej.
^ párr. 65 TLEN NESI IPAN TLAIXKOPINAJLI: Se tokniuj melak kuajli tlajtoua itech Jehová ijkuak temachtia.
