Pablo okijkuilo: “Ipampa tlanauatijli nejua yonimik, niman ijkon uelis ninemis para toTajtsin” (Gál. 2:19).

Pablo okijkuilo yejuin pampa kinekiya itlaj kimasikamachiltis tokniuan akin chantiyaj Galacia. Sekimej tokniuan yopeujkaj tlanemiliayaj ijkon ken akin temachtiayaj tlen xmelauak, akin kiteititiayaj ika tla yakaj kinekiya makisas nonekiya kintlakamatis tlanauatiltin tlen okimakakaj Moisés niman kinochiuiliskiaj circuncisión. San ika, Pablo kimatstoya ika toTajtsin xok kintlajtlaniliaya itekipanojkauan makinochiuilikan circuncisión. Yejua kuajli okiteititi ika tlen temachtiayaj yejon tlakamej xmelauak niman okimijli tokniuan ika nonekiya tlaneltokaskej itech tlen Jesucristo okichiuj topampa (Gál. 2:4; 5:2).

Biblia kuajli kijtoua ika ijkuak se miki, xok itlaj kimati (Ecl. 9:5). Ijkuak Pablo okijto “ipampa tlanauatijli nejua yonimik”, okijtosnek ika yejua xok noyekanaya ika tlanauatiltin tlen okimakakej Moisés. Yejua kuajli kimatstoya ika pampa tlaneltokaya itech tlen Jesús okichiuj topampa, aman ueliskia nemis para toTajtsin.

Pablo okipatlak ken tlanemiliaya ipampa tlen kijtouayaj tlanauatiltin tlen okimakakej Moisés. ¿Tlenon okipatlak? Yejua yokijtoka ika “Dios xkiteneua sen tlakatl ika nochi itlajtlakoluan yokimpopoloj pampa kitlakamati itlanauatil Moisés, yej pampa kineltoka ika JesuCristo ipampa omik” (Gál. 2:16). Yemelak, yejon Tlanauatijli tlen okimakakej Moisés, melak otepaleui. Pablo okimijli akin chantij Galacia: “On tlanauatijli okitlalijkej para on tlakatl kititia itlajtlakol. Niman on tlanauatijli otlamandaroj hasta ijkuak ouajlaj iuejkakoneu Abraham yejuan Dios okiprometerouilij” (Gál. 3:19). Kema, yejon tlanauatijli okiteititi ika tinochimej titlajtlakolejkej niman ika xueliskia tikchiuaskiaj nochi tlen kijtouaya yejon tlanauatijli. Yejua ika, nonekiya manotemaka topampa yakaj akin xkipiaya tlajtlakojli. Tlanauatijli otepaleui makitakan ika Jesús “iuejkakoneu Abraham yejuan Dios okiprometerouilij”. Nochimej akin tlaneltokaskej itech tlen okichiuj Jesucristo, toTajtsin uelis kinmakixtis (Gál. 3:24). ToTajtsin okitlapopolui Pablo pampa, ipampa tlen kijtouaya tlanauatijli, otlaneltokak itech Jesús. Ijkon, Pablo omik ipampa tlen kijtoua tlanauatijli niman onen para toTajtsin. Yejua xok noyekanaya ika tlanauatiltin tlen okimakakej Moisés, aman yejua noyekanaya ika tlen toTajtsin kijliaya.

Pablo noijki ijkon okijto ijkuak okintlajkuilouili tokniuan romanos: “Nokniuan, nemejuamej yonenmikkej itech on tlanauatijli pampa yonenmikkej iuan Cristo. [...] Pero itech on tlanauatijli yejuan techyekanaya ikan ipoder, aman yotimikkej” (Rom. 7:4, 6). Yejuin tlaxeloltin niman tlen kijtoua Gálatas 2:19, kiteititiaj ika Pablo xkijtotoya tla omik pampa xkintlakamatiya tlanauatiltin, yejua kijtojtoya ika xok nonekiya kintlakamatis. Pablo niman nochimej akin kichiuaj ken Cristo, xok nonekiya noyekanaskej ika Tlanauatijli tlen okimakakej Moisés. Aman, kuajli kimatstoyaj ika san ueliskiaj makisaskej, tla tlaneltokayaj itech tlen Jesús okichiuj inpampa.