1. ¿Tlenon ome tlemach kuajli tikmatstokej?

JEHOVÁ kintlasojtla akin kitekichiuiliaj. Nochipa yokintlasojtlak niman nochipa kintlasojtlas. Yejua noijki kitlasojtla melajkayotl (Sal. 33:5). Kuakon, kuajli tikmatstokej ome tlemach. Kachtopa, ika yejua kiyolkokoua ijkuak itekipanojkauan inpan nochiua tlen xkinamiki. Niman, ika ome, ika yejua kichiuas tlen melajki. Ipan parte 1, * otikitakej ika Tlanauatijli tlen toTajtsin okimakak ikalpan Israel kiteititiaya tlasojtlalistli niman melajkayotl, niman melak kinpaleuiaya akin tlajyouiayaj (Deut. 10:18). Yejuin Tlanauatijli kiteititia kenon Jehová melak kintlasojtla akin kitekichiuiliaj.

2. ¿Tlenon tiknankiliskej?

² ITlanauatil Moisés otlan ipan xiuitl 33, ijkuak opeuj tlanechikojli. ¿Kijtosnekiya ika akin opeuj kichiuaj ken Cristo xkipiyaskiaj se tlanauatijli tlen makiteititi tlasojtlalistli niman melajkayotl? Ka, xyejon kijtosnekiya. Tokniuan kipiayaj se yenkuik tlanauatijli. Ipan yejuin tlamachtijli, kachtopa tikitaskej katlejua yejon yenkuik tlanauatijli niman sakin tikinnankiliskej yejuin: ¿Tleka tikijtouaj ika yejuin tlanauatijli noyekana ika tlasojtlalistli niman ika kiteititia melajkayotl? Niman, ¿kenon kipiya ika teitaskej akin tlayekanaj tla kinekij kitlakamatiskej itlanauatil Cristo?

3. ¿Tlenon kijtosneki “itlanauatil Cristo”tlen noteneua ipan Gálatas 6:2?

³ (Xpoua Gálatas 6:2). Akin tiktekichiuiliaj toTajtsin tiktlakamatij “itlanauatil Cristo”. Jesús xokimijkuilouili  inomachtijkauan tlanauatiltin tlen nonekiya kichiuaskej, san ika, kema okinnojnots niman okimijli kenon noyekanaskiaj. “Itlanauatil Cristo” kijtosneki nochi tlen Jesús otemachti niman otenauatij. Tla tiknekij kuajli tikasikamatiskej, matikinnankilikan seki tlajtoltilistin.

4, 5. ¿Kenon otemachti Jesús, niman kemanon otemachti?

⁴ ¿Kenon otechmachti Jesús? Kachtopa, ika tlen kijtouaya. Yejua temachtiaya tlen melauak itech toTajtsin, okiteititi tleka tinemij niman otemachti ika san iTekiuajyo toTajtsin uelis kiyektlalis tlen techtlajyouiltia, ika yejon, tlen kijtouaya kipiaya kojtilistli (Luc. 24:19). Jesús noijki otemachti ika tlen okichiuj. Okimititi inomachtijkauan kenon kipiya ika nemiskej (Juan 13:15).

⁵ ¿Kemanon otemachti Jesús? Ijkuak otenojnotstinen ipan tlaltikpaktli (Mat. 4:23). Noijki okinmachti inomachtijkauan sakin ika oyoliujka. Matikilnamikikan ika ouajnonexti imixpan kanaj 500 inomachtijkauan niman okiminauati matemachtikan (Mat. 28:19, 20; 1 Cor. 15:6). Pampa Jesús yejua akin kiyekana tlanechikojli, okinmachti inomachtijkauan maski yonokuepka ne iluikak. Xkita yejuin, kanaj ipan xiuitl 96, itechkopa apóstol Juan okinyolchikauj tokniuan tlapejpeniltin niman noijki okinnojnots (Col. 1:18; Apoc. 1:1).

6, 7. a) ¿Kanon onka tlen Jesús otemachti? b) ¿Tlenon kipiya ika tikchiuaskej niman ijkon tiktlakamatiskej itlanauatil Cristo?

⁶ ¿Kanon onka tlen Jesús otemachti? Naui Evangelios kijtouaj miyek tlen Jesús okichiuj niman tlen okijto ipan tlaltikpaktli. Niman okseki tlen onka ipan Tlajkuiloltin ika Griego techpaleuiyaj kuajli matikasikamatikan kenon tlanemiliaya Jesús, pampa akin otlajkuilojkej onoyekankej ika espíritu santo niman tlanemiliayaj ken Cristo (1 Cor. 2:16).

⁷ Tlen techmachtia: Tlen Jesús otechmachti techpaleuiya ipan tonemilis. Techpaleuiya ipan tlen tikchiuaj tochan, ipan totekiyo noso kampa tomachtiaj, niman ipan totlanechikol. Tikasikamatij tlenon kijtoua yejuin tlanauatijli ijkuak tikpouaj  Tlajkuiloltin ika Griego niman ijkuak titlanemiliaj itech. Tiktlakamatij itlanauatil Cristo ijkuak tikchiuaj tlen otenajnauati Jesús niman tlen okijto, niman nochi yejuin onka ipan yejuin Tlajkuiloltin. Ijkuak tiktlakamatij itlanauatil Cristo, tiktlakamatij toTajtsin Jehová, pampa tlen Jesús otemachti ualeua itech toTajtsin (Juan 8:28).

8. ¿Ika tlenon noyekana itlanauatil Cristo?

⁸ Melak kuajli nomachiliaj akin chantij ipan se kajli tlen kuajli tlachijchiujtli niman kuajli itsintepanuan. Noijki ijkon nomachiliaj akin kitlakamatij se kuajli tlanauatijli tlen kuajli okichijchiujkej. Itlanauatil Cristo melak kuajli tlachijchiujtli pampa noyekana ika tlasojtlalistli. ¿Tleka ijkon tikijtouaj?

9, 10. a) ¿Tlenon kiteititia ika Jesús nochipa otetlasojtlak? b) ¿Kenon noijki uelis ijkon tikchiuaskej?

⁹ Kachtopa, pampa Jesús okiteititi ika tetlasojtla. Jesús otemachti, otepajti, otetlakualti niman oteyoliti, yejua okichiuj yejon pampa teikneliaya, niman iteiknelilis ualeuaya itech itetlasojtlalis (Mat. 14:14; 15:32-38; Mar. 6:34; Luc. 7:11-15). Yemelak ika nochi tlen kichiuaya kikuiliaya miyek tiempo niman chikaualistli. San ika, yejua nochipa tepaleuiaya niman ika iyojlo kichiuaya. Niman xsan yejon, yejua okiteititi ika melak tetlasojtlaya pampa okitemakak inemilis inpampa oksekimej (Juan 15:13).

¹⁰ Tlen techmachtia: Uelis tikchiuaskej ken Jesús tla tikinpaleuiyaj oksekimej. Noijki uelis tikchiuaskej ken yejua tla tikimikneliaj akin tikinnojnotsaj, yejon kichiuas matikinnojnotsakan itech iTekiuajyo toTajtsin. Tla ijkon tikchiuaj, tiktlakamatstoskej itlanauatil Cristo.

11, 12. a) ¿Tleka tikmatij ika Jehová melak kineki techpaleuis? b) ¿Kenon noijki uelis tikchiuaskej ken Jehová?

¹¹ Ika ome, pampa Jesús okiteasikamachilti ika iTaj tetlasojtla. Ijkuak otenojnotstinen, okiteititi ika Jehová melak kineki kinpaleuis itekipanojkauan. Jesús otemachti ika toTajtsin tinochimej techpatiojkaita (Mat. 10:31). Noijki, okiteasikamachilti ika Jehová kineki ika ikoneuan manoyolkuepakan niman noijki manokuepakan tlanechikojli niman ijkon kinselis ika tlasojtlalistli (Luc. 15:7, 10). Niman okijto ika toTajtsin okiteititi ika techtlasojtla pampa okitemakak iKoneuj niman ijkon techmakixtis (Juan 3:16).

¹² Tlen techmachtia: ¿Kenon noijki uelis tikchiuaskej ken Jehová? (Efes. 5:1, 2). Tla tikinpatiojkaitaj tokniuan niman tla tikinseliaj ika tlasojtlalistli akin uajnokuepaj itech Jehová (Sal. 119:176). Tikteititiaj ika tikintlasojtlaj tokniuan tla tikinpaleuiyaj ijkuak kixnamikij tlen ouijtika (1 Juan 3:17). Ijkuak tikintlasojtlaj oksekimej, tiktlakamatij itlanauatil Cristo.

13, 14. a) ¿Tlen tlanauatijli nesi ipan Juan 13:34, 35, niman tleka yenkuik? b) ¿Kenon tiktlakamatij yejuin yenkuik tlanauatijli?

¹³ Ika yeyi, pampa Jesús okinnauati inomachtijkauan matetlasojtlakan ken yejua okichiuj (xpoua Juan 13:34, 35). Yejuin tlanauatijli yenkuik, pampa xonkatka ipan Tlanauatijli tlen toTajtsin okimakak ikalpan Israel. Jesús okijto ika noneki tikintlasojtlaskej tokniuan ijkon ken yejua otechtlasojtlak. Noneki más tikintlasojtlaskej xken tejuamej totlasojtlaj, hasta tiknekiskej tiktemakaskej tonemilis inpampa, ijkon ken Jesús okichiuj.

¹⁴ Tlen techmachtia: ¿Kenon tiktlakamatij yejuin yenkuik tlanauatijli? Ijkuak tikchiuaj itlaj inpampa tokniuan. Xsan tiknekij tiktemakaskej tonemilis inpampa,  noijki tiknekij tikinpaleuiskej kampa nonekis. Matiknemilikan yejuin, uelis tikchiuaskej itlaj niman ijkon tikuikaskej se tokniuj ipan tlanechikojli, uelis tijkauaskej itlaj tlen tikuelitayaj niman ijkon tikyolpaktiskej yakaj akin tiktlasojtlaj. Noso uelis tijkuiskej tovacaciones niman ijkon titlapaleuiskej kampa tlaixpoliui. Ijkuak tikchiuaj yejuin, tiktlakamatij itlanauatil Cristo niman titlapaleuiyaj ika ipan totlanechikol tinochimej kuajli matomachilikan.

15-17. a) ¿Kenon Jesús okiteititi imelajkayo? b) ¿Kenon noijki uelis tikchiuaskej ken Jesús?

¹⁵ Ipan Biblia, melajkayotl kijtosneki tikchiuas tlen toTajtsin kijtoua ika kuajli niman xsan tiktlapejpenis katlejua tikchiuas. ¿Tleka tikijtouaj ika itlanauatil Cristo kiteititia melajkayotl?

¹⁶ Kachtopa, matikitakan kenon Jesús okiteititi imelajkayo. Ijkuak yejua onen ipan tlaltikpaktli, judíos akin tlanauatiayaj ipan tlaneltokiltin kintlauelitayaj akin oksekan ualeuayaj, akin xuejueyixtoyaj niman xkintlakaitayaj siuamej. San ika, Jesús xotechikoitak, yejua nochimej san noijki kimitaya. Okinseli akin itech tlaneltokayaj maski oksekan ualeuayaj (Mat. 8:5-10, 13). Nochimej okinnojnots, akin kipiayaj tomin niman akin xkipiayaj (Mat. 11:5; Luc. 19:2, 9). Jesús nochipa okinpatiojkaitak siuamej, kuajli kiminotsaya niman kintlakaitaya, niman noijki ijkon okintlasojtlak akin miyekej kintlauelitayaj (Luc. 7:37-39, 44-50).

¹⁷ Tlen techmachtia: Uelis noijki tikchiuaskej ken Jesús tla xtitechikoitaj niman tla tikinnojnotsaj nochimej akin kinekij techkakiskej. Maka matikitakan kanon ualeuaj noso tla okse tlamantik tlaneltokaj. Tokniuan tlakamej kichiuaj ken Jesús ijkuak kintlakaitaj siuamej. Ijkuak ijkon tikchiuaj, tiktlakamatij itlanauatil Cristo.

18, 19. ¿Tlenon otemachti Jesús itech melajkayotl, niman tlenon tiuelij itech tlen otemachti?

¹⁸ Ika ome, matikitakan tlen okijto Jesús itech melajkayotl. Okimititi inomachtijkauan tlen kinpaleuiskia makinchiuilikan oksekimej tlen melajki. Matitlanemilikan itech tlen okijto Jesús, tlen kixmatij ken Regla de Oro (Mat. 7:12). Tinochimej tiknekij matexchiuilikan tlen kuajli, kuakon, tejuamej noijki noneki ijkon tikinchiuiliskej oksekimej. ¿Tlenon panos tla ijkon tikchiuaj? Oksekimej noijki kinekiskej texchiuiliskej tlen kuajli. Niman ¿tla yotexchiuilijkej tlen xkuajli noso tlen xkinamiki? Jesús noijki okinmachti inomachtijkauan makineltokakan ika Jehová kinchiuilis tlen kinamiki akin “ikan tonajli niman yeuajli itech noueyikatsajtsilijtokej” (Luc. 18:6, 7). Yejuin tlen techijlitika toTajtsin akin melajki: yejua kimati tlen tikixnamiktokej ipan yejuin sa itlamiyan tonaltin, niman yejua kichiuas ika matexchiuilikan tlen melajki ijkuak yejua kitas ika nonekis (2 Tes. 1:6).

¹⁹ Tlen techmachtia: Tla tikchiuaj tlen Jesús otemachti, tikinchiuiliskej oksekimej ijkon ken kinamiki. Niman, tla ipan tlaltikpaktli tlen kiyekana Satanás yotexchiuilijkej itlaj tlen xkinamiki, techyolseuiya tikmatiskej ika Jehová kichiuas matexchiuilikan tlen kinamiki.

20, 21. a) ¿Kenon kipiya ika tetlakaitaskej akin tlayekanaj? b) ¿Kenon teueuentsitsinuan kiteititiaj ika tetlasojtlaj? c) ¿Kenon tatajtin kipiya ika kintlakaitaskej inkoneuan?

²⁰ Ken yotikitakej, itlanauatil Cristo noyekana ika tlasojtlalistli. Ika yejon, ipampa  yejuin tlanauatijli, akin tlayekanaj kipiya ika kintlasojtlaskej oksekimej. Kipiya ika kilnamikiskej ika Jesús kichia ika nochipa matitetlasojtlakan.

²¹ Imiuan tochanejkauan. Teueuentsitsinuan kipiya ika kintlasojtlaskej insiuauan ijkon ken Jesús okitlasojtlak tlanechikojli (Efes. 5:25, 28, 29). Kiteititiaj ika tetlasojtlaj ken Jesús ijkuak kinmakaj insiuauan tlen kinpoloua niman tlen kinekij, niman noijki ijkuak achtopa tlanemiliaj inpampa imixnamik. Sekimej tlakamej xuelij kichiuaj yejuin pampa kampa onoskaltijkej xtetlasojtlaj nion xkitechiuiliaj tlen kinamiki. Maski kimachiliskej ouijtika kikauaskej tlen yonomatkej kichiuaj, noneki nopatlaskej tla kinekij kitlakamatiskej itlanauatil Cristo. Teueuentsitsinuan akin ijkon tetlasojtlaj kinotlaniliaj ika insiuauan makintlakaitakan. Niman tatajtin akin yemelak kintlasojtlaj inkoneuan xkeman kinchiuiliskej tlen xkuajli nion xkimijliskej tlen kinyolkokos (Efes. 4:31). Tatajtin noneki kimititiskej inkoneuan ika kintlasojtlaj niman ika pakij inpampa. Ijkon, kokonej kintlasojtlaskej intajuan niman intech tlaneltokaskej.

22. Ken kijtoua 1 Pedro 5:1-3, ¿akinon inyaxka borreguitos, niman kenon kipiya ika kintlakaitaskej?

²² Ipan tlanechikojli. Tlayekankej kipiya ika kilnamikiskej ika borreguitos xinyaxkauan (Juan 10:16; xpoua 1 Pedro 5:1-3). Biblia kijtoua ika yejuamej “iborreguitos” toTajtsin niman ika yokinmaktilij tlayekankej niman ijkon makintlajpiyakan, yejuin tlen noneki kilnamikiskej tlayekankej. Niman Jehová kineki makintlasojtlakan iborreguitos (1 Tes. 2:7, 8). ¿Tlenon panoua ijkuak tlayekankej kuajli kintlajpiyaj borreguitos? Jehová kinselia niman tokniuan kintlakaitaj.

23, 24. a) ¿Tlenon kipiya ika kichiuaskej tlayekankej ijkuak nochiua se tlajtlakojli? b) Ijkuak ijkon panoua, ¿tlenon kipiya ika kitaskej tlayekankej?

 ²³ Tlanauatijli tlen toTajtsin okinmakak israelitas kijtouaya ika jueces niman tlayekankej kitaskiaj kenon se kiueyichiujtoya toTajtsin, noijki kitaskiaj tlen panouaya ipan kalpan niman tlen xkuajli nochiuaya. San ika, itlanauatil Cristo kimititia tlayekankej ika xok yejon intekiyo. Ijkuak nochiua itlaj tlen xkuajli, tlayekankej san kitaj kenon se kiueyichiujtika toTajtsin. Kasikamatij ika toTajtsin yokinkauili tekiuajkej makitakan tlen nochiua ipan tlaltikpaktli. Ika yejon, tekiuajkej uelij kinchiualtiaj matlatlaxtlauakan akin kichiuaj tlen xkuajli noso uelij tetsakuaj (Rom. 13:1-4).

²⁴ Kuakon, ¿tlenon kichiuaj tlayekankej ijkuak nochiua se ueyi tlajtlakojli? Kikuij Biblia niman ijkon kimatiskej tlenon kichiuaskej. Xkilkauaj ika itlanauatil Cristo noyekana ika tlasojtlalistli. Yejuin kualneskayotl kinpaleuiya tlayekankej makimatikan kenon kipaleuiskej akin yokichiuilijkej tlen xkuajli. Niman tlasojtlalistli noijki kinpaleuiya makimatikan tla yonoyolkuep akin okichiuj tlajtlakojli niman tla uelis kipaleuiskej oksejpa manouika iuan toTajtsin.

25. ¿Tlenon tikitaskej ipan okse tlamachtijli?

²⁵ Melak tipakij ika aman techyekana itlanauatil Cristo. Ijkuak tinochimej tokojtiliaj tiktlakamatiskej, titlapaleuiyaj ika nochimej ipan tlanechikojli kuajli manomachilikan niman makimachilikan ika tikintlasojtlaj niman tikinpatiojkaitaj. San ika, tinemij ipan se tlaltikpaktli kampa tlakamej melak xkuajkualtin niman melak ijtlakaujtiuej (2 Tim. 3:13). Kuakon, noneki nochipa totlajpiyaskej. ¿Kenon tlanechikojli kiteititia imelajkayo toTajtsin ijkuak yakaj kinajnauiltia se konetl? Ipan okse tlamachtijli tiknankiliskej yejuin.