1, 2. a) ¿Tlenon kichiaj kiseliskej itekipanojkauan Jehová? b) ¿Tlenon techpaleuis maka matikixtenpolokan tlen tikchiaj tikseliskej? (Xkita tlaixkopinajli kampa peua tlen tomachtijtokej).

IJKON ken apóstol Pablo, tokniuan tlapejpeniltin ipan yejuin tonajli kichiaj kiseliskej se nemilistli ipan iluikak (Filip. 3:14, TNM). Melak kinekij nemiskej iuan Jesús ipan iTekiuajyo tlen onka iluikak niman san sekan kinpaleuiskej tlaltikpakchanejkej maka sa makipiyakan tlajtlakojli (Apoc. 20:6). ¡Melak kualtsin tlamachialistli yokinmakak Jehová! Okseki borreguitos kipiyaj okse tlamachialistli. Kichiaj kiseliskej nemilistli tlen xkeman tlamis ipan tlaltikpaktli, niman yejuin melak kinyolpaktia (2 Ped. 3:13).

² Pablo kinekiya kinpaleuis mamelajkanemikan ikniuan tlapejpeniltin niman makiselikan tlen kichiaj, ika yejon okimijli: “Xtlanemilikan itech on tlajtlamach yejuan onkaj ne iluikak” (Col. 3:2). Nonekiya nochipa kilnamiktoskej yejon kualtsin tlamachialistli ika kiseliskiaj nemilistli ipan iluikak (Col. 1:4, 5). Maski tla tikchiaj tinemiskej ipan iluikak noso ipan tlaltikpaktli, kuajli matikmatstokan ika titlanemiliskej itech tlateochiualistin tlen Jehová yokijto kinmakas  itekipanojkauan, techpaleuis maka matikixtenpolokan tlen tikchiaj tikseliskej (1 Cor. 9:24).

3. ¿Itech tlenon okimijli Pablo manotlajpiyakan akin kichiuaj ken Cristo?

³ Pablo noijki okimijli imikniuan itech tlenon nonekiya notlajpiyaskej, tlen ueliskia kinkuilis tlen kichiayaj kiseliskej. Se neskayotl, okitlajkuilouili tlanechikojli tlen onkatka Colosas itech akin xmelauak kichiuayaj ken Cristo, akin kiyejyekouayaj nemiskej kuajli ixpan toTajtsin ika kitlakamatiskej Tlanauatijli, xika tlaneltokijli ipan Cristo (Col. 2:16-18). Noijki, okiminojnots itech xkuajli ileuilistin, tlaueltin inuan tokniuan, niman tlen ouijtika kixnamikij familias. Yejuin noijki uelis techijtlakos ipan yejuin tonajli, kuakon tlen okijto Pablo itech yejuin ok melak tepaleuiya. Ika yejon, matikitakan seki tlen okimelajkaijto itech tlen okimijkuilouili colosenses.

4. ¿Tleka xkuajli ileuilistin uelis techkuiliskej tlen tikchiaj tikseliskej?

⁴ Sakin ika okimilnamikti imikniuan kualtsin tlamachialistli tlen kipiayaj, Pablo okijkuilo: “Xpopolokan nochi tlen xkuajli nemotech onkaj yejuan kisa ipan in tlaltikpaktli. Ma ka yakaj ma auilnemi. Xkixtikan nochi on tlen xchipauak ipan nemonemilis. Ma ka xkauilikan nemoeleuilis ma mechyekana, nion ma ka xnejnekikan on yejuan tlen xkuajli, nion ma ka xnekikan nochi nenkimoyaxkatiskej” (Col. 3:5). Xkuajli ileuilistin uelis melak chikauak yeskej niman techkuiliskej tlen patioj tikpiyaj ipan totlaneltokil, ken ika kuajli touikaj iuan Jehová, niman totlamachialis. Se tokniuj akin okinokauili makiyekanakan xkuajli ileuilistin niman akin sakin oksejpa onokuep ipan tlanechikojli, okijto ika yejon ileuilistin melak chikauak katkaj niman okajsik itlamachilis hasta ijkuak nochi yopanoka.

5. ¿Kenon totlajpiyaskej ijkuak itlaj topan panotos tlen uelis kichiuas matikchiuakan tlen xkuajli?

⁵ Melak noneki matotlajpiyakan ijkuak itlaj topan panotos tlen ueliskia kichiuas matiknekikan xtikintlakamatiskej itlanauatiluan Jehová. Se neskayotl, melak tepaleui ika akin yopeujkej kistinemij nimantsin matlajtokan itech tlenon xkichiuaskej ijkuak kinekiskej noititiskej ika notlasojtlaj niman ijkuak kinekiskej san inselti nokauaskej (Prov. 22:3). Akin kichiuaj ken Cristo noijki uelis kixnamikiskej tlen uelis kichiuas makichiuakan tlen xkuajli ijkuak yejuamej uejka nemij itech inchan ipampa intekiyo noso pampa tekitij iuan se tlakatl noso se siuatl (Prov. 2:10-12, 16). Tla kemantika topan nochiua itlaj ken yejuin, matikteijlikan ika tiiteixpantijkauan Jehová, matoyekanakan ken kinamiki niman matikilnamikikan kenon xkuajli tonkisas tla san titeixuetskilijtinemi. Kipiya melak totlajpiyaskej ijkuak tajmantoskej noso ijkuak tomachiliskej xtikojtikej. Ijkuak topan nochiuas yejuin, kanaj melak tiknekiskej yakaj matechititi ika techpatiojkaitaj. Ueliskia melak tiknekiskej yakaj matechyolchikaua niman hasta tikseliskej matechyolseui maski san akinon. Tla kemantika topan panoua itlaj ken yejuin, matiktlajtlanilikan Jehová niman tokniuan matechpaleuikan, niman ijkon xtikchiuaskej itlaj tlen makichiua maka matikselikan tlen tikchiaj (xpoua Salmo 34:18; * Proverbios 13:20). *

6. ¿Tlenon kipiya tikilnamikiskej ijkuak tiktlapejpeniskej tlen ika toyolpaktiskej?

⁶ Techpaleuis matikinpopolokan xkuajli ileuilistin tla tiktlapejpeniaj xtoyolpaktiskej ika tlen kipiya auilnemilistli. Miyek tlen kichijchiuaj tlen ika noyolpaktiaj tlaltikpakchanejkej ipan yejuin tonaltin techilnamiktiaj kalpamej Sodoma niman Gomorra (Jud. 7, TNM). Akin kinyekanaj akin kichijchiuaj yejuin, kisemoyauaj intlanemililuan kampa kiteititiaj ika tiauilnemis xtlajtlakojli niman xmitsyolkokos tla tikchiua. Noneki nochipa matotlajpiyakan niman maka san totoka matikselikan nochi tlen kichijchiuaj ika matoyolpaktikan.  Tla xkuajli tiktlapejpeniaj, uelis tikixtenpoloskej nemilistli tlen tikchiaj tikseliskej (Prov. 4:23).

7. ¿Tlen tlaueltin uelis tikinpiyaskej ipan tlanechikojli?

⁷ Tinochimej tikmachiliaj ika se tlateochiualistli tinemiskej ipan tlanechikojli tlen kiyekana Cristo. Tomachtiskej iTlajtol toTajtsin ipan tlanechikoltin niman topaleuiskej semej iuan oksekimej ika tlasojtlalistli niman teiknelilistli, techpaleuiyaj maka matikixtenpolokan tlen tikchiaj. Maski ijkon, kemantika itlaj tlen xkuajli onasikamat uelis kichiuas maka kuajli manomachilikan tokniuan. Tla xtikinyektlaliaj yejuin tlaueltin, uelis kichiuas matikualantinemikan (xpoua 1 Pedro 3:8, 9).

8, 9. a) ¿Tlen kualneskayomej techpaleuiskej matikselikan tlen tikchiaj? b) ¿Tlenon techpaleuis matikpiyakan yolseuilistli tla se tokniuj techyolkokoua?

⁸ ¿Tlenon uelis tikchiuaskej niman ijkon tlen otechkualani maka matechtsakuili tikseliskej tlen tikchiaj? Pablo okimijli colosenses: “Dios mechtlajsojtla niman yomechtlajpejpenij. Yejua ika, tej, xmopantlantikan ikan teiknelilistli, ikan kuajlilistli, ikan yolyemanilistli, ikan kuajli tenotsalistli itlaj ika, niman ikan ijyouilistli. Xpiakan ijyouilistli iuan oksekimej, niman xmotlapojpoluikan tla yakaj mechtlauelkuitia [...]. On yejuan más ueyi kijtosneki, xmotlajsojtlakan iuan oksekimej, pampa on tetlajsojtlalistli kajxitia nochi in tlajtlamach” (Col. 3:12-14).

⁹ Tlasojtlalistli niman teiknelilistli techpaleuiskej matotlapopoluikan semej iuan oksekimej. Se neskayotl, tla techyolkokoua tlen okijto noso okichiuj se tokniuj, matikyejyekokan tikilnamikiskej ijkuak tejuamej otikijtokej noso otikchiujkej itlaj tlen yakaj okikualani. Yemelak, tiktlasojkamatij intlasojtlalis niman inteiknelilis tokniuan akin otechtlapopoluijkej ijkuak otopopolojkej (xpoua Eclesiastés 7:21, 22). * Niman melak tiktlasojkamatij iueyi teiknelilis Jesús tlen yokiteititi pampa san sekan yokinsentlali akin melauak kiueyichiuaj toTajtsin (Col. 3:15). Tinochimej tiktlasojtlaj sa no yejua toTajtsin, tikteijliaj sa no yejua tlajtoltin niman tikixnamikij sa noijki tlaueltin. Tla tikintlasojtlaj tokniuan, tla tikimikneliaj niman totlapopoluiyaj semej iuan oksekimej, titlapaleuiskej san sekan matinemikan ken ikniujtin, niman tiktejtemoskej tikseliskej nemilistli tlen tikchiaj.

10, 11. a) ¿Tleka melak teijtlakoua nexikojli? b) ¿Kenon xtijkauiliskej nexikojli matechkuili tlen tikchiaj tikseliskej?

¹⁰ Nexikojli uelis kichiuas maka matikselikan tlen tikchiaj. Biblia kipiya neskayomej tlen kiteititiaj ika melak teijtlakoua. Se neskayotl, Caín okinexikolitak ikniuj Abel niman okimikti. Coré, Datán niman Abiram okinexikolitakej Moisés niman okixnamijkej. Niman tekiuaj Saúl okinexikolitak David pampa kuajli onkisaya ipan tlen kichiuaya, niman okiyejyeko kimiktis. Ika yejon, xtechmojkatlachialtia ika Biblia kijtoua: “Yejuan tenexikolitaj niman san kinemiliaj on tlen kuajli para yejuamej, sa no yejuamej xkuajli nouikaj, niman intech onkaj nochi on tlajtlamach tlen xkuajli” (Sant. 3:16).

¹¹ Tla tikiskaltiaj tlasojtlalistli niman teiknelilistli ipan toyojlo xnimantsin titenexikolitaskej. Itlajtol toTajtsin kijtoua: “Tlasojtlalistli teijyouiya niman yolkuajli. Tlasojtlalistli xnexikole” (1 Cor. 13:4). Kipiya tikitaskej tlen panoua ijkon ken kita Jehová niman ijkon xtijkauiliskej ika nexikojli manoneluayoti ipan toyojlo. Noneki tikitaskej tlanechikojli ken se tlalnakayotl kampa san sekan tinemij iuan tokniuan. Yejuin techpaleuis matikinmasikamatikan, ijkon ken kijtouaj yejuin tlajtoltin: “Ijkuak se parte kiselia tetlakaitalistli, nochimej on oksekimej no pakij” (1 Cor. 12:16-18, 26). Kuakon, ijkuak tikitaskej  ika oksekimej kiseliaj tlateochiualistin, xtikinnexikolitaskej, tejuamej inuan tiyolpakiskej. Matitlanemilikan itech Jonatán, se ikoneuj tekiuaj Saúl. Yejua xonoxiko pampa Jehová okitlapejpenijka David matekiuajti sakin. Xsan yejon, Jonatán okititi David tlasojtlalistli niman teiknelilistli, niman okiyolchikauj niman okipaleui (1 Sam. 23:16-18). ¿Uelis tikchiuaskej ijkon ken yejua?

12. ¿Tlen tlajtolyekanalistin itech Biblia uelis kinpaleuis tochanejkauan makiselikan tlen tikchiaj?

¹² Tikintlakamatiskej itlajtolyekanalisuan Biblia kichiuas matikpiyakan yolseuilistli niman pakilistli iuan tochanejkauan, niman techpaleuis matikselikan tlen tikchiaj. ¿Tlenon okimijli Pablo makichiuakan familias ipan amatlajkuilojli tlen okintitlanili colosenses? Okijto: “Siuamej, cada se de nemejuamej xtlakamatikan nemoueuentsin. In yejua noneki nenkichiuaskej pampa nentlaneltokaj itech toTeko. Tlakamej, cada se de nemejuamej xtlajsojtlakan nemosiuau niman ma ka xtetlajtlaueltijkej inuan. Kokonej, nochi ika xkintlakamatikan nemotajuan, pampa in yejua kipaktia toTeko. Tatajtin, ma ka xkinkuajkualanikan nemokoneuan, para ma ka najmanaskej hasta kampa yolajsiskej” (Col. 3:18-21). Kuajli tikmatij ika noijki tiknemiliaj ika yejuin tlajtoltin ok kinpaleuijtika teueuentsintin, tesiuatsitsintin niman tekoneuan ipan yejuin tonajli.

13. ¿Kenon se tokniuj siuatl uelis kichiuas ika iueuentsin makiseli tlen melauak?

¹³ Matiknemilikan ika se tokniuj siuatl kinemilia ika iueuentsin, akin xTeixpantijketl, kichiuilia tlen xkuajli. ¿Kichiuas manoyektlali tlen panotika  tla san kixkoijlijtok tlen kichiua? Niman, maski tla kichiuaskia ika iueuentsin makipatla tlen kichiua, ¿kichiuaskia yejuin makineki kitekichiuilis Jehová? Kanaj xuelis. Yejuin xijkon ontlamis tla yejua kitlakaita pampa yejua akin tlayekana ipan inchan. Ijkon kichiuas ika ichanejkauan manemikan ika yolseuilistli, kiueyichiuas Jehová niman hasta uelis ika iueuentsin kinekis kitekichiuilis toTajtsin. Tla ijkon panoua, kanaj omemej kiseliskej tlen tikchiaj (xpoua 1 Pedro 3:1, 2).

14. ¿Tlenon noneki kichiuas se tokniuj tla isiuauj xkitlakaita?

¹⁴ Matiknemilikan aman ika se tokniuj kinemilia ika isiuauj, akin xTeixpantijketl, xkitlakaita. ¿Kichiuas makitlakaita tla kitsajtsilia niman ijkon kititis akinon tlanauatia? Tikmatstokej ika ka. Jehová kichia ika yejua makixkopina Jesús niman makitlasojtla isiuatsin (Efes. 5:23). Cristo tlanauatia ika tlasojtlalistli niman ika ijyouilistli ipan tlanechikojli (Luc. 9:46-48). Tokniuj akin kixkopina ineskayo Jesús kanaj uelis kichiuas ika isiuatsin noijki makineki kitekichiuilis Jehová.

15. ¿Kenon se tokniuj kititia isiuatsin ika kitlasojtla?

¹⁵ Biblia kimijlia teueuentsitsintin: “Cada se de nemejuamej xtlasojtlakan nemosiuau niman ma ka xtetlajtlaueltijkej inuan” (Col. 3:19). Tokniuj akin kitlasojtla isiuatsin kitlakaita ijkuak kikaki tlenon kinemilia niman kititia ika kitlasojkamati tlen kijtoua (1 Ped. 3:7). Maski xnochipa uelis kichiuas tlen isiuauj kitlajtlanilia, kitlajtoltis tlen kinemilia, kipaleuis kitlapejpenis tlen kuajli (Prov. 15:22). Tlakatl akin kitlasojtla isiuauj xkichiualtia makitlakaita, yejua kinotlanilia. Ijkuak se tokniuj kitlasojtla isiuatsin niman ikoneuan, uelis kichiuas ika makitechiuilikan Jehová ika pakilistli niman makiselikan tlen tikchiaj.

16, 17. Tla titelpochtli noso tiichpochtli, ¿tlenon uelis mitspaleuis maka xmosiaujkaua itech tlen kichiuaj motajuan?

¹⁶ Kanaj titelpochtli noso tiichpochtli akin tiknemilia ika motajuan akin kichiuaj ken Cristo xmitsasikamatij noso nion xitlaj mitskauiliaj xchiua. Kanaj pampa tiajmankamiki, kichiua xometlamati tla yemelak ika tiktekichiuilis Jehová ijkon ken melauak kuajli tijkuis monemilis. San ika, tla tijkaua tlen melauak, nimantsin tikitas ika xakaj ijkon najmana mopampa ken motajuan niman tokniuan ipan tlanechikojli.

¹⁷ Tajtin noneki matemelajkatlalikan. Tla xkeman mitsmelajkatlaliskiaj, ¿xtimotlajtoltiskia tla yemelak najmanaj mopampa? (Heb. 12:8). San ika, kanaj tlen xtikuelita yejua kenon mitsmelajkatlaliaj. Maka san xtlanemili itech kenon mitsmelajkatlaliaj, xyejyeko xkasikamati ika onka tlen ika ijkon kichiuaj. Ika yejon, xmoyolseui niman xmokojtili tikteltis tlen tikmachilia. Biblia kijtoua: “Se tlakatl akin tlaixmatki kinteltia itlajtoluan, niman se tlakatl akin tlamachilise xnimantsin kualani” (Prov. 17:27). Xtejtemo timochiuas yakaj akin tlamachilise, akin ika iyojlo ueli kiselia ijkuak kimelajkanotsaj, niman ueli itech nopaleuiya niman xkajmana kenon okijlikej (Prov. 1:8). Tikpiyas motajuan akin tlaneltokaj itech Cristo niman melauak kitlasojtlaj Jehová miyek ken mitspaleuiya. Kuajli xmatsto ika yejuamej kinekij mitspaleuiskej xseli nemilistli tlen tikchiaj.

18. ¿Tleka kuajli yotikijto ika xkeman tikixtenpolos tlen tikchiaj tikseliskej?

¹⁸ Tinochimej uelis tikseliskej tlen melak kualtsin tikchiaj: nemilistli kampa xuelis timikis ipan iluikak, noso nemilistli tlen xkeman tlamis ipan Xochitlalpan. Yejuin tlamachialistli melauak nochiuas, pampa ualeua itech tlen yokijto kichiuas akin otexchijchiuj. Itech nemilistli ipan Xochitlalpan yejua kijtoua: “Tlaltikpaktli melauak temis ika itlaixmatilis Jehová” (Is. 11:9). Ijkuakon, nochimej akin nemiskej ipan tlaltikpaktli toTajtsin kinmachtis. Melak kuajli tla tokojtiliaj tikseliskej tlen tikchiaj. Ika yejon, maka matikixtenpolokan tlen yokijto Jehová techmakas. Maka itlaj matechkuili tlen tikchiaj tikseliskej.