1. ¿Tlenon otechijlijkej ipan reunión anual tlen onopanolti ipan 2023?

 ¡MELAK kualtsin katka reunión anual tlen onopanolti ipan 2023! a Ipan yejuin tlanechikojli otechijlijkej tlen yenkuik yotikasikamatkej niman seki itech kenon titenojnotsaskej. Otechijlijkej ika kanaj sekimej nonisiuiskej itech Jehová sakin ika kipopoloskej Ueyixtika Babilonia. Noijki otechijlijkej ika ipan noviembre de 2023, xok tikteijliskiaj nochi tlen tikchiuaj ijkuak titenojnotsaj. ¿Kijtosneki yejuin ika xok noneki melak matitenojnotsakan? ¡Ka, xyejon kijtosneki!

2. ¿Tleka aman más noneki matitenojnotsakan? (Marcos 13:​10, TNM).

² Aman más noneki matitenojnotsakan. ¿Tleka? Pampa mojmostla uajnonisiuijtiuj ijkuak tlapopoliuis. Ipan Marcos, Jesús otlajto itech tenojnotsalistli ipan itlamiyan tonaltin (xpoua Marcos 13:​10, TNM). b Noijki, ipan Mateo, Jesús okijto ika on “kuajli tlajtoltin” noteijliskia achto “tlapopoliuis” (Mat.  24:​14, TNM). Tlajtojli tlapopoliuis kiteneujtika ijkuak kipopoloskej nochi tlen Satanás kiyekana. Jehová yokitlali “on tonajli niman on hora” ijkuak tlapopolos (Mat. 24:36; 25:13; Hech. 1:7). Kuakon, melak noneki matitenojnotsakan pampa xok ueyi tiempo poliui ijkuak tlapopoliuis (Rom. 13:11).

3. ¿Tleka titenojnotsaj?

³ Melak kuajli tla tinochimej ijkin totlajtoltiaj: ¿tleka titenojnotsaj? Tejuamej titenojnotsaj pampa tikpiyaj se kualtsin kualneskayotl: tlasojtlalistli. Ijkuak titenojnotsaj, tikteititiaj ika tiktlasojtlaj tlen temachtia Biblia, ika tikintlasojtlaj tlaltikpakchanejkej niman ika tiktlasojtlaj Jehová niman itoka. Más matitlajtokan itech yejuin.

TITENOJNOTSAJ PAMPA TIKTLASOJTLAJ TLEN TEMACHTIA BIBLIA

4. ¿Tlenon tikchiuaj ijkuak techijliaj itlaj tlen melak techyolpaktia?

⁴ ¿Kemantika yomitsijlijkaj itlaj tlen melak omitsyolpakti? Kanaj omitsijlijkej ika yonemiko ikonetsin se mochanejkauj noso kanaj omitsmakakej se tekitl tlen melak tiknekiya. Ijkuakon, melak otiyolpak hasta tiknekiya nochimej tikimijlis mochanejkauan niman moamigos. Kanaj noijki ijkon otimomachili ijkuak omitsnojnotskej itech iTekiuajyo toTajtsin.

5. ¿Kenon otimomachili ijkuak kemach timomachtijtoya Biblia? (Noijki xkimita tlaixkopinaltin).

⁵ Noijki xnemili kenon otimomachili ijkuak kemach opeuj timomachtia Biblia. Omitsmachtijkej ika Jehová mitstlasojtla, ika kineki xtekichiuili ipan ikalpan, ika kipopolos nochi tlen xkuajli niman ika ipan yenkuik tlaltikpaktli kinyolitis mochanejkauan akin yomijkej (Mar. 10:​29, 30; Juan 5:​28, 29; Rom. 8:​38, 39; Apoc. 21:​3, 4). Nochi tlen mitsmachtijtoyaj oajsik ipan moyojlo (Luc. 24:32). Tejua opeuj tiktlasojtla tlen temachtia Biblia niman xsan tejua tiknekiya tikmatstos, ika yejon, opeuj tikteijlia (uelis tikitas Jeremías 20:9).

6. ¿Tlenon mitsmachtia tlen inpan opanok Ernest niman Rose?

 ⁶ Matitlajtokan itech tokniuj Ernest. c Ijkuak kipiaya majtlaktli xiuitl, itaj omik. Yejua kijtoua: “Nejua ninotlajtoltiaya: ‘¿Kanon oyaj notaj, oyaj iluikak noso opopoliuj?’. Melak nikinnexikolitaya kokonej akin kipiayaj intaj”. Ernest mojmostla yaya kampa okitokakej itaj, ompa notlakuantelketsaya niman kinotsaya toTajtsin. Yejua ijkin kijliaya: “NoTajtsin, nikneki nikmatis kanon nemi notaj”. Ijkuak kipiaya 27 xiuitl, okijlijkej tla kinekiya nomachtis Biblia niman yejua okinek. Melak oyolpak ijkuak okimachtijkej ika akin yomijkej xtlaj kimatij pampa yejuamej kentla kochtoskiaj niman ika Biblia kijtoua ika oksejpa yoliuiskej (Ecl. 9:​5, 10; Hech. 24:15). ¡Aman yejua ikimatiya tlen nochipa notlajtoltiaya! Yejua melak kuelkakiya nochi tlen nomachtijtoya ipan Biblia. Niman isiuauj, Rose, noijki iuan opeuj nomachtia, niman noijki melak kuelkakiya nochi tlen kinmachtijtoyaj. Niman ipan 1978, onoapolaktijkej. Yejuamej melak yolpakiyaj niman opeuj kinnojnotsaj nochimej inchanejkauan, inamigos niman nochimej akin kinekiyaj kinkakiskej. Hasta aman, Ernest niman Rose yokinpaleuijkej 70 tlaltikpakchanejkej makixmatikan Jehová niman manoapolaktikan.

7. ¿Tlenon panos tla tiktlasojtlaj tlen temachtia Biblia? (Lucas 6:45).

⁷ Tla tiktlasojtlaj tlen temachtia Biblia, nochipa tiknekiskej tikteijliskej tlen ompa yotomachtijkej (xpoua Lucas 6:45). Tejuamej tomachiliaj ijkon ken tokniuan ipan kachtopa siglo akin okijtojkej: “Tejuamej tej, xuelis tikajkauaskej ika tikijtoskej on tlajtlamach yejuan yotikitakej niman yotikakej” (Hech. 4:20). Tejuamej tiknekij nochimej tikinnojnotsaskej pampa melak tiktlasojtlaj tlen temachtia Biblia.

TITENOJNOTSAJ PAMPA TIKINTLASOJTLAJ TLALTIKPAKCHANEJKEJ

8. ¿Tlenon techpaleuiya matitenojnotsakan? (Xkita recuadro “ Xtetlasojtla | Xtemachti”; noijki xkita tlaixkopinajli).

⁸ Tejuamej noijki tikintlasojtlaj tlaltikpakchanejkej ijkon ken Jehová niman Jesús kintlasojtlaj (Prov. 8:31; Juan 3:16). Tejuamej tikimikneliaj akin xkixmatij toTajtsin niman xkimatij tlenon panos ika tlayekapan (Efes. 2:12). Yejuamej kipiyaj miyek tlaueltin niman tejuamej tikpiyaj tlen uelis kinpaleuis: kuajli tlajtoltin itech iTekiuajyo toTajtsin. Tla tejuamej titetlasojtlaj niman titeikneliaj, techpaleuis matokojtilikan nochimej matikinnojnotsakan.  Tlen tikpiyaj yeskia ken se tesoro pampa uelis kinpaleuis mayolpakikan ipan yejuin tonaltin niman makipiyakan se “nemilistli on yejuan melauak nemilistli para nochipa” (1 Tim. 6:19).

9. ¿Tlenon tikimijliaj tlaltikpakchanejkej, niman tleka? (Ezequiel 33:​7, 8).

⁹ Tejuamej techajmana ika sekimej tlaltikpakchanejkej niman sekimej tochanejkauan xkimatij tlenon panos ika tlayekapan, niman pampa tikintlasojtlaj, tejuamej tokojtiliaj tikimijliskej ika sa achijtsin poliui ijkuak tlapopoliuis (xpoua Ezequiel 33:​7, 8). Ipan Mateo 24:​21, kijtoua ika “sanoyej miyek onyas tlajyouilistli ken yejuan xkaman onkaj desde ijkuak opeu in tlaltikpaktli, niman xkaman onyas”. Tiknekij tikimijliskej oksekimej tlen panos ijkuak techyolkuitiskej: kachtopa, kinpopoloskej nochi tlaneltokiltin tlen xmelajkej niman sakin, ipan Armagedón, kipopoloskej nochi tlen kiyekana Satanás (Apoc. 16:​14, 16; 17:​16, 17; 19:​11, 19, 20). Tiktlajtlaniliaj Jehová sanoyej miyekej matechkakikan tlaltikpakchanejkej niman makinekikan touan makitekichiuilikan. San ika ¿tlenon inpan panos akin xkinekij techkakiskej, ken sekimej tochanejkauan?

10. ¿Tleka melak noneki matitenojnotstokan?

¹⁰ Ken otomachtijkej ipan on okse tlamachtijli, kanaj Jehová kinmakixtis akin nopatlaskej ijkuak kitaskej kenon kixoxotoniaj Ueyixtika Babilonia. Ika yejon, melak noneki matitenojnotsakan pampa tlen aman tikimijliaj kanaj yejon tlen kilnamikiskej ika tlayekapan niman kinekiskej kitekichiuiliskej Jehová (uelis tikitas Ezequiel 33:33). Yeuejkaui, ne Filipos nemiya se cárceltlajpixketl akin okinek nomachtis niman kitekichiuilis Jehová ijkuak okitak kenon chikauak otlalolin. Noijki ijkon, miyekej akin aman xkinekij nomachtiskej kanaj kinekiskej nopatlaskej ijkuak kitaskej kenon kixoxotoniaj Ueyixtika Babilonia (Hech. 16:​25-34).

TITENOJNOTSAJ PAMPA TIKTLASOJTLAJ JEHOVÁ NIMAN ITOKA

11. ¿Kenon tikmakaj Jehová “ueyilistli, tetlakaitalistli, niman poder”? (Apocalipsis 4:11; noijki xkimita tlaixkopinaltin).

¹¹ Tejuamej titenojnotsaj pampa melak tiktlasojtlaj Jehová niman itoka. Ijkuak titenojnotsaj, tikueyiteneuaj Jehová. Tikmatstokej ika san Jehová kimelaua kiselis “ueyilistli, tetlakaitalistli, niman poder” (xpoua Apocalipsis 4:11). ¿Kenon tikmakaj Jehová ueyilistli niman tetlakaitalistli? Ijkuak tikteijliaj ika Jehová okichijchiuj nochi tlen onka niman ika yejua otechmakak tonemilis. ¿Niman kenon tikmakaj poder, noso, tokojtilis?  Ijkuak tiktekitiltiaj totiempo, tochikaualis niman tlen tikpiyaj para titenojnotsaskej hasta kampa tiuelij (Mat. 6:33; Luc. 13:24; Col. 3:23). Tejuamej melak tikuelitaj titlajtoskej itech Jehová, akin melak tiktlasojtlaj. Niman noijki tikuelitaj tikteijliskej kenon itoka niman tlenon kijtosneki itoka. ¿Tleka?

12. ¿Kenon tikchipauaj itoka Jehová ijkuak titenojnotsaj?

¹² Pampa melak tiktlasojtlaj Jehová, tiknekij manochipaua itoka (Mat. 6:9). Satanás melak miyek yokijto tlen xkuajli itech Jehová niman melak yokitsojkuiloti itoka (Gén. 3:​1-5; Job 2:4; Juan 8:44). Ika yejon, melak tiknekij titenojnotsaskej niman tikteijliskej tlen melauak itech Jehová. Tiknekij nochimej tikimijliskej ika yejua melak tetlasojtlaj, ika san yejua kimelaua tlayekanas pampa yejua melajki niman ika iTekiuajyo kikixtis nochi tlen xkuajli niman kichiuas matiyolpakikan niman matikpiyakan yolseuilistli (Sal. 37:​10, 11, 29; 1 Juan 4:8). Melak tiyolpakij ijkuak titenojnotsaj pampa tikmatstokej ika tikchiujtokej totekiyo ken iteixpantijkauan Jehová. ¿Tleka?

13. ¿Tleka melak tiyolpakij pampa tiiteixpantijkauan Jehová? (Isaías 43:​10-12).

¹³ Jehová yotechtlapejpeni para tejuamej matiiteixpantijkauan (xpoua Isaías 43:​10-12). Ikipiya seki xiujtin, Grupo akin Tlayekana ijkin okijto ipan se carta: “Melak tiyolpakij pampa totokayotiaj iteixpantijkauan Jehová. Xtlaj onka tlen ueliskia más techyolpaktis”. d Matikonnemilikan yejuin: yakaj otechtlateluili niman noneki yakaj mauiya para makiteijliti ika xmelauak tlen otechijtouilijkej noso otechteneuilijkej. Tejuamej tikijliskiaj mauiya yakaj akin kuajli tikixmatstokej, akin xtekajkayaua niman akin kitlakaitaj niman ijkon makineltokilikan tlen  kijtos. Noijki ijkon, Jehová yotechijli tejuamej matitenojnotsakan pampa kuajli techixmatstok, totech tlaneltoka niman kimatstok ika tikteijliskej ika san yejua toTajtsin akin melauak. Tejuamej melak tiyolpakij pampa yotechtlapejpeni ken tiiteixpantijkauan. Ika yejon, maski san kanon, tikteijliaj kenon itoka niman tikteijliaj ika xmelauak nochi tlen xkuajli yokijtouilijkej. Ijkuak ijkon tikchiuaj, tikteititiaj ika tejuamej tiiteixpantijkauan Jehová (Sal. 83:18; Rom. 10:​13-15).

TIJKAJKAUASKEJ TITENOJNOTSASKEJ HASTA IJKUAK JEHOVÁ TECHIJLIS

14. ¿Tlenon sa tikchiatokej mapano?

¹⁴ ¡Sa tikchiatokej tikitaskej tlen panos ika tlayekapan! Tiktlajtlaniliaj Jehová makinpaleui tlaltikpakchanejkej makinekikan manomachtikan achto peuas ueyi tlajyouilistli. San ika, noijki techyolpaktia ika ipan ueyi tlajyouilistli kanaj sekimej xok kinekiskej kichiuaskej tlen Satanás kineki niman peuaskej touan kiueyiteneuaskej Jehová (Hech. 13:48).

15, 16. ¿Tlen tekitl tikchiujtokej, niman hasta kemanon ijkon tikchiuaskej?

¹⁵ Aman tikchiuaj se tekitl tlen xok keman tikchiuaskej: tikteijliaj kuajli tlajtoltin itech iTekiuajyo toTajtsin ipan nochi tlaltikpaktli. Niman, noijki tikteijliaj ika sa achijtsin poliui ijkuak kipopoloskej nochi tlen Satanás kiyekantika. Ijkuak Jehová teyolkuitis, nochimej kitaskej ika tlen tikteijliayaj ualeuayaj itech Jehová (Ezeq. 38:23).

¹⁶ Tejuamej melak tiktlasojtlaj tlen temachtia Biblia, tikintlasojtlaj tlaltikpakchanejkej niman melak tiktlasojtlaj Jehová niman itoka. Ika yejon, tiknektokej titenojnotsaskej ika nochi toyojlo hasta ijkuak Jehová matechijli: “¡San ijkon!”.