1. Sakin ika otlajtlakojkej Adán niman Eva, ¿tlenon okijto Jehová itech totlauelikniuj?

ADÁN kuajli kimatiya ika kouamej xtlajtouaj. Ika yejon, ijkuak se kouatl otlajto iuan Eva, kanaj okinemili ika akin yemelak tlajtotoya katka se espíritu (Gén. 3:1-6). Adán niman Eva xmiyek kimatiyaj itech yejon espíritu. Maski ijkon, Adán okitlapejpeni xkitlakamatis iTaj iluikakchane akin tetlasojtlani niman oteixnamik iuan yejuin espíritu akin nion xkixmatiya (1 Tim. 2:14). Jehová nimantsin opeuj tlajtoua itech yejuin totlauelikniuj akin okimixpolojka Adán niman Eva, noijki kuajli okijto ika kipopoloskia yejon teixnamijketl. San ika, noijki okijto ika seki tonaltin yejuin espíritu kimixnamikiskia akin kitlasojtlaj toTajtsin (Gén. 3:15).

2, 3. ¿Tleka Jehová xmiyek okijto itech Satanás achto ika uajlaskia Mesías?

² Pampa Jehová melak tlamachilise, xkeman techijlia kenon itoka yejon iluikaktekitketl akin okixnamik. * Niman onochiak 2,500 xiujtin achto ika techijlis katlejua tlajtojli kitekitiltia ijkuak kiteneua yejon iluikaktekitketl: Satanás, tlen kijtosneki “Teixnamijketl” (Job 1:6). Niman yejuin tlajtojli san nesi ipan yeyi amoxtin itech Tlajkuiloltin  ika Hebreo: 1 Crónicas, Job niman Zacarías. ¿Tleka Jehová xmiyek okijto itech yejuin totlauelikniuj achto ika uajlaskia Mesías?

³ Nesi ika Jehová xokinek melak makiueyikaitakan Satanás. Ika yejon, xokichiuj ika ipan Tlajkuiloltin ika Hebreo miyek manoijkuilo itech nion tlen kichiua. Jehová okichiuj manoijkuilo yejon amoxtin itech Biblia pampa kinekiya kinpaleuis tlaltikpakchanejkej makixmatikan Mesías niman makitokakan (Luc. 24:44; Gál. 3:24). Jehová okitekitilti Mesías ijkuak oyejkok niman noijki inomachtijkauan niman ijkon makitemachiltikan tlen aman tikmatij itech Satanás niman itech iluikaktekitkej akin iuan oteixnamijkej. * Niman kinamiki ika ijkon okichiuj, pampa Jehová kitekitiltis Jesús niman tlapejpeniltin ijkuak kipopolos Satanás niman akin kitokaj (Rom. 16:20; Apoc. 17:14; 20:10).

4. ¿Tleka xnoneki melak tikmakasiskej Satanás?

⁴ Apóstol Pedro okiteneuj ika Diablo kentla se “león yejuan nanalkatinemi”, niman Juan okitokayoti “kouatl” niman “dragón” (1 Ped. 5:8; Apoc. 12:9). ¿Kijtosneki yejon ika noneki melak tikmakasiskej Satanás? Ka, pampa ikojtilis san ontlami (xpoua Santiago 4:7). Niman Jehová techpaleuiya, noijki Jesús niman iluikaktekitkej yolmelaujkej. Ika intlapaleuilis, ueli tikxikouaj ijkuak techixnamikij. San ika, ok noneki matiknankilikan yeyi tlajtoltilistin tlen ueyi kijtosnekij: ¿Kech kojtilistli kipiya Satanás? ¿Kenon kiyejyekoua Satanás kinkajkayauas tlaltikpakchanejkej? Niman ¿tlenon xueli kichiua Satanás? Matikinnankilikan yejuin niman matikitakan tlenon techmachtiaj.

5, 6. ¿Tleka tekiuajkej xuelij kiyektlaliaj tlen tlaltikpakchanejkej melak kinekij?

⁵ Miyekej iluikaktekitkej oteixnamijkej iuan Satanás. Ijkuak ok xpanouaya apachiuilistli, Satanás ouel okichiuj ika sekimej iluikaktekitkej maauilnemikan iuan siuamej. Biblia kiteneua yejuin tlen opanok ika se neskayotl tlen kijtoua ika itech “nochi on yexkantipan kech onkatkaj sitlalimej ne ipan cielo”, se dragón “okintejchiuilan se parte” (Gén. 6:1-4; Jud. 6; Apoc. 12:3, 4). Ijkuak iluikaktekitkej okinkaujkej ichanejkauan Jehová, okimapeujkej niman onokauilijkej makinyekana Satanás. San ika, maka matiknemilikan ika yejuamej ijkon ken tlaltikpakchanejkej akin kichiuaj tlen xkuajli niman xakaj kinyekana. Satanás yokichijchiuj se tekiuajyotl tlen kixkopinasneki iTekiuajyo toTajtsin, niman sa no yejua yonochiuj tekiuaj. Yejua yokintlali xkuakualtin espíritus ken tekiuajkej, yokinmakak tlanauatijkayotl niman yokinkuep tlanauatijkej itech nochi tlaltikpaktli (Efes. 6:12).

⁶ Satanás kitekitiltia itekiuajyo niman ika yejuin kinyekana tekiuajkej ipan tlaltikpaktli. Yejuin kuajli ones ijkuak okititi Jesús “nochi on países yejuan onkaj ipan in tlaltikpaktli” niman okijli: “Nejua nimitsmakas nochi tekiuajyotl niman on ueyilistli yejuan onkaj ipan in países. Nochi yejua in, onechmakakej, yejua ika niuelis nikmakas san akin niknekis” (Luc. 4:5, 6). Maski ijkon tlayekana Diablo, miyekej tekiuajyomej itech yejuin tlaltikpaktli kichiuaj tlen kuajli inpampa tlaltikpakchanejkej. Niman nemij sekimej tekiuajkej akin kichiuasnekij tlen kuajli. San ika, xonka se tekiuajyotl niman xnemi nion se tekiuaj akin makiyektlali tlen tlaltikpakchanejkej melak kinekij (Sal. 146:3, 4; Apoc. 12:12).

7. Satanás kintekitiltia tekiuajyomej, san ika ¿kenon noijki kitekitiltia tlaneltokijli tlen xmelauak niman ken notekitiltia tomin? (Xkita tlaixkopinajli kampa peua tlen tomachtijtokej).

⁷ Satanás niman xkuakualtin espíritus xsan kintekitiltiaj tekiuajyomej niman ijkon kikajkayauaskej “nochi tlakatl chanej ipan in tlaltikpaktli”, noijki kitekitiltiaj tlaneltokijli tlen xmelauak niman ken notekitiltia tomin (Apoc. 12:9). Itechkopa tlaneltokijli tlen  xmelauak, Satanás kisemoyaua tlakajkayaualistin itech Jehová. Niman nesi ika kuajli yokijto kichiuas ika melak miyekej tlaltikpakchanejkej makilkauakan itokayo toTajtsin (Jer. 23:26, 27). Ipampa yejuin, miyekej kineltokaj ika kiueyichiuaj toTajtsin, san ika, tlen yemelak, yejuamej kinueyichiujtokej xkuakualtin espíritus (1 Cor. 10:20, TNM; 2 Cor. 11:13-15). Itechkopa ken notekitiltia tomin, Satanás kisemoyaua okseki tlakajkayaualistin. Se neskayotl, kichiua ika tlaltikpakchanejkej makineltokakan ika san uelis yemelak tipakis tla tikpiya miyek tomin niman miyek tlemach (Prov. 18:11). Akin kineltokaj yejuin tlakajkayaualistli, ipan nochi innemilis san kitejtemouaj kipiyaskej “tomin” niman xkitejtemouaj Jehová (Mat. 6:24). Tlasojtlalistli tlen kimachiliaj ipampa yejon tlemach tlen uelis kipiyaskej, kichiua mapopoliui intlasojtlalis tlen kimachiliaj ipampa toTajtsin (Mat. 13:22; 1 Juan 2:15, 16).

8, 9. a) ¿Tlenon ome tlamachtijli techititia inneskayo Adán, Eva niman iluikaktekitkej akin oteixnamijkej? b) ¿Kenon techpaleuiya tikmatiskej kech kojtilistli kipiya Satanás?

⁸ Inneskayo Adán, Eva niman iluikaktekitkej akin oteixnamijkej techmachtiaj ome tlamachtijli tlen melak ueyi kijtosnekij. Kachtopa, noneki tiktlapejpeniskej iuan akinon tinemiskej, tla tinemiskej iuan Jehová noso iuan Satanás. Xuelis ojkan tinemiskej (Mat. 7:13, TNM). Ika ome, tlen yakaj kiselia pampa kipaleuiya Satanás, san ontlami. Adán niman Eva sa no yejuamej ouel okijtokej tlenon kuajli niman tlenon xkuajli, niman xkuakualtin espíritus okinmakakej seki tlanauatijkayotl intech tekiuajkej ipan tlaltikpaktli (Gén. 3:22). San ika, kech kipolouaj akin kipaleuiyaj Satanás nochipa melak miyek xijkon ken tlen kiseliaj (Job 21:7-17; Gál. 6:7, 8).

⁹ ¿Kenon techpaleuiya tikmatiskej kech kojtilistli kipiya Satanás? Se, techkauilia matikasikamatikan ika Jehová kineki matikintlakaitakan tekiuajkej niman akin tlayekanaj ipan tlaltikpaktli (1 Ped. 2:17). Yejua kichia matikintlakamatikan intlanauatiluan tekiuajkej tlen maka makixnamiki tlen yejua technauatia (Rom. 13:1-4). San ika, noijki tikmatij ika xkipiya tikpaleuiskej se partido político nion tiktokaskej se akin ompa tlayekana (Juan 17:15, 16; 18:36). Noijki, pampa tikitaj kenon Satanás kiyejyekoua kitsokuilos itokayo niman ken kitaj Jehová, melak tiknekij tikinmachtiskej oksekimej tlen melauak itech toTajtsin. Tiktekitiltiaj niman techpaktia tikitkiskej itokayo. Tikmatij ika tiktlasojtlaskej toTajtsin techmaka miyek tlen kuajli xijkon ken tla tiktlasojtlaskiaj tomin noso tlemach tlen uelis tikpiyaskej (Is. 43:10; 1 Tim. 6:6-10).

10-12. a) ¿Ika tlenon okinkajkayauj Satanás miyekej iluikaktekitkej? b) ¿Tlenon techmachtia tlen inpan onochiuj yejon iluikaktekitkej?

¹⁰ Satanás kitekitiltia miyek tlajtlamach niman ijkon kichiuas ika tlaltikpakchanejkej  makichiuakan tlen yejua kineki. Ken tikitaskej, kemantika kitekitiltia itlaj tlen ika tekajkayaua niman kemantika nion xkiyana ken teixnamiki.

¹¹ Kachtopa, matikitakan kenon Satanás okinkajkayauj miyekej iluikaktekitkej. Kanaj ouejkauj kimitstoya niman ijkon kitas kenon kinyoltilanas niman kichiuas ika itech mauiyan. Niman sekimej kentla onajsikej ipan iteposchikol noso itlakajkayaualis Satanás niman oauilnenkej iuan siuamej. Inkoneuan akin melak uejkapamej katkaj, kichiuayaj tlen xkuajli niman tetlajyouiltiayaj (Gén. 6:1-4). Uelis tiknemiliskej ika Satanás xsan okitekitilti auilnemilistli niman ijkon kinyoltilanas, kanaj noijki kuajli okimijli ika kinyekanaskiaj tlaltikpakchanejkej. Nesi ika kitejtemouaya maka mayejko ikoneuj “yejon siuatl” akin toTajtsin yokijtokaj uajnemiskia (Gén. 3:15). San ika, Jehová okuajkuik se ueyi apachiuilistli niman ijkon okitelti tlen kinekiya kichiuas Satanás niman xkuakualtin espíritus.

¹² ¿Tlenon techmachtia yejuin? Ika maka matiknemilikan ika tejuamej xuelis techijtlakos auilnemilistli noso ueyimatilistli. Iluikaktekitkej akin oyajkej iuan Satanás yotekichiujkaj melak miyek xiujtin ixpan Jehová. San ika, maski nemiyaj kampa xnochiuaya tlen xkuajli, miyekej iluikaktekitkej okikauilijkej ika xkuakualtin ileuilistin manoskaltikan niman maueyiyakan ipan inyojlo. Tejuamej noijki ijkon, kanaj yotiktekichiuilijkej Jehová miyek xiujtin ipan ikalpan tlen chipauak. San ika, maski tinemij ipan ikalpan chipauak, uelis tijkauiliskej ika xkuakualtin ileuilistin manoskaltikan ipan toyojlo (1 Cor. 10:12). Melak noneki ika nochipa matiktlachilijtokan tlenon onka ipan toyojlo niman matijkixtikan ueyimatilistli niman xkuakualtin tlanemililtin (Gál. 5:26; xpoua Colosenses 3:5).

13. a) ¿Tlenon okse kitekitiltia Satanás tlen yokichiuj ika miyekej ompa mauetsitij? b) ¿Tlenon uelis tikchiuaskej niman ijkon xtechajsis iteposchikol Satanás?

¹³ Satanás kitekitiltia okse tlakajkayaualistli tlen yokichiuj ika miyekej ompa mauetsitij, yejuin panoua ijkuak sekimej kinekij kixmatiskej naualyotl. Yejua xsan kitekitiltia tlaneltokijli tlen xmelauak niman ijkon kinyoltilanas tlaltikpakchanejkej makixmatisnekikan xkuakualtin espíritus, noijki kitekitiltia yejon tlen ika noyolpaktilo. Kintekitiltia películas niman tlen timauiltis ipan aparatos, niman okseki tlemach tlen kichiua manesi ika naualyotl tepakti. ¿Tlenon uelis tikchiuaskej niman ijkon xtechajsis yejon teposchikojli? Xkipiya tikchiaskej ika ikalpan toTajtsin matechijkuilouili nochi tlenon ika uelis toyolpaktiskej niman tlenon ka. Toseselti noneki tikmachtiskej totlamachilis niman ijkon matlanemili ijkon ken Jehová tlanemilia (Heb. 5:14). Tiktlapejpeniskej tlen kuajli tla tiktlakamatij tlen techijlia apóstol Pablo, yejua okijto ika totlasojtlalis itech Jehová maka makipiya “ome ixayak” (Rom. 12:9, TNM). Matotlajtoltikan: “Tla se akin kemach nomachtijtika Biblia kitaskia ika  tlenon ninoyolpaktia, ¿kinemiliskia ika nikchiua tlen nikteijlia ijkuak nontenojnotsa, noso ika nikpiya ome noxayak?”. Tla tikchiuaj tlen tikijtouaj ijkuak titenojnotsaj, yejuin techpaleuis maka matiuetsikan ipan itlakajkayaualisuan Satanás (1 Juan 3:18).

14. a) ¿Kenon uelis techixnamikis Satanás? b) ¿Kenon uelis tikxikoskej?

¹⁴ Aman matikitakan kenon Satanás techixnamiki pampa xkineki matiyolmelaujkanemikan itech Jehová. Se neskayotl, uelis kitekitiltis ikojtilis niman kichiuas ika tekiuajkej maka sa matechkauilikan matitenojnotsakan. Noijki ijkon, uelis kichiuas ika akin imiuan titekitij noso tomachtiaj matechpijpinaujtikan pampa tiknekij toyekanaskej ijkon ken toTajtsin technauatia (1 Ped. 4:4). Noijki uelis kichiuas ika tochanejkauan matechijlikan maka matiakan tlanechikoltin, maski kanaj kinemiliaj ika ijkon techpaleuijtokej (Mat. 10:36). ¿Kenon uelis tikxikoskej nochi yejuin? Kachtopa, noneki matikasikamatikan ika yejuin panos, pampa Satanás nochipa techixnamiktika (Apoc. 2:10; 12:17). Ika ome, maka matijkauilikan ika yejuin tlaueltin makichiua matikilkauakan tlen ueyi kijtosneki: ika Satanás kijtoua ika san tiktekichiuiliaj toTajtsin ijkuak techpaleuiya niman ika tijkauaskej ijkuak tikixnamikiskej tlen ouijtika (Job 1:9-11; 2:4, 5). Niman, ika yeyi, matiktlajtlanilikan Jehová matechmaka kojtilistli niman ijkon titlaxikoskej. Matikilnamikikan ika yejua xkeman techkauas (Heb. 13:5).

15. ¿Uelis texchiualtis Satanás matikchiuakan itlaj tlen xtiknekij? Xkijto tleka ijkon titlanankilia.

¹⁵ Satanás xuelis texchiualtis matikchiuakan itlaj tlen xtiknekij tikchiuaskej (Sant. 1:14). Miyekej tlaltikpakchanejkej xkitaj ika kichiuaj tlen Satanás kineki. San ika, ijkuak kixmatij tlen melauak, noneki kitlapejpeniskej akinon kitekichiuiliskej (Hech. 3:17; 17:30). Tla kuajli yotikijtokej tiktlakamatiskej toTajtsin, kuakon Satanás xuelis kichiuas maka sa matiyolmelaujkanemikan (Job 2:3; 27:5).

16, 17. a) ¿Tlenon okseki tlemach xuelij kichiuaj Satanás niman xkuakualtin espíritus? b) ¿Tleka xkipiya ika techmojtis matechkakikan ijkuak tikchiuaskej teoyotl?

¹⁶ Onka okseki tlemach tlen Satanás niman xkuakualtin espíritus xuelij kichiuaj. Xnemili yejuin, Biblia xkanaj kijtoua tla uelij kitaj tlenon tikpiyaj ipan totlamachilis noso ipan toyojlo. San Jehová niman Jesús uelij kichiuaj yejuin (1 Sam. 16:7; Mar. 2:8). San ika ¿tlenon panoua ijkuak titlajtouaj noso techkakij ijkuak tikchiuaj teoyotl? ¿Noneki techmojtis ika Diablo niman xkuakualtin espíritus makikakikan tlenon tikijtouaj niman makitekitiltikan yejon ijkuak techixnamikiskej? Ka. Ijkon ken xtechmojtia ika Diablo makita ika tiktekichiuiliaj Jehová, noijki xkipiya techmojtis matechkaki ijkuak tikchiuaskej teoyotl. Niman Biblia kinteneua seki itekipanojkauan toTajtsin akin okinkakej ijkuak okichiujkej teoyotl, niman xkanaj nesi tla kinmojtiaya ika Satanás makinkaki (1 Rey. 8:22, 23; Juan 11:41, 42; Hech. 4:23, 24). Tla tikchiuaj nochi tlen tiuelij niman ijkon titlajtoskej niman tikchiuaskej ken Jehová kineki, uelis tikmatstoskej ika Jehová xkeman kikauilis ika Diablo matexchiuili itlaj tlen xuelis noyektlalis (xpoua Salmo 34:7). *

¹⁷ Noneki tikixmatiskej totlauelikniuj, san ika, xkipiya ika melak tikmakasiskej. Niman maski titlajtlakolejkej, uelis tiktlaniskej pampa Jehová techpaleuiya (1 Juan 2:14). Tla tikmapeuaj noso xtokauiliaj matechyekana Diablo, yejua techtlalkauis (Sant. 4:7; 1 Ped. 5:9). Nesi, ika yejua melak kuelita kimixnamikis telpokamej. ¿Tlenon uelis kichiuaskej yejuamej niman ijkon yolmelaujkanemiskej ijkuak kimixnamikis Diablo? Tiknankiliskej yejuin tlajtoltilistli ipan okse tlamachtijli.