TLAMACHTIJLI 11
Matijkakikan iTlajtol Jehová
“In yejua notlajsojkaKoneu [...]. Yejua xtenkakikan” (MAT. 17:5).
TLAKUIKAJLI 89 Kiteochiuaj akin tlakaki niman tetlakamati
TLEN TIKITASKEJ *
1, 2. a) ¿Kenon Jehová kiminotsa itekipanojkauan? b) ¿Tlenon tikitaskej ipan yejuin tlamachtijli?
JEHOVÁ melak kuelita nonotsas touan. Kichiua, pampa kineki matikmatikan kenon tlanemilia. Ika yejon, yeuejkaui okinkuik teotlajtokej, iluikaktekitkej, niman noijki okikuik ikoneuj, Jesucristo (Amós 3:7; Gál. 3:19; Apoc. 1:1). Aman, touan nonotsa ika iTlajtol, Biblia.
2 Ijkuak Jesús onen ipan tlaltikpaktli, Jehová yexpa okinots. Matikitakan tlenon okijto, tlenon tiuelij itech itlajtoluan niman kenon techpaleuiyaj.
“TINOTLAJSOJKAKONETSIN”
3. Ken kijtoua Marcos 1:10, 11, ¿tlenon okijto Jehová ijkuak Jesús onoapolakti, niman tlenon oteasikamachilti yejuin tlajtoltin?
3 (Xpoua Marcos 1:10, 11). Nikan ijkuak kachtopa otlajto Jehová. Okijto: “Tejua tinotlajsojkaKonetsin, niman sanoyej moka nipaki”. Jesús melak oyolpak ijkuak okikak ika iTaj kitlasojtla niman itech tlaneltoka. Matikitakan yeyi tlen Jehová oteasikamachilti: ika Jesús iKoneuj, kitlasojtla niman ika kiyolpaktia.
4. ¿Kenon Jesús oksejpa onochiuj iKoneuj toTajtsin ijkuak onoapolakti?
4 Tejua tinoKoneuj. Ika yejuin tlajtoltin, Jehová okijto ika onopatlak ken kitaya iKonetsin. Ijkuak Jesús xiuajlaya ipan tlaltikpaktli, ikatka iKoneuj toTajtsin. San ika, ijkuak onoapolakti okitlapejpenijkej ika espíritu santo niman oksejpa onochiuj iKoneuj toTajtsin. Yejon kijtosnekiya ika ijkuak nokuepaskia iluikak, yejua nochiuaskia Tekiuaj niman Ueyi Teopixki (Luc. 1:31-33; Heb. 1:8, 9; 2:17). Kuakon, ijkuak Jesús onoapolakti, kinamikiya ika iTaj makijto ika yejua iKonetsin (Luc. 3:22).
Ijkuak techyolchikauaj niman techijliaj ika kuajli tlen otikchiujkej, kichiua kuajli matomachilikan. (Xkita párrafo 5). *
5. ¿Kenon uelis tikchiuaskej ken Jehová?
5 Tejua tinotlajsojkaKonetsin. Ijkon ken Jehová okititi Jesús ika kitlasojtla niman okiyolchikauj, tejuamej noijki kipiya ika ijkon tikchiuaskej (Juan 5:20). Ijkuak yakaj akin tiktlakaitaj techititia ika techtlasojtla niman techijlia ika kuajli tlen yotikchiujkej, kuajli tomachiliaj. Tokniuan ipan tlanechikojli niman tochanejkauan noijki kinekij matikimititikan ika tikintlasojtlaj niman matikinyolchikauakan. Tla ijkon tikchiuaj, chikauis intlaneltokil niman melajkanemiskej itech Jehová. Melak noneki ika tajtin kuajli makinyolchikauakan inkoneuan niman makimititikan ika kintlasojtlaj. Ijkon kinpaleuiskej machikauikan.
6. ¿Tleka uelis titlaneltokaskej itech Jesucristo?
6 Moka nipaktika. Ijkuak Jehová okijto yejuin, okiteititi kenon kuajli kimatstoya ika Jesús kichiuaskia tlen yejua kinekiya. Tla Jehová kuajli tlaneltokaya itech iKoneuj, tejuamej noijki uelis kuajli tikmatstoskej ika Jesús kichiuas nochi tlen Jehová yokijto (2 Cor. 1:20). Ijkuak titlanemiliaj itech Jesús, tiknekij tomachtiskej itech niman tikchiuaskej ken yejua. Niman Jehová noijki tlaneltoka ika itekipanojkauan ok kinekiskej ueliskej itech iKoneuj (1 Ped. 2:21).
“XTENKAKIKAN”
7. Ken kijtoua Mateo 17:1-5, ¿kemanon oksejpa ouajtlajto Jehová, niman tlenon okijto?
7 (Xpoua Mateo 17:1-5). Ijkuak Jesús onixpatlak, ijkuakon ika okpa ouajtlajto Jehová. Jesús okimijlika Pedro, Santiago niman Juan iuan mauiyan ipan se tepetl melak ueyi. Ompa okipixkej se tlatlachalistli. Jesús oixpetlan niman itlaken opeuj tsotlani. Omemej akin kineskayotiayaj Moisés niman Elías, opeuj tlajtouaj iuan Jesús itech kenon mikiskia niman yoliuiskia. Maski yejon yeyimej itlatitlankauan Jesús melak kochisnekiyaj, otlatlachixkej noso oijsakej niman ijkon uelis kitaskej yejon tlatlachalistli (Luc. 9:29-32). Sakin, se moxtli tlen tsotlani okintlapacho, niman ompa ouajkakistik se tlajtojli: otlajto toTajtsin. Ijkon ken opanok ijkuak Jesús onoapolakti, Jehová okiteititi ika kitlasojtlaya niman kiyolpaktiaya ikoneuj ijkuak okijto: “In yejua notlajsojkaKoneu yejuan nechpaktia”. San ika, noijki okijto: “Xtenkakikan”.
8. ¿Kenon okinpaleui inomachtijkauan Jesús tlatlachalistli tlen okitakej?
8 Tlatlachalistli tlen okitakej okiteititi iueyilis niman ikojtilis Jesús tlen kipiyaskia ijkuak nochiuaskia tekiuaj itech iTekiuajyo toTajtsin. Yejuin okiyolchikauj Jesús pampa tlajyouiskia niman xkuajli kichiuiliskiaj ijkuak kimiktiskiaj. Noijki, okinchikauili intlaneltokil inomachtijkauan. Okinyolchikauj mamelajkanemikan niman kuajli makichiuakan ueyi tekitl tlen kipiayaj. Apóstol Pedro okiteneuj yejuin tlatlachalistli ijkuak yopanoka 30 xiuitl, yejon kiteititia ika melak kuajli kilnamiktoya (2 Ped. 1:16-18).
9. ¿Tlenon okimijli Jesús inomachtijkauan?
9 Xtenkakikan. Jehová kuajli okijto ika kinekiya matijkakikan niman matiktlakamatikan tlen okijto iKoneuj. Ijkuak Jesús onen ipan tlaltikpaktli, miyek okijto tlen noneki kuajli matijkakikan. Yejua okinmachti inomachtijkauan matenojnotsakan itech iTekiuajyo toTajtsin niman miyekpa okimilnamikti ika noneki tlatlachixtoskej (Mat. 24:42; 28:19, 20). Noijki miyekpa okimijli melak manokojtilikan niman okinyolchikauj maka masiauikan (Luc. 13:24). Noijki, kuajli okimijli ika nonekiya notlasojtlaskej, san sekan nemiskej niman makitlakamatikan itlanauatiluan (Juan 15:10, 12, 13). Tlen okimijli melak otepaleui niman aman noijki melak techpaleuiyaj.
10, 11. ¿Kenon tikteititiaj ika tijkakij Jesús?
10 Jesús okijto: “Nochimej yejuan kitlakamatij on tlen melauak, kakij tlen nejua nikijtoua” (Juan 18:37). Tikteititiaj ika tijkakij itlajtol ijkuak tikchiuaj yejuin: “Xpiyakan ijyouilistli iuan oksekimej, niman xtlapojpoluikan tla yakaj xkuajli itlaj mechchiuilia” (Col. 3:13; Luc. 17:3, 4). Noijki tikteititiaj ika tijkakij itlajtol ijkuak titenojnotsaj ika pakilistli “ijkuak on tlakamej kinekiskej kakiskej niman ijkuak xkinekiskej” (2 Tim. 4:2).
11 Jesús okijto: “Noborregos nechtenkakij” (Juan 10:27). Tikteititiaj ika tijkakij Jesús xsan ijkuak tikpouaj itlajtoluan, tikchiuaj ijkuak tiktlakamatij. Tlen techajmana ipan tonemilis xtijkauiliaj makichiua maka matijkakikan Jesús (Luc. 21:34). Tikitaj ika melak ueyi kijtosneki tiktlakamatiskej itlanauatiluan Jesús, maski tikixnamikij tlen ouijtika. Miyekej tokniuan kixnamiktokej uejueyimej tlaueltin, kintlaueltokaj, xkipiyaj tlen kikuaskej niman tlaixpoliui kampa chantij. San ika, maski ijkon, melajkanemij itech Jehová. Jesús kimijlia: “Yejuan kimati niman kitlakamati notlanauatiluan, melauak nechtlajsojtla. Niman on yejuan nechtlajsojtla noTajtsin no kitlajsojtlas” (Juan 14:21).
Ijkuak titenojnotsaj techpaleuiya matijkakikan itlajtol Jesús. (Xkita párrafo 12). *
12. ¿Kenon noijki tikteititiaj ika tijkakij Jesús?
12 Ijkuak tikinpaleuiyaj akin Jesús yokintlali matechyekanakan, tikteititiaj ika tijkakij Jesús (Heb. 13:7, 17). Ipan yejuin xiuitl tlen yopanok, ikalpan toTajtsin miyek yokipatlak. Yenkuik yotechititi kenon titenojnotsaskej niman noijki yotechmakak tlen ika titenojnotsaskej. Yokipatlak ken nochiua tlanechikojli tlen tikpiyaj itlajkotian semana, noijki yokipatlak ken kinchijchiuaj niman kinyektlaliaj kaltin kampa tosentlaliaj. ¿Xmelak ika tiktlasojkamatij ika kuajli techyekanaj ika tlasojtlalistli? Uelis kuajli tikmatstoskej ika Jehová techteochiuas pampa tokojtiliaj tiktlakamatiskej ikalpan.
13. ¿Kenon techpaleuiya tijkakiskej Jesús?
13 Melak techpaleuiya tijkakiskej nochi tlen Jesús otechmachti. Yejua kuajli okimijli inomachtijkauan ika yolseuiskej tla kikakij itlamachtiluan. Okijto: “Nenkiseliskej neseuilistli para nemoalma”. Noijki okijto: “Tlen nemechmachtia xouijtikaj nenueliskej nenkichiuaskej” (Mat. 11:28-30). ITlajtol toTajtsin, noijki naui Evangelios tlen tlajtouaj itech inemilis niman itenojnotsalis Jesús, techyolchikaua, kichikaua totlaneltokil niman kichiua matitlamachilisejkej (Sal. 19:7; 23:3). Jesús okijto: “¡Dios más kintiochiua on yejuan kakij itlajtoltsin niman kitlakamatij!” (Luc. 11:28).
TOTAJTSIN KIUEYICHIUAS ITOKA
14, 15. a) Ken kijtoua Juan 12:27, 28, ¿kemanon ika yexpa ouajtlajto Jehová? b) ¿Tleka itlajtoluan Jehová okiyolchikaujkej Jesús?
14 (Xpoua Juan 12:27, 28). Evangelio de Juan tlajtoua ijkuak ika yexpa Jehová ouajtlajto. Poliuiya seki tonaltin ika Jesús mikiskia, yejua nemiya Jerusalén niman ijkon ompa kipanoltis sa ika tlami pascua. Sakin ika okijto ika yoajmankamijka, okitlajtlanili toTajtsin ipan se teoyotl: “NoTajtsin, xchiua para ma mitsueyilikan”. Niman okikak ika Jehová okuajnankili: “Yonikchiu para ma nechueyilikan, niman oksejpa nikchiuas para ma nechueyilikan”.
15 Jesús melak najmanaya pampa nonekiya yolmelajkanemis itech Jehová. Kimatstoya ika kiuitekiskiaj niman kimiktiskiaj (Mat. 26:38). San ika, kiueyichiuas itoka iTajtsin yejon melak kajmanaya. Okitlajtolchijchiuilijkej niman kajmanaya ika imikilis makijtlako itech ken kitayaj toTajtsin. San ika, tlen okijto iTaj, yejon okichiuj kuajli makimati ika noueyichiuas itoka Jehová. Yejuin tlajtoltin okiyolseuijkej niman okiyolchikaujkej niman ijkon makixiko tlen kixnamikiskia. Maski yejuin tlajtoltin kanaj san yejua okasikamat, Jehová okichiuj manoijkuilo pampa ijkon noijki techpaleuis (Juan 12:29, 30).
Jehová kiueyichiuas itoka niman kimakixtis ikalpan. (Xkita párrafo 16). *
16. ¿Tleka kemantika uelis techajmanas manotsokuilo itoka Jehová?
16 Ijkon ken Jesús kanaj noijki techajmana manotsokuilo itoka Jehová. Kanaj texchiuiliaj itlaj tlen xkinamiki, ijkon ken okichiuilijkej Jesús. Noso kanaj techajmana tlen oksekimej xkuajli kijtouaj totech. Kemantika kanaj tiknemiliaj kenon yejuin kijtlakoua ken kitaj Jehová niman ikalpan. San ika, yejuin xkipiya ika kichiuas melak matajmanakan. Ijkuak ijkon panoua techyolchikaua tlen Jehová okijli Jesús. Jehová nochipa kiueyichiuas itoka. Kikuis iTekiuajyo niman ijkon kiyektlalis nochi tlen satanás niman yejuin tlaltikpaktli kinchiuiliskej itekipanojkauan (Sal. 94:22, 23; Is. 65:17). Tikmatstokej ika yejuin tlajtoltin nochiuaskej: “Dios mechmakas yolseuilistli [...] in yolseuilistli kejeuas nemoyojlo niman nemotlamachilis pampa itechkopa Cristo Jesús” (Filip. 4:6, 7).
KENON TECHPALEUIYA TIJKAKISKEJ ITLAJTOL JEHOVÁ
17. Ken kijtoua Isaías 30:21, ¿kenon aman technotsa Jehová?
17 Aman Jehová ok technotsa (xpoua Isaías 30:21). Xtechuajnotsa ijkon ken okichiuj iuan Jesús. San ika, techyekana ika iTlajtol, Biblia. Noijki, espíritu santo kiyekana tekitketl akin melajkanemi makichikaua totlaneltokil, ika amatlajkuiloltin, ipan Internet, ika videos niman audios (Luc. 12:42). ¿Xmelak ika tikpiyaj miyek tlen ika uelis tikchikauaskej totlaneltokil?
18. ¿Tleka itlajtoluan Jehová techyolchikaua niman kichiua manoskalti totlaneltokil?
18 Maka keman matikilkauakan tlen Jehová okijli iKoneuj ijkuak onen ipan tlaltikpaktli. Itlajtoluan tlen onka ipan Biblia matechpaleui matikneltokakan ika yejua kimati kenon tlayekanas. Matikmatstokan, ika kiyektlalis nochi tlen texchiuiliskej Satanás niman akin xkuajkualtin. Kuajli matijkakikan itlajtol Jehová. Tla ijkon tikchiuaj, uelis tikixnamikiskej maski san tlenon. Biblia techilnamiktia yejuin: “Nemejuamej noneki nenkipiyaskej ijyouilistli chika nentlajyouiyaj para uelis nenkichiuaskej on tlinon Dios kineki, niman ijki uelis nenkiseliskej on tlen yejua omechprometerouilij” (Heb. 10:36).
TLAKUIKAJLI 4 Jehová notlajpixkauj
^ párr. 5 Ijkuak Jesús onen ipan tlaltikpaktli, Jehová yexpa okinots. Sejpa, okinnauati inomachtijkauan makikakikan iKonetsin. Aman, toTajtsin technotsa ika Biblia kampa nestika tlen Jesús otemachti, niman noijki kitekitiltia ikalpan. Ipan yejuin tlamachtijli, tikitaskej kenon melak tepaleui tijkakiskej Jehová niman Jesús.
^ párr. 52 TLEN NESI IPAN TLAIXKOPINALTIN: Se tlayekanketl kita kenon se Siervo Ministerial tlapaleuijtika ipan kajli kampa tosentlaliaj niman kintemakatika amatlajkuiloltin, niman kijlia ika kuajli tlen kichiua.
^ párr. 54 TLEN NESI IPAN TLAIXKOPINAJLI: Se tokniuj iuan isiuauj akin chantij Sierra Leona kimakaj se invitación akin kinojnotstokej niman ijkon mauiya tlanechikoltin.
^ párr. 56 TLEN NESI IPAN TLAIXKOPINAJLI: Ipan se país kampa xtechkauiliaj matitenojnotsakan, tokniuan nosentlaliaj ipan se kajli. Pampa xkinekij makimatikan, xnotlakentiaj ken ijkuak yauej tlanechikoltin.
