1. ¿Tlenon techmachtia iTlajtol toTajtsin?

JEHOVÁ yejua toUeyi Tlamachtijkauj. Ika yejon, uelis tikixnamikiskej maski san katlejua tlauejli pampa yejua techpaleuis (Is. 30:20, 21). ITlajtol toTajtsin techmachtia kenon uelis toyektlalijtiaskej niman ijkon tikchiuaskej nochi tlen kuajli (2 Tim. 3:17). Ijkuak tikchiuaj tlen kijtoua Biblia, tochiuaj más tlamachilisejkej xijkon ken akin noyekanaj ika “tlamatkilistli yejuan kisa ipan in tlaltikpaktli” (1 Cor. 3:19; Sal. 119:97-100).

2. ¿Tlenon tikitaskej ipan yejuin tlamachtijli?

² Ken tikitaskej, tlamachilistli tlen kisa ipan yejuin tlaltikpaktli kichiua matiknekikan matikchiuakan tlen kileuiya totlalnakayo. Kuakon, kanaj ouijtika tikitaj xtitlanemiliskej noso xtikchiuaskej ken akin xkitekichiuiliaj Jehová. Ika yejon, Biblia techijlia: “Xmotakan sano nemejuamej. Maka yakaj xkauilikan mechkajkayaua  ika on xkuajli temachtilistli tlen xmelauak. On ken on tlajtlamach temachtilistli, san intemachtil niman incostumbre on tlaltikpaktlakamej” (Col. 2:8). Ipan yejuin tlamachtijli tikitaskej kenon opeuj noneltoka ome tlanemilijli tlen ualeuaj itech Satanás. Tikitaskej tleka tlamachilistli tlen kisa ipan yejuin tlaltikpaktli melak xkuajli niman tleka tlamachilistli tlen kipiya Biblia yejon tlen melak kuajli.

3, 4. ¿Tlenon onopatlak ne Estados Unidos ijkuak opeuj siglo veinte?

³ Ijkuak opeuj siglo veinte, ne Estados Unidos opeuj nopatla ken noitaya sexo. Kachtopa, miyekej kinemiliayaj ika san ueliskiaj notekaskiaj akin yononamiktijkej niman xkipiaya ika titlajtos itech sexo. San ika, opeuj nopatla ken tlanemiliayaj niman okitekauilijkej manochiua tlen kachtopa kimapeuayaj.

 ⁴ Kanaj ipan xiuitl 1920 melak miyek tlemach onopatlak. Se ixtlamatki okijto ika melak opeuj nopanoltia auilnemilistli ipan películas, obras de teatro, tlakuikaltin, amoxtin niman ipan okseki amamej. Ken opeujkej nijtotiaj kichiuaya ika oksekimej makipiyakan xkuajli ileuilistli. Niman noijki opeujkej melak xkuajli notlakentiaj. Ijkon ken yokijtoka Biblia, ipan itlamiyan tonaltin miyekej sajnoye kinekiskiaj nopaktiskej (2 Tim. 3:4).

5. Itech xiuitl 1960 ika tlayekapan, ¿kenon yonopatlak intlamachilis akin xkitekichiuiliaj Jehová?

⁵ Itech xiuitl 1960 ika tlayekapan, miyekej xok kitayaj tla xkuajli katka ijkuak sekimej san sekan chantiyaj maski xinonamiktiayaj. Miyekej opeujkej kitaj ika xtlajtlakojli katka tla se tlakatl notekaya iuan okse tlakatl, noso tla se siuatl notekaya iuan okse siuatl. Noijki, xok kitayaj tla xkuajli katka tijkauas moixnamik san ika itlaj tlen xueyi kijtosnekiya. Tlen ika noyolpaktiayaj opeuj melak kiteititia sexo. ¿Kenon yotlamito nochi yejuin? Se akin kimijkuiloua amoxtin okijto ika panoua miyek tlen xkuajli ijkuak xok notlakamatij tlanauatiltin tlen techpaleuiyaj kuajli matinemikan. San xkonnemili yejuin, miyekej akin yononamiktijkej xsan sekan chantij noso san nantli noso san tajtli kimiskaltia inkoneuan. Miyekej melak xika inyojlo nemij niman miyekej xuelij kikajkauaj kitaj pornografía. Tikitaj ika melak miyek onka kokolistli pampa auilnemilo, ken sida, niman yejuin techititia ika tlamachilistli tlen kisa ipan tlaltikpaktli melak xkuajli (2 Ped. 2:19).

6. ¿Tleka Satanás xkineki matikintlakamatikan tlanauatiltin tlen techpaleuiyaj kuajli matinemikan?

⁶ Satanás xkineki matikintlakamatikan tlanauatiltin tlen techpaleuiyaj kuajli matinemikan. Kuajli tikmatij ika melak kipaktia kitas ika miyekej san kauilmatij sexo niman namiktilistli, tlen toTajtsin yotechtlayokoli (Efes. 2:2). ToTajtsin otechteochiuj niman ijkon matikinpiyakan tokoneuan, san ika, akin auilnemij xkitlakaitaj yejuin tlateochiualistli. Niman pampa ijkon kichiuaj, kanaj xkipiyaskej nemilistli tlen xkeman tlamis (1 Cor. 6:9, 10).

7, 8. ¿Tleka más kuajli tlen kijtoua Biblia itech sexo xijkon ken tlen kijtouaj akin xkitekichiuiliaj Jehová?

⁷ Akin noyekanaj ika tlamachilistli tlen kisa ipan yejuin tlaltikpaktli melak kipijpinaujtiaj tlen tenauatia Biblia, niman noijki kijtouaj ika xakaj uelis kichiuas tlen ompa ijkuiliujtika. Kanaj kijtouaj: “Tla Totajtsin otexchijchiuj niman ijkon matiknekikan totekaskej  iuan yakaj, ¿tleka kijtoua ika noneki matikteltikan toileuilis?”. Yejuamej ijkon kijtouaj pampa kinemiliaj ika noneki tikchiuaskej nochi tlen tikileuiyaj. San ika, Biblia xijkon temachtia. Ompa kijtoua ika xkipiya ika tikchiuaskej nochi tlen tikileuiskej. Techmachtia ika nochimej ueliskej kipopoloskej xkuajkualtin ileuilistin (Col. 3:5). Niman xsan yejon, Jehová kijtoua ika se uelis nonamiktis niman ijkon uelis notekas iuan ixnamik, ijkon omemej nopaktiskej ken kinamiki (1 Cor. 7:8, 9). Ijkuak ijkin nochiua, se teueuentsin niman isiuauj uelij notekaj niman xitlaj kinmajmana. Kema, xnotekipachojtokej ken akin auilnemij.

⁸ Biblia xijkon temachtia ken kijtouaj akin xkitekichiuiliaj Jehová. Biblia techmachtia kenon kinamiki matikitakan sexo. Ompa kijtoua ika melak tepakti ijkuak se noteka iuan ixnamik (Prov. 5:18, 19). San ika, noijki kijtoua: “Cada se ma kimati kenijki kipiyas isiuau ikan chipaualistli niman ikan tetlakaitalistli. Niman maka sanoyej xpiyakan on xkuajli eleuilistli ijkon ken kichiuaj on tlakamej” (1 Tes. 4:4, 5).

9. a) ¿Kenon okinpaleuijkej tokniuan akin onenkej ijkuak opeuj siglo veinte makichiuakan tlen kijtoua Biblia? b) ¿Tlenon techmachtia 1 Juan 2:15, 16? c) Ken kijtoua Romanos 1:24-27, ¿tlenon xkipiya ika tikchiuaskej?

⁹ Ijkuak opeuj siglo veinte, tokniuan xokinokauilijkej makinkajkayauakan akin kichiuayaj tlen tepinajti (Efes. 4:19). Tokniuan melak onokojtilijkej kitlakamatiskej itlanauatiluan toTajtsin. Ipan amatlajkuilojli Watch Tower 15 de mayo de 1926, ikalpan toTajtsin okijkuilo ika tlakamej niman siuamej xkipiaya ika kinemiliskej nion kichiuaskej tlen tsokuiltik, niman melak nonekiya ika tlakamej chipauak manouikakan imiuan siuamej, niman siuamej chipauak manouikakan imiuan tlakamej. Maski melak nopatlatoya intlamachilis akin xkitekichiuiliayaj Jehová, tokniuan nochipa okichiujkej tlen kijtoua Biblia (xpoua 1 Juan 2:15, 16). ¡Melak tiktlasojkamatij ika tikpiyaj iTlajtol toTajtsin! Noijki tiktlasojkamachiliaj Jehová ika itechkopa ikalpan techijlia tlen techpaleuis niman ijkon maka matikitakan sexo ken kitaj akin xkitekichiuiliaj Jehová * (xpoua Romanos 1:24-27).

10, 11. ¿Tlenon okijto Biblia ika panoskia itlamiyan tonaltin?

¹⁰ Biblia okijto ika itlamiyan tonaltin miyekej “notlajsojtlaskej sano yejuamej” (2 Tim. 3:1, 2). Xtechmojkatlachialtia ika miyekej kinyolchikauaj oksekimej sa no yejuamej manotlasojtlakan. Se enciclopedia kijtoua ika kanaj ipan xiuitl 1970 ika tlayekapan, melak miyek okinkixtijkej amoxtin tlen tlajtouaj itech kenon se uelis kuajli nomachilis. Seki amoxtin kiteijliayaj ika se nonekiya noixmatis, pakis ken nemi niman ika xnonekiya nopatlas. Se amoxtli teijlia ika sa no tejua xmotlasojtla, pampa xakaj nemi akin sajnoye makualtsin, akin melak mateyolpakti niman akin makipatiojkaitakan ken tejua. Yejuin amoxtli kijtoua ika toseselti noneki tikitaskej kenon tinemiskej niman ika noneki tikchiuaskej tlen tejuamej tikmachiliskej ika kuajli niman ika tepaleui.

¹¹ ¿Xmelak ika yotikajkaj yejuin? Satanás okijli Eva noijki ijkon makichiua. Okijli ika yejua ueliskia nochiuas ken toTajtsin niman ika kasikamatiskia “on tlen kuajli niman on tlen xkuajli” (Gén. 3:5). Ipan yejuin tonajli, miyekej kinemiliaj ika uejueyixtokej niman ika xakaj, nion toTajtsin, uelis kimijlis tlenon kuajli niman tlenon xkuajli. Yejuin noijki yokichiuj ika manopatla ken miyekej kitaj namiktilistli.

12. ¿Kenon kitaj namiktilistli akin xkitekichiuiliaj Jehová?

 ¹² Biblia kimijlia akin yononamiktijkej ika noneki notlakaitaskej niman kichiuaskej tlen onoijlikej ijkuak ononamiktijkej. Kimilnamiktia ika kipiya ika nokojtiliskej nochipa san sekan nemiskej. Ika yejon, Biblia kijtoua: “Sen tlakatl kikaua itataj niman inanaj para nosentlalia san sekan iuan isiuauj, niman on omemej nochiuaj san se” (Gén. 2:24). Akin noyekanaj ika tlamachilistli tlen kisa ipan yejuin tlaltikpaktli xijkon kinemiliaj. Yejuamej kijtouaj ika inseselti noneki kichiuaskej tlen yejuamej kinekiskej. Se amoxtli tlen tlajtoua itech divorcio kijtoua ika ijkuak nonamiktilo, miyekej xok kijtouaj “san sekan tinemiskej hasta ijkuak timikiskej”, aman kijtouaj “san sekan tinemiskej hasta ijkuak xok totlasojtlaskej”. Miyekej kinemiliaj ika xnoneki nochipa tinemis iuan moixnamik. Yejuin yokichiuj ika miyekej manokauakan niman manoyolkokokan. Tikitaj ika melak xkuajli ken kitaj namiktilistli akin noyekanaj ika tlamachilistli tlen kisa ipan yejuin tlaltikpaktli.

13. ¿Tleka Jehová xkimijyouiya akin noueyimatij?

¹³ Biblia kijtoua: “ToTEKO xkinmijyouiya on yejuan noueyimatij” (Prov. 16:5). ¿Tleka Jehová xkimijyouiya akin noueyimatij? Matikitakan se. Akin noueyimatij kiteititiaj ika tlanemiliaj ken Satanás, akin nomati melak ueyixtok. San matikonnemilikan yejuin, Satanás kineltokaya ika Jesús, akin okipaleuijka Jehová ijkuak nochi okichijchiuj, nonekiya ixpan notlakuantelketsas niman kiueyichiuas (Mat. 4:8, 9; Col. 1:15, 16). Ijkuak tikitaj kenon miyekej noueyimatij, más kuajli tikasikamatij tleka toTajtsin kita ika tlamachilistli tlen kisa ipan yejuin tlaltikpaktli melak xkuajli.

14. ¿Kenon techpaleuiya Romanos 12:3 matoitakan ken kinamiki?

¹⁴ Biblia techpaleuiya matoitakan niman matotlasojtlakan ken kinamiki. Jesús okijto: “Xkintlajsojtla oksekimej ken tejua timotlajsojtla” (Mat. 19:19). Yejuin techititia ika kema noneki matikitakan tlen tejuamej  techpoloua san ken kinamiki. San ika, Biblia xtechmachtia ika kipiya ika tiknemiliskej ika más tiuejueyixtokej xijkon ken oksekimej. Biblia kijtoua: “Maka itlaj xchiuakan ikan nexikojli nion maka nenkinekiskej nemoueyimatiskej, yej ikan yolyemanilistli xmomatikan ika oksekimej más uejueyixtokej xken nemejuamej” (Filip. 2:3; xpoua Romanos 12:3).

15. ¿Tleka tiknemilia ika tepaleui tlen kijtoua Biblia itech timoueyimatis?

¹⁵ Miyekej akin kimitaj ika tlamachilisejkej ipan yejuin tlaltikpaktli melak kipijpinaujtiaj tlen kijtoua Biblia itech timoueyimatis. Kijtouaj ika tla tiknemiliaj ika oksekimej más uejueyixtokej xken tejuamej, kuakon, texchiuiliskej ken kinekiskej. San ika ¿yemelak yejon?, ¿kenon yotlamitoj akin noueyimatij ken Satanás? ¿Tikitaj ika yolpakij? ¿Yolpakij imiuan inchanejkauan? ¿Nouikaj imiuan akin yemelak kintlasojtlaj? ¿Kuajli nouikaj iuan toTajtsin? ¿Katlejua tikitaj más tepaleui: tlamachilistli tlen kisa ipan yejuin tlaltikpaktli, noso tlamachilistli tlen onka ipan iTlajtol toTajtsin?

16, 17. ¿Tlenon melak techyolpaktia, niman tleka?

¹⁶ Melak xkuajli onkisaj akin kichiuaj tlen kijtouaj “tlamachilisejkej” ipan yejuin tlaltikpaktli. Yejuamej yeskiaj kentla se pajxalojketl akin yopoliuj niman kitlajtoltia okse pajxalojketl akin noijki yopoliuj. Matikitakan kenon Jesús kimitaya akin yeuejkaui noijki kimitayaj ken “tlamachilisejkej”, yejua okijto: “Yejuamej ken on ciegos yejuan kinyekanaj oksekimej ciegos. Tla sen ciego kiyekanas okse ciego, nochimej on omemej onxiniskej ne kampa uejkatlan” (Mat. 15:14). Yemelak tej, toTajtsin kita ika tlamachilistli tlen kisa ipan yejuin tlaltikpaktli, melak xkuajli.

¹⁷ Tlen kijtoua Biblia nochipa “techmachtia on tlen melauak, techchikajkanotsa, kiyektlalia on tlen xkuajli, niman temachtia kenijki onyas sen nemilistli melajki” (2 Tim. 3:16). Melak tiyolpakij ika itechkopa ikalpan, Jehová techpaleuiya maka matitlanemilikan ken akin xkitekichiuiliaj (Efes. 4:14). ToTajtsin melak kuajli techmachtijtika niman yejon techpaleuiya nochipa matiktlakamatikan itlanauatiluan. Tipakij ika toTajtsin Jehová techyekana ika tlamachilistli tlen onka ipan iTlajtol.