JESÚS yokijtoka ika inomachtijkauan miyek kipixkaskiaj ipan itlamiyan tonaltin (Mat. 9:37; Mat. 24:14, TNM). Yejuin tlajtoltin melak kuajli nochiujtokej ipan seki kalpamej itech Transcarpatia (Ucrania). San ipan yeyi kalpamej tlen nisiuj onokej, onka 50 tlanechikoltin niman nemij ipantsin 5,400 tenojnotskej. * Niman, tla tikinpouaj nochimej kechmej nemij ipan yejon yeyi kalpamej, se itech naui tlaltikpakchanejkej, yonochiuj iteixpantijkauj Jehová.

¿Kenon tenankiliaj ijkuak kinnojnotsaj akin ompa chantij? “Akin nikan chantij kitlakaitaj Biblia, kipatiojkaitaj melajkayotl, san sekan chantij niman nokojtiliaj nopaleuiskej”, yejon tlen kijtoua se tokniuj itoka Vasile. Noijki kijtoua: “Xnochipa kuelitaj tlen tikneltokaj, san ika, ijkuak tikimititiaj se tlaxelojli pitentsin ipan Biblia, kuajli mitskakiskej”.

San ika, pampa tenojnotsaj kampa nemij miyekej tenojnotskej, tokniuan kixnamikij seki tlemach tlen ouijtika niman tlen xmiyekan panoua. Se neskayotl, se tlanechikojli kipiya 134 tenojnotskej niman san 50 kaltin kampa tenojnotsaj. ¿Kenon kixnamikij yejuin?

Miyekej tokniuan melak nokojtiliaj niman ijkon ueliskej yaskej kampa nonekij tenojnotskej. Tokniuj Ionash akin kipiya 90 xiuitl, kijtoua: “Ipan totlanechikol, tla toxexelouiliskiaj kaltin, se tenojnotsketl san ipan ome kajli panoskia. Nejua aman nitenojnotsa ipan kalpan kampa nichanti, san ika, san kemach, ijkuak ok kuajli ninomachiliaya, noijki niaya ipan se kalpan kampa xakaj tenojnotsaya, tlen onka 160 kilómetros ika uejka, ompa nitenojnotsaya ika tlajtojli húngaro”. Tenojnotskej noneki melak nokojtiliskej niman ijkon yaskej ipan yejuin kalpamej. Ionash kijtoua: “Nonekiya ninokuiteuas las cuatro ika kualkan, pampa san ijkon ueliskia nikajsiskia tren. Niman nitenojnotsaya hasta las seis ika teotlak, ijkuak tren uajnokuepaya. Yejuin nikchiuaya okpa noso yexpa ipan se semana”. ¿Kimachilia tokniuj ika otepaleui nochi kech onokojtili? Sa no yejua kijtoua: “Ijkuak ijkon nontenojnotsaya, melak niyolpakiya. Niman onikseli se tlateochiualistli, pampa onikmachti tlen melauak se familia akin uejka chanti”.

Tikasikamatij ika sekimej tokniuan itech yejon tlanechikoltin xuelij uejka yauej, san ika, nochimej, maski akin iuejueyimej, nokojtiliaj niman ijkon ueliskej kinmachtiskej nochimej kampa tenojnotsaj. Yejon okichiuj ika ijkuak onoilnamik imikilis Cristo ipan 2017, kech onosentlalijkej ipan yejon yeyi kalpamej, okiokpaui tenojnotskej, kijtosneki, tlajkotipan itech nochimej akin ompa chantij. Yemelak, maski san kanon titenojnotsaj, ok onka miyek tlen tikchiuaskej ipan itekiyo toTajtsin (1 Cor. 15:58).